Ahenle Mɔɔ Ngapezoma ne mɔ Amuala Lile Ɔ Nwo Daselɛ
Tile 4
Ahenle Mɔɔ Ngapezoma ne mɔ Amuala Lile Ɔ Nwo Daselɛ
1. Duzu a Gyisɛse anwo edwɛkɛ mɔɔ fane mekɛ mɔɔ ɛnee ɔtɛbayɛle dasanli la maa yɛnwu ye wɔ abusuabɔlɛ mɔɔ ɔ nee Gyihova lɛ ye la anwo a?
“SELƐ ne kulo Ralɛ ne, yɛɛ ɔkile ye mɔɔ ɔdaye mumua ne ɔlɛyɛ la amuala.” (Dwɔn 5:20) Nea abusuabɔlɛ kɛnlɛma mɔɔ ɛnee Ralɛ ne nee ɔ Ze Gyihova lɛ ye a! Ɔvi mekɛ mɔɔ bɛbɔle ye la yɛɛ abusuabɔlɛ ɛhye bɔle ɔ bo a, na mekɛ tendenle pɛle nu kolaa na bɛawo ye kɛ dasanli. Ɔle Nyamenle Ara mɔɔ ɔwole ye kokye, yemɔ a Gyihova angomekye bɔle ye a. Nyamenle luale ye belamunli Ralɛ ne mɔɔ ɔkulo ye kpalɛ la anwo zo a ɔbɔle ninyɛne mɔɔ ɛha mɔɔ wɔ anwuma nee aze la a. (Kɔlɔsaema 1:15, 16) Ɔrayɛle Nyamenle Edwɛkɛ, anzɛɛ ye Kpɔmavolɛ, Ahenle mɔɔ Nyamenle luale ɔ nwo zo lale ye ɛhulolɛdeɛ ali hilele abɔdeɛ mɔɔ ɛha la. Ralɛ ɛhye mɔɔ ɛnee Nyamenle kulo ye kpole kpalɛ la a, rayɛle dasanli Gyisɛse Kelaese a.—Mrɛlɛbulɛ 8:22-30; Dwɔn 1:14; 12:49, 50.
2. Kɛzi Baebolo nu ngapezo ne mɔ hwenle adwenle hɔle Gyisɛse anwo zo ɛ?
2 Bɛhɛlɛle ngapezo dɔɔnwo bɛvanenle Nyamenle belamunli Ralɛ ne anwo kolaa na bɛanrenzɛ ye nwanwane adenle zo kɛ dasanli. Ɛzoanvolɛ Pita lile ɛhye anwo daselɛ hilele Kɔnileɛse kɛ: “Nyamenle [Ngapezoma] amuala ka ɔ nwo edwɛkɛ.” (Gyima ne 10:43) Bɛhanle gyima mɔɔ Gyisɛse bayɛ la anwo edwɛkɛ dɔɔnwo wɔ Baebolo ne anu na ɔmanle anwumabɔvolɛ bie bɔbɔ zele ɛzoanvolɛ Dwɔn kɛ: “Gyisɛse anwo daselɛlilɛ ti a bɛhanle ngapezo a.” (Yekile 19:10, NW) Zɔhane ngapezo ne mɔ lale ye ali wienyi kɛ yemɔ a ɔle Mɛzaya ne a. Bɛhwenle adwenle bɛhɔle gyima ngakyile mɔɔ ɔbayɛ amaa Nyamenle atiakunlukpɔkɛ ne mɔ ara nu la azo. Ɔwɔ kɛ yɛmaa ɛhye mɔ anwo kyia yɛ kpalɛ ɛnɛ.
Mɔɔ Ngapezo ne mɔ Manle Ɔlale Ali La
3. (a) Wɔ Mɔlebɛbo 3:15 ngapezo ne anu nwane mɔ a ɛwɔlɛ ne, “raalɛ ne,” nee ɛwɔlɛ ne “ara” ne gyi ɛkɛ ne maa bɛ a? (b) Duzu ati a ɔyɛ Gyihova azonvolɛ fɛ kpole kɛ bɛbagelegele ɛwɔlɛ ne ati a?
