Fa Nyamenlezonlenlɛ Di Gyima wɔ Sua Nu
Tile 17
Fa Nyamenlezonlenlɛ Di Gyima wɔ Sua Nu
1. Kɛzi Nyamenle Edwɛkɛ ne anu adehilelɛ mɔɔ bɛfa bɛdi gyima la ɛboa agyalɛma bie mɔ ɛ?
GYIHOVA a hyehyɛle agyalɛ a, na ye Edwɛkɛ ne fa adehilelɛ kpalɛ maa mbusua. Menli mɔɔ fa adehilelɛ ɛhye di gyima la anu dɔɔnwo agyalɛ ɛgyinla. Bie mɔ mɔɔ ɛnee ɛtɛgyale bɛ nwo noko bɛde la ɛva bɛ agyalɛ ɛwula mɛla bo. Agyalɛma bie mɔ ɛgyakyi bɛ sa aze ɛwulowulalɛ. Mrenya atisesebɛ mɔɔ ɛnee teetee bɛ ye mɔ nee bɛ mra la ɛzukoa ɛlɛda ahunlunyele nee ɛlɔlɛ ali.
2. Duzu a boka Keleseɛne abusua asetɛnla nwo a?
2 Ninyɛne dɔɔnwo mɔɔ bie a le mekɛ tendenle mɔɔ ɔwɔ kɛ agyalɛma bɔ nu tɛnla, abusua nu ɛzonlelilɛ mɔɔ yɛdi nwolɛ gyima, nee kɛzi yɛ nee abusua ne anu amra di la boka Keleseɛne abusua asetɛnla nwo. (Ɛfɛsɛsema 5:33–6:4) Ɔwɔ nuhua kɛ yɛze mɔɔ Baebolo ne ka ye abusua asetɛnla nwo la ɛdeɛ, noko ɔwɔ kɛ yɛbɔ mɔdenle na yɛahola yɛava Baebolo nu folɛdulɛ yɛali gyima. Yɛngulo kɛ yɛyɛ kɛ menli mɔɔ bulule Nyamenle mɛla zo mɔɔ Gyisɛse dendɛle tiale bɛ la. Ɛnee bɛlɛ adwenle mɔɔ ɛndenrɛ la kɛ saa bɛyɛ ɛzonlenlɛ nu ninyɛne bie mɔ ala a ɛnee yewie. (Mateyu 15:4-9) Yɛngulo kɛ yɛyɛ yɛ nwo kɛ yɛsonle Nyamenle noko yɛkpo kɛ yɛkɛva nyamenlezonlenlɛ yɛkɛli gyima wɔ sua nu. Emomu, yɛkulo kɛ yɛda nɔhalɛ nyamenlezonlenlɛ mɔɔ le “anwonyia kpole la” ali.—1 Temɔte 5:4; 6:6; 2 Temɔte 3:5.
Ɔnle Kɛ Bɛkpakye Agyalɛ Nu
3. (a) Ngyegyelɛ boni a agyalɛ dɔɔnwo ɛlɛyia ye ɛnɛ a, na duzu a ɔwɔ kɛ yɛsika yɛ bo kɛ yɛkɛyɛ a? (b) Fa wɔ Baebolo ne ye kpuyia mɔɔ doɔdoa zo la anloa.
3 Agyalɛ dɔɔnwo ɛlɛtɔ nzule nu ɛnɛ. Agyalɛma bie mɔ mɔɔ ɛdɛnla ɛhyɛ bɔbɔ la bɔ ewole gya fofolɛ. Ɛnɛ yerayɛ abɔfo ɛbɔlɛ kɛ mgbavolɛ nee mbɛlɛra mɔɔ bɛgya la kɛtete nu wɔ mekɛ ezinra bie anu. Ɔnle kɛ yɛyɛ mɔɔ menli ɛlɛyɛ la bie, emomu ɔwɔ kɛ yɛyɛ mɔɔ bazɔ Gyihova anye la. Yemɔti maa yɛzuzu kpuyia nee ngɛlɛlera mɔɔ doɔdoa zo la anwo amaa yɛanwu mɔɔ Nyamenle Edwɛkɛ ne ka ye wɔ mekɛ tendenle mɔɔ ɔwɔ kɛ agyalɛma bɔ nu tɛnla la anwo.
