Duzu a ɔwɔ kɛ ɛyɛ a?

50 Asoo ɛkulo kɛ ɛtɛnla aze dahuu wɔ zɔhane paladaese kɛnlɛma ne anu ɔ?

Ɛnee sukoa dɔɔnwo fale mɔɔ Nyamenle ɛha la anwo.

Bɔ mɔdenle sukoa kɛ ɛbagenga Bible ne.—John 17:3; Yekile 1:3

51 Sukoa Jesus anwo debie dɔɔnwo.—Deuteronomy 18:18, 19; John 3:16; Gyima 3:19-23

52 Bɔ mɔdenle yɛ ninyɛne mgbalɛ ala, na yɛ tieyɛ maa Jehovah.—Romema 6:17, 18, 22

 53 Kakye kɛ, Jehovah se ɔnle kɛ yɛku menli.—Exodus 20:13; 1 John 3:11, 12

54 Ɔnle kɛ yɛfa awie mɔ debie.—Exodus 20:15; Ephesusma 4:28

55 Ɔnle kɛ nrenya nee raalɛ tɛnla na ɔ nee ye da kyesɛ ɔle ɔ ye.—Exodus 20:14, 17; 1 Thessalonicama 4:3

56 Asoo ɛkakye mraalɛ dodo mɔɔ Nyamenle maa adenle maa nrenya gya la ɔ? Mekɛ tendenle nyɛ yɛ ɔwɔ kɛ nrenya nee ɔ ye tɛnla a?—Genesis 2:22, 24; Matthew 19:5, 6; 1 Corinthma 7:2, 10, 11

 57 Eza, kakye kɛ, ɔwɔ kɛ yɛsonle Jehovah angome kye.—Matthew 4:10; 1 Corinthma 8:6

58 Aboduaba nee ananze ne mɔ ɛngola ɛmboa yɛ. Duzu ati ɔ?—1 Corinthma 8:4

Asoo ɔle kpalɛ kɛ yɛkɛnyia aboduaba ɔ?—Deuteronomy 27:15; 1 John 5:21

59 Duzu ati a ɔle ɛtane kɛ yɛkɛnyia debie mɔɔ bɛfa bɛkye sili anzɛɛ yɛkɛdu ayile ɛ?—Deuteronomy 18:10-13; Yekile 21:8

60 Anwumabɔvolɛ ɛtane ne mɔ anzɛɛ sunsum evinli ne mɔ dele atua tiale Nyamenle. Bɛdua munzulebɔlɛma anwo zo bɛbɛlɛbɛla menli.—Gyima 16:16

 61 Ɔwɔ kɛ yɛsɛlɛ Nyamenle. Asɔneyɛlɛ kile kɛ yɛtendɛ yɛahile Nyamenle, yɛaha yɛahile ye kɛ yɛkulo kɛ yɛsonle ye, na yɛazɛlɛ ye ɛkɛ ne moalɛ.—Philippima 4:6, 7

62 Ɔwɔ kɛ yɛtie Jesus na yɛnyia diedi wɔ ye nu.—Hebrewma 5:9; John 3:16

63 Kakye kɛ ɔwule, ɔliele yɛ ngoane.—Romema 5:8

 64 Kakye kɛ Jesus a le yɛ belemgbunli mɔɔ ɛnyelɛ ɛnnwu ye a. Ɔwɔ kɛ yɛtie ye.—Philippima 2:9-11; Yekile 19:16

 65 Jesus hanle kɛ ɔwɔ kɛ ɛka ninyɛne mgbalɛ ne mɔɔ ɛlɛsukoa la anwo edwɛkɛ ɛkile menli gyɛne, na bɛdabɛ mɔɔ bɛkpondɛ kɛ bɛsonle Nyamenle la ɔwɔ kɛ bɛsɔne bɛ.—Matthew 28:19, 20; John 4:7-15

