Gyihova Atiakunlukpɔkɛ Ba nu Anyunlunyia Nu
Tile 21
Gyihova Atiakunlukpɔkɛ Ba nu Anyunlunyia Nu
1, 2. (a) Atiakunlukpɔkɛ boni a Gyihova lɛ ye wɔ ye abɔdeɛ mɔɔ ze nrɛlɛbɛ la anwo a? (b) Nwane mɔ a ɛnee bɔ nu yɛ Nyamenle azonvolɛ abusua ne a?
GYIHOVA ɛlɔlɛ atiakunlukpɔkɛ a le kɛ abɔdeɛ mɔɔ ze nrɛlɛbɛ la kɔsɔɔti kɛbɔ nu kɛzonle nɔhalɛ Nyamenle kokye ne na bɛkɛnyia anyunlunyia fanwodi ne mɔɔ Nyamenle amra lɛ ye la. Ɛhye noko a menli mɔɔ kulo tenleneyɛlɛ la kɔsɔɔti kpondɛ a.
2 Gyihova bɔle ɔ bo kɛ ɔdi atiakunlukpɔkɛ kɛnlɛma ɛhye anwo gyima wɔ mekɛ mɔɔ ɔbɔle ninyɛnebɔlɛ bo la. Ye abɔdeɛ mɔɔ lumua la le Ralɛ, na ɔvi mekɛ mɔɔ bɛdwazole ye bɛvile ewule nu la yehile “kɛ Nyamenle anyunlunyia ne wienyi kpole si de la. Ɔle Nyamenle ɛsaso bɔkɔɔ.” (Hibuluma 1:1-3) Ralɛ ɛhye ɛbɔlɛ ne le ngakyile ɔluakɛ Nyamenle angomekye a bɔle ye a. Akee Nyamenle luale Ralɛ ɛhye anwo zo bɔle ninyɛne mɔɔ ɛha la: mɔɔ lumua, anwumabɔvolɛ ne mɔ, yɛɛ akee menli mɔɔ wɔ azɛlɛ ye azo. (Dwobu 38:7; Luku 3:38) Ɛnee bɛ muala bɛbɔ nu bɛyɛ abusua kpole ko. Na ɛnee Gyihova le bɛ kɔsɔɔti bɛ Nyamenle, bɛ Maanzaleɛ Belemgbunli, yɛɛ bɛ Ze.
3. (a) Duzu a yɛ kɔsɔɔti yɛnyia yɛvi yɛ awovolɛ mɔɔ lumua la ɛkɛ a? (b) Ɛlɔlɛ nziezielɛ boni a Gyihova yɛle manle Adam abo zo amra a?
3 Mekɛ mɔɔ yɛ awovolɛ mɔɔ lumua la anye fuu yɛle ɛtane na Nyamenle buale bɛ ewule fɔlɛ la, ɔvoanle bɛ ɔvile Yidɛn na ɔkpole bɛ. Bɛvile ye abusua kpole ne anu. (Mɔlebɛbo 3:22-24; Mɛla ne 32:4, 5) Yɛ kɔsɔɔti yɛle bɛ bo zo amra, yemɔti yɛlɛ ɛtaneyɛlɛ subane. Noko ɛnee Gyihova ze kɛ Adam nee Yive abo zo amra ne bie mɔ bayɛ menli mɔɔ kulo tenleneyɛlɛ a. Yemɔti ɔvile ɛlɔlɛ nu ɔyɛle nziezielɛ mɔɔ ɛhye mɔ bahola alua zo aranyia “anyunlunyia fanwodi ne mɔɔ Nyamenle amra lɛ ye la.”—Wulomuma 8:20, 21.
Gyinlabelɛ Kpalɛ Bɔle Yizilayɛma
4. Nwolɛ adenle boni a Gyihova vale manle tete Yizilayɛma a?
4 Gyihova bɔle Adam la ye ɛvolɛ kɛyɛ 2,500 anzi ɔmanle menli bie mɔ nyianle adenle nee Ye ranyianle abusuabɔlɛ titile. Ɔkpale tete Yizilayɛma kɛ ye menli na ɔvale ye Mɛla ɔmanle bɛ. (Mɔlebɛbo 12:1, 2) Ɔyɛle bɛ maanle na ɔvale bɛ ɔlile ye atiakunlukpɔkɛ nwo gyima. (Mɛla ne 14:1, 2; Ayezaya 43:1) Noko, ɛnee bɛtɛbɔ ɛtane nee ewule akɛlɛyɛlɛ bo, yemɔti bɛannyia anyunlunyia fanwodi ne mɔɔ ɛnee Adam nee Yive lɛ ye mɔlebɛbo ne la bie.