3 Bɛhanle ngapezo ɛhye mɔ anu mɔɔ lumua la wɔ Yidɛn atuadelɛ ne anzi. Gyihova zele ɛwɔlɛ ne kɛ: “Mebava ɛkpɔlɛ meado wɔ nee raalɛ ne, nee ɛ ra nee raalɛ ne ara avinli. Raalɛ ne ara bagelegele ɛ ti na ɛdawɔ wɔaha ɔ gyakɛ anzi.” (Mɔlebɛbo 3:15) Bɛhanle ngapezo ɛhye bɛhilele Seetan mɔɔ ɛnee ɛwɔlɛ ne gyi ɛkɛ ne maa ye la. “Raalɛ ne” gyi ɛkɛ ne maa Gyihova ahyehyɛdeɛ ne mɔɔ wɔ anwuma mɔɔ di nɔhalɛ, mɔɔ le kɛ ɔ ye mɔɔ di nɔhalɛ maa ye la. Ɛwɔlɛ ne “ara” anzɛɛ abozonli ne gyi ɛkɛ ne maa anwumabɔvolɛma nee menli mɔɔ da Seetan subane ali na bɛdwazo bɛtia Gyihova nee Ye menli la kɔsɔɔti. Ɛwɔlɛ ne ati mɔɔ raalɛ ne ara ne “bagelegele” la kile Seetan, atuadelɛnli ne mɔɔ sokpale Gyihova na ɔvale nyanelilɛ kpole ɔrɛlɛle alesama la ɛzɛkyelɛ bɔkɔɔ. Noko duzu a maa yɛnwu “raalɛ ne ara” anzɛɛ abozonli mumua ne mɔɔ bagelegele ɛwɔlɛ ne ati la ɛ? Ɛvoya dɔɔnwo pɛle nu mɔɔ ɛnee ɛhye le edwɛkɛ nwuanzanwuanza mɔɔ “vea” a.—Wulomuma 16:20, 25, 26.
4. Adenle boni azo a Gyisɛse abusua ɛlɔnwɔne ne boa maa yɛnwu kɛ yemɔ a ɔle Abozonli ne mɔɔ bɛbɔle ɔ nwo ɛwɔkɛ la ɛ?
4 Ɛvolɛ 2,000 pɛle nu la, Gyihova hanle nwolɛ edwɛkɛ dɔɔnwo hilele alesama. Ɔhilele kɛ Abozonli ne bavi Ebileham abusua ɛlɔnwɔne nu. (Mɔlebɛbo 22:15-18) Noko akee, ɛnee abusua ɛlɔnwɔne ne mɔɔ Abozonli ne bavi nu ara la ɛnrɛyɛ awolɛ nu agyalilɛ ala, emomu ɔbayɛ mɔɔ Nyamenle bakpa ye la. Ɔnvane nwolɛ ɛlɔlɛ kpole mɔɔ ɛnee Ebileham lɛ maa Yehyemeeyɛle mɔɔ Heega wole ye la, Gyihova zele ye kɛ: “Ayezeke mɔɔ Sɛla bawo ye . . . la, yemɔ yɛɛ me nee ye bakyekye me ngyekyeleɛ ne a.” (Mɔlebɛbo 17:18-21) Nzinlii, Gyekɔbo mɔɔ Yizilayɛ mbusua 12 ne vi ye nu la a bɛhanle bɛhilele ye kɛ ngyekyeleɛ ne balua ɔ nwo zo a na tɛ Yisɔ mɔɔ ɛnee le Ayezeke belamunli ralɛ la ɔ. (Mɔlebɛbo 28:10-14) Amozii, bɛhilele kɛ bɛbawo Abozonli ne wɔ Dwuda abusua nu wɔ Devidi sua nu.—Mɔlebɛbo 49:10; 1 Edwɛkɛsisilɛ 17:3, 4, 11-14.