66 Yemɔti ɛbahola wɔaha ninyɛne mgbalɛ ɛhye mɔ anwo edwɛkɛ wɔahile ɛ gɔnwo mɔ.—Matthew 10:32

67 Saa ɛnwu kenga kpalɛ a, ɛbahola wɔazukoa ninyɛne dɔɔnwo, na wɔahola wɔaboa menli gyɛne kpalɛ kpalɛ.—2 Timothy 2:15

 68 Jesus eza hilehilele ngakula ngyikyi kɛ bɛdie Nyamenle. Mekɛ biala amba mɔɔ yeanyia alagye ɔnle bɛ andendɛ a.—Matthew 19:13-15

69 Ɔwɔ kɛ awovolɛ dahuu kilehile bɛ mra maa bɛtie Nyamenle na bɛanyia ɛlɔlɛ bɛamaa ye.—Deuteronomy 6:6, 7; Mrɛlɛbulɛ 6:20-22; Ephesusma 6:4

70 Asɔne ngakyile dɔɔnwo wɔ ɛkɛ. Bɛ ngilehilelɛ ne mɔ dɔɔnwo ɛnvi Bible ne anu. Jehovah ka kile yɛ kɛ, yɛvi ɛzonlelɛ ne mɔ mɔɔ ɛngilehile nɔhalɛ ne la anu.—Yekile 18:4; John 4:23, 24

 71 Jehovah lɛ menli wɔ azɛlɛ ye azo mɔɔ bɛbahola bɛahilehile wɔ ɔ nwo debie dɔɔnwo a. Asoo ɛze bɛ menli holɛ ko ɔ?—Gyima 15:14; Romema 10:14, 15

72 Bɛmɛ a le Jehovah Dasevolɛma. Bɛlɛ anzondwolɛ wɔ bɛ avinli. Ɛze deɛmɔti ɔ? Bɛdodɔ bɛ nwo bɛ nwo la ati ɔ.

—Isaiah 43:10-12; John 13:34, 35

73 Eza bɛlɛ ɛlɔlɛ bɛmaa Jehovah la ati, bɛzɔne bɛ. Ɛhye a le adenle mɔɔ bɛdua zo bɛda ye ali bagua nu kɛ, bɛgyakyi bɛ ɛbɛla ɛtane ne mɔ, na bɛkulo kɛ bɛfa bɛ mekɛ bɛsonle Nyamenle.—Gyima 2:41

 74 Jehovah Dasevolɛma anye la kɛ bɛbadɛnla paladaese fofolɛ kɛnlɛma ne anu.—Edwɛndolɛ 37:9-11, 29

Duzu a ɛbahola wɔayɛ amaa ɛnee bɛ abɔ nu adɛnla ɛkɛ a?—James 1:22, 25; 2:20-26

75 Boka bɛ bɛzukoa bɛzonle Jehovah. Bɛlɛ ɛlɔlɛ nee tieyɛ bɛmaa Jehovah nee Christ Jesus. Ɛlɛ ɛlɔlɛ ɛmaa bɛ ɔ? Ɛbahulo kɛ ɛbaboa menli gyɛne wɔamaa bɛanwu Nyamenle anwo debie ɔ?—John 6:45-47

 76 Jehovah nee Christ Jesus lɛ ɛlɔlɛ maa wɔ na bɛkpondɛ kɛ ɛtɛnla aze dahuu wɔ paladaese.—John 3:16

Mɔɔ wɔzukoa wɔvi nvoninli ngakyile nee edwɛkɛ mɔɔ wɔ buluku ekyi ɛhye anu mɔɔ wɔzuzu nwo la ɛmaa wɔnyia ɛhulolɛ kɛ ɛbanyia azedɛnlalɛ nu anyelielɛ wɔ azɛlɛ ye azo dahuu. Saa ɛbahulo kɛ ɛbazukoa dɔɔnwo wɔavale ɛhye anwo a, yɛsuzu kɛ ɛ nee Jehovah Dasevolɛma mɔɔ wɔ ɛleka mɔɔ ɛwɔ la anu ko ɛdendɛ. Anzɛɛ ɛbahola wɔahɛlɛ, anzɛɛ maa awie ɛva ɔfese mɔɔ bikye ɛleka mɔɔ ɛde la, kɛmɔ bɛhile wɔ adelɛse ngakyile mɔɔ wɔ buluku ekyi ɛhye mukɛleɛ nwiɔ ne la ɛhɛlɛ ɛmaa wɔ.