Saa nrenya nee raalɛ gya a, mekɛ tendenle nyɛ a ɔwɔ kɛ bɛtɛnla a? (Maake 10:6-9; Wulomuma 7:2, 3)
Ngɛlɛlera nu ngyinlazo boni a bɛkola bɛgyinla zo bɛbɔ ewole na bɛgya fofolɛ a? (Mateyu 5:31, 32; 19:3-9)
Kɛzi Gyihova te nganeɛ wɔ ewolebɔlɛ mɔɔ ɛngyi ye Edwɛkɛ ne azo la anwo ɛ? (Malakae 2:13-16)
Asoo Baebolo ne kile kɛ agyalɛ nu ngyegyelɛ sɔbelɛ a le ndetenu ɔ? (1 Kɔlentema 7:10-13)
Gyinlabelɛ boni mɔ anu a awie kola tete agyalɛ nu a? (Edwɛndolɛ 11:5; Luku 4:8; 1 Temɔte 5:8)
4. Duzu a ɛmaa agyalɛ bie mɔ abo ɛtima a?
4 Agyalɛ bie mɔ abo ɛtima. Duzu ati ɔ? Saa menli nwiɔ ne nyi na bɛagya a ɔboa, noko bokavolɛ mɔɔ dwenle ɔ gɔnwo anwo na ɔlɛ ɛhulolɛ kɛ ɔ nee ye kɛzuzu ninyɛne nwo la anwo hyia. Bokavolɛ mɔɔ lɛ ɛlɔlɛ maa Gyihova na ɔdie ɔto nu kɛ Baebolo ne a ɔwɔ kɛ bɛgyinla zo bɛsiezie edwɛkɛ la anwo hyia kpalɛ kpalɛ. (Edwɛndolɛ 119:97, 104; 2 Temɔte 3:16, 17) Sonla zɛhae ɛnrɛva ɛnrɛzie ye adwenle nu kɛ saa ninyɛne angɔ boɛ a ɔbatete agyalɛ nu anzɛɛ ɔbabɔ ewole. Ɔnrɛgyinla ye bokavolɛ ne sinlidɔlɛ zo ɔnrɛbu ɔ nye ɔnrɛgua ɔdaye mumua ne ye ɛzonlelilɛ zo. Emomu ɔbanwu ngyegyelɛ ne na yeakpondɛ ɔ nloa ayile.
5. (a) Kɛzi nɔhalɛ mɔɔ yɛdi yɛamaa Gyihova la boa wɔ agyalɛ nu ɛ? (b) Saa yɛyia dwazotia bɔbɔ a, nyilalɛ boni a vi Gyihova ngyinlazo mɔɔ yɛbava yɛali gyima la anu ara a?
5 Seetan edwɛkɛ a le kɛ saa yɛnwu amaneɛ a yɛbakpo Gyihova ndenle ne mɔ. (Dwobu 2:4, 5; Mrɛlɛbulɛ 27:11) Noko Gyihova Alasevolɛ dɔɔnwo mɔɔ bɛ bokavolɛ dwazotia ɛmaa bɛnwu amaneɛ la ɛtɛkpole bɛ agyalɛ. Bɛkɔ zo bɛdi nɔhalɛ bɛmaa Gyihova na bɛdi ye mɛla zo. (Mateyu 5:37) Nea anyelielɛ mɔɔ ɔyɛ kɛ bɛdabɛ mɔɔ bɛgyinla dwazotia ɛhye mɔ anloa la anu bie mɔ bokavolɛ ɛraboka bɛ bɛlɛsonle Gyihova a! (1 Pita 3:1, 2) Keleseɛnema mɔɔ bɛ bokavolɛma ɛnyɛ nzenzaleɛ biala anzɛɛ bɛkpo bɛ ɔluakɛ bɛsonle Gyihova la ze kɛ bɛbanyia nyamenlezonlenlɛ mɔɔ bɛda ye ali wɔ bɛ sua nu la azo nvasoɛ.—Edwɛndolɛ 55:22; 145:16.
