“Bɛva Bɛ Ahonle Muala Bɛhulo Bɛ Nwo”
Tile 16
“Bɛva Bɛ Ahonle Muala Bɛhulo Bɛ Nwo”
1. Duzu a ta si nyɛvolɛ mɔɔ ba Gyihova Alasevolɛ ayia ne mɔ abo la anwo a?
SAA menli gyɛne ba Gyihova Alasevolɛ ayia bo a, ɛlɔlɛ mɔɔ Alasevolɛ ne mɔ da ye ali la ta si bɛ nwo. Bɛnwu ɛhye wɔ kɛzi bɛdie nyɛvolɛ nee kɛzi bɛ nee bɛ nwo bɛ nwo bɔ la anu. Nyɛvolɛ mɔɔ ba yɛ nyianu ne mɔ abo la noko nwu ɛlɔlɛ ɛhye. Adawu kɛlɛvolɛ bie hɛlɛle ye wɔ nyianu ne mɔ ko anwo kɛ: ‘Awie biala ɛnle ɛkɛ ne mɔɔ ɛbo nza anzɛɛ ɛnlo ayile ɛtane a. Ɛdeɛdeanlɛ biala ɛnle ɛkɛ. Awie ɛnzuhu awie yɛɛ ndane ɛhanlɛ anzɛɛ amowa biala ɛnle kɛ. Ɛdendɛlɛ evinli anzɛɛ sigalɛte esike biala ɛnle ɛkɛ. Awie ɛnwua debie yɛɛ ɛnnwu kɛ ahɔpo gugua mgbane mgbane. Ɛnee ɔyɛ azibɛnwo.’ Ɛhye mɔ amuala di daselɛ kɛ bɛlɛ ɛlɔlɛ, nuhua ne mɔɔ “ɛnyɛ ninyɛne mgbane mgbane, yɛɛ . . . ɔnle angomedi” la.—1 Kɔlentema 13:4-8.
2. (a) Mekɛ ɛlɛkɔ la, duzu a ɔwɔ kɛ da ali wɔ kɛzi yɛda ɛlɔlɛ ali la anwo a? (b) Duzu ɛlɔlɛ a ɔwɔ kɛ yɛda ye ali yɛfa yɛsukoa Kelaese a?
2 Mediemalɔlɛ le nɔhalɛ Keleseɛnema nzonlɛyɛlɛ. (Dwɔn 13:35) Mekɛ mɔɔ yɛlɛnyi sunsum nu la, yɛsukoa kɛzi yɛda ɛlɔlɛ ali kpalɛ la. Ɛzoanvolɛ Pɔɔlo yɛle asɔne kɛ ɔ mediema Keleseɛnema ɛnyia ɛlɔlɛ kpole. (Felepaema 1:9) Ɛzoanvolɛ Dwɔn hilele kɛ ɔwɔ kɛ yɛ ɛlɔlɛ yɛ mɔɔ angomedi biala ɛnle nu a. Ɔhɛlɛle kɛ: “Kɛ ɛhulolɛ de la ɛne: Kelaese dole ye ngoane aze manle yɛ, yemɔti ɔwɔ kɛ yɛdayɛ noko yɛto yɛ ngoane aze yɛmaa yɛ mediema.” (1 Dwɔn 3:16; Dwɔn 15:12, 13) Asoo amgba ɔwɔ kɛ yɛfa yɛ ngoane yɛto aze yɛmaa yɛ mediema? Mekɛ dɔɔnwo ne ala ɔngyia kɛ yɛkɛyɛ zɔ. Noko mɔdenle boni a yɛbɔ yɛboa bɛ wɔ mekɛ mɔɔ ɔyɛ se ɔmaa yɛ bɔbɔ la ɛ?
3. (a) Adenle boni azo a yɛbahola yɛala yɛ ɛlɔlɛ ali kpalɛ a? (b) Duzu ati a ɔwɔ kɛ yɛfi ahonle nu yɛkulo yɛ nwo ngoko ngoko ɛnɛ a?
