Fanwodi Mɔɔ Gyihova Azonvolɛ Lɛ La
Tile 5
Fanwodi Mɔɔ Gyihova Azonvolɛ Lɛ La
1, 2. (a) Duzu fanwodi a Nyamenle vale manle menli nwiɔ ne mɔɔ lumua la a? (b) Kile mɛla mɔɔ bɛvale bɛmanle Adam nee Yive la bie mɔ.
MEKƐ mɔɔ Gyihova bɔle nrenya nee raalɛ mɔɔ lumua la ɔmanle bɛ fanwodi mɔɔ tɛla fanwodi biala mɔɔ alesama lɛ ye ɛnɛ la. Ɔbɔle bɛ ɔguale Paladaese, Yidɛn Tola kɛnlɛma ne anu. Ɛnee bɛdi munli wɔ adwenle nee nwonane nu la ati, anwodolɛ biala angola anzɛkye anyelielɛ mɔɔ ɛnee bɛlɛ wɔ bɛ asetɛnla nu la. Ɛnee ewule ɛnle ɛkɛ ne ɛmmaa bɛ kɛmɔ ɔwɔ ɛkɛ ne ɔmaa awie biala ɔvi zɔhane mekɛ ne la. Eza Gyihova anyɛ bɛ kɛ milahyinli la, emomu, ɛnee bɛlɛ adenle bɛkpa mɔɔ bɛkulo na bɛsi bɛ ti anwo kpɔkɛ. Noko akee, amaa bɛahɔ zo bɛanyia fanwodi kɛnlɛma ɛhye la, ɛnee ɔwɔ kɛ bɛdi Nyamenle mɛla zo.
2 Kɛ neazo la, suzu abɔdeɛ nwo mɛla mɔɔ Nyamenle ɛva ɛmaa la anwo nea. Ɔda ali kɛ bɛangɛlɛ mɛla ɛhye mɔ anu dɔɔnwo, noko bɛbɔle Adam nee Yive mɔɔ ɛnee ɔnyɛ se kɛ bɛkɛli zo a. Ɛhɔne maa bɛnwu kɛ ɔwɔ kɛ bɛdi debie; nzuhɔne kakye bɛ kɛ ɔwɔ kɛ bɛno nzule; sɛnzɛne ne kɔtɔ ɔmaa bɛnwu ye kɛ ɔwɔ kɛ bɛkɔda. Gyihova eza manle bɛ gyima. Ɛnee gyima ɛhye le mɛla ɔluakɛ ɛnee ɔbahile bɛ mɔɔ ɔwɔ kɛ bɛyɛ la. Ɔzele bɛ kɛ bɛwo na bɛnlea debie biala mɔɔ lɛ ngoane wɔ azɛlɛ ye azo la azo na bɛdɛlɛ bɛ Paladaese ne anu bɛhɔdwu aleɛabo amuala. (Mɔlebɛbo 1:28; 2:15) Gyima mɔɔ yɛ anyelielɛ na nvasoɛ wɔ zo la boni ɛne! Ɛnee ɔle gyima mɔɔ bamaa bɛ nye alie na bɛava bɛ adwenle nee bɛ anwosesebɛ bɛali gyima wɔ adenle kpalɛ zo a. Bieko, ɛnee bɛkola bɛsi adenle mɔɔ bɛbava zo bɛayɛ bɛ gyima ne la anwo kpɔkɛ. Duzu bieko a ɛnee hyia bɛ a?