5. Mekɛ mɔɔ Gyisɛse bɔle ye azɛlɛ ye azo ɛzonlenlɛ gyima ne abo la, duzu a hilele kɛ ɔdaye a ɔle Mɛzaya ne a?
5 Edwɛkɛ mɔɔ maa yɛnwu Abozonli ne la boni bieko a bɛhanle a? Ɔhale ɛvolɛ 700 na bɛawo ye la Baebolo ne lumua hanle kɛ bɛbawo Abozonli ne mɔɔ bɛbɔ ɔ nwo ɛwɔkɛ la kɛ dasanli wɔ Bɛtelɛhɛm. Eza noko bɛhilele kɛ Abozonli ne ɛlumua ɛdɛnla aze “vi tete,” mekɛ mɔɔ bɛbɔle ye mɔɔ ɛnee ɔwɔ anwuma la. (Maeka 5:2) Bɛluale ngapezonli Daneɛle anwo zo bɛhanle mekɛ kpɔtee mɔɔ bɛbawo Mɛzaya ne wɔ azɛlɛ ye azo la anwo edwɛkɛ bɛdole ɛkɛ. (Daneɛle 9:24-26) Mekɛ mɔɔ bɛvale sunsum nwuanzanwuanza ne bɛkpokpale Gyisɛse na ɔrayɛle Ahenle Mɔɔ Gyihova Ɛkpokpa Ye la, Nyamenle mumua ne vi anwuma dendɛle lile daselɛ kɛ ɔle Ɔ Ra. (Mateyu 3:16, 17) Abozonli ne ralale ali! Ɛhye manle Felepe vale anwodozo hanle kɛ: “Yɛnwu sonla ne mɔɔ Mosisi hɛlɛle ɔ nwo edwɛkɛ wɔ mɛla ne anu, na Nyamenle [ngapezoma] noko hɛlɛle ɔ nwo edwɛkɛ la. Yemɔ a le Gyisɛse.”—Dwɔn 1:45.
6. (a) Kɛmɔ Luku 24:27 kile la, duzu a Gyisɛse ɛdoavolɛ ne mɔ ranwunle ye a? (b) Nwane a le “Raalɛ ne ara” anzɛɛ Abozonli ne foa titile a, na duzu a ɛwɔlɛ ne ati mɔɔ ɔbagelegele la kile a?
6 Ɛhye anzi, ɛdoavolɛ ne mɔ ranwunle kɛ Gyisɛse anwo ngapezo dɔɔnwo wɔ Ngɛlɛlera ne anu. (Luku 24:27) Eza ɔralale ali wienyi kɛ Gyisɛse a le “raalɛ ne ara” anzɛɛ Abozonli ne foa titile, ahenle mɔɔ bagelegele ɛwɔlɛ ne ati na yeazɛkye Seetan bɔkɔɔ la a. Ɔlua Gyisɛse anwo zo, ɛwɔkɛ mɔɔ Nyamenle ɛbɔ alesama mɔɔ yɛ kunlu a anrɛɛ yɛnyia bɛ la kɔsɔɔti bara nu.—2 Kɔlentema 1:20.
7. Saa yɛnwu Ahenle mɔɔ bɛha ɔ nwo edwɛkɛ wɔ ngapezo ne mɔ anu la a, duzu bieko a ɔhyia kɛ yɛyɛ a?
7 Duzu a ɔwɔ kɛ ɛhye mɔɔ yɛnwu ye la maa yɛyɛ a? Baebolo ne ka Yiteyopeanli abɔlɔba bie mɔɔ ɛnee ɛgenga Dievolɛ nee Mɛzaya ne mɔɔ bara la anwo ngapezo ne bie mɔ la anwo edwɛkɛ. Ɛnee ɔnde ɔ bo yemɔti ɔbizale edwɛkpakavolɛ Felepe kɛ: “Nwane anwo edwɛkɛ a Nyamenle [ngapezonli] ne ɛlɛka a?” Mekɛ mɔɔ abɔlɔba ne dele ɔ bo la yeammaa edwɛkɛ ne ampɛ ɛkɛ ne ala. Ɔdiele Felepe ngilenu ne ɔwiele la, ɔradele ɔ bo kɛ ɔwɔ kɛ ngapezo ɛhye mɔɔ ɛra nu la maa ɔyɛ nwolɛ debie. Ɔranwunle ye kɛ ɔwɔ kɛ ɔmaa bɛsɔne ye. (Gyima ne 8:32-38; Ayezaya 53:3-9) Asoo zɔhane a ɛdawɔ noko ɛnwu ye a?
