Edwɛkɛ Mɔɔ Yɛ Muala Yɛ Nwo wɔ Nu
Tile 6
Edwɛkɛ Mɔɔ Yɛ Muala Yɛ Nwo wɔ Nu
1, 2. (a) Tumililɛ nwo edwɛkɛ boni a Seetan hɔhwenle rale Yidɛn a? (b) Kɛzi yɛnwu ɛhye wɔ edwɛkɛ mɔɔ ɔhanle la anu ɛ?
Ɛ NWO wɔ edwɛkɛ bie mɔɔ nwolɛ hyia kpalɛ kpalɛ mɔɔ fane alesama anwo la anu. Mɔɔ ɛbayɛ ye wɔ edwɛkɛ ɛhye anwo la a bahile kɛ ɛbanyia ngoane kenlebie anzɛɛ ɛnrɛnyia a. Edwɛkɛ ɛhye zile Yidɛn, mekɛ mɔɔ atuadelɛ bɔle ɔ bo la. Wɔ mekɛ zɔhane Seetan bizale Yive kɛ: “Yemɔti Nyamenle ɛze bɛ kɛ, ‘Bɛmmadi mbakama mɔɔ wɔ tola ye anu la biala bie’ ɔ?” Raalɛ ne buale kɛ Nyamenle ɛha ye wɔ baka ko bie anwo kɛ: “Bɛmmadi baka ne . . . ma ne bie, . . . anrɛɛ bɛkɛwu.” Akee Seetan dole Gyihova ɛzonle kɛ ɔle adalɛ, ɔluakɛ Seetan hanle kɛ tɛ ɛdielɛ mɔɔ Adam nee Yive badie Nyamenle la a bamaa bɛadɛnla aze dahuu a. Seetan hilele kɛ Nyamenle ɛlɛfa nwolɛ adenle mɔɔ Ye abɔdeɛ lɛ ye si mɔɔ le kpalɛ nee mɔɔ le ɛtane nwo kpɔkɛ la avea bɛ. Seetan hanle ye peenyi kɛ: “Nyamenle ze kɛ saa bɛdi baka ne ma ne bie a bɛ nye babuke na bɛayɛ kɛ ɔdaye Nyamenle la, na bɛanwu mɔɔ le kpalɛ, [bɛanwu] mɔɔ le ɛtane la.”—Mɔlebɛbo 3:1-5.
2 Ɔda ali kɛ, ɛnee Seetan ɛlɛkile kɛ saa alesama si bɛ ti anwo kpɔkɛ a ɔbaboa bɛ yeadɛla kɛ bɛbali Nyamenle mɛla zo. Ɔluale ɛhye azo ɔdendɛle ɔtiale Nyamenle tumililɛ. Ɛhye hɔvale edwɛkɛ mɔɔ anwo hyia tɛla biala la rale—Nyamenle maanzaleɛ tumililɛ, adenle mɔɔ ɔlɛ ɔdi tumi la anwo rale edwɛkɛ. Edwɛkɛ ne a le kɛ: Boni a le kpalɛ maa alesama a, Gyihova tumililɛ anzɛɛ tumililɛ mɔɔ ɛnvi Nyamenle la ɔ? Anrɛɛ Gyihova bahola azɛkye Adam nee Yive ɛkɛ ne ala, noko anrɛɛ yemɔ ɛnrɛbua tumililɛ nwo edwɛkɛ ne kpalɛ. Ɛnee saa Nyamenle maa alesama mekɛ maa bɛyɛ mɔɔ bɛkulo la a yɛɛ ɔbahola yeagyinla mɔɔ vi bɛtianwolilɛ ne anu bara la azo yeabua edwɛkɛ ne kpalɛ a.