3. Duzu a ɛnee ɔwɔ kɛ Adam nee Yive yɛ na bɛahola bɛava fanwodi mɔɔ bɛlɛ bɛsi kpɔkɛ la bɛali gyima kpalɛ ɛ?
3 Ɔda ali kɛ, fanwodi mɔɔ ɛnee Adam nee Yive lɛ si bɛ ti anwo kpɔkɛ la ɛngile kɛ kpɔkɛ biala mɔɔ bɛbazi la bayɛ nvasoɛ amaa bɛ. Ɛnee ɔwɔ kɛ bɛfa Nyamenle mɛla nee ye ngyinlazo bɛdi gyima wɔ mekɛ mɔɔ bɛlɛsi kpɔkɛ la. Kɛ bɛbayɛ na bɛanwu mɛla nee ngyinlazo ɛhye mɔ ɛ? Ɛnee ɔwɔ kɛ bɛtie bɛ Bɔvolɛ ne, bɛnea ninyɛne mɔ yebɔ la na bɛdwenledwenle nwolɛ. Nyamenle manle Adam nee Yive nrɛlɛbɛ mɔɔ bamaa bɛahola bɛava mɔɔ bɛzukoa la bɛali gyima a. Kɛmɔ ɛnee bɛdi munli la ati, ɛnee ɔnyɛ se kɛ bɛkɛla Nyamenle subane ne mɔ ali wɔ bɛ kpɔkɛzilɛ nu. Nɔhalɛ nu, ɛnee saa bɛ nye sɔ mɔɔ Nyamenle ɛyɛ ɛmaa bɛ la na bɛkulo kɛ ɔdie bɛ ɔto nu amgba a, bɛbala subane ɛhye mɔ ali.—Mɔlebɛbo 1:26, 27; Dwɔn 8:29.
4. (a) Asoo mɛla mɔɔ bɛvale bɛmanle Adam nee Yive kɛ bɛmmadi bakama ne la zile bɛ fanwodi nwo adenle? (b) Duzu ati a ɛnee ɛhye le adehilelɛ mɔɔ fɛta a?
4 Yemɔti, ɛnee ɔfɛta kɛ Nyamenle zɔle bɛ tieyɛ nee ɛhulolɛ mɔɔ bɛlɛ kɛ bɛkɛli ye mɛla zo kɛ bɛ Ngoane Maavolɛ la nleanle a. Gyihova manle Adam mɛla kɛ: “Ɛkola ɛdi bakama biala mɔɔ wɔ tola ye anu la bie, na kpalɛ nee ɛtane ɛnwunlɛ baka ne, yemɔ mmadi ye ma ne bie, ɔluakɛ kenle ko ne mɔɔ ɛkɛli bie la, ɛbawu.” (Mɔlebɛbo 2:16, 17) Mɔɔ bɛbɔle Yive la bɛvale mɛla ko ne ala bɛmanle ye. (Mɔlebɛbo 3:2, 3) Asoo ɛhye zile bɛ fanwodi nwo adenle ɔ? Kyɛkyɛ. Ɛnee bɛlɛ mbakama dɔɔnwo mɔɔ yɛ fɛ mɔɔ bɛbali mɔɔ ɔngyia kɛ bɛkɛli mɔɔ bɛduale bɛ la bie a. (Mɔlebɛbo 2:8, 9) Ɛnee ɔwɔ kɛ bɛnwu kɛ azɛlɛ ne le Nyamenle ɛdeɛ ɔluakɛ ɔdaye a ɔbɔle a. Yemɔti ɔlɛ adenle ɔdi mɛla mɔɔ nee ye atiakunlukpɔkɛ yia na ɔle nvasoɛ ɔmaa alesama a.—Edwɛndolɛ 24:1, 10.
5. (a) Kɛ ɔyɛle mɔɔ Adam nee Yive minlinle bɛ anyunlunyia fanwodi ne ɛ? (b) Duzu a ralile fanwodi mɔɔ ɛnee Adam nee Yive lɛ la agyakɛ anu a, na kɛzi ɛhye ɛha yɛ ɛ?
