• BƐWOLE YE: 1963

• MAANLE MƆƆ ƆVI NU: BRITAIN

• Ɔ NWO EDWƐKƐ: ƐNEE MELƐ GYIMA KPALƐ

ME ƐBƐLA DƐBA NE:

Bɛwole me wɔ Croydon mɔɔ wɔ South London la na ɛnee yɛle ngɔnla, medame a metɔ zo nsia wɔ abusua ne anu a. Me awovolɛ vi Caribbean bɔra ne mɔɔ bɛfɛlɛ ye St. Vincent la azo. Ɛnee me mame kɔ Metɔdise. Ɛnee melɛ ɛhulolɛ kpole kɛ mebazukoa ninyɛne dɔɔnwo noko ɛnee me nye ɛnlie kɛ mebazukoa Nyamenle anwo debie. Ɛnee saa yɛmaa adenle a, meta mekenga mbuluku mɔɔ melie mevi mbulukuzielɛleka ne la wɔ azule tandane bie anloa.

Menwiele sukulu la anzi, menzile kpɔkɛ kɛ mebaboa menli mɔɔ bɛ nwo yɛ anwunvɔne la. Membɔle ɔ bo kɛ meyɛ gyima meaboa bɛdabɛ mɔɔ bɛnlɛ ɛleka bɛnla, wuliravolɛma nee bɛdabɛ mɔɔ bɛlɛ debiezukoalɛ nwo ngyegyelɛ la. Akee mengɔle yunivɛsiti na menzukoale ndenle bie mɔ mɔɔ bɛdua zo bɛyɛ ayile la anwo debie. Menwiele la, menyianle gyima kpalɛ nee dibilɛ na ɛnee melɛ anwonyia dɔɔnwo. Debie mɔɔ ɛnee mehyia nwo na meahola meayɛ me gyima ne la ala a le kɔmpita yɛɛ Yintanɛte. Mefa anwumalɛne metu adenle mekɔdi dapɛne bie mɔ wɔ hotɛle mɔɔ me nye die nwo na ɛkɛ ne le kɛnlɛma la anu. Mekɔ ɛleka mɔɔ bɛkpundikpundi agbɔkɛ nu na bɛnyia kpɔkɛdelɛ kpalɛ la. Ɛnee debie biala ɛlɛkɔ boɛ amaa me. Noko ɛnee medwenle menli mɔɔ bɛ nwo yɛ anwunvɔne la anwo.

KƐZI BAEBOLO NE HAKYILE ME ƐBƐLABƆLƐ LA:

Wɔ ɛvolɛ dɔɔnwo anu membizale me nwo kɛ, ‘Duzu ati a bɛbɔle yɛ a?’ Noko meamkpondɛ mualɛ ne wɔ Baebolo ne anu. Kenle ko bie wɔ 1999, me diema raalɛ ekyi ne, Margaret mɔɔ ɛnee yerayɛ Gyihova Dasevolɛ la nee ɔ gɔnwo Dasevolɛ raalɛ bie mɔɔ hilele kɛ ɔdwenle me nwo la rakpɔlale me. Menzile kpɔkɛ kɛ me nee me diema raalɛ ne agɔnwo ne bazukoa Baebolo ne, noko meannyia anyuhɔlɛ kpalɛ biala ɔluakɛ ɛnee me gyima nee me ɛbɛlabɔlɛ ne die me mekɛ dɔɔnwo.

Wɔ 2002 wawaa mekɛ nu, mendule mengɔle England nyiakɛ adɔleɛ. Mendoale me nwomazukoalɛ ne azo wɔ yunivɛsiti amaa meanyia amodinli kɛlata kpole. Membɔle ɔ bo kɛ me nee me ra nrenyia ekyi ne kɔ Belemgbunlililɛ Asalo mɔɔ wɔ ɛkɛ la dahuu. Ɛnee me nye die nwoma kpole ɛzukoalɛ nwo, noko ɛnee Baebolo ne mɔɔ melɛsukoa la a ɛlɛmaa meade ngyegyelɛ mɔɔ yɛyia ye la abo na meanwu bɛ sɔbelɛ a. Menwunle nɔhalɛ edwɛkɛ mɔɔ wɔ Mateyu 6:24 mɔɔ ka kɛ ɛnrɛhola ɛnrɛzonle menlenlɛ nwiɔ la. Ɔwɔ kɛ ɛkpa ko, Nyamenle anzɛɛ anwonyia. Menwunle kɛ ɔwɔ kɛ mesi mɔɔ anwo hyia me wɔ me ɛbɛlabɔlɛ nu la anwo kpɔkɛ.