3. Edwɛkɛ boni bieko a Seetan hɔhwenle rale a?
3 Gyihova tumililɛ nwo edwɛkɛ mɔɔ Seetan hɔhwenle rale la anga Yidɛn ɛkɛ ne ala. Eza ɔmanle nɔhalɛ mɔɔ awie mɔ di amaa Gyihova la anwo rale edwɛkɛ. Ɛhye rayɛle edwɛkɛ bieko mɔɔ le kɛ tumililɛ nwo ɛdeɛ ne la. Ye ɛzonledolɛ ne hanle Adam nee Yive abo zo amra nee Nyamenle sunsum nu mralɛ amuala, mɔɔ Gyihova belamunli Ralɛ ne mɔɔ ɔkulo ye kpalɛ la bɔbɔ boka nwo a. Kɛ neazo la, wɔ Dwobu mekɛ zo, Seetan hanle kɛ tɛ ɛlɔlɛ a maa Gyihova abɔdeɛ sonle ye a, emomu nvasoɛ mɔɔ bɛnyia ye la ati ɔ. Ɔhilele kɛ saa bɛyia ngyegyelɛ mɔɔ anu yɛ se la a bɛ muala bɛbayɛ mɔɔ bɛdabɛ mumua ne bɛkulo la.—Dwobu 2:1-6; Yekile 12:10.
Mɔɔ Tetedwɛkɛ Ɛmaa Yela Ali La
4, 5. Duzu a alesama mɔɔ ɛli bɛ ti anwo la anwo tetedwɛkɛ ɛmaa yela ali a?
4 Edwɛkɛ mɔɔ hyia wɔ tumililɛ nwo edwɛkɛ ne anu la a le ɛhye: Nyamenle ambɔ alesama mɔɔ saa bɛtwe bɛ nwo bɛfi ye tumililɛ bo a ɔbawie bɛ boɛ a. Ɔbɔle bɛ mɔɔ ɔwɔ kɛ bɛdi ye tenlene mɛla zo a. Ngapezonli Gyɛlɛmaya hanle kɛ: “O [Gyihova], meze kɛ sonla ɔdaye ɔnlɛ ɔ nwo; sonla ɔdaye ɔnlɛ ye ngoane zo tumi. O [Gyihova, tenrɛdenrɛ], me.” (Gyɛlɛmaya 10:23, 24) Yemɔti Nyamenle Edwɛkɛ ne tu folɛ kɛ: “Fa ɛ rɛle wula [Gyihova] anu, mmafa wɔ adwenle ɛsɔ ɛ ngome wɔ nrɛlɛbɛ.” (Mrɛlɛbulɛ 3:5) Kɛmɔ Nyamenle vale abɔdeɛ nwo mɛla bɔle alesama amaa bɛahola bɛadɛnla ngoane nu la, zɔhane ala a ɔmanle bɛ ɛbɛlabɔlɛ nu mɛla, mɔɔ saa bɛdi zolɛ a ɔbamaa bɛanyia abusua mɔɔ koyɛlɛ wɔ nu a.
5 Ɔda ali kɛ, ɛnee Nyamenle ze kɛ saa alesama abusua ne twe bɛ nwo fi ye tumililɛ bo a ɔnrɛwie bɛ boɛ. Alesama mɔɔ ɛhwe bɛ nwo ɛvi Nyamenle tumililɛ bo la ɛyɛ maanyɛlɛ, gualilɛ, nee ɛzonlenlɛ nwo ngyehyɛleɛ ngakyile noko ɔle kɛ bɛlɛ kɛndɛne bɛlɛkɔ azule la. Mɔɔ vi ngyehyɛleɛ ngakyile ɛhye mɔ anu ɛra la a le basabasayɛlɛ, konle konle, yɛɛ ewule. “Bie mɔ lɛ tumi ɛlɛsisi bie mɔ bɛamaa bɛanwu amaneɛ.” (Nolobɔvo ne 8:9) Ɛhye a ɛhɔ zo wɔ alesama tetedwɛkɛ nu a. Nyamenle Edwɛkɛ ne hanle kɛ, “amumuyɛma nee adalɛma bahɔ zolɛ amaa bɛ ti ayɛ se kpalɛ.” (2 Temɔte 3:13) Na ɔnvane nwolɛ kɛ alesama ɛnyia anyuhɔlɛ wɔ abɔdeɛ nwo nrɛlɛbɛnwunlɛ nee ninyɛneyɛlɛ nu la esiane mɔɔ bie ɛtɛsile ɛlɛ la a ɛsisi ɛvolɛ ɛya mɔɔ ɛze ɛhɔ la anu a. Gyɛlɛmaya 10:23 ɛra nu bɔkɔɔ—bɛambɔ sonla kɛ ɔli ɔ ti anwo.