8. (a) Duzu anwo neazo a Ayezeke mɔɔ anrɛɛ Ebileham fa ye abɔ afɔle la de a? (b) Duzu ati a Gyihova hanle hilele Ebileham kɛ Abozonli ne anwo zo a maanle maanle ne balua anyia nyilalɛ a, na kɛzi ɛhye fane yɛ nwo ɛnɛ ɛ?
8 Suzu edwɛkɛ ɛhye mɔɔ ka ahonle la noko anwo nea. Mekɛ bie, anrɛɛ Ebileham fa ɔ ra Ayezeke mɔɔ Sɛla wole ye kokye la abɔ afɔle. (Mɔlebɛbo 22:1-18) Ɛnee zɔhane deɛ ne le mɔɔ Gyihova mumua ne bayɛ, ɔ Ra kokye ne mɔɔ ɔbava ye yeabɔ afɔle la anwo neazo: “Nyamenle hulole ewiade amra kpole kpalɛ la ati yɛɛ ɔvale Ɔ Ra kokye ne ɔmanle a, amaa awie biala mɔɔ kɛlie ye kɛli la anwu na yeanyia ngoane mɔɔ ɛnlɛ awieleɛ.” (Dwɔn 3:16) Ɛhye maa yɛnyia anwodozo kɛ kɛmɔ Gyihova vale ɔ Ra kokye ne lile gyima manle Ye atiakunlukpɔkɛ rale nu la, zɔhane ala a Ɔbamaa yɛanyia “ninyɛne muala” a. (Wulomuma 8:32) Duzu a ɔhyia kɛ yɛyɛ a? Kɛmɔ bɛhɛlɛ ye wɔ Mɔlebɛbo 22:18 la, Gyihova hanle hilele Ebileham kɛ Abozonli ne anwo zo yɛɛ maanle maanle mɔɔ wɔ ewiade la balua anyia nyilalɛ a, “ɔboalekɛ wɔdie me ne.” Ɛhɛe, Ebileham diele Nyamenle ane yemɔti ɔwɔ kɛ yɛdayɛ noko yɛtie Gyihova nee ɔ Ra, Gyisɛse ane: “Awie biala mɔɔ die Ralɛ ne di la lɛ ngoane mɔɔ ɛnlɛ awieleɛ, na mɔɔ kɛkpo kɛ ɔnrɛlie Ralɛ ne ɔnrɛli la ɛnrɛnyia ngoane mɔɔ ɛnlɛ awieleɛ la ɛlɛ, Nyamenle ndeanlɛ ne wɔ ɔ nwo zo dahuu.”—Dwɔn 3:36.
9. Saa yɛ nye sɔ dahuu ngoane nwo anyelazo mɔɔ Gyisɛse afɔle ne maa yɛnyia la a, duzu a yɛbayɛ a?
9 Saa yɛ nye sɔ dahuu ngoane nwo anyelazo mɔɔ Gyisɛse afɔle ne maa yɛnyia la a, ɔbamaa yɛayɛ debie biala mɔɔ Gyihova ɛlua Gyisɛse anwo zo ɛha ɛhile yɛ la. Ɛhye nee ɛlɔlɛ mɔɔ yɛnyia yɛamaa Nyamenle nee yɛ gɔnwo mɔ la a lua a. (Mateyu 22:37-39) Gyisɛse hilele kɛ ɛlɔlɛ mɔɔ yɛlɛ yɛmaa Gyihova la baha yɛ amaa yɛahilehile awie mɔ, ɔluakɛ ɔhanle kɛ: “Bɛhilehile bɛ bɛmaa bɛli debie biala mɔɔ meha mehile bɛ la azo.” (Mateyu 28:19, 20) Eza yɛkulo kɛ yɛda ɛlɔlɛ ɛhye ali yɛkile yɛ mediema mɔɔ yɛ nee bɛ sonle Gyihova la ɔlua “nyianu” anzɛɛ debiezukoalɛ mɔɔ yɛbahɔ ye dahuu la azo. (Hibuluma 10:25; Galeehyeama 6:10) Noko akee, saa yɛlɛtie Nyamenle nee ɔ Ra ne a, ɔnle kɛ yɛsuzu kɛ bɛ nye la kɛ yɛbayɛ menli mɔɔ nvonleɛ biala ɛnle yɛ nwo a. Hibuluma 4:15 ka kɛ Gyisɛse, yɛ Ɛsɔfo Kpanyinli ne, “le sonla mɔɔ se yɛ anwunvɔne wɔ yɛ sinlidɔlɛ nwo a.” Nea kɛ ɛhye si kyekye yɛ rɛle, ye titile saa yɛdua Kelaese anwo zo yɛsɛlɛ Nyamenle kɛ ɔboa yɛ ɔmaa yɛli yɛ sinlidɔlɛ zo konim a!—Mateyu 6:12.