5. Kɛ ɔyɛle mɔɔ abusuabɔlɛ titile mɔɔ ɛnee Yizilayɛma nee Nyamenle lɛ la bɔle bɛ a?
5 Noko akee, ɛnee Yizilayɛma ne lɛ gyinlabelɛ kpalɛ wɔ Nyamenle anyunlu. Na ɛnee eza ɔwɔ kɛ bɛfa enililɛ bɛmaa Gyihova kɛ bɛ Ze na bɛyɛ mɔɔ nee ye atiakunlukpɔkɛ yia la. Gyisɛse zile ɛhyianlɛ mɔɔ ɔhyia kɛ bɛdi ɛhye anwo gyima la azo. (Mateyu 5:43-48) Noko Yizilayɛma ne anyɛ zɔ. Ɔwɔ nuhua kɛ ɛnee Dwuuma ne ka kɛ “yɛ ze ala a le Nyamenle” ɛdeɛ, noko Gyisɛse hilele kɛ bɛ subane nee bɛ nyɛleɛ da ye ali kɛ mɔɔ bɛka la ɛnle nɔhalɛ. (Dwɔn 8:41, 44, 47) Nyamenle manle Mɛla ne mɔɔ ɔvale ɔmanle Yizilayɛma la rale ye awieleɛ wɔ 33 Y.M., na ɔpɛle abusuabɔlɛ titile mɔɔ ɔ nee bɛ lɛ la anu. Asoo ɛnee ɛhye kile kɛ menli nee Nyamenle ɛnrɛhola ɛnrɛnyia abusuabɔlɛ kpalɛ ɔ?
“Abɔdeɛ Muala Mɔɔ wɔ Anwuma” la Ɛhuohuanlɛ
6. “Ngyehyɛlɛ” ne mɔɔ Pɔɔlo hanle nwolɛ edwɛkɛ wɔ Ɛfɛsɛsema 1:9, 10 la atiakunlukpɔkɛ a le boni?
6 Ɛzoanvolɛ Pɔɔlo hilele kɛ alesama bie mɔ nee Nyamenle bahola anyia abusuabɔlɛ titile. Kɛ neazo la, Pɔɔlo hanle ngyehyɛleɛ mɔɔ Gyihova ɛyɛ amaa bɛdabɛ mɔɔ bɛlɛ diedi la ahola arayɛ ye sua nu amra la anwo edwɛkɛ kɛ: “Nyamenle yɛle mɔɔ yehyehyɛ la, na yelua Kelaese anwo zo yemaa yɛnwu ye ngyehyɛlɛ ne mɔɔ yedwenle nwolɛ dɛba yedo ɛkɛ ne na ɔvea la. Ngyehyɛlɛ ɛhye, mɔɔ ye mekɛ dwu a Nyamenle bamaa yeali munli la a le kɛ, ɔkuohua abɔdeɛ muala mɔɔ wɔ anwuma nee aze la anloa, na yeava Kelaese yeazie bɛ ti.” (Ɛfɛsɛsema 1:9, 10) “Ngyehyɛlɛ” ɛhye gyi Gyisɛse Kelaese anwo zo. Ɔlua ɔ nwo zo alesama baranyia gyinlabelɛ kpalɛ wɔ Nyamenle anyunlu. Bɛ nuhua ekyi lɛ anyelazo kɛ bɛbahɔ anwuma. Na bɛ nuhua dɔɔnwo badɛnla azɛlɛ ye azo dahuu.
7. “Abɔdeɛ muala mɔɔ wɔ anwuma” la gyi ɛkɛ ne maa nwane mɔ?
7 Mɔɔ lumua, bɛbɔle ɔ bo kɛ bɛboɔboa “abɔdeɛ muala mɔɔ wɔ anwuma,” menli mɔɔ nee Kelaese bali tumi wɔ anwuma Belemgbunlililɛ ne anu la anloa wɔ Pɛntekɔso 33 Y.M. Ɔlua diedi mɔɔ bɛlɛ ye Gyisɛse afɔlebɔlɛ ne anu la azo Nyamenle bule bɛ tenlenema. (Wulomuma 5:1, 2) Mekɛ hɔle bie la, Dwuuma nee menli mɔɔ ɛnle Dwuuma la rabokale nwo, na “abɔdeɛ muala mɔɔ wɔ anwuma” la dodo yɛle 144,000. (Galeehyeama 3:26-29; Yekile 14:1) Bɛ nuhua ekyi bie a tɛbɔ azɛlɛ ye azo a.