6. Ɔnrɛhyɛ duzu a Nyamenle bayɛ ye wɔ alesama mɔɔ ɛhwe bɛ nwo ɛvi ɔ nwo la anwo ɛ?
6 Anwubɛnyunlu mɔɔ vi tumililɛ mɔɔ ɛnvi Nyamenle anu ɛra la ɛla ye ali kɛ alesama tumililɛ ɛnrɛyɛ boɛ ɛlɛ. Nyamenle tumililɛ ala a bava anyelielɛ, koyɛlɛ, kpɔkɛdelɛ kpalɛ, nee ngoane ara a. Nyamenle Edwɛkɛ ne kile kɛ alesama tumililɛ mɔɔ ɛnvi Gyihova la awieleɛ ɛbikye. (Mateyu 24:3-14; 2 Temɔte 3:1-5) Ɔnrɛhyɛ Nyamenle bava ɔ nwo alie alesama edwɛkɛ nu na yeala ye tumililɛ ali wɔ azɛlɛ ye azo. Baebolo ngapezo kile kɛ mekɛ mɔɔ alesama arelemgbunlililɛ mɔɔ wɔ ɛkɛ ne ɛnɛ la wɔ zolɛ la Nyamenle bamaa belemgbunlililɛ ko mɔɔ bɛnrɛzɛkye ye ɛlɛ la avinde anwuma. Awie mɔ gyɛne ɛnrɛhola ɛnrɛlie belemgbunlililɛ ne anzɛɛ dasanli biala ɛnrɛli tumi wɔ azɛlɛ ye azo bieko. Belemgbunlililɛ ɛhye bazɛkye arelemgbunlililɛ mɔɔ wɔ azɛlɛ ye azo ɛnɛ la amuala, na yemɔ a badɛnla ɛkɛ ne dahuu a.—Daneɛle 2:44.
Nyamenle Ewiade Fofolɛ ne anu Ɛhɔlɛ
7. Saa Nyamenle tumililɛ sɛkye alesama ɛdeɛ ne a, nwane mɔ a banyia ngoane a?
7 Saa Nyamenle tumililɛ sɛkye alesama tumililɛ a, nwane mɔ a banyia ngoane a? Baebolo ne bua kɛ: “Menli mɔɔ di boɛ [bɛdabɛ mɔɔ bɛgyi Nyamenle tumililɛ ne anzi] la badɛnla azɛlɛ ne azo, yɛɛ menli mɔɔ ze nrɛlɛbɛ la baha zolɛ. Bɛbaye amumuyɛma [bɛdabɛ mɔɔ bɛngyi Nyamenle tumililɛ ne anzi la] bɛavi azɛlɛ ne azo, na bɛadu ngunzima bɛavi zolɛ.” (Mrɛlɛbulɛ 2:21, 22) Edwɛndolɛnli ne noko hanle kɛ: “Ɔnrɛhyɛ biala ɛnee amumuyɛnli ne abo zo ɛminli . . . Tenlenema bava azɛlɛ ne ayɛ bɛ ɛdeɛ, na bɛadɛnla zolɛ dahuu.”—Edwɛndolɛ 37:10, 29.