Nyia Kelaese anu Diedi
10. Duzu ati a Gyisɛse Kelaese angome a yɛdua ɔ nwo zo a yɛbanyia ngoane ɛ?
10 Mɔɔ Pita hanle hilele Dwuu kɔɔto mgbanyima mɔɔ wɔ Gyɛlusalɛm la kɛ Gyisɛse a ɛmaa Baebolo ngapezo ne mɔ ɛra nu ɔwiele la, ɔvale akɛnrasesebɛ ɔdwulale ye edwɛkɛ ne kɛ: “Awie bieko ɛnle aleɛabo mɔɔ Nyamenle ɛva ye duma ɛmaa mɔɔ yɛdua ɔ nwo zo a yɛkɛnyia ngoane a.” (Gyima ne 4:12) Ɔluakɛ Adam abo zo amra amuala ɛyɛ ɛtane la ati, bɛ ewule ɛngola ɛnlie awie biala ngoane. Noko ɛnee Gyisɛse di munli yɛɛ ye ngoane kola kpɔda yɛ ɛtane. (Edwɛndolɛ 49:6-9; Hibuluma 2:9) Ɔvale ye ngoane mɔɔ ɛnee di munli kɛ Adam ɛdeɛ ne mɔɔ ɔminlinle ye la ɔmanle Nyamenle kɛ ɛkpɔnedeɛ. (1 Temɔte 2:5, 6) Ɛhye ɛbuke adenle mɔɔ bamaa yɛanyia dahuu ngoane wɔ Nyamenle ewiade fofolɛ ne anu.
11. Kilehile kɛzi Gyisɛse afɔle ne kola boa yɛ la anu.
11 Ɛkpɔnedeɛ ne eza maa yɛnyia nvasoɛ bɔbɔ wɔ mekɛ ɛhye anu. Kɛ neazo la, ɔnvane nwolɛ kɛ yɛle ɛtanevolɛma la, Gyisɛse afɔle ne kola maa yɛnyia ɛtane fakyɛ nee adwenle mɔɔ anu te. Ɛhye sonle bolɛ tɛla nvasoɛ mɔɔ Yizilayɛma luale nane afɔlebɔlɛ zo nyianle ye wɔ Mosisi Mɛla ne abo la. (Gyima ne 13:38, 39; Hibuluma 9:13, 14; 10:22) Noko akee, saa yɛbanyia ɛtane fakyɛ ɛhye a ɛnee ɔwɔ kɛ yɛnyia Kelaese afɔle ne anu diedi: “Saa yɛka kɛ yɛnyɛ ɛtane a, ɛnee yɛbɛlɛbɛla yɛ nwo, yɛɛ yɛnga nɔhalɛ. Nyamenle di ye ɛwɔkɛ zo, ɔdi pɛlepɛle. Saa yɛka yɛ ɛtane ne mɔ yɛkile ye a, ɔkɛva ɔkɛhyɛ yɛ na ɔkɛde yɛ nwo ɔkɛvi nyɛleɛ mɔɔ ɛndenrɛ la amuala anwo.”—1 Dwɔn 1:8, 9.
