Nwane mɔ a Le Gyihova Alasevolɛ?

Gyihova Alasevolɛ anwo edwɛkɛ boni a ɛze ye a? Bie mɔ fɛlɛ bɛ menli mɔɔ twe awie mɔ kɔ bɛ ɛzonlenlɛ nu, ɛzonlenlɛ fofolɛ, Keleseɛne eku mɔɔ ɛde ɔ nwo na Dwuuma diedi ɛli bɛ adwenle, anzɛɛ kyengyema mɔɔ kpo ayileyɛlɛ. Noko akee, Alasevolɛ ne mɔ ɛnle ɛhye mɔ biala. Duzu ati a menli fɛlɛ bɛ zɛhae a? Fane dɔɔnwo ne ala ɔlua bɛ nwo edwɛkɛ mɔɔ ɛnle nɔhalɛ mɔɔ menli ɛde la ati ɔ.

Kɛmɔ bɛ duma ne kile la, Gyihova Alasevolɛ di Gyihova anwo daselɛ. Gyihova a le nwane? Wɔ aneɛ mɔɔ bɛvale bɛhɛlɛle Baebolo ne la anu, Gyihova (Hibulu יהוה, YHWH) a le duma mɔɔ Nyamenle Bedevinli ne fa fɛlɛ ɔ nwo a. * Ɔle ye duma, na ɔnle kɛ amodinli Nyamenle anzɛɛ Awulae. Yɛbahola yɛaha kɛ, ɔvi tete ne toonwo mɔɔ ba la, awie biala mɔɔ di Nyamenle anyunlunyia ne anwo daselɛ la le Gyihova dasevolɛ.—Adendulɛ 3:13, 15; Ayezaya 43:10, NW.

Yemɔti Baebolo ne fɛlɛ nɔhavoma mɔɔ dɛnlanle aze, ɛbɔ ye Ebɛle anwo zo toonwo mɔɔ ba la kɛ “dasevolɛma pemgbenleamgbe.” (Hibuluma 11:4; 12:1) Bɛha bɛ nuhua bie mɔ mɔɔ le kɛ Nowa, Ebileham, Ayezeke, Gyekɔbo, Dwosefi, Mosisi, nee Devidi anwo edwɛkɛ kɛ Nyamenle alasevolɛ—Gyihova alasevolɛ. Bɛfɛlɛ Gyisɛse Kelaese “nɔhalɛ dasevolɛ ne.”—Yekile 3:14.

Duzu Ati a Alasevolɛ nwo Hyia A?

Baebolo ne kile kɛ bɛbɔle sonla mɔɔ ɛnee ɔdi munli na bɛvale ye bɛdɛnlanle paladaese. Bɔvolɛ ne bɔle ye mɔɔ ɔbahola yeadɛnla aze dahuu, yeawo mralɛ na yeamaa ye Paladaese awuke ne adɛlɛ azɛlɛ ye azo amuala. Zɔhane mekɛ ne ɛnee sonla ze ye Nyamenle ne, yemɔti ɛnee alasevolɛ nwo ɛngyia.—Mɔlebɛbo 1:27, 28.

Nyamenle manle sonla adenle kɛ ɔkpa mɔɔ ɔkulo, noko yɛ awovolɛ mɔɔ lumua la bɔle kpɔkɛ ɛtane. Bɛzile kpɔkɛ kɛ bɛdi bɛ ti anwo. Ɛhye ati, ɔwɔ nuhua kɛ Nyamenle ɛtɛkakyile, ɔdi munli, ɔle pɛlepɛle yɛɛ ɔ nwo te ɛdeɛ, noko alesama mɔɔ wɔ azɛlɛ ye azo la le ɛtanevolɛma na bɛndenrɛ. Noko akee, yɛ Nyamenle nwuanzanwuanza ne bamaa ɛtane nee amumuyɛyɛlɛ nwo adenle mekɛ ezinra bie ala. Baebolo ne kile kɛ yɛbikye mekɛ zɔhane awieleɛ. Amaa alesama anwu ɛhye la, Nyamenle ɛva ye Edwɛkɛ ne—Torah ne, Edwɛndolɛ, yɛɛ Edwɛkpa ne—ɛzie toonwo yeradwu yɛ mekɛ ye azo.