5 Noko duzu a zile a? Anwumabɔvolɛ bie yɛle angomedi na ɔvale ye fanwodi ne ɔlile gyima wɔ adenle ɛtane zo, na ɔrayɛle Seetan, mɔɔ kile “Dwazotiavolɛ” la. Ɔluale debie mɔɔ nee Nyamenle ɛhulolɛdeɛ ɛnle ko la azo ɔbɛlɛbɛlale Yive. (Mɔlebɛbo 3:4, 5) Adam rabokale Yive anwo bɛdonle Nyamenle mɛla. Ɔluakɛ bɛvale debie mɔɔ ɛnee ɛnle bɛ ɛdeɛ la ati bɛ anyunlunyia fanwodi ne vile bɛ sa. Ɛtane rayɛle bɛ menle, na kɛmɔ Nyamenle bɔle bɛ kɔkɔ la, bɛwule. Bɛvale ɛtane bɛgyakyile bɛ mra. Ɛhye ati, yɛlɛ ɛtaneyɛlɛ subane na yemaa yɛdɔ sinli wɔ nwonane nu yɛɛ yeva anwodolɛ, ɛrelerayɛlɛ, nee ewule yera. Ɛtaneyɛlɛ subane ɛhye mɔɔ Seetan ɛmaa yeyɛ kpole la ɛmaa ɛkpɔlɛ, amumuyɛ, nzisi, nee konle mɔɔ ɛhu menli mgbe mgbe la ɛra ewiade. Nea kɛzi ɛhye nee fanwodi mɔɔ Nyamenle vale manle alesama wɔ mɔlebɛbo ne la ɛnle ko a!—Mɛla ne 32:4, 5; Dwobu 14:1, 2; Wulomuma 5:12; Yekile 12:9.
Nienwu a Yɛbahola Yɛanyia Fanwodi A?
6. (a) Nienwu a yɛbahola yɛanyia nɔhalɛ fanwodi yɛavi a? (b) Fanwodi boni a Gyisɛse hanle nwolɛ edwɛkɛ a?
6 Ɔlua ninyɛndane mɔɔ ɛlɛkɔ zo ɛnɛ wɔ ɛleka biala la ati, ɔnyɛ nwanwane kɛ menli kulo kɛ bɛnyia fanwodi kpole a. Noko nienwu a yɛbahola yɛanyia nɔhalɛ fanwodi yɛavi a? Gyisɛse hanle kɛ: “Saa bɛkɔ zolɛ bɛdi me ngilehilelɛ zo a, ɛnee bɛle me ɛdoavolɛma amgba; bɛbanwu nɔhalɛ ne, na nɔhalɛ ne bamaa bɛanyia bɛ ti [“bɛanyia fanwodi,” NW].” (Dwɔn 8:31, 32) Fanwodi ɛhye ɛnle kɛ mɔɔ menli kpondɛ mɔɔ ɔti bɛtu arane ko bɛfa fofolɛ bɛsie zolɛ la. Emomu, fanwodi ɛhye maa yɛnwu deɛ mɔɔ ɔti alesama yia ngyegyelɛ la. Ɛnee Gyisɛse ɛlɛka ɛtane tumi bo mɔɔ yɛfi la anwo edwɛkɛ. (Dwɔn 8:24, 34-36) Yemɔti, saa awie bayɛ Gyisɛse Kelaese nɔhalɛ ɛdoavolɛ a, ngakyile kpole ba ye asetɛnla nu—ɔnyia fanwodi!
7. (a) Duzu a ɛtane tumi bo mɔɔ yɛnle ye kɛkala la kile a? (b) Duzu a ɔwɔ kɛ yɛyɛ na yɛanyia zɔhane fanwodi ne a?