Wɔ ɛvolɛ mɔɔ ɛnee ɛpɛ nu la anu, ɛnee meta me nee Alasevolɛ bie mɔ yia nu sukoa Is There a Creator Who Cares About You? * buluku ne. Menwunle kɛ yɛ Bɔvolɛ Gyihova angomekye a lɛ alesama ngyegyelɛ ne sɔbelɛ. Noko wɔ yunivɛsiti ɛkɛ ne ɛnee bɛkilehile kɛ yɛngyia Bɔvolɛ biala anwo. Ɛhye hanle me ɛya. Wɔ siane nwiɔ anzi, menvile yunivɛsiti ɛkɛ na menzile kpɔkɛ kɛ mefa mekɛ dɔɔnwo meahwe meabikye Nyamenle.

Edwɛkɛ mɔɔ wɔ Mrɛlɛbulɛ 3:5, 6 la a boale me maanle menyɛle nzenzaleɛ a: “Fi wɔ ahonle muala anu fa ɛ nwo to Gyihova anwo zo, na mmafa ɛ nwo ɛto wɔ ndelebɛbo zo. Nwu ye wɔ wɔ ndenle kɔsɔɔti anu, na ɔbamaa wɔ ndenle adenrɛ fɔɔnwo.” Ɛnee nvasoɛ wɔ yɛ ɛlɔlɛ Nyamenle ne anwo debie mɔɔ melɛsukoa la azo tɛla anwonyia nee dibilɛ mɔɔ amodinli kɛlata bamaa meanyia la. Mɔɔ melɛsukoa bodane mɔɔ Gyihova lɛ maa azɛlɛ ne nee kɛzi Gyisɛse vale ye ngoane bɔle afɔle maanle yɛ anwo debie la ɛnee ɛhulolɛ mɔɔ melɛ kɛ meyila me nwo zo meamaa yɛ Bɔvolɛ ne la ɛlɛyɛ kpole. Bɛzɔnenle me wɔ April 2003. Yemɔ anzi mentetele ninyɛne zo ngyikyingyikyi.

KƐZI YEBOA ME LA:

Agɔnwolɛvalɛ mɔɔ me nee Gyihova lɛ la sonle bolɛ tɛla debie biala. Gyihova mɔɔ menwu ye la ɛmaa menyia ahunlundwolɛ nee anyelielɛ. Eza Nyamenle nɔhalɛ azonvolɛ mɔɔ me nee bɛ tu la maa me nye die kpalɛ.

Ninyɛne mɔɔ mesukoa ye Baebolo ne anu nee Kilisiene ayia bo la ɛlɛdi ɛhulolɛ mɔɔ melɛ kɛ mesukoa ninyɛne dɔɔnwo la anwo gyima. Me nye die kɛ mebaha me diedi ne anwo edwɛkɛ meahile awie mɔ. Ɛhye ɛrayɛ me gyima na ɔmaa mekola meboa awie mɔ memaa bɛnyia ɛbɛlabɔlɛ kpalɛ ɛnɛ nee anyelazo kɛ bɛbadɛnla aze wɔ ewiade fofolɛ ne anu. Meyɛ dahuu ɛzonlenlɛ gyima ne bie ɔvi June 2008 mɔɔ ba la, na me nye die yɛɛ me kunlu dwo me nwo tɛla mekɛ biala. Menwu deɛmɔti bɛbɔle yɛ la na meyɛ Gyihova mo kpalɛ wɔ ɛhye anwo.