‘Abɔdeɛ Mɔɔ wɔ Aze’ la Ɛhuohuanlɛ
8. Nwane mɔ a ‘abɔdeɛ mɔɔ wɔ aze’ la gyi ɛkɛ ne maa bɛ a, na abusuabɔlɛ boni a bɛ nee Gyihova lɛ a?
8 Ngyehyɛleɛ ko ne ala a bɛlɛdua zo bɛahuohua ‘abɔdeɛ mɔɔ wɔ aze’ la anloa a. Bɛlɛkuohua menli mgbe mgbe mɔɔ lɛ anyelazo kɛ bɛbadɛnla azɛlɛ ye azo dahuu la anloa. Bɛ nee Belemgbunlililɛ ne kɔliagyama mɔɔ tɛbɔ azɛlɛ ye azo la bɔ nu te Gyihova duma nwo na bɛkpogya ye ɛzonlenlɛ ne. (Ayezaya 2:2, 3; Zɛfanaya 3:9) Eza bɛfɛlɛ Gyihova bɛ “Ze” ɔluakɛ bɛze kɛ yemɔ a bɛ ngoane vi ye a. Yɛɛ kɛmɔ bɛlɛ diedi wɔ Gyisɛse mogya ne mɔɔ ɔhwinle ɔguale la anu la ati, bɛlɛ gyinlabelɛ kpalɛ wɔ Gyihova anyunlu. (Yekile 7:9, 14) Noko kɛmɔ bɛtɛdile munli la ati, kenlebie yɛɛ bɛbalie bɛ bɛado nu bɔkɔɔ kɛ Nyamenle amra a.
9. Duzu ɛwɔkɛ a Wulomuma 8:21 bɔ alesama a?
9 Kɛkala menli ɛhye mɔ mɔɔ lɛ anyelazo kɛ bɛbadɛnla azɛlɛ ye azo la ɛlɛkendɛ mekɛ mɔɔ bɛbaye abɔdeɛ muala “bɛavi ɛkpɔlɔlɛ akɛlɛzonlenlɛ nu” la. (Wulomuma 8:21) Fanwodi ɛhye babɔ ɔ bo mekɛ mɔɔ Kelaese nee ye anwuma ɛlɔne ne balua Amagɛdɔn azo ava anwongyelelɛ kpole ne ara awieleɛ la anzi. Ɛhye bayɛ Seetan ewiade ɛtane ne ɛzɛkyelɛ, na yemɔ anzi Kelaese Ɛvolɛ Apenle Tumililɛ ne anu nyilalɛ babɔ ɔ bo.—Yekile 19:17-21; 20:6.
10. Ayɛlɛyelɛ edwɛne boni a Gyihova azonvolɛ bado a?
10 Nea anyelielɛ mɔɔ ɔbayɛ wɔ mekɛ mɔɔ Gyihova azonvolɛ mɔɔ wɔ azɛlɛ ye azo la babɔ nu aye ye ayɛlɛ kɛmɔ ye azonvolɛ mɔɔ wɔ anwuma la fa anyelielɛ ka kɛ: “[Gyihova] Nyamenle Bedevinli, wɔ nyɛleɛ yɛ ɛzulolɛ, ɔyɛ nwanwane! Damɛnlangoate Belemgbunli, wɔ ndenle le fɔɔnwo nee nɔhalɛ. Awulae, nwane a ɛnrɛzulo wɔ a, nwane a kɛzu kpolera kɛ ɛnle kpole a? Ɛ ngomekye a ɛle nwuanzanwuanza a. Maanle maanle kɔsɔɔti badu agua ɛ nyunlu azonle wɔ, ɔboalekɛ awie biala ɛnwu kɛ ɛdi pɛlepɛle.” (Yekile 15:3, 4) Ɛhɛe, Gyihova azonvolɛ kɔsɔɔti babɔ nu azonle nɔhalɛ Nyamenle kokye ne. Bɛbadwazo mɔwuamra bɔbɔ na bɛamaa bɛanyia adenle bɛaboka bɛdabɛ mɔɔ bɛlɛye Gyihova ayɛlɛ la anwo.—Gyima ne 24:15.