Ɔluakɛ menli dɔɔnwo ɛnze Nyamenle la ati, yemaa adenle kɛ alesama mɔɔ die ye di la ɛli ɔ nwo daselɛ. Ɔfɛlɛ diedima ɛhye mɔ kɛ: “Bɛle me alasevolɛ.” (Ayezaya 43:10) Na ɔka gyima mɔɔ bɛyɛ la anwo edwɛkɛ kɛ: ‘Bɛbabɔ Edwɛkpa ɛhye mɔɔ fane Anwuma Belemgbunlililɛ ne anwo la nolo wɔ aleɛabo amuala, amaa yeayɛ daselɛlilɛ yeamaa aleɛabo amra kolaa na awieleɛ ne ara.’—Mateyu 24:14.

Ɛnɛ, menli dɔɔnwo mɔɔ vi mbusua, aneɛ, nee maanle ngakyile nu la ɛlɛfa ahonle kpalɛ azukoa Nyamenle Edwɛkɛ ne. Bɛnwu kɛ ɛzonlenlɛ nu amaamuo dɔɔnwo vi awozonle ɛzonlenlɛ nu na bɛnzɔ Nyamenle anye.

Kɛmɔ bie a wɔnwu ye la, bie mɔ ɛva ɛzonlenlɛ ɛyɛ gualilɛ. Bie mɔ noko ɛlɛfa ali bɛ maanyɛlɛ nu atiakunlukpɔkɛ nwo gyima anzɛɛ bɛlɛdua zo bɛasisi ehyiavolɛma bɛava bɛanyia bɛ nwo. Saa menli zɛhae mɔ te kɛ awie ɛlɛdi Nyamenle anwo daselɛ nɔhalɛ nu a, ɛnea a kɛzi ɔka bɛ ɛ? Nɔhalɛ nu, bɛ ahonle tu. Deɛ mɔɔ ɔti menli ka Gyihova Alasevolɛ anwo edwɛkɛ ɛtane la ko ɛne.

Gyihova Alasevolɛ ne mɔ di edwɛkɛ mɔɔ Baebolo ne ka la azo mɔɔ bɛnzulo mɔɔ awie mɔ bava ayɛ bɛ a. Bɛtɛbɔle ɛzonlenlɛ fofolɛ bo. Edwɛkɛ mɔɔ nɔhalɛ ɛzonlenlɛ gyi zo mɔɔ wɔ Torah ne, Edwɛndolɛ, yɛɛ Edwɛkpa ne anu la azo a bɛdi a. Ɛnee duzu a bɛdie bɛdi a? Bɛ ngilehilelɛ ne mɔ bie a wɔ ɔ bo ɛke la. Kenga na nea kɛ ɛhye le nɔhalɛ anzɛɛ ɔnle nɔhalɛ a.

Bɛnlie Nsa-Ko Bɛnli

Baebolo ne ɛngilehile kɛ Nyamenle le nsa-ko. Emomu, ɔkile kɛ nɔhalɛ Nyamenle kokye mɔɔ le damɛnlangoate la a wɔ ɛkɛ a. ‘Gyihova yɛ Nyamenle ne le Gyihova kokye ala.’ (Mɛla ne 6:4) Yemɔ a le Bɔvolɛ ne—damɛnlangoate, tumivolɛ bedevinli mɔɔ awie nee ye ɛnzɛ a. Gyisɛse ɛnle Nyamenle Tumivolɛ Bedevinli. Gyisɛse dɛnlanle azɛlɛ ye azo kɛ sonla mɔɔ di munli na ɔwule ɔmanle alesama mɔɔ ɛnli munli la. Gyihova liele Gyisɛse ngoane ne kɛ ɛkpɔnedeɛ, yemɔti ɔlua ɔ nwo zo a bɛbalie menli mɔɔ di nɔhalɛ la ngoane a. Ɛhye a le Nyamenle ɛhulolɛdeɛ a.—Luku 22:42; Wulomuma 5:12.