8. Kɛ Nyamenle bayɛ ahile ye wienyi kɛ ɔlɛ adenle ɔdi tumi ɛ?
8 Mekɛ mɔɔ Nyamenle ɛzɛkye Seetan ewiade ne ɛwie la, ɔbava ye ewiade fofolɛ ne yeazie ɔ bo zo. Ewiade fofolɛ ne baye basabasayɛlɛ, konle konle, ehyia, amaneɛnwunlɛ, anwodolɛ, nee ewule mɔɔ ɛzie alesama wɔ ɛvolɛ apenle apenle dɔɔnwo anu la avi ɛkɛ. Baebolo ne ka nyilalɛ mɔɔ alesama mɔɔ yɛ tieyɛ banyia la anwo edwɛkɛ kɛ: “[Nyamenle bakyikyi] bɛ nye anwo monle. Ewule ɛnle ɛkɛ bieko, monle ɛnle ɛkɛ, nyane ɛnle ɛkɛ, ɛzunlɛ ɛnle ɛkɛ ne bieko. Ɔluakɛ alumua ninyɛne ne mɔ ɛze ɛhɔ.” (Yekile 21:3, 4) Nyamenle balua anwuma Belemgbunlililɛ ne mɔɔ wɔ Kelaese asa anu la azo ahile kɛ ɔlɛ adenle ɔdi tumi na yemɔ a ɔle yɛ Tumivolɛ a.—Wulomuma 16:20; 2 Pita 3:10-13; Yekile 20:1-6.
Mɔɔ bie mɔ Ɛyɛ ye wɔ Edwɛkɛ ne Anwo La
9. (a) Duzu a menli mɔɔ lile nɔhalɛ manle Gyihova la yɛle wɔ ye edwɛkɛ nwo a? (b) Duzu a Nowa yɛle hilele kɛ ɔdi nɔhalɛ a, na duzu a yɛsukoa yɛfi ye neazo ne anu a?
9 Mrenya nee mraalɛ mɔɔ dɛnlanle aze tete ne la bie mɔ lile nɔhalɛ manle Gyihova na bɛliele ye tumililɛ ne bɛdole nu. Ɛnee bɛze kɛ bɛ ngoane gyi ɛdielɛ mɔɔ bɛbadie na bɛayɛ mɔɔ Nyamenle ɛha la azo. Menli ɛhye mɔ anu ko a le Nowa. Nyamenle zele Nowa kɛ: “Mezi pi kɛ mesɛkye ewiade ye nee nuhua menli ne amuala . . . Yemɔti . . . bobɔ ɛlɛnemgbole.” Nowa lile Gyihova adehilelɛ ne azo. Ɔwɔ nuhua kɛ bɛbɔle menli mɔɔ ɛha la kɔkɔ ɛdeɛ noko bɛyɛle mɔɔ bɛkulo la kɛ asɛɛ debie ɛzulolɛ biala ɛmbanzi la. Nowa bobɔle ɛlɛne kpole bie na eza ɔbɔle Gyihova tenlene ndenle ne mɔ nolo. Baebolo ne kɔ zo ka kɛ: “Nowa yɛle ɛhye mɔ na ɔyɛle debie biala mɔɔ Nyamenle zele ye la.”—Mɔlebɛbo 6:13-22; Hibuluma 11:7; 2 Pita 2:5.
10. (a) Duzu a Ebileham nee Sɛla yɛle hilele kɛ bɛgyi Gyihova tumililɛ nzi a? (b) Kɛzi Ebileham nee Sɛla neazo ne bahola ayɛ nvasoɛ amaa yɛ ɛ?
10 Ebileham nee Sɛla noko yɛle neazo kpalɛ gyinlanle Gyihova tumililɛ nzi na bɛdiele ye bɔkɔɔ. Ɛnee bɛde Babelonia suakpole Yule mɔɔ gyi boɛ la azo. Noko mekɛ mɔɔ Gyihova zele Ebileham kɛ ɔdu ɔhɔ maanle fofolɛ mɔɔ ɔnze zo anu la, Ebileham “hɔle kɛmɔ [Gyihova] ɛze ye la.” Ɔda ali kɛ ɛnee Sɛla noko lɛ asetɛnla kpalɛ—ɛnee ɔlɛ aako, agɔnwolɛma, nee mbusua. Noko, ɔnvane nwolɛ kɛ ɛnee ɔnze kɛ ɛkɛ ne tɛnlabelɛ ne si de la, ɔbɛlɛle ɔ nwo aze ɔdiele Gyihova nee ɔ hu na ɔhɔle Keena.—Mɔlebɛbo 11:31–12:4; Gyima ne 7:2-4.
