Bɛhɔ zo Bɛlumua Bɛkpondɛ Belemgbunlililɛ Ne
Tile 11
Bɛhɔ zo Bɛlumua Bɛkpondɛ Belemgbunlililɛ Ne
1. (a) Duzu ati a Gyisɛse dule ye tievolɛma folɛ kɛ bɛlumua bɛkpondɛ Belemgbunlililɛ ne a? (b) Duzu edwɛkɛ a ɔwɔ kɛ yɛbiza yɛ nwo a?
GYISƐSE dule ye tievolɛma folɛ wɔ ɛdendɛlɛ bie mɔɔ ɔmanle ye wɔ Galeli mɔɔ ɛbo ɛvolɛ 1,900 la anu kɛ: “Bɛbɔ mɔdenle bɛdwenle [“Bɛhɔ zo bɛlumua bɛkpondɛ,” NW] Nyamenle Belemgbunlililɛ ne nee mɔɔ Nyamenle kpondɛ kɛ bɛyɛ la anwo kpalɛ.” Duzu ati a ɛnee ɔwɔ kɛ bɛyɛ ɛhye ndɛndɛ a? Asoo ɛnee mekɛ mɔɔ Kelaese asa baha Belemgbunlililɛ tumi ne la ɛnle moa ɔ? Ɛnee ɔwɔ moa ɛdeɛ, noko ɛnee Mɛzaya Belemgbunlililɛ ne a le adenle mɔɔ Gyihova balua zo ala ye ali kɛ ɔlɛ adenle ɔdi tumi na yeamaa atiakunlukpɔkɛ mɔɔ ɔlɛ ye azɛlɛ ye anwo la ara nu a. Awie biala mɔɔ te kɛzi ninyɛne ɛhye mɔ anwo hyia abo la bamaa Belemgbunlililɛ ne alumua ye ɛbɛlabɔlɛ nu. Saa ɛnee nwolɛ hyia wɔ ɛvoya ne mɔɔ lumua la anu a, ɛnee ɔhyia kpole kpalɛ wɔ ɛnɛ mɔɔ bɛzie Kelaese Belemgbunli la! Yemɔti edwɛkɛ ne a le kɛ, Asoo memaa ɔda ali wɔ me ɛbɛlabɔlɛ nu kɛ melɛdumua meakpondɛ Nyamenle Belemgbunlililɛ ne ɔ?—Mateyu 6:33.
2. Duzu a alesama dɔɔnwo ne ala li ɔ nzi a?
2 Ɛnɛ, ewiade ye anu menli mgbe mgbe ɛla ye ali kɛ bɛlɛkɔ zo bɛalumua bɛakpondɛ Belemgbunlililɛ ne. Bɛyila bɛ nwo zo bɛmaa Gyihova na bɛlɛyɛ ye ɛhulolɛdeɛ bɛava bɛahile kɛ bɛgyi ye Belemgbunlililɛ ne anzi. Noko akee, alesama mɔɔ ɛha la li ninyɛne mɔɔ nvasoɛ ɛnle zo la anzi. Bɛdi ezukoa, anwonyia nee anyelielɛ ninyɛne mɔɔ ezukoa fa ba la anzi. Anzɛɛ bɛfa bɛ anwosesebɛ muala bɛkpondɛ mɔɔ bɛdabɛ mumua ne bɛkulo la. Bɛ ɛbɛlabɔlɛ da ye ali kɛ bɛkulo nwonane afoa nu ninyɛne nee anyelielɛ, na bɛdwenle bɛ ngome bɛ nwo. Saa bɛdie Nyamenle bɛdi bɔbɔ a, bɛnva ye bɛnlumua bɛ ɛbɛlabɔlɛ nu.—Mateyu 6:31, 32.
3. (a) Anwonyia boni a Gyisɛse dule ye ɛdoavolɛma folɛ kɛ bɛlumua bɛkpondɛ a, na duzu ati ɔ? (b) Duzu ati a ɔngyia kɛ yɛkɛdwenledwenle nwonane afoa nu ninyɛne nwo somaa a?