7 Ɛhye ɛngile kɛ ɛtaneyɛlɛ subane ne ɛngola ɛnnyia nɔhalɛ Keleseɛnema anwo zo tumi. Kɛmɔ bɛwole bɛ ɛtane nu la ati, ɔwɔ kɛ bɛpele dahuu na bɛanyɛ ɛtane. (Wulomuma 7:21-25) Noko akee, saa awie fa Gyisɛse ngilehilelɛ ne bɔ ye ɛbɛla a, ɛnee ɔnle ɛtane akɛlɛ bieko. Ɛtane ɛnrɛyɛ ɔ menle mɔɔ ɔwɔ kɛ dahuu ɔtie ye a. Ɔnrɛbɔ ɛbɛla mɔɔ ɛnlɛ atiakunlukpɔkɛ mɔɔ bamaa ye adwenle abua ye fɔlɛ a. Ɔlua diedi mɔɔ ɔlɛ ye Kelaese afɔlebɔlɛ ne anu la ati, bɛbava ye ɛtane bɛahyɛ ye na yeanyia adwenle mɔɔ anu te wɔ Nyamenle anyunlu. Ɛtaneyɛlɛ subane ne babɔ mɔdenle kɛ ɔdi ɔ nwo zo tumi, noko saa ɔkakye Kelaese ngilehilelɛ kpalɛ ne na ɔkoati subane ɛhye a ɛnee ɔlɛkile kɛ ɛtane ɛnle ɔ menle bieko.—Wulomuma 6:12-17.
8. (a) Fanwodi boni mɔ a nɔhalɛ Keleseɛne ɛzonlenlɛ maa yɛnyia a? (b) Duzu subane a ɔwɔ kɛ yɛda ye ali yɛkile ewiade arelemgbunli a?
8 Suzu fanwodi mɔɔ yɛlɛ ye kɛ Keleseɛnema la anwo. Adalɛ ngilehilelɛ, diedi mgbane nee ɛtane akɛlɛyɛlɛ ɛnlɛ yɛ nwo zo tumi bieko. Gyinlabelɛ mɔɔ mɔwuamra wɔ nu nee ewudwazo ne anwo nɔhalɛ mɔɔ yɛnwu ye la ɛmmaa yɛnzulo ewule bieko. Yɛranyia anyelazo ɔluakɛ yɛranwu ye kɛ ɔnrɛhyɛ Nyamenle tenlene Belemgbunlililɛ ne bazɛkye alesama arelemgbunlililɛ mɔ ɛnli munli la avi ɛkɛ. (Daneɛle 2:44; Mateyu 6:10) Noko akee, fanwodi ɛhye ɛngile kɛ ɔnle kɛ yɛbu tumivolɛma nee bɛ mɛla ne mɔ.—Taetɛse 3:1, 2; 1 Pita 2:16, 17.
9. (a) Kɛzi Gyihova fi ɛlɔlɛ nu boa yɛ maa yɛnyia fanwodi kpalɛ mɔɔ wɔ ɛkɛ ne ɛnɛ maa alesama la ɛ? (b) Kɛ yɛbayɛ na yɛazi kpɔkɛ kpalɛ ɛ?
9 Gyihova anyɛ yɛ mɔɔ ɔwɔ kɛ yɛsɔ ɛbɛlabɔlɛ ngakyile yɛnea na yɛanwu mɔɔ le kpalɛ la. Ɔze kɛzi yɛde, mɔɔ maa yɛ kunlu dwo yɛ nwo, yɛɛ mɔɔ maa yɛnyia nvasoɛ dahuu la. Ɔze mɔɔ yɛyɛ a ɔbahola yeazɛkye abusuabɔlɛ mɔɔ yɛ nee Ye nee yɛ gɔnwo mɔ lɛ, na bie a yeazi yɛ adenle kɛ yɛkɛhɔ ewiade fofolɛ ne anu la. Gyihova fi ɛlɔlɛ nu dua Baebolo ne nee ye ahyehyɛdeɛ ne mɔɔ wɔ azɛlɛ ye azo la azo ɔmaa yɛnwu ninyɛne ɛhye mɔ amuala. (Maake 13:10; Galeehyeama 5:19-23; 1 Temɔte 1:12, 13) Ɛnee akee yedo ye kɛ yɛdayɛ mumua ne yɛbava fanwodi mɔɔ Nyamenle ɛva ɛmaa yɛ la yɛakpa mɔɔ yɛbayɛ la. Saa yɛdi mɔɔ Baebolo ne ka la azo a, yɛnrɛyɛ kɛ Adam la, yɛbazi kpɔkɛ kpalɛ. Yɛbahile kɛ abusuabɔlɛ mɔɔ yɛ nee Gyihova lɛ la sonle bolɛ tɛla debie biala mɔɔ yɛlɛ ye wɔ yɛ ɛbɛlabɔlɛ nu la.