11. (a) Gyinlabelɛ boni anu a Mosisi gyinlanle Gyihova tumililɛ nzi a? (b) Duzu a yɛsukoa yɛfi Mosisi neazo ne anu a?
11 Mosisi boka menli mɔɔ gyinlanle Gyihova tumililɛ nzi la anwo. Ɔyɛle ɛhye wɔ gyinlabelɛ mɔɔ anu yɛ se la anu, bɔbɔ wɔ Yigyibiti Belemgbunli Falo anyunlu. Ɛhye ɛngile kɛ ɛnee Mosisi die ɔ nwo di somaa. Emomu, ɛnee ɔte nganeɛ kɛ ɔnrɛhola ɔnrɛdendɛ kpalɛ bɔbɔ. Noko ɔdiele Gyihova. Gyihova gyinlanle ɔ nzi na ɔluale ɔ diema Aalɔn anwo zo ɔmanle Mosisi hanle Gyihova edwɛkɛ hilele Falo mɔɔ ɛnee le dapele la. Yizilayɛma bie mɔ bɔbɔ dendɛle tiale Mosisi. Noko Mosisi yɛle debie biala mɔɔ Gyihova hanle hilele ye la, na ɔlua ɔ nwo zo bɛliele Yizilayɛma bɛvile Yigyibiti.—Adendulɛ 7:6; 12:50, 51; Hibuluma 11:24-27.
12. (a) Duzu a kile kɛ nɔhalɛ mɔɔ yɛdi yɛamaa Gyihova la ɛnle Nyamenle mɛla mɔɔ bɛhɛlɛ mɔɔ yɛdi zolɛ la ala ɛ? (b) Saa yɛte nɔhalɛlilɛ ɛhye abo a kɛzi ɔbaboa yɛ yeamaa yɛava edwɛkɛ mɔɔ wɔ 1 Dwɔn 2:15 la yɛali gyima ɛ?
12 Bɛdabɛ mɔɔ bɛlile nɔhalɛ bɛmanle Gyihova la andwenle kɛ Nyamenle mɛla mɔɔ bɛhɛlɛ la ala a ɔwɔ kɛ bɛdi zo a. Mekɛ mɔɔ Pɔtefaa aye ne bɔle mɔdenle kɛ ɔbɛlɛbɛla Dwosefi yeamaa ɔ nee ye ala la ɛnee bɛtɛkɛlɛle Nyamenle mɛla biala mɔɔ tendɛ tia agyalɛzɛkyelɛ a. Noko akee, ɛnee Dwosefi ze agyalɛ nwo ngyehyɛleɛ mɔɔ Gyihova yɛle wɔ Yidɛn la. Ɛnee ɔze kɛ Nyamenle anye ɛnrɛlie awie aye mɔɔ bɛ nee ye da la anwo. Yeambɔ mɔdenle kɛ ɔsɔ kɛzi Gyihova bamaa ye adenle amaa yeayɛ kɛ Yigyibitima ne la yeanlea. Ɔdwenledwenlenle mɔɔ ɛnee Gyihova ɛha ɛhile alesama la anwo, ɔnwunle mɔɔ Nyamenle kulo la na ɔbɔle mɔdenle ɔyɛle.—Mɔlebɛbo 39:7-12; Edwɛndolɛ 77:11, 12.