3 Gyisɛse dule ye ɛdoavolɛma ne folɛ kɛ: “Bɛmmakpondɛ bɛ anwonyia bɛsie azɛlɛ ye azo,” ɔboalekɛ ninyɛne ɛhye mɔ ɛndɛnla ɛkɛ ne dahuu. Emomu, ɔzele bɛ kɛ: “Bɛkpondɛ bɛ anwonyia bɛzie anwuma,” ɔlua Gyihova mɔɔ bɛsonle ye la azo. Ɔdule bɛ folɛ bieko kɛ bɛnyia ɛnyelɛ “kpalɛ,” ɔlua bɛ nye mɔɔ bɛfa bɛazie Nyamenle ɛhulolɛdeɛ zo na bɛava bɛ anwosesebɛ muala bɛayɛ ye dahuu la azo. Ɔhanle ɔhilele bɛ kɛ: “Bɛnrɛhola Nyamenle nee ezukoa sonle.” Na nwonane afoa nu ngyianlɛ mɔɔ le kɛ aleɛ, ndanlɛ, nee dabelɛ noko ɛ? Gyisɛse doale zo kɛ, “bɛmmadwenle” ɛhye mɔ anwo. Ɔhwenle bɛ adwenle ɔhɔle nloma ne mɔ anwo zo—Nyamenle a maa bɛ aleɛ a. Eza ɔwulale bɛ anwosesebɛ kɛ bɛnlea felawɔse ne mɔ—Nyamenle a keda bɛ ɛdanlɛ a. Asoo Gyihova azonvolɛ mɔɔ wɔ azɛlɛ ye azo la anwo ɛngyia ɛndɛla ninyɛne ɛhye mɔ? Gyisɛse hanle kɛ: “Bɛbɔ mɔdenle [bɛlumua] bɛdwenle Nyamenle Belemgbunlililɛ ne nee mɔɔ Nyamenle kpondɛ kɛ bɛyɛ la anwo kpalɛ, na ɔkɛva mɔɔ bɛhyia nwolɛ la ɔkɛmaa bɛ.” (Mateyu 6:19-34) Asoo wɔ ɛbɛlabɔlɛ da ye ali kɛ ɛdie ɛhye ɛdi ɔ?
Bɛmmamaa Debie Biala Fo Belemgbunlililɛ Nɔhalɛ Edwɛkɛ ne Azo
4. Saa awie maa nwonane afoa nu ninyɛne di ye adwenle a, duzu a bavi nu ara a?
4 Nvonleɛ biala ɛnle nwolɛ kɛ yɛbadwenle nwonane afoa nu ninyɛne mɔɔ yɛ nee yɛ abusua ne hyia la anwo. Noko saa awie dwenle nwonane afoa nu ninyɛne nwo dɔɔnwo a, ɔbahola yeayɛ esiane yeamaa ye. Saa bɔbɔ ɔdie Belemgbunlililɛ ne ɔdi a, ninyɛne gyɛne mɔɔ ɔbava yealumua ye asetɛnla nu la, bahola avo Belemgbunlililɛ nɔhalɛ edwɛkɛ ne azo. (Mateyu 13:18-22) Kɛ neazo la, kenle ko sukoavolɛ bie rabizale Gyisɛse kɛ: “Duzu a menyɛ na meanyia ngoane mɔɔ ɛnlɛ awieleɛ a?” Ɛnee ɔbɔ ɛbɛla kpalɛ yɛɛ ɔ ti akunlu le kɛnlɛma, noko ɛnee nwonane afoa nu ninyɛne ɛli ye adwenle. Ɛnee ɔyɛ se ɔmaa ye kɛ ɔkɛhwe ɔ nwo ɔkɛvi ye anwonyia nwo na ɔkɛrayɛ Kelaese ɛdoavolɛ. Yemɔti, ɔkpole nwolɛ adenle mɔɔ anrɛɛ ɔbanyia ɔ nee Kelaese adɛnla anwuma Belemgbunlililɛ ne anu la. Gyisɛse hanle ye mekɛ zɔhane kɛ: “Ɔbayɛ se yeamaa sukoavolɛma kɛ bɛkɛnyia Nyamenle Belemgbunlililɛ ne.”—Maake 10:17-23.
5. (a) Ninyɛne boni mɔ a Pɔɔlo zele Temɔte kɛ ɔmaa ɔ kunlu ɛdwo nwo a, na duzu ati ɔ? (b) Kɛzi Seetan fa “ezukoa nwo anyebolo” di gyima sɛkye menli ɛ?