Bɛnlie Ɛkɛla Mɔɔ Ɛnwu la Bɛnli

Saa yɛwu a duzu a ba yɛ nwo zo a? Nyamenle Edwɛkɛ ne se: “Anyewɔzoamra ze kɛ bɛbawu, na mɔwuamra ɛnze ɛhwee.” (Nolobɔvo ne 9:5) Sonla ɛnlɛ ɛkɛla mɔɔ ɛnwu ɛlɛ a. Menli mɔɔ suzu kɛ bɛ nee mɔwuamra ɛlɛtendɛ la nee sunsum evinli a ɛlɛdi ngitanwo a. Zɔhane ala yɛɛ asɔne mɔɔ bɛyɛ bɛmaa mɔwuamra la ɛmboa bɛ na emomu ɛsɔfo ne mɔ mɔɔ die nwolɛ ezukoa di la a nyia zolɛ nvasoɛ a.

Ewudwazo

Alesama anyelazo a le kɛ mɔwuamra badwazo ara azɛlɛ ne mɔɔ bɛbayɛ ye Paladaese la azo. Bɛdabɛ mɔɔ bɛsonle Nyamenle nɔhalɛ nu la banyia nyilalɛ. Bɛdabɛ noko mɔɔ bɛannwu Nyamenle na bɛawu la bɛanyia adenle azukoa ɔ nwo debie wɔ zɔhane mekɛ ne anu. Yemɔti, “ɛtanevolɛma nee kpalɛyɛlɛma badwazo ara ngoane nu.” (Gyima ne 24:15) Menli mɔɔ Nyamenle bu bɛ kɛ bɛnfɛta la ala a bɛnrɛdwazo bɛ a.

Bɛnlie Hellsenle Bɛnli

Nyamenle mɔɔ lɛ ɛlɔlɛ la ɛnrɛyɛ ɛleka mɔɔ bɛkile mɔwuamra nyane dahuu a. Nyamenle mumua ne hanle menli mɔɔ bɛyela bɛ senle nu la anwo edwɛkɛ kɛ: “Meanze bɛ kɛ bɛyɛ ɛhye, yɛɛ ɔtɛbale me adwenle nu bɔbɔ.”—Gyɛlɛmaya 7:31.

 Nyamenle Ɛngyehyɛ Mɔɔ Bado Sonla La

Nyamenle ɛngɛlɛ debie biala wɔ menli nwoma azo. Debie biala ɛnle ɛkɛ mɔɔ kile mɔɔ yɛbayɛ ye kenlebie kolaa na bɛawo yɛ a. Yɛdayɛ mumua ne a yɛdi debie biala mɔɔ yɛbayɛ la anwo ɛzonle a. “Yɛ nuhua ko biala babu ye mgbonda ahile Nyamenle.”—Wulomuma 14:12.

Bɛnlɛ Ɛsɔfo Eku

Awie biala mɔɔ ɛyila ɔ nwo zo ɛmaa Nyamenle la sonle bolɛ maa Ye. Nɔhalɛ azonvolɛ kɔsɔɔti le mediema mrenya nee mraalɛ. Nyamenle ɛtɛkpale ɛsɔfo eku bie mɔɔ kpogya a. Gyisɛse hanle kɛ: “Awie biala mɔɔ memaa ɔ nwo zo la Nyamenle bɛlɛ ye aze, yɛɛ mɔɔ bɛlɛ ɔ nwo aze la Nyamenle kpogya ye zo.” (Luku 18:14) Nyamenle badua bɛdabɛ mɔɔ bɛdua ɛzonlenlɛ zo bɛmemaa bɛ nwo zo la kakɛ soo.—Mateyu 23:4-12.

Bɛnzonle Ananze

“Nyamenle le Sunsum, yemɔti ɔwɔ kɛ bɛdabɛ mɔɔ bɛsonle ye la bɛsonle ye wɔ sunsum nu nee nɔhalɛ nu.” (Dwɔn 4:24) Nɔhalɛ ɛzonlenlɛma ɛnva ananze ɛnli gyima wɔ bɛ ɛzonlenlɛ nu.