13. Kɛzi menli ɛhye mɔ manle Abɔnsam yɛle adalɛ ɛ (a) Dwobu (b) Hibuluma nsa ne?
13 Saa bɛdabɛ mɔɔ bɛsonle Gyihova nɔhalɛ nu la yia sɔnea mɔɔ anu yɛ se la bɔbɔ a, bɛkɔ zo bɛtie ye. Seetan dole Dwobu mɔɔ ɛnee Gyihova die ye to nu la ɛzonle kɛ saa ye ninyɛne fi ɔ sa anzɛɛ anwonyane bɔ ye a, ɔbakpo Nyamenle. Ɔwɔ nuhua kɛ ɛnee Dwobu ɛnze deɛ mɔɔ ɔti ɔlɛnwu amaneɛ la ɛdeɛ, noko ɔmanle Abɔnsam yɛle adalɛ. (Dwobu 2:9, 10) Ɛvolɛ ɛya ɛya dɔɔnwo anzi, ɛnee Seetan tɛbɔ mɔdenle kɛ ɔmaa ye edwɛkɛ ne ayɛ nɔhalɛ, yemɔti ɔmanle Babelɔn belemgbunli bie nwunlonwunlanle Hibulu mgbavolɛ nsa kɛ saa bɛanzonle ananze ne mɔɔ belemgbunli ne ɛyɛ la a ɔbava bɛ yeagua sendɔlɔra kpole bie anu yeahu bɛ. Ɛnee ɔwɔ kɛ mgbavolɛ ne mɔ kpa kɛ bɛbadie belemgbunli ne anzɛɛ bɛbadie Gyihova mɛla mɔɔ tia awozonle ɛzonlenlɛ la. Bɛlale ye ali wienyi kɛ Gyihova a bɛsonle ye a na yemɔ a le bɛ Tumivolɛ Bedevinli a. Ɛnee nɔhalɛ mɔɔ bɛdi bɛamaa Nyamenle la hyia bɛ tɛla ngoane mɔɔ ɛnee bɛlɛ la!—Daneɛle 3:14-18.
14. Duzu a maa yɛnwu kɛ alesama mɔɔ ɛnli munli la kola di nɔhalɛ maa Gyihova ɛ?
14 Asoo neazo ɛhye mɔ kile kɛ ɔwɔ kɛ awie yɛ sonla mɔɔ di munli na yeahola yeali nɔhalɛ yeamaa Gyihova, anzɛɛ awie mɔɔ kɛvo la ɛnrɛnyia Nyamenle anyunlu ɛlolɛ fee? Kyɛkyɛ! Baebolo ne kile kɛ ɛnee ɔdwu mekɛ ne bie a Mosisi fo. Ɔwɔ nuhua kɛ Gyihova anye anlie ɛhye anwo ɛdeɛ, noko yeamkpo Mosisi. Ɛnee Gyisɛse Kelaese ɛzoanvolɛ ne mɔ noko tɔ sinli. Ɔluakɛ yɛnli munli la ati, saa yɛfo na tɛ yɛ nye fuu a Gyihova ɛmkpo yɛ. Saa yɛ sinlidɔlɛ maa yɛkɔyɛ ɛtane bie a, ɔnle kɛ yɛmaa ɔyɛ yɛ subane, emomu ɔwɔ kɛ yɛfi ahonle nu yɛnu yɛ nwo. Saa yɛyɛ ye zɔ a ɛnee yɛlɛkile kɛ yɛkulo mɔɔ Gyihova se ɔle kpalɛ yɛɛ yɛkyi mɔɔ ɔkile kɛ ɔle ɛtane la. Gyisɛse afɔlebɔlɛ ne mɔɔ kola kpɔda yɛ ɛtane la anu diedi mɔɔ yɛbanyia la bahola amaa yɛanyia Nyamenle anyunlu ɛlolɛ.—Emɔso 5:15; Gyima ne 3:19; Hibuluma 9:14.
15. (a) Wɔ alesama amuala anu nwane a diele Nyamenle bɔkɔɔ a, na duzu a ɔmanle ɔlale ali a? (b) Nvasoɛ boni a yɛnyia ye wɔ Gyisɛse neazo ne anu a?