Awie Biala Yɛ Ye Afoa nu Ɛdeɛ
6. Ngyehyɛleɛ boni a ɔwɔ kɛ agyalɛma di zo na bɛ agyalɛ agyinla a?
6 Nɔhalɛ nu, tɛ menli nwiɔ mɔɔ bɔ nu adɛnla la ala a maa agyalɛ gyinla a. Ɔwɔ kɛ bokavolɛ ko biala kile ɛbulɛ maa tileyɛlɛ nwo ngyehyɛleɛ mɔɔ Gyihova ɛyɛ la. Ɛhye maa ninyɛne kɔ zo pɛpɛɛpɛ na anzondwolɛ ba sua nu. Yɛkenga ye 1 Kɔlentema 11:3 kɛ: “Mekpondɛ kɛ bɛte ɔ bo kɛ nrenya biala amenle a le Kelaese, raalɛ biala amenle a le ɔ hu, yɛɛ Kelaese amenle a le Nyamenle.”
7. Kɛ ɔwɔ kɛ kunli si di ye tileyɛlɛ ne wɔ abusua ne anu ɛ?
7 Asoo ɛyɛle deɛ mɔɔ lumua ngyɛnu ɛhye anu la nzonlɛ ɔ? Ɔwɔ kɛ nrenya biala bɛlɛ ɔ nwo aze maa Kelaese mɔɔ le ɔ Menle la. Ɛhye kile kɛ ɔwɔ kɛ kunli da Gyisɛse subane ne bie ali wɔ ye tileyɛlɛ ne anu. Kelaese bɛlɛ ɔ nwo aze maa Gyihova, ɔkulo asafo ne kpalɛ na ɔdi ye ngyianlɛ nwo gyima. (1 Temɔte 3:15) “Ɔdole ye ngoane aze wɔ ɔ ti.” Gyisɛse dwenle menli nwo, ‘ɔle bɛtɛɛ yɛɛ ɔmmemaa ɔ nwo zo.’ Bɛdabɛ mɔɔ bɛba ye tileyɛlɛ bo la “ɛkɛla ne mɔ anwo kɛdɔ bɛ.” Saa kunli nee ye abusua ne di ye zɛhae a, ɔkile kɛ ɔbɛlɛ ɔ nwo aze ɔmaa Kelaese. Ɛhye bamaa Keleseɛnenli yelɛ anwu ye kɛ nvasoɛ wɔ zo na ɔle anwodɔlɛ kɛ ɔ nee ɔ hu kɛyɛ ko na ɔkɛbɛlɛ ɔ nwo aze ɔkɛmaa ye tileyɛlɛ.—Ɛfɛsɛsema 5:25-33; Mateyu 11:28, 29; Mrɛlɛbulɛ 31:10, 28.
8. (a) Duzu ati a ngyegyelɛ kola ba abusua nu ɔnvane nwolɛ kɛ yɛfa Baebolo adehilelɛ yɛdi gyima la ɛ? (b) Ɔba ye zɛhae a, duzu a ɔwɔ kɛ yɛyɛ a?
8 Noko akee, ngyegyelɛ bara. Bie a kolaa na abusua ne anu sonla bie abɔ ɔ bo kɛ ɔfa Baebolo ngyinlazo yeali gyima la, ɛnee ɔle ye subane kɛ ɔngulo kɛ awie mɔ kɛhile ye mɔɔ ɔwɔ kɛ ɔyɛ la. Yemɔti ɛdendɛlɛ bɛtɛɛ bɔbɔ ɛmkputi ye ahonle. Yɛze kɛ Baebolo ne ka kɛ “bɛye . . . ɛya biala bɛgua. Bɛmmadi butule anzɛɛ bɛmmayɛ aholoba.” (Ɛfɛsɛsema 4:31) Na saa aholoba ɛyɛlɛ nee ɛdeɛdeanlɛ ɛrayɛ abusua ne anu sonla bie subane a, duzu a ɔwɔ kɛ yɛyɛ a? Kakye kɛ mekɛ mɔɔ bɛnwulonwunla Gyisɛse babɔ ye aholoba la yeandɛ ɔ nloa nu, emomu ɔvale ɔ nwo ɔdole ɔ Ze anwo zo. (1 Pita 2:22, 23) Yemɔti saa ngyegyelɛ ba abusua ne anu a, kɛ anrɛɛ yɛbayɛ mɔɔ ewiade ne anu amra yɛ la bie la, yɛmaa yɛ nyamenlezonlenlɛ da ali na yɛsɛlɛ Gyihova ɛkɛ ne moalɛ.—Mrɛlɛbulɛ 3:5-7.