Fanwodi Fofolɛ Ɛkpondɛlɛ
10. Duzu fanwodi a Gyihova Alasevolɛ bie mɔ kulo kɛ bɛnyia a?
10 Saa ɔdwu mekɛ ne bie a ngakula mɔɔ le Gyihova Alasevolɛ nee mɔɔ ati ɛdi bɔbɔ la te nganeɛ kɛ ɔwɔ kɛ bɛnyia fanwodi fofolɛ. Ɔyɛ bɛ kɛ ewiade ne anu yɛ fɛ. Na saa bɛdwenledwenle ɛhye anwo a ɔmaa bɛnyia ɛhulolɛ kɛ bɛkɛyɛ ninyɛndane mɔɔ ɛbu zo wɔ ewiade ne anu la bie. Bie a ɔnle bɛ adwenle nu kɛ bɛno nyile ɛtane ɛtane, nza dɔɔnwo anzɛɛ bɛbɔ adwɔmane, noko bɛbɔ ɔ bo bɛfa menli mɔɔ ɛnle nɔhalɛ Keleseɛnema la agɔnwolɛ na bɛbɔ mɔdenle kɛ bɛ nee bɛ kɛyɛ ko. Bie a bɛbabɔ ɔ bo bɛazukuezukoa bɛ ɛdendɛlɛ nee bɛ nyɛleɛ bɔbɔ.—3 Dwɔn 11.
11. Nwane mɔ a ɔdwu mekɛ ne bie a bɛbahola babɛlɛbɛla yɛ bɛamaa yɛahɔbɔ ɛbɛlatane a?
11 Ɔtɔ kenle ne bie a menli mɔɔ kile kɛ bɛsonle Gyihova la bie mɔ bɔbɔ bahola abɛlɛbɛla yɛ amaa yɛahɔbɔ ɛbɛlatane. Ɛhye bie zile alumua Keleseɛnema mekɛ zo, na ɔbahola yeazi yɛ mekɛ ye azo noko. Menli ɛhye mɔ kulo kɛ bɛyɛ ninyɛne mɔɔ bɛte nganeɛ kɛ ɔbamaa bɛ nye alie la, noko mɔɔ bɛyɛ la tia Nyamenle mɛla. Bɛwula awie mɔ anwosesebɛ kɛ “bɛlie bɛ nye.” “Bɛfa fanwodi bɛbɔ ɛwɔkɛ, wɔ mekɛ mɔɔ bɛdabɛ mumua ne bɛle subane ɛtane nwo ahanra la.”—2 Pita 2:19.