15 Noko, asoo ɛhye kile kɛ alesama mɔɔ ɛnli munli la ɛnrɛhola ɛnrɛdie Gyihova bɔkɔɔ ɔ? Wɔ ɛvolɛ kɛyɛ 4,000 anu ɛnee kpuyia ɛhye anwo mualɛ ne le fealeranu edwɛkɛ nwuanzanwuanza. Adam mɔɔ ɛnee di munli la anyɛ neazo kpalɛ wɔ nyamenlezonlenlɛ nu. Yemɔti ɛnee nwane a bahola ayɛ a? Ɔ bo zo amra mɔɔ ɛnli munli la anu biala angola anyɛ. Gyisɛse Kelaese angomekye ala a holale yɛle neazo kpalɛ a? (Hibuluma 4:15) Mɔɔ Gyisɛse yɛle la hilele kɛ anrɛɛ Adam mɔɔ ɛnee di munli la bahola adie Nyamenle bɔkɔɔ, saa ɛnee ɔkulo kɛ ɔyɛ zɔ a. Ɛnee nvonleɛ biala ɛnle ninyɛne mɔɔ Nyamenle ɛbɔ la anwo. Yemɔti, saa yɛkulo kɛ yɛdi Nyamenle mɛla zo na yɛsonle Gyihova, Maanzaleɛ Tumivolɛ ne kpalɛ a ɛnee ɔwɔ kɛ yɛsukuezukoa Gyisɛse Kelaese.—Mɛla ne 32:4, 5.
Duzu a Yɛdayɛ Noko Yɛbayɛ A?
16. Duzu ati a ɔwɔ kɛ yɛyɛ yɛ nye gyɛlɛmgbɛɛnye wɔ mekɛ mɔɔ yɛgyi Gyihova tumililɛ ne anzi la ɛ?
16 Ɛnɛ, ɔwɔ kɛ yɛ nuhua ko biala kile afoa mɔɔ ɔgyi wɔ maanzaleɛ tumililɛ nwo edwɛkɛ ne anu la. Saa yɛla ye ali bagua nu kɛ yɛgyi Gyihova anzi a, Seetan badu yɛ anyebɔne. Ɔfa ngyegyelɛ ngakyile ɔba yɛ nwo zo na ɔbahɔ zo yeayɛ zɔ kɔkpula kɛ bɛbaye ye ewiade ɛtane ne bɛavi ɛkɛ. Ɔwɔ kɛ yɛyɛ yɛ nye gyɛlɛmgbɛɛnye. (1 Pita 5:8) Yɛ nyɛleɛ a yɛbava yɛahile kɛ yɛgyi Gyihova tumililɛ ne anzi na eza yɛdi nɔhalɛ yɛmaa ye a. Saa yɛbu ɛbɛlatane kɛ debie kpalɛ ɔluakɛ yebu zo wɔ ewiade a, ɔnrɛwie yɛ boɛ. Nyamenle mɔɔ yɛkɔ zo yɛadie ye la kile kɛ yɛbava Gyihova ngyinlazo yɛali gyima wɔ yɛ ɛbɛlabɔlɛ biala anu.
17. Ɛleka mɔɔ adalɛ nee awule bo vi la anwo edwɛkɛ boni a ɔwɔ kɛ maa yɛkoati nyɛleɛ ɛhye mɔ a?