5 Ɛvolɛ dɔɔnwo pɛle nu la, ɛzoanvolɛ Pɔɔlo hɛlɛle kɛlata hɔmanle Temɔte mɔɔ ɛnee wɔ Ɛfɛsɛse, suakpole mɔɔ ɛnee gyi boɛ azo la. Pɔɔlo hakyele ye kɛ: “Yɛanva ɛhwee yɛamba ewiade ye, yɛɛ yɛnrɛva bie yɛnrɛhɔ. Ɛhye ati, saa yɛlɛ mɔɔ yɛdi nee mɔɔ yɛkeda la a, bɛmaa yɛ nye ɛzɔ yɛ nwo.” Nvonleɛ biala ɛnle nwo kɛ yɛkɛyɛ gyima mɔɔ bamaa yɛ nee yɛ abusua ne anyia “mɔɔ yɛdi nee mɔɔ yɛkeda la.” Noko Pɔɔlo bɔle kɔkɔ kɛ: “Bɛdabɛ mɔɔ bɛkpondɛ bɛ nwo bɛanyia la tɔ ngyegyelɛ nu, na munzule atiakunluwɔzo mgbane mgbane mɔɔ sɛkye menli, minli bɛ bo zo la kye bɛ wɔ ye ɛhane nu.” Seetan le kɛdɛba. Ɔdumua ɔfa ninyɛne ngyikyi ngyikyi ɔbɛlɛbɛla menli. Amozii, ɔfa ninyɛne mgbole mɔɔ le kɛ gyima mɔɔ bɛtua kakɛ kpalɛ anzɛɛ gyima nu dibilɛ kpole mɔɔ bie a nwolɛ ɛzonlelilɛ die mekɛ dɔɔnwo, bɔbɔ mekɛ mɔɔ bɛfa bɛyɛ ɛzonlenlɛ gyima ne la. Saa yɛannea boɛ a, “ezukoa nwo anyebolo” bahola amaa yɛabu yɛ nye yɛagua Belemgbunlililɛ ne anwo ninyɛne mɔɔ hyia la azo. Pɔɔlo hanle ye zɛhae: “Bie mɔ anye ɛbolo ye ɛkpondɛlɛ somaa yemaa bɛvi diedi ne anwo mɔɔ akee nyane ala a bɛdi a.”—1 Temɔte 6:7-10.
6. (a) Amaa yɛahoati anwonyia ɛhulolɛ nwo ɛhane ne la, duzu a ɔwɔ kɛ yɛyɛ a? (b) Ɔnvane nwolɛ kɛ ɛnɛ, ewiade ɛyɛ se la, anwodozo boni a yɛbahola yɛanyia a?
6 Ɔlua ɛlɔlɛ mɔɔ Pɔɔlo lɛ maa ɔ diema Keleseɛnenli Temɔte la ati, ɔzele ye kɛ: “Twe ɛ nwo fi ninyɛne ɛhye mɔ anwo,” na “ko diedi nu konle kpalɛ ne.” (1 Temɔte 6:11, 12) Ɔhyia mɔdenlebɔlɛ amaa anwonyia ɛhulolɛ mɔɔ ɛbu zo wɔ ewiade ye la andwehwe yɛ. Noko saa yɛyɛ mɔɔ nee yɛ diedi le ko la a, Gyihova ɛnrɛkpo yɛ ɛlɛ. Ɔnvane nwolɛ kɛ ninyɛne awolɛ ɛyɛ se na menli ɛnnyia gyima ɛnyɛ la, ɔbamaa yɛanyia mɔɔ yɛhyia la. Pɔɔlo hɛlɛle kɛ: “Bɛye ezukoa nwo anyebolo bɛvi bɛ ɛbɛla nu, na bɛmaa bɛ kunlu ɛdwo mɔɔ bɛlɛ ye la anwo. Ɔluakɛ Nyamenle ɛha ye kɛ, ‘Menrɛgyakyi bɛ ɛlɛ, yɛɛ me rɛle ɛnrɛvi bɛ fee.’ Zɔhane ati, yɛkola yɛsi yɛ kɛnra yɛka kɛ, ‘[Gyihova] le me boavolɛ, menrɛzulo ɛhwee. Duzu yɛɛ sonla kola yɛ me a?’” (Hibuluma 13:5, 6) Belemgbunli Devidi noko hɛlɛle kɛ: “Ɛnee mele kakula, na kɛkala meyɛ kpanyinli; na metɛnwunle kɛ bɛkpo tenlenenli ɛlɛ; yɛɛ metɛnwunle kɛ ɔ mra ɛlɛsɛlɛzɛlɛ aleɛ ali.”—Edwɛndolɛ 37:25.