12. Duzu a vi nyɛleɛ mɔɔ tia Nyamenle mɛla nee ye ngyinlazo ne mɔ anu la ba a?
12 Kɛmɔ fanwodi ɛhye tia Nyamenle mɛla la ati mɔɔ vi nu ba la ɛnle kpalɛ fee. Kɛ neazo la, adwɔmane nyɛleɛ bahola ava adwenle nu ngyegyelɛ, anwodolɛ, ewule, ɛnrenzɛlɛ mɔɔ bɛ nye ɛnla, anzɛɛ agyalɛzɛkyelɛ ara. (1 Kɔlentema 6:18; 1 Tɛsalonaekama 4:3-8) Menli mɔɔ no nyile ɛtane ɛtane la ta fa ɛya mgbane mgbane, tendɛ mgbane mgbane, ɛnnwu debie kpalɛ, anye zo kyi bɛ na ɔyɛ bɛ minzinlaminzinla, bɛngola ɛnwomenle die kpalɛ, yɛɛ bɛngyɛ na bɛawu. Ɔkola ɔgya bɛ ɔmaa bɛyɛ ninyɛndane amaa bɛanyia nyile ɛhye mɔ bie dahuu a. Ninyɛne ɛhye mɔ noko kola to menli mɔɔ no nza dɔɔnwo la. (Mrɛlɛbulɛ 23:29-35) Menli mɔɔ bɔ ɛbɛla ɛhye mɔ la suzu kɛ bɛ nwo ɛdɔ bɛ noko bɛ nye zo katete bɛ la ɛnee bɛrayɛ ngɛkɛlɛ bɛmaa ɛtane. Ɛtane noko ati yɛ se kɛ ewule! Ninyɛne ɛhye mɔ mɔɔ yɛbazuzu nwolɛ boɛ ɛnɛ la baboa amaa yɛahoati ngyegyelɛ mɔɔ vi nu ba la.—Galeehyeama 6:7, 8.
Kɛzi Ngyegyelɛ ne Bɔ Ɔ Bo La
13. (a) Kɛzi atiakunluwɔzo mɔɔ fa ngyegyelɛ ba la bɔ ɔ bo ɛ? (b) Amaa yɛanwu agɔnwolɛ mɔɔ le “agɔnwolɛ ɛtane” la, nwane adehilelɛ a yɛhyia a? (d) Mekɛ mɔɔ ɛlɛbua kpuyia ne mɔ mɔɔ wɔ ɛdendɛkpunli 13 ne anu la, maa kɛzi Gyihova bu ninyɛne ɛhye mɔ la ɛdɛnla wɔ adwenle nu kpalɛ.
13 Suzu kɛzi ngyegyelɛ ne bɔ ɔ bo la anwo. Baebolo ne kile nu kɛ: “Sonla ɔdaye ye atiakunluwɔzo ɛtane ne a sɔ ye nea na ɔtwe ye ɔfi Nyamenle anwo a. Saa ye munzule atiakunluwɔzo ne nrenzɛ a ɔwo ɛtane, yɛɛ ɛtane wie nyi a ɔwie ewule.” (Gyemise 1:14, 15) Kɛ atiakunluwɔzo ɛhye si bɔ ɔ bo ɛ? Mɔɔ yɛfa yɛ adwenle yɛsie zo la a fa ba a. Fane dɔɔnwo ne ala menli mɔɔ ɛnva Baebolo ngyinlazo ɛnli gyima mɔɔ yɛ nee bɛ tu la a fa ɛhye ba a. Yɛ muala yɛze kɛ ɔwɔ kɛ yɛkoati “agɔnwolɛ ɛtane.” (1 Kɔlentema 15:33) Noko nwane mɔ a le agɔnwolɛ ɛtane a? Kɛ Gyihova si bu edwɛkɛ ɛhye ɛ? Kpuyia ɛhye mɔ mɔɔ yɛbazuzu nwo na yɛagenga ngɛlɛlera ne mɔ mɔɔ bɛhwe adwenle bɛhɔ zo la baboa amaa yɛazi kpɔkɛ kpalɛ.