12. Duzu ati a nzule nu ɛzɔnenlɛ nwo hyia na awie anyia adwenle mɔɔ anu te wɔ Nyamenle anyunlu ɛ?
12 Kɛ ɔkɛyɛ na ɛtanevolɛma ahile kɛ bɛlɛ diedi wɔ Kelaese nee ye afɔlebɔlɛ ne anu ɛ? Mɔɔ ɛvoya ne mɔɔ lumua la anu amra rayɛle diedima la, bɛlale ye ali bagua nu. Wɔ adenle boni azo? Bɛmanle bɛzɔnenle bɛ. Duzu ati ɔ? Ɔboalekɛ Gyisɛse zele kɛ ɔwɔ kɛ ye ɛdoavolɛma kɔsɔɔti maa bɛsɔne bɛ. ( Mateyu 28:19, 20; Gyima ne 8:12; 18:8) Saa ɛlɔlɛ nziezielɛ mɔɔ Gyihova luale Gyisɛse anwo zo yɛle la ka awie ahonle kpalɛ a ɔnrɛhola zo fea. Ɔbayɛ nzenzaleɛ biala mɔɔ ɔwɔ kɛ ɔyɛ la wɔ ye ɛbɛla ɛbɔlɛ nu, yealua asɔneyɛlɛ zo yeayila ɔ nwo zo yeamaa Nyamenle, na yeava nzule nu ɛzɔnenlɛ yeayɛ ɔ nwo zo ɛyilalɛ ne anwo sɛkɛlɛneɛ. Saa awie dua adenle ɛhye azo da ye diedi ali a ɛnee ɔlɛbodo Nyamenle kɛ ɔmaa ye “adwenle mɔɔ anu la ɛkɛ ne wienyi la.”—1 Pita 3:21.
13. Saa yɛyɛ ɛtane a duzu a ɔwɔ kɛ yɛyɛ a, na duzu ati ɔ?
13 Wɔ ɛhye bɔbɔ anzi yɛbahola yɛayɛ ɛtane. Saa ɔbaye zɔ a duzu a ɔwɔ kɛ yɛyɛ a? Ɛzoanvolɛ Dwɔn hanle kɛ: “Melɛkɛlɛ bɛ kɛlata ɛhye, amaa bɛanyɛ ɛtane, na saa bɛ nuhua bie yɛ ɛtane a, yɛlɛ kamaavolɛ wɔ Selɛ ne anwo lɔ mɔɔ kpa yɛ ti kyɛlɛ a, yemɔ a le Gyisɛse Kelaese, mɔɔ le fɔɔnwonli ko ne. Kelaese a le sonla mɔɔ yɛlua ɔ nwo zo mɔɔ bɛva yɛ ɛtane ne mɔ bɛhyɛ yɛ a.” (1 Dwɔn 2:1, 2) Asoo ɛhye kile kɛ saa yɛyɛ ɛtane biala, na yɛsɛlɛ Nyamenle kɛ ɔva ɔhyɛ yɛ a ɛnee yewie ɔ? Tɛ ye zɔ ɔ. Emomu, saa yɛfi ahonle nu yɛnu yɛ nwo a yɛɛ yɛbanyia ɛtane fakyɛ a. Eza yɛbahyia mgbanyima mɔɔ wɔ Keleseɛne asafo ne anu la moalɛ. Ɔwɔ kɛ yɛnwu anyebolo mɔɔ wɔ ɛtane mɔɔ yɛyɛ la anu na yɛfi ahonle nu yɛnu yɛ nwo amaa yɛahola yɛabɔ mɔdenle biala kɛ yɛnrɛyɛ zɔhane bieko. (Gyima ne 3:19; Gyemise 5:13-16) Saa yɛyɛ ɛhye a yɛɛ yɛbanyia Gyisɛse moalɛ na yɛanyia Gyihova anyunlu ɛlolɛ bieko a.
14. (a) Kilehile adenle ko mɔɔ Gyisɛse afɔle ne ɛyɛ nvasoɛ ɛmaa yɛ la anu. (b) Saa amgba yɛlɛ diedi a duzu a yɛbayɛ a?