Alumua Ɛdoavolɛma Yɛle Neazo
7. Adehilelɛ boni a Gyisɛse vale manle ye ɛdoavolɛma ne wɔ edwɛkɛhanlɛ ne anwo a, na duzu ati a ɛnee ɔfɛta a?
7 Gyisɛse tetele ye ɛzoanvolɛ ne mɔ wiele la, ɔzoanle bɛ kɛ bɛhɔbɔ edwɛkpa ne nolo wɔ Yizilayɛma anu na bɛha kɛ: “Anwuma Belemgbunlililɛ ne ɛbikye.” Nea kɛ ɛnee edwɛkɛ ɛhye si yɛ anyelielɛ a! Ɛnee Gyisɛse Kelaese, Mɛzaya Belemgbunli ne wɔ bɛ avinli. Kɛmɔ ɛnee ɛzoanvolɛ ne mɔ ɛlɛtu bɛ nwo amaa azonle Nyamenle la ati, Gyisɛse dule bɛ folɛ kɛ bɛnyia Nyamenle anu anwodozo kɛ ɔbanlea bɛ. Yemɔti ɔzele bɛ kɛ: “Wɔ bɛ adendulɛ ne anu bɛmmafa debie biala mɔɔ le kɛ kpɔma anzɛɛ kodoku, aleɛ anzɛɛ ezukoa, yɛɛ bɛmmafa tɛladeɛ bieko bɛboka mɔɔ bɛwula la anwo. Awuke biala mɔɔ bɛkɛlie bɛ nu la, bɛdɛnla ɛkɛ ne kɔkpula mekɛ mɔɔ bɛkɛvi sua ne azo la.” (Mateyu 10:5-10; Luku 9:1-6) Ɛnee Gyihova balua Yizilayɛma mɔɔ ɛnee ɔle bɛ amaamuo kɛ bɛkɛlie nyɛvolɛ la anwo zo yeamaa bɛ sa aha debie biala mɔɔ bɛbahyia la.
8. (a) Ɔka ekyii na Gyisɛse awu la, duzu ati a ɔvale edwɛkɛhanlɛ ne anwo adehilelɛ fofolɛ ɔmanle a? (b) Noko duzu a ɛnee ɔwɔ kɛ ɔdumua wɔ Gyisɛse ɛdoavolɛma ne ɛbɛlabɔlɛ nu a?
8 Nzinlii, ɔka ekyii na Gyisɛse awu la, ɔmanle ye ɛzoanvolɛ ne mɔ dele ɔ bo kɛ tɛnlabelɛ ne bahakyi kenlebie. Ɔlua ɛkpɔlɛ mɔɔ bɛbayia ye la ati, ɛnee Yizilayɛma ɛnrɛlie bɛ kɛmɔ bɛyɛ ye dɛba la. Bieko, ɛnee bɛbava Belemgbunlililɛ edwɛkpa ne bɛahɔ maanle maanle ne mɔ anu. Ɛhye ati, ɛnee akee ɔwɔ kɛ bɛfa “ezukoa kodoku” yɛɛ “adendulɛ kodoku” anzɛɛ aleɛ. Noko, ɛnee ɔwɔ kɛ bɛkɔ zo bɛdumua bɛkpondɛ Gyihova Belemgbunlililɛ ne nee ye tenleneyɛlɛ, na bɛnyia anwodozo kɛ Nyamenle bayila bɛ mɔdenlebɔlɛ ne azo yeamaa bɛanyia mɔɔ bɛbali nee mɔɔ bɛbaheda la.—Luku 22:35-37.
9. Kɛ Pɔɔlo zile nleanle ɔ nwo na mekɛ ko ne ala ɔmanle Belemgbunlililɛ ne lumuale ye ɛbɛlabɔlɛ nu ɛ, na folɛdulɛ boni a ɔvale ɔmanle wɔ ɛhye anwo a?
9 Ɛzoanvolɛ Pɔɔlo yɛle neazo kpalɛ diele Gyisɛse folɛdulɛ ne. Pɔɔlo vale edwɛkɛhanlɛ ne yɛle ye gyima titile. (Gyima ne 20:24, 25) Ɛnee saa ɔtu adenle kɛ ɔkaha edwɛkpa ne a, ɔdaye mumua ne ɔnea ɔ nwo. Ɔdwu mekɛ ne bie bɔbɔ a ɔyɛ ɛdanlɛ sua ɔfa ɔnea ɔ nwo. Yeanva ɔ nye yeando kɛ awie mɔ kɛnlea ye. (Gyima ne 18:1-4; 1 Tɛsalonaekama 2:9) Noko, ɛnee saa awie mɔ fi bɛ ɛhulolɛ nu yɛ ye nyele a, ɔ nye sɔ. (Gyima ne 16:15, 34; Felepaema 4:15-17) Pɔɔlo wulale Keleseɛnema anwosesebɛ kɛ ɔnle kɛ bɛkoati kɛ bɛkɛnlea bɛ mbusua ɔlua edwɛkɛhanlɛ ne ati, emomu, ɛnee ɔwɔ kɛ bɛdi ɛzonlelilɛ ngakyile mɔɔ bɛlɛ la anwo gyima wɔ adenle kpalɛ zo. Ɔdule bɛ folɛ kɛ bɛyɛ gyima, bɛhulo bɛ mbusua, na bɛyɛ nyele. (Ɛfɛsɛsema 4:28; 2 Tɛsalonaekama 3:7-12) Ɔzile bɛ adua kɛ bɛva bɛ nwo bɛdo Nyamenle anwo zo, na tɛ nwonane afoa nu ninyɛne zo, na bɛbɔ bɛ ɛbɛla kɛ bɛze ninyɛne mɔɔ hyia kpole kpalɛ la. Kɛmɔ Gyisɛse hilehilele la, ɛnee ɛhye kile kɛ bɛbahɔ zo bɛalumua bɛakpondɛ Nyamenle Belemgbunlililɛ ne nee ye tenleneyɛlɛ.—Felepaema 1:9-11.
Maa Belemgbunlililɛ ne Ɛlumua Wɔ Ɛbɛlabɔlɛ Nu
10. Duzu a Belemgbunlililɛ ne mɔɔ yɛdumua yɛakpondɛ la kile a?
10 Mekɛ dodo nyɛ yɛɛ ɔwɔ kɛ yɛfa yɛ nee awie mɔ suzu Belemgbunlililɛ edwɛkpa ne anwo a? Tɛnlabelɛ mɔɔ yɛwɔ nu nee anyezɔlɛ mɔɔ yɛlɛ ye Belemgbunlililɛ ne anwo la a bahile a. Kakye kɛ Gyisɛse anga kɛ, ‘Bɛkpondɛ Belemgbunlililɛ ne wɔ mekɛ mɔɔ bɛnlɛ debie bɛnyɛ la.’ Ɛnee Gyisɛse ze kɛzi Belemgbunlililɛ ne anwo hyia la, yemɔti ɔhanle kɛ yɛhɔ zo yɛkpondɛ “Nyamenle Belemgbunlililɛ ne,” kɛmɔ ɔ Ze kulo kɛ yɛyɛ la. (Luku 12:31) Ɔwɔ nuhua kɛ ɔwɔ kɛ yɛ nuhua dɔɔnwo yɛ gyima nea yɛ nwo nee yɛ mbusua ɛdeɛ, noko saa yɛlɛ diedi a yɛbamaa Belemgbunlililɛ gyima ne mɔɔ Nyamenle ɛva ɛwula yɛ sa la alumua yɛ ɛbɛlabɔlɛ nu. Mekɛ ko ne ala, yɛbahɔ zo yɛanlea yɛ mbusua.—1 Temɔte 5:8.
11. (a) Ndonwo boni a Gyisɛse yɛle hilele kɛ yɛ muala yɛ anwosesebɛ ɛnrɛzɛ wɔ Belemgbunlililɛ edwɛkpa ne ɛhanlɛ nu a? (b) Ninyɛne boni mɔ a bahile dodo mɔɔ awie bahola ayɛ a?