3 Mɔɔ boka nyɛleɛ mɔɔ kile kɛ yɛlɛ tunwomaa sunsum anwo la a le kɛ yɛbanyia ɛlɔlɛ kpalɛ yɛamaa yɛ mediema Keleseɛnema. Nyamenle Edwɛkɛ ne tu yɛ folɛ kɛ: “Bɛva mediema ɛhulolɛ bɛhulo bɛ nwo ngoko.” (Wulomuma 12:10) Yɛ muala yɛte nganeɛ zɔhane yɛmaa menli bie mɔ. Noko asoo yɛbahola yɛanyia ɛlɔlɛ yɛamaa awie mɔ gyɛne? Mekɛ mɔɔ ngyehyɛleɛ dɛba ɛhye awieleɛ ɛlɛbikye la, ɔhyia kɛ yɛtwe yɛbikye yɛ gɔnwo mɔ Keleseɛnema kpalɛ. Baebolo ne ka kɛ: “Ninyɛne kɔsɔɔti awieleɛ ɛbikye. . . . Mɔɔ hyia kpalɛ la, bɛva bɛ ahonle muala bɛhulo bɛ nwo ngoko ngoko, ɔboalekɛ ɛhulolɛ maa bɛfa ɛtane dɔɔnwo bɛkyɛ.”—1 Pita 4:7, 8.
Mekɛ Mɔɔ Awie Kɛvo Yɛ
4. (a) Duzu ati a edwɛkɛ kola ba menli mɔɔ wɔ asafo ne anu la avinli ɛ? (b) Saa yɛfa Baebolo nu folɛdulɛ yɛdi gyima, bɔbɔ wɔ mekɛ mɔɔ folɛdulɛ ne nee mɔɔ wɔ yɛ ahonle nu la ɛnle ko a, duzu nvasoɛ a yɛbanyia a?
4 Nɔhalɛ nu, kɛmɔ yɛnli munli la ati, ɔtɔ kenle ne bie a yɛfo yɛ gɔnwo mɔ. Ɔyɛ noko a yɛ mediema ne mɔ fo yɛ wɔ ndenle ngakyile zo. (1 Dwɔn 1:8) Saa ɛhye bie to wɔ a, duzu a ɔwɔ kɛ ɛyɛ a? Ngɛlɛlera ne maa yɛ adehilelɛ mɔɔ fɛta. Noko kɛmɔ yɛnli munli la ati, bie a mɔɔ wɔ yɛ ahonle nu la nee mɔɔ Baebolo ne ka la ɛnrɛyɛ ko. (Wulomuma 7:21-23) Noko akee, saa yɛfi yɛ ahonle nu yɛfa folɛdulɛ mɔɔ wɔ Baebolo ne anu la yɛdi gyima a, ɔbahile kɛ yɛkulo kɛ yɛsɔ Gyihova anye. Zɔhane ɛyɛlɛ bamaa ɛlɔlɛ mɔɔ yɛlɛ yɛmaa menli gyɛne la anu amia.
5. Saa awie yɛ yɛ debie maa ɔyɛ yɛ nyane a, duzu ati a ɔnle kɛ yɛdi nzenralɛ ɛ?
5 Saa awie yɛ awie debie maa ɔyɛ ye nyane a ɔbɔ mɔdenle kɛ ɔyɛ bie yeazie ɔ gyakɛ anu. Noko ɛhye maa edwɛkɛ ne yɛ kpole ala. Saa nzenralɛ nwo hyia bɔbɔ a, ɔwɔ kɛ yɛgyakyi ɛhye yɛmaa Nyamenle. (Mrɛlɛbulɛ 24:29; Wulomuma 12:17-21) Bie mɔ bɔ mɔdenle kɛ bɛ nee ahenle ne baya. Noko ɔnle kɛ yɛfa ɛhye yɛyɛ yɛ gɔnwo mɔ azonvolɛ, ɔluakɛ yɛ mediema mɔɔ yɛbahulo bɛ la boka ninyɛne mɔɔ bamaa yɛ ɛzonlenlɛ azɔ ɛnyelɛ la anwo. (1 Dwɔn 4:20) Ɛhye ati, Pɔɔlo hɛlɛle kɛ: “Bɛsosɔ bɛ nwo ngoko ngoko, na saa bie lɛ ɔ gɔnwo anwo ɛya a ɔva ɔhyɛ ye. Bɛva ɛtane bɛhyɛ, kɛmɔ Awulae ɛva bɛ nwo edwɛkɛ ɛhyɛ bɛ la.” (Kɔlɔsaema 3:13) Ɛbahola wɔayɛ zɔ ɔ?
6. (a) Fane nyɛ a ɔwɔ kɛ yɛfa yɛ diema ɛtane yɛkyɛ ye a? (b) Duzu a saa yɛte ɔ bo a ɔbaboa yɛ wɔ mekɛ mɔɔ awie ɛyɛ ɛtane ɛtia yɛ la ɛ?