Bɛnle Afoa Biala wɔ Maanyɛlɛ Nu

Gyisɛse hanle kɛ ye ɛdoavolɛ ne mɔ ‘ɛnle ewiade ne ɛdeɛ.’ (Dwɔn 17:16) Ɛhye ati, Gyihova Alasevolɛ ɛnva bɛ nwo ɛnwulowula maanyɛlɛ nu. Bieko, bɛdi mɛla zo.—Wulomuma 13:1, 5-7.

Ɛbɛlabɔlɛ Kpalɛ nwo Ngyinlazo

Mekɛ mɔɔ Gyisɛse kile mɔɔ bamaa menli anwu nɔhalɛ azonvolɛ la, ɔhanle kɛ: “Me mɛla ne a le ɛhye: Bɛhulo bɛ nwo ngoko ngoko, kɛmɔ mehulo bɛ la.” (Dwɔn 15:12, 13) Baebolo ne eza ka kɛ: “Nyamenle Sunsum ne ma a le ɛhye mɔ: ɛhulolɛ, anyelielɛ, anzonudwolɛ, abotane, atiakunlukɛnlɛmayɛlɛ, kpalɛyɛlɛ, nɔhalɛlilɛ, mɛlɛbɛnwoaze, yɛɛ bɛ nwo zo ɛhomolɛ.” (Galeehyeama 5:22, 23) Menli mɔɔ da subane ɛhye mɔ ali la ɛmbɔ adalɛ, bɛnwua, bɛndo kyakya, bɛnno nyile ɛtane ɛtane, anzɛɛ bɛnva bɛ nwo bɛnwula nla nu ɛbɛlatane ɛbɔlɛ nu. (Ɛfɛsɛsema 4:25-28) Bɛkulo Nyamenle, yemɔti bɛkpo ninyɛne mɔɔ Nyamenle kyi la. Ngyinlazo ɛhye mɔ a Gyihova Alasevolɛ ɛbɛlabɔlɛ gyi zo a.

Ewiade Ɛhye Awieleɛ Ɛbikye

Duzu a maa yɛ mekɛ ye yɛ ngakyile fi mɔɔ ɛha la anwo a? Baebolo ngapezo mɔɔ ɛra nu la kile kɛ yɛde ewiade ɛtane ɛhye awieleɛ mekɛ nu. (Daneɛle 2:44) Ɛnɛ, ɔwɔ kɛ yɛbiza yɛ nwo kɛ, Asoo ninyɛne mɔɔ yɛyɛ la sɔ Nyamenle anye? Nyamenle le kokye, yemɔti nɔhalɛ ɛzonlenlɛ ko ala a wɔ ɛkɛ a. Ɛzonlenlɛ ɛhye di edwɛkɛ mɔɔ wɔ Torah ne, Edwɛndolɛ, yɛɛ Edwɛkpa ne anu la azo. Ɛhye ati, ɔwɔ kɛ yɛneɛnlea zɔhane Edwɛkɛ ne anu.

Ɛhye a Gyihova Alasevolɛ yɛ a. Ɔnvane nwolɛ ɛzonlenlɛ biala mɔɔ ɛwɔ nu la, ɔwɔ kɛ ɛdawɔ noko ɛyɛ zɔ. Awie biala ɛnrɛhola ɛnrɛzi ɛhye anwo kpɔkɛ ɛnrɛmaa wɔ. Kakye kɛ: “Yɛ nuhua ko biala babu ye mgbonda ahile Nyamenle.”—Wulomuma 14:12.

Awie biala ɛnle ɛkɛ mɔɔ bɛkawo ye la ɛnee ɔle Gyihova Dasevolɛ a. Dasevolɛ ko biala si ɔ ti anwo kpɔkɛ. Saa awie sukoa Nyamenle Edwɛkɛ ne na ɔnwu nɔhalɛ ne a, ɔgyinla zo ɔyila ɔ nwo zo ɔmaa nɔhalɛ Nyamenle ne mɔɔ bɛfɛlɛ ye Gyihova la. Saa ɛbahulo kɛ ɛdawɔ noko ɛyɛ neɛnleanu zɔhane bie a, ɛnee fa ɔ bo ɛke address ne mɔɔ fɛta la kɛlɛ Jehovah’s Witnesses.

[Ɔ bo ɛkɛ ne edwɛkɛ]