17 Kɛ neazo la, yɛnrɛhola yɛnrɛva Seetan mɔɔ le “adalɛ kɔsɔɔti bɛ ze” la agyakɛ. (Dwɔn 8:44) Ɔwɔ kɛ yɛdi nɔhalɛ wɔ debie biala anu. Ngakula ta bɔ adalɛ kile bɛ awovolɛ wɔ Seetan ewiade ye anu. Noko Keleseɛne ngakula kpo ɛhye ɛyɛlɛ, na bɛmaa Seetan mɔɔ ɛdo Nyamenle menli ɛzonle kɛ saa bɛyia ngyegyelɛ mɔɔ anu yɛ se la a bɛbakpo Nyamenle la yɛ adalɛ. (Dwobu 1:9-11; Mrɛlɛbulɛ 6:16-19) Akee gualilɛ nu nyɛleɛ mɔɔ maa awie koati nɔhalɛ Nyamenle ne na ɔbayɛ “adalɛ kɔsɔɔti bɛ ze” ne agɔnwo la noko wɔ ɛkɛ. Ɔwɔ kɛ yɛkpo nyɛleɛ zɔhane mɔ. (Maeka 6:11, 12) Bieko, awule ɛnle debie kpalɛ yemɔti kanzɛ awie kyia debie nwo na ɔkɔwua bie, anzɛɛ ɔkɔwua awie mɔɔ lɛ ezukoa la bɔbɔ a ɔngile kɛ mɔɔ ɔyɛle la ɛnle ɛtane. (Mrɛlɛbulɛ 6:30, 31; 1 Pita 4:15) Saa awule ɛrayɛ subane mɔɔ ɛbu zo wɔ ɛleka mɔɔ yɛde anzɛɛ deɛ mɔɔ awie kɛwua la le ekyi bie bɔbɔ a, ɔwɔ kɛ yɛnwu kɛ awuleyɛlɛ tia Nyamenle mɛla.—Luku 16:10; Wulomuma 12:2; Ɛfɛsɛsema 4:28.
18. (a) Sɔnea boni a bara alesama anwo zo wɔ Kelaese Ɛvolɛ Apenle Tumililɛ ne awieleɛ a? (b) Duzu subane a ɔwɔ kɛ yɛnyia ye kɛkala a?
18 Wɔ Kelaese Ɛvolɛ Apenle Tumililɛ ne anu, bɛbava Seetan nee ye sunsum evinli ne mɔ bagua efiade, mɔɔ bɛnrɛhola bɛnrɛgyegye alesama a. Ɛhye bayɛ anwodɔlɛ mekɛ! Noko bɛbagyakyi bɛ ekyii wɔ ɛvolɛ apenle ko ne awieleɛ. Seetan nee ye ɛlɔnema babɔ mɔdenle kɛ bɛgyegye alesama mɔɔ ɛlɛdi nɔhalɛ amaa Nyamenle la. (Yekile 20:7-10) Saa yɛnyia adenle yɛtɛnla aze zɔhane mekɛ ne a, duzu a yɛbayɛ ye wɔ maanzaleɛ tumililɛ nwo edwɛkɛ ne anwo a? Zɔhane mekɛ ne ɛnee alesama kɔsɔɔti ɛli munli yemɔti bɛbazɛkye awie biala mɔɔ anye fuu kɛbulu Nyamenle mɛla zo la bɔkɔɔ. Ɛhye ati a nwolɛ hyia kɛ yɛkɛdie Gyihova adehilelɛ mɔɔ ɔdua Baebolo ne anzɛɛ ye ahyehyɛdeɛ ne azo ɔfa ɔmaa la ɛnɛ a! Saa yɛyɛ zɔ a ɛnee yɛlɛkile kɛ yɛdie ye yɛto nu kɛ yɛ Maanzaleɛ Tumivolɛ.
Suzu nwo Fa Ti Nu
• Edwɛkɛ mɔɔ anwo hyia kpalɛ kpalɛ la boni a yɛ nwo wɔ nu a? Kɛ ɔyɛle mɔɔ yɛ nwo rale nu ɛ?
• Duzu a ɛ nye die nwo wɔ kɛzi mrenya nee mraalɛ mɔɔ dɛnlanle aze tete ne la lile nɔhalɛ manle Gyihova la anwo a?
• Duzu ati a ɔhyia kɛ yɛfa yɛ nyɛleɛ yɛwula Gyihova anyunlunyia alehyenlɛ ko biala ɛ?
[Debiezukoalɛ kpuyia ne mɔ]