6 Noko saa awie kɔ zo yɛ ɛtane tia yɛ, na ɛtane ne ɛnle mɔɔ anyebolo wɔ nu mɔɔ maa bɛkola bɛtu ye bɛfi asafo ne anu ɛ? Ɛzoanvolɛ Pita hanle kɛ ɔwɔ kɛ yɛfa ɛtane ngyikyi ɛhye mɔ yɛkyɛ toonwo “fane nsuu.” Noko Gyisɛse hilele kɛ “tɛ fane nsuu, na abulasuu fane nsuu.” Ɔzile kɛzi ɛtane mɔɔ yɛyɛ Nyamenle la kpole tɛla mɔɔ awie mɔ yɛ yɛ la azo. (Mateyu 18:21-35) Alehyenlɛ ko biala yɛfo Nyamenle wɔ ndenle ngakyile zo—ɔtɔ kenle ne bie a, yɛdua angomedi nyɛleɛ, mɔɔ yɛka nee mɔɔ yɛdwenle nwo, anzɛɛ mɔɔ yɛngola yɛnyɛ la azo yɛfo ye—mɔɔ yɛnnwu ye bɔbɔ a. (Wulomuma 3:23) Noko akee, Nyamenle kɔ zo se yɛ anwunvɔne. (Edwɛndolɛ 103:10-14; 130:3, 4) Ɔ nye la kɛ yɛdayɛ noko yɛ nee yɛ nwo yɛ nwo kɛli ye zɔhane ala. (Mateyu 6:14, 15; Ɛfɛsɛsema 4:1-3) Saa yɛyɛ zɔ a ɛnee yɛlɛda ɛlɔlɛ ne mɔɔ “ɔmbu ɛtane nwo mgbonda” la ali.—1 Kɔlentema 13:4, 5; 1 Pita 3:8, 9.
7. Saa yɛ diema bie nee yɛ lɛ edwɛkɛ a, duzu a ɔwɔ kɛ yɛyɛ a?
7 Ɔdwu mekɛ ne bie a yɛnlɛ yɛ diema bie anwo adwenle ɛtane ɛdeɛ, noko yɛnwu kɛ ɔ nee yɛ lɛ edwɛkɛ. Saa ɔba ye zɔ a, yɛbahola yɛabu yɛ nye yɛagua zo na yɛamaa ɛlɔlɛ aheda ninyɛne zo kɛmɔ 1 Pita 4:8 kile la. Anzɛɛ yɛbalumua yɛahɔ ye ɛkɛ yɛ nee ye ahɔziezie edwɛkɛ ne.—Mateyu 5:23, 24.
8. Saa yɛ diema diedinli bie ɛlɛyɛ debie mɔɔ gyegye yɛ a, duzu a yɛbahola yɛayɛ wɔ nwo a?
8 Ɔbahola yeara ye kɛ yɛ diema diedinli bie ɛlɛyɛ debie mɔɔ gyegye yɛ nee mediema gyɛne a. Asoo ɔnrɛyɛ kpalɛ kɛ ɛ nee ye kɛdendɛ? Ɛbahola wɔayɛ zɔ. Saa ɛto ɛ rɛle aze ɛkilehile edwɛkɛ ne anu ɛkile ye a, debie kpalɛ bahola avi nu ara. Noko ɔwɔ kɛ ɛdumua ɛbiza ɛ nwo kɛ: ‘Asoo ɔlɛyɛ debie mɔɔ Baebolo ne tendɛ tia? Anzɛɛ kɛmɔ asolo ɛleka mɔɔ mevi nee kɛzi bɛtetele me la ati a menwu ye zɔhane a?’ Nea boɛ na wɔanli ɛ ti anwo mɛla wɔangyinla zo wɔambua awie mɔ ndɛne. (Gyemise 4:11, 12) Gyihova ɛnyɛ nyeyenu, ɔdie menli mɔɔ vi ɛleka ngakyile la kɔsɔɔti na ɔsi bɛ nwo abotane wɔ mekɛ mɔɔ bɛlɛnyi sunsum nu la.
9. (a) Nwane mɔ a di ɛtane mɔɔ anyebolo wɔ nu la anwo gyima wɔ asafo ne anu a? (b) Mekɛ boni a ɔle awie mɔɔ bɛvo ye la gyima kɛ ɔkɛlumua ɔkɛdu agyakɛ a, na adwenle boni a ɔwɔ kɛ ɔnyia a?