9. Kɛ anrɛɛ Keleseɛne kunlima kɛha nvonleɛ biala anwo edwɛkɛ la, duzu a bɛ nuhua dɔɔnwo ɛzukoa ɛlɛyɛ a?
9 Ɔwɔ nuhua kɛ ninyɛne ɛnrɛhakyi ndɛndɛ ɛdeɛ, noko saa yɛto yɛ rɛle aze yɛfa Baebolo nu folɛdulɛ yɛdi gyima kpalɛ a ɔbayɛ moalɛ. Kunlima dɔɔnwo mɔɔ ɛzukuezukoa kɛzi Kelaese nee asafo ne di la ɛnwu kɛ bɛ agyalɛ ɛnyia anyuhɔlɛ. Menli mɔɔ ɛnli munli la a wɔ zɔhane asafo ne anu a. Noko Gyisɛse kulo asafo ne, ɔyɛ neazo kpalɛ ɔmaa ye, na ɔfa Ngɛlɛlera ne ɔboa ye ɔmaa ɔnyia anyuhɔlɛ. Ɔvale ye ngoane ɔdole aze ɔmanle asafo ne. (1 Pita 2:21) Ye neazo ne ɛboa Keleseɛne kunlima dɔɔnwo ɛmaa bɛlɛdi bɛ tileyɛlɛ ne wɔ adenle kpalɛ zo bɛaboa bɛamaa bɛ agyalɛ ali munli. Nvasoɛ wɔ ɛhye ɛyɛlɛ zo tɛla kɛ bɛbaha nvonleɛ biala anwo edwɛkɛ anzɛɛ bɛbakpo kɛ bɛ nee bɛ bokavolɛ ne kɛdendɛ.
10. (a) Adenle boni azo a kunli anzɛɛ yelɛ mɔɔ kile kɛ ɔle Keleseɛnenli bɔbɔ la bahola amaa abusua ne anu amra anwo ahyele bɛ a? (b) Duzu a yɛbahola yɛayɛ yɛazɔ ngyegyelɛ zɛhae anloa a?
10 Na saa kunli bie ɛndwenle ye abusua ne nganeɛdelɛ nwo anzɛɛ ɔnyɛ ngyehyɛleɛ bɛnzukoa Baebolo ne yɛɛ ɔnyɛ ninyɛne gyɛne ɛ? Anzɛɛ saa yelɛ bie noko nee ɔ hu ɛnyɛ ko yɛɛ ɔmbɛlɛ ɔ nwo aze ɛ? Menli mɔɔ fa ɛbulɛ nee bɛ abusua ne suzu edwɛkɛ nwo la nyia zolɛ nvasoɛ. (Mɔlebɛbo 21:10-12; Mrɛlɛbulɛ 15:22) Saa bɔbɔ yɛannyia mɔɔ yɛkpondɛ la a, yɛ nuhua ko biala bahola aboa amaa anzondwolɛ ara abusua ne anu ɔlua Nyamenle sunsum ne ma ne mɔɔ yɛbala ye ali wɔ yɛ ɛbɛlabɔlɛ nu, na yɛavi ɛlɔlɛ nu yɛadwenle abusua ne anu amra anwo la azo. (Galeehyeama 5:22, 23) Saa yɛanva yɛ adwenle yɛanzɔ awie, na yɛyɛ yɛ afoa nu ɛdeɛ yɛkile kɛ yɛfa nyamenlezonlenlɛ yɛbɔ yɛ ɛbɛla a, abusua ne banyia anyuhɔlɛ.—Kɔlɔsaema 3:18-21.
Ɛleka Mɔɔ Yɛbanyia Moalɛ La
11, 12. Duzu moalɛ a Gyihova ɛva ɛmaa amaa yɛ abusua asetɛnla ayɛ anyelielɛ a?
11 Ɛleka dɔɔnwo wɔ ɛkɛ ne mɔɔ menli kɔ kɔdie bɛ abusua nwo folɛdulɛ a. Noko Nyamenle Edwɛkɛ ne anu a folɛdulɛ kpalɛ mɔɔ tɛla biala la wɔ a, na yɛ nye sɔ moalɛ mɔɔ Nyamenle dua ye ahyehyɛdeɛ ne mɔɔ ɛnyelɛ nwu ye la azo fa maa amaa yɛahola yɛava folɛdulɛ ne yɛali gyima la. Asoo ɛlɛnyia zɔhane moalɛ ne anu nvasoɛ ɔ?—Edwɛndolɛ 119:129, 130; Maeka 4:2.