14 Gyisɛse afɔle ne ɛbuke dahuu ngoane nwo adenle wɔ anwuma ɛmaa “mboane ekpunli ekyi” ne mɔɔ boka abozonli ne mɔɔ bɛha ɔ nwo edwɛkɛ wɔ Mɔlebɛbo 3:15 ne la anwo la. (Luku 12:32; Galeehyeama 3:26-29) Eza yemaa yeyɛ boɛ kɛ alesama mgbe mgbe dɔɔnwo badɛnla aze dahuu wɔ paladaese wɔ azɛlɛ ye azo. (Edwɛndolɛ 37:29; Yekile 20:11, 12; 21:3, 4) Dahuu ngoane le “Nyamenle ahyɛlɛdeɛ ne mɔɔ ɔfa ɔmaa mgbane . . . wɔ yɛ Awulae Kelaese Gyisɛse ati.” (Wulomuma 6:23; Ɛfɛsɛsema 2:8-10) Saa yɛlɛ ahyɛlɛdeɛ ɛhye anu diedi na yɛ nye sɔ adenle mɔɔ bɛluale zo bɛvale bɛmanle la a yɛbabɔ ye nolo. Saa yɛnwu nwanwane adenle mɔɔ Gyihova ɛlua Gyisɛse anwo zo ɛmaa Ye ɛhulolɛdeɛ ɛyɛ ɛkɛ, nee ɛhyianlɛ mɔɔ ɔhyia kɛ yɛ kɔsɔɔti yɛfa Gyisɛse agyakɛ la a yɛbamaa Keleseɛne ɛzonlenlɛ gyima ne anwo ahyia yɛ kpole adɛla gyima biala wɔ yɛ ɛbɛlabɔlɛ nu. Anwodozo mɔɔ yɛbava yɛaha Nyamenle ahyɛlɛdeɛ kpole ɛhye anwo edwɛkɛ la bahile kɛ yɛlɛ diedi.—Gyima ne 20:24.
15. Kɛzi Gyisɛse Kelaese anu diedi ka menli bɔ nu ɛ?
15 Nea kɛ diedi ɛhye mɔɔ ka menli bɔ nu la si le kɛnlɛma ɛ! Ɔmaa yɛkola yɛtwe yɛbikye Gyihova, ɔ Ra ne yɛɛ yɛ mediema mɔɔ wɔ Keleseɛne asafo ne anu la kɔsɔɔti. (1 Dwɔn 3:23, 24) Diedi ɛhye maa yɛ nye die kɛ Gyihova ɛvi ahunlunyele nu ɛva “duma fofolɛ mɔɔ tɛla aluma muala [Nyamenle duma ɛmboka nwo]” ɛmaa ɔ Ra ne. Ɛhye ati anwuma nee aze nee azɛlɛ bo amuala “bahoto Gyisɛse na bɛali ye duma ne eni, na awie biala aha ye baguase kɛ, Gyisɛse Kelaese le Awulae, bɛava bɛawula Nyamenle Selɛ ne anyunlunyia.”—Felepaema 2:9-11.
Suzu nwo Fa Ti Nu
• Mɔɔ Mɛzaya ne rale la, duzu ati a yeanyɛ se yeammaa menli mɔɔ amgba die Nyamenle Edwɛkɛ ne di la kɛ bɛkɛnwu ye a?
• Ninyɛne mɔɔ ɔwɔ kɛ yɛyɛ yɛkile kɛ yɛ nye sɔ Gyisɛse afɔle ne la bie mɔ a le boni?
• Ndenle boni azo a Gyisɛse afɔle ne maa yɛnyia nvasoɛ wɔ mekɛ ɛhye bɔbɔ anu a? Kɛzi ɛhye boa yɛ wɔ mekɛ mɔɔ yɛlɛsɛlɛ Gyihova ɛkɛ ne ɛtane fakyɛ la ɛ?
[Debiezukoalɛ kpuyia ne mɔ]
[Nvoninli wɔ mukelɛ 36]
Gyisɛse zele ye ɛdoavolɛ ne mɔ kɛ bɛhilehile awie mɔ bɛmaa bɛli Nyamenle mɛla ne mɔ azo