9 Saa asafo ne anu sonla bie kɔyɛ ɛtane mɔɔ anyebolo wɔ nu, mɔɔ le kɛ adwɔmanebɔlɛ la a, ɔwɔ kɛ bɛdi nwolɛ gyima ndɛndɛ. Nwane mɔ a ɔwɔ kɛ di nwolɛ gyima a? Mgbanyima ne mɔ ɔ. (Gyemise 5:14, 15) Noko akee, saa awie fo ɔ gɔnwo, bie a, wɔ gyimayɛlɛ nu anzɛɛ ɛdendɛlɛ nu a, ɔwɔ kɛ nuhua ne mɔɔ bɛvo ye la dumua kɔ mɔɔ yɛle nvonleɛ ne la ɛkɛ na bɛ mu nwiɔ bɛsiezie edwɛkɛ ne. (Mateyu 18:15) Saa edwɛkɛ ne ampɛ a, ɔwɔ kɛ ɔdi adehilelɛ mɔɔ wɔ Mateyu 18:16, 17 la azo. Ɔwɔ kɛ ɛlɔlɛ mɔɔ yɛlɛ yɛmaa yɛ diema mɔɔ ɛvo nee ɛhulolɛ mɔɔ yɛlɛ kɛ ‘yɛ sa baha’ ye la ka yɛ maa yɛyɛ ɛhye wɔ adenle mɔɔ baha ye ahonle la azo.—Mrɛlɛbulɛ 16:23.
10. Saa edwɛkɛ bie ba a, duzu a baboa amaa yɛali nwolɛ gyima kpalɛ a?
10 Mekɛ mɔɔ edwɛkɛ bie kɛra la, kpole o, ekyi o, saa yɛte kɛzi Gyihova bu ye la abo a ɔboa yɛ. Ɔkyi ɛtane biala, na wɔ ye mekɛ nloa, ɔmaa bɛye menli mɔɔ yɛ ɛtane mɔɔ anyebolo wɔ nu na bɛnnu bɛ nwo la bɛfi ye ahyehyɛdeɛ ne anu. Noko akee, ɔwɔ kɛ yɛkakye kɛ yɛ muala yɛfo ngyikyi ngyikyi na yɛhyia ye abotane nee ye anwunvɔnezelɛ. Yemɔti saa awie fo yɛ a ɔwɔ kɛ yɛsukuezukoa Gyihova. Saa yɛse anwuvɔne a, ɛnee yɛlɛda ye ɛlɔlɛ ne bie ali.—Ɛfɛsɛsema 5:1, 2.
Bɛbɔ Mɔdenle “Bɛbuke Bɛ Munli Nu”
11. Duzu ati a Pɔɔlo wulale Kɔlentema ne anwosesebɛ kɛ “bɛbuke bɛ munli nu” a?
11 Pɔɔlo vale mekɛ dɔɔnwo a hyehyɛle asafo ne mɔɔ wɔ Kɔlente mɔɔ wɔ Gilisi la a. Ɔyɛle gyima ɛsesebɛ ɔboale mediema mɔɔ wɔ ɛkɛ ne la, na ɛnee ɔkulo bɛ. Noko ɛnee bɛ nuhua bie mɔ ɛngulo ye edwɛkɛ. Bɛdendɛle bɛtiale ye. Ɔdule bɛ folɛ kɛ “bɛbuke bɛ munli nu” bɛhile ɛlɔlɛ bɛmaa bɛ gɔnwo mɔ. (2 Kɔlentema 6:11-13; 12:15) Ɔwɔ kɛ yɛ muala yɛbɔ mɔdenle yɛsuzu ɛlɔlɛ mɔɔ yɛda ye ali yɛkile yɛ gɔnwo mɔ la anwo na yɛkpondɛ ndenle mɔɔ yɛbava zo yɛabuke yɛ munli nu la.—1 Dwɔn 3:14.