12 Saa ɛye asafo ayia ɛhɔlɛ ɛsie ahane a, asoo bɛyɛ abusua Baebolo ɛzukoalɛ nwo ngyehyɛleɛ? Mbusua mɔɔ yɛ zɔhane la kola bɔ nu sonle kpalɛ. Bɛ abusua asetɛnla yɛ anyelielɛ wɔ mekɛ mɔɔ bɛlɛfa Nyamenle Edwɛkɛ bɛali gyima la.—Mɛla ne 11:18-21.
13. (a) Saa yɛlɛ abusua nwo kpuyia bie a, nienwu a yɛbanyia moalɛ yɛavi a? (b) Duzu a ɔwɔ kɛ da ali wɔ kpɔkɛ biala mɔɔ yɛbazi la anu a?
13 Bie a abusua asetɛnla nwo kpuyia bie mɔ gyegye wɔ. Kɛ neazo la, awolɛ nu ɛhwehwenlɛ ɛ? Asoo ɛkolɛyelɛ le debie kpalɛ? Saa kakula bie anye ɛnlie sunsum nu ninyɛne nwo kpalɛ a, duzu a ɔwɔ kɛ ɛyɛ ye wɔ mekɛ mɔɔ abusua ne ɛlɛbɔ nu azonle la ɛ? Kpuyia zɛhae mɔ anwo edwɛkɛ dɔɔnwo wɔ mbuluku mɔɔ Gyihova Alasevolɛ ɛyɛ la anu. Sukoa kɛzi bɛfa mbuluku mɔɔ bɛfa bɛsukoa Baebolo ne, mɔɔ index ngakyile boka nwo, bɛdi gyima bɛkpondɛ mualɛ la. Saa ɛnlɛ buluku bie mɔɔ index ne twe adwenle kɔ zo la bie a, kɔkpondɛ bie wɔ mbuluku ɛzielɛ ɛleka ne mɔɔ wɔ Belemgbunlililɛ Asalo ne la. Anzɛɛ bie a ɛnee mbuluku ɛhye mɔ wɔ wɔ kɔmputa zo. Eza ɛbahola ɛ nee Keleseɛne mrenya nee mraalɛ mɔɔ ɛnyi sunsum nu la azuzu edwɛkɛ ne anwo. Noko nwu ye kɛ tɛ kenle ne amuala a bɛ mualɛ ne bayɛ ɛhɛe anzɛɛ kyɛkyɛ a. Fane dɔɔnwo ne ala ɔwɔ kɛ ɛdawɔ mumua ne anzɛɛ ɛ nee wɔ bokavolɛ ne si nwolɛ kpɔkɛ. Ɔba ye zɛhae a si kpɔkɛ mɔɔ bahile kɛ tɛ bagua nu angomekye a ɛda wɔ nyamenlezonlenlɛ ali a, emomu, sua nu noko.—Wulomuma 14:19; Ɛfɛsɛsema 5:10.
Suzu nwo Fa Ti Nu
• Kɛzi nɔhalɛ mɔɔ awie di yeamaa ye agyalɛ nu bokavolɛ la kile kɛ ɔdi nɔhalɛ ɔmaa Gyihova ɛ?
• Saa yɛyia ngyegyelɛ wɔ agyalɛ nu a, duzu a baboa amaa yɛayɛ mɔɔ sɔ Nyamenle anye a?
• Saa abusua ne anu amra bie mɔ bɔbɔ ɛngola ɛnyɛ mɔɔ ɔwɔ kɛ bɛyɛ la a, duzu a yɛbahola yɛayɛ yɛaboa a?
[Debiezukoalɛ kpuyia ne mɔ]
[Nvoninli wɔ mukelɛ 155]
Ɔwɔ kɛ kunli da Gyisɛse subane ne mɔ ali wɔ ye tileyɛlɛ ne anu
[Nvoninli wɔ mukelɛ 157]
Baebolo ne mɔɔ abusua ne bɔ nu sukoa ye dahuu la maa bɛyɛ ko