Saa awie le sonla mɔɔ bɛdi ye eni a, ɛnee ɔkile kɛ ɔle agɔnwolɛ kpalɛ ɔ? (Mɔlebɛbo 34:1, 2, 18, 19)
Asoo bɛ adawu anzɛɛ ngoayɛ mɔɔ bɛbɔ la kile kɛ ɔwɔ kɛ yɛfa bɛ agɔnwolɛ ɔ? (Ɛfɛsɛsema 5:3, 4)
Saa yɛ nee menli mɔɔ ɛngulo Gyihova la tu a kɛzi ɔbade nganeɛ ɛ? (2 Edwɛkɛsisilɛ 19:1, 2)
Ɔwɔ nuhua kɛ yɛ nee menli mɔɔ nee yɛ ɛnlɛ diedi ko la bayɛ gyima anzɛɛ ahɔ sukulu ɛdeɛ, noko duzu ati a ɔwɔ kɛ yɛnea boɛ a? (1 Pita 4:3, 4)
Tɛlevihyɛne nee sini ɛnleanlɛ, Intanɛte zo ɛhɔlɛ, mbuluku, magazine nee adwelie ngɛlata ɛgengalɛ le ndenle mɔɔ yɛdua zo yɛfa agɔnwolɛ a. Edwɛkɛ mɔɔ wɔ ninyɛne ɛhye mɔ anu la boni mɔ a ɔwɔ kɛ yɛnea boɛ wɔ nwolɛ a? (Mrɛlɛbulɛ 3:31; Ayezaya 8:19; Ɛfɛsɛsema 4:17-19)
Kɛzi menli mɔɔ yɛfa bɛ agɔnwolɛ la maa Gyihova nwu sonla holɛ mɔɔ yɛde la ɛ? (Edwɛndolɛ 26:1, 4, 5; 97:10)
14. Fanwodi boni a menli mɔɔ di Nyamenle Edwɛkɛ zo kpalɛ ɛnɛ la banyia a?
14 Nyamenle ewiade fofolɛ ne ɛbikye kpalɛ kpalɛ. Nyamenle balua anwuma Belemgbunlililɛ ne azo alie alesama avi Seetan nee ewiade ɛtane ɛhye tumi bo. Ngyikyi ngyikyi ɔbaye ngyegyelɛ mɔɔ ɛtane ɛva ɛra alesama mɔɔ yɛ tieyɛ anwo zo la yeavi ɛkɛ amaa bɛali munli bɔkɔɔ wɔ adwenle nee nwonane nu. Ɛhye bamaa yɛahola yɛadɛnla Paladaese dahuu. Abɔdeɛ muala banyia fanwodi ne mɔɔ “Nyamenle sunsum ne” die to nu la. (2 Kɔlentema 3:17) Asoo nrɛlɛbɛ wɔ nu kɛ yɛkɛbulu Nyamenle Edwɛkɛ zo na yɛkɛminli ɛhye mɔ amuala ɔ? Ɔrɛla ye kɛ yɛ muala yɛbava yɛ Keleseɛnema fanwodi ne yɛali gyima kpalɛ ɛnɛ na yɛahile ye wienyi kɛ yɛkulo “fanwodi ne mɔɔ Nyamenle amra lɛ ye la.”—Wulomuma 8:21.
Suzu nwo Fa Ti Nu
• Fanwodi boni a ɛnee menli nwiɔ ne mɔɔ lumua la lɛ ye a? Kɛzi yemɔ le ngakyile fi mɔɔ menli lɛ ye ɛnɛ la anwo ɛ?
• Duzu fanwodi a nɔhalɛ Keleseɛnema lɛ a? Ngakyile boni a wɔ fanwodi ɛhye nee mɔɔ ewiade ne kile kɛ bɛlɛ la anu ɛ?
• Duzu ati a ɔwɔ kɛ yɛkoati agɔnwolɛ ɛtane a? Amaa yɛanyɛ kɛ Adam la, nwane a ɔwɔ kɛ yɛmaa ɔkile yɛ mɔɔ le kpalɛ la ɛ?
[Debiezukoalɛ kpuyia ne mɔ]
[Nvoninli ne mɔ wɔ mukelɛ 46]
Nyamenle Edwɛkɛ ne bɔ kɔkɔ kɛ: “Bɛmmamaa bɛbɛlɛbɛla bɛ, ‘Agɔnwolɛ ɛtane sɛkye ɛbɛla kpalɛ’”