11 Yɛ nuhua bie mɔ kola fa mekɛ dɔɔnwo ka Belemgbunlililɛ nɔhalɛ edwɛkɛ ne tɛla bie mɔ. Noko Gyisɛse lale ye ali wɔ ye ndonwo ne mɔɔ fane azɛlɛ ngakyile ne anwo la anu kɛ bɛdabɛ mɔɔ bɛ ahonle le kɛ azɛlɛ kpalɛ la bazo ma. Dodo nyɛ? Asolo awie biala nee ye gyinlabelɛ. Abusua nu ɛzonlelilɛ, ɛvolɛ mɔɔ yɛli, nee yɛ anwosesebɛ a bahile dodo mɔɔ yɛbahola yɛayɛ a. Noko saa yɛ nye die Belemgbunlililɛ edwɛkpa ne anwo kpalɛ a, yɛbahola yɛayɛ dɔɔnwo.—Mateyu 13:23.
12. Ɛzonlenlɛ nu ninyɛne kpalɛ boni a bɛwula ngakula anwosesebɛ kɛ bɛva bɛzie bɛ nye zo a?
12 Ɔle kpalɛ kɛ yɛkɛva ninyɛne mɔɔ bamaa yɛayɛ dɔɔnwo wɔ Belemgbunlililɛ ɛzonlenlɛ gyima ne anu la yɛkɛzie yɛ nye zo. Ɔwɔ kɛ ngakula mɔɔ ɛdu zolɛ la suzu neazo kɛnlɛma mɔɔ Keleseɛnenli kpavolɛ Temɔte yɛle la anwo kpalɛ. (Felepaema 2:19-22) Duzu a tɛla bɛ nwo mɔɔ bɛfa bɛawula dahuu ɛzonlenlɛ gyima ne anu wɔ mekɛ mɔɔ bɛkɛwie sukulu la ɛ? Mgbanyinli mɔɔ fa ɛzonlenlɛ nu ninyɛne sie bɛ nye zo la noko banyia nvasoɛ kpole.
13. (a) Nwane a ze mɔɔ yɛ nuhua ko biala kola yɛ wɔ Belemgbunlililɛ gyima ne anu a? (b) Saa amgba yɛlɛdumua yɛakpondɛ Belemgbunlililɛ ne a, duzu a yɛmaa ɔda ali a?
13 Kɛ anrɛɛ yɛbadendɛ yɛatia menli mɔɔ yɛte nganeɛ kɛ bɛbahola bɛayɛ dɔɔnwo la, ɔwɔ kɛ yɛ diedi ka yɛ maa yɛdayɛ mumua ne yɛyɛ dɔɔnwo amaa yɛazonle Nyamenle kpalɛ kɛmɔ yɛ gyinlabelɛ maa nwolɛ adenle la. (Wulomuma 14:10-12; Galeehyeama 6:4, 5) Kɛmɔ yɛnwu ye wɔ Dwobu edwɛkɛ ne anu la, Seetan hilele kɛ anwonyia, anwodɔlɛ, nee yɛ boɛyɛlɛ a hyia yɛ a, yemɔti angomedi adwenle a yɛfa yɛsonle Nyamenle a. Noko saa amgba yɛlɛfa Belemgbunlililɛ ne yɛalumua yɛ ɛbɛlabɔlɛ nu a, ɛnee yɛlɛkile kɛ Abɔnsam le adalɛ nabalaba. Ɛnee yɛlɛda ye ali kɛ Nyamenle ɛzonlenlɛ a dumua yɛ ɛbɛlabɔlɛ nu a. Na yɛfa mɔɔ yɛka nee mɔɔ yɛyɛ la yɛkile kɛ yɛkulo Gyihova kpalɛ yɛɛ yɛgyi ye tumililɛ nzi, na yɛkulo yɛ gɔnwo mɔ noko.—Dwobu 1:9-11; 2:4, 5; Mrɛlɛbulɛ 27:11.
14. (a) Duzu ati a ɔle kpalɛ kɛ yɛkɛyɛ daselɛlilɛ nwo ngyehyɛleɛ a? (b) Duzu a Alasevolɛ dɔɔnwo ɛlɛyɛ ye daselɛlilɛ gyima ne anwo a?