Fanwodi Kpalɛ La Yɛ Nyunlu
11. Fanwodi kɛnlɛma boni a bɛdabɛ mɔɔ bɛbanyia bɛ ti wɔ anwongyelelɛ kpole ne anu la banyia a?
11 Mekɛ mɔɔ Amagɛdɔn ɛva anwongyelelɛ kpole ne ɛra awieleɛ na bɛye ɛtanevolɛma bɛvi azɛlɛ ne azo la, Seetan Abɔnsam ɛnrɛyɛ “ɛtane ewiade ɛhye nyamenle” bieko. Gyihova azonvolɛ nee Seetan tumi ɛtane ne ɛnrɛli apelepele bieko. (2 Kɔlentema 4:4; Yekile 20:1, 2) Adalɛ ɛzonlenlɛ mɔɔ kilehile Gyihova anwo adalɛ edwɛkɛ na ɔkpakyekpakye menli nu la ɛnrɛdɛnla ɛkɛ bieko. Ewiade tumivolɛma ɛnrɛsisi nɔhalɛ Nyamenle ne azonvolɛ na bɛabua bɛ mgbɔvodɛne bieko. Nea fanwodi kɛnlɛma mɔɔ bɛbanyia a!
12. Adenle boni azo a bɛbalie menli kɔsɔɔti bɛavi ɛtane nee ye tumi bo a?
12 Kɛ “Nyamenle Boaneralɛ ne mɔɔ ɔbava yeabɔ [afɔle] yeaye ewiade amra ɛtane yeahɔ la,” Gyisɛse balua ye afɔlebɔlɛ ne azo ava alesama ɛtane ahyɛ bɛ. (Dwɔn 1:29) Mekɛ mɔɔ Gyisɛse wɔ azɛlɛ ye azo na ɔvale menli ɛtane ɔhyɛle bɛ la ɔyɛle bɛ ayile ɔvale ɔlile ɛhye anwo daselɛ. (Mateyu 9:1-7; 15:30, 31) Zɔhane ala a, Kelaese Gyisɛse, Nyamenle anwuma Belemgbunlililɛ ne azo Belemgbunli ne, bayɛ anyezinliravolɛma, anzodilirama, abuburama, mumule, nee bɛdabɛ mɔɔ ewule ngakyile biala ɛha bɛ la ayile wɔ nwanwane adenle zo a. (Yekile 21:3, 4) Bɛbaye “ɛtane mɛla” ne bɛavi menli mɔɔ yɛ tieyɛ la anu amaa bɛ nye alie bɛ nzuzulɛ nee bɛ nyɛleɛ nwo na yeazɔ Nyamenle anye. (Wulomuma 7:21-23) Bɛbali munli wɔ Ɛvolɛ Apenle ne awieleɛ na bɛayɛ nɔhalɛ Nyamenle kokye ne ‘ɛsaso na bɛazɔho’ ye.—Mɔlebɛbo 1:26.
13. Duzu a Kelaese bayɛ ye Ɛvolɛ Apenle Tumililɛ ne awieleɛ a, na duzu a vi nu bara a?
13 Mekɛ mɔɔ Kelaese ɛmaa alesama ɛli munli la, akee ɔbazia yeava tumililɛ ne yeamaa ɔ Ze mɔɔ vale gyimalilɛ ɛhye wulale ɔ sa la: “Kelaese bali mgbolema, tumivolɛma nee arelemgbunli kɔsɔɔti anwo zo konim, na yeava Belemgbunlililɛ ne yeawula Nyamenle Selɛ ne asa anu. Ɔluakɛ ɔwɔ kɛ Kelaese di belemgbunli kɔkpula kɛ Nyamenle kɛli ye agbɔvolɛ amuala anwo zo konim na ɔkɛva bɛ ɔkɛwula ɔ gyakɛ abo.” (1 Kɔlentema 15:24, 25) Wɔ zɛhae mekɛ ye anu ɛnee Ɛvolɛ Apenle Belemgbunlililɛ ne ɛli ye gyima ɛwie bɔkɔɔ; yemɔti arane ɛhye mɔɔ gyi Gyihova nee menli avinli la anwo ɛnrɛhyia bieko. Na kɛmɔ ɛnee bɛlie alesama bɛvi ɛtane nee ewule nu bɔkɔɔ la ati, gyima mɔɔ Gyisɛse di kɛ