12. Duzu a bamaa ɛlɔlɛ mɔɔ yɛlɛ yɛmaa asafo ne anu amra amuala la ayɛ kpole a?
12 Asoo asafo ne anu amra bie mɔ wɔ ɛkɛ ne mɔɔ ɔyɛ se ɔmaa yɛ kɛ yɛkɛhwe yɛkɛbikye bɛ ɔ? Saa yɛbu yɛ nye yɛgua bɛ sinlidɔlɛ ngyikyi ngyikyi zo, kɛmɔ yɛkɛhulo kɛ bɛdabɛ noko bɛkɛyɛ bɛkɛmaa yɛ la a, ɔbamaa abusuabɔlɛ mɔɔ wɔ yɛ nee bɛ avinli la anu amia. Saa yɛnea subane kpalɛ mɔɔ bɛlɛ na yɛfa yɛ adwenle yɛsie zo a nganeɛdelɛ kpalɛ mɔɔ yɛlɛ ye bɛ nwo la banyia anyuhɔlɛ. Kpolerazulɛ biala ɛnle nwolɛ kɛ ɛhye bamaa ɛlɔlɛ mɔɔ yɛlɛ yɛmaa bɛ la ayɛ kpole.—Luku 6:32, 33, 36.
13. Kɛ yɛbayɛ yɛabuke yɛ munli nu yɛahile ɛlɔlɛ yɛahile bɛdabɛ mɔɔ bɛwɔ yɛ asafo ne anu la ɛ?
13 Nɔhalɛ nu, yɛnrɛhola yɛnrɛyɛ mɔɔ yɛkulo kɛ yɛyɛ yɛmaa awie mɔ la kɔsɔɔti. Yɛnrɛhola yɛnrɛzoma awie ko biala wɔ ayia ko biala abo. Yɛɛ yɛnrɛhola yɛnrɛdo ɛsalɛ yɛnrɛvɛlɛ awie ko biala wɔ mekɛ mɔɔ yɛ nee yɛ gɔnwo mɔ ɛlɛto ɛkponle la. Noko akee, asoo ɔnrɛyɛ kpalɛ kɛ yɛkɛva mekɛ ekyii yɛ nee awie mɔɔ wɔ yɛ asafo ne anu la kɛli adwelie amaa yɛanwu ye kpalɛ ɔ? Ɔdwu mekɛ ne bie a yɛbahola yɛado ɛsalɛ yɛavɛlɛ awie mɔɔ yɛnze ye kpalɛ la yɛ nee ye ahɔ daselɛlilɛ.
14. Saa yɛ nee Keleseɛnema mɔɔ yɛnze bɛ la yia a, kɛ yɛbayɛ na yɛahile kɛ yɛfi ahonle muala nu yɛkulo yɛ nwo ngoko ngoko ɛ?
14 Keleseɛnema nyianu maa yɛnyia adenle kpalɛ kɛ yɛkɛbuke yɛ munli nu yɛkɛla ɛlɔlɛ ali. Menli dɔɔnwo ba ayia ɛhye mɔ abo. Yɛnrɛhola bɛ muala soma, noko yɛbahola yɛava yɛ nyɛleɛ yɛahile kɛ yɛfa bɛ boɛyɛlɛ yɛdumua yɛ ɛhulolɛdeɛ nyunlu. Yɛbahola yɛava yɛ ɛnwomenlelielɛ mekɛ ne yɛazoma menli mɔɔ de bikye yɛ la yɛahile kɛ yɛdwenle bɛ nwo. Kenlebie, menli mɔɔ wɔ azɛlɛ ye azo la kɔsɔɔti babɔ nu kɛ mediema mrenya nee mraalɛ azonle nɔhalɛ Nyamenle nee menli kɔsɔɔti bɛ Ze ne. Nea anyelielɛ mɔɔ ɔbayɛ kɛ yɛbanwu yɛ nwo ngoko ngoko a! Ahonle muala nu ɛlɔlɛ baha yɛ amaa yɛayɛ ɛhye. Duzu ati a ɛmbɔ ɔ bo kɛkala a?
Suzu nwo Fa Ti Nu
• Saa edwɛkɛ bie ba Keleseɛnema avinli a, kɛzi ɔwɔ kɛ bɛsiezie ye ɛ, na duzu ati ɔ?
• Mekɛ mɔɔ yɛlɛnyi sunsum nu la ndenle boni azo a ɔwɔ kɛ yɛ ɛlɔlɛ noko yɛ kpole a?
• Kɛzi yɛkola yɛda ahonle muala nu ɛlɔlɛ ali yɛkile menli mɔɔ ɛnle yɛ gɔnwo mɔ bɔbɔ la ɛ?
[Debiezukoalɛ kpuyia ne mɔ]
[Nvoninli wɔ mukelɛ 148]
Yɛda Keleseɛne ɛlɔlɛ ali wɔ ndenle ngakyile zo, bie a le asafo ayia bo