14 Ngyehyɛleɛ mɔɔ yɛbayɛ la bahola aboa amaa yɛayɛ dɔɔnwo. Gyihova bɔbɔ lɛ ye “mekɛ” mɔɔ ɔfa ɔdi ye atiakunlukpɔkɛ nwo gyima a. (Adendulɛ 9:5; Maake 1:15) Ɔbayɛ kpalɛ kɛ yɛbayɛ ngyehyɛleɛ yɛahɔ daselɛlilɛ kenle ko anzɛɛ nwiɔ wɔ dapɛne biala anu. Gyihova Alasevolɛ mɔɔ wɔ ewiade ye la anu dɔɔnwo ɛva bɛ nwo ɛwula adekpakyelɛ boavolɛ gyima ne anu, na bɛfa dɔnehwele nwiɔ bɛka edwɛkpa ne kenle ko biala. Bɛ nuhua dɔɔnwo sonle kɛ dahuu adekpakyelɛma na bɛfa dɔnehwele kɛyɛ nwiɔ nee foa bɛbɔ Belemgbunlililɛ ne nolo kenle ko biala. Adekpakyelɛ titilema nee edwɛkpatɛlɛvolɛma fa mekɛ dɔɔnwo yɛ Belemgbunlililɛ gyima ne. Yɛdayɛ noko yɛbahola yɛakpondɛ ndenle yɛalua zo yɛabɔ Belemgbunlililɛ ne nolo yɛahile awie biala mɔɔ kulo kɛ tie, wɔ mekɛ bɔbɔ mɔɔ yɛtɛsieziele yɛ nwo kɛ yɛkɔ daselɛlilɛ la. (Dwɔn 4:7-15) Ɔwɔ kɛ yɛnyia ɛhulolɛ kɛ yɛbayɛ gyima ne dɔɔnwo kɛmɔ yɛ gyinlabelɛ maa nwolɛ adenle la, ɔboalekɛ Gyisɛse hanle ziele kɛ: “Bɛbabɔ Edwɛkpa ɛhye mɔɔ fane Anwuma Belemgbunlililɛ ne anwo la nolo wɔ aleɛabo amuala, amaa yeayɛ daselɛlilɛ yeamaa aleɛabo amra kolaa na awieleɛ ne ara.”—Mateyu 24:14; Ɛfɛsɛsema 5:15-17.
15. Mɔɔ fane yɛ ɛzonlenlɛ gyima ne anwo la, duzu ati a ɛte nganeɛ kɛ folɛdulɛ mɔɔ wɔ 1 Kɔlentema 15:58 la fɛta a?
15 Gyihova Alasevolɛ mɔɔ wɔ maanle ngakyile mɔɔ wɔ ewiade amuala anu la ɛlɛfa koyɛlɛ ayɛ gyima ɛhye. Bɛlɛdi Baebolo nu folɛdulɛ ɛhye azo: “Bɛgyinla kpundii kpalɛ. Bɛmaa bɛ nye ɛbolo Awulae gyima ne ɛyɛlɛ nwo, na bɛnwu ye kɛ Awulae ati bɛ ɛvɛlɛ ɛnrɛyɛ gyɛne.”—1 Kɔlentema 15:58.
Suzu nwo Fa Ti Nu
• Mekɛ mɔɔ Gyisɛse hanle kɛ bɛhɔ zo ‘bɛlumua bɛkpondɛ Nyamenle Belemgbunlililɛ ne’ la, duzu a ɛnee ɔlɛkile kɛ yɛmaa ɔdɔ zo nwiɔ a?
• Adwenle boni a ɔwɔ kɛ yɛnyia ye wɔ gyima mɔɔ yɛyɛ yɛanlea yɛ nwo nee yɛ mbusua la anwo a? Duzu moalɛ a Nyamenle bava amaa yɛ a?
• Belemgbunlililɛ gyima ne foa boni a yɛbahola yɛayɛ bie a?
[Debiezukoalɛ kpuyia ne mɔ]
[Nvoninli wɔ mukelɛ 107]
Ɛnɛ, wɔ maanle biala anu, Gyihova Alasevolɛ ɛlɛbɔ edwɛkpa ne nolo, kolaa na awieleɛ ne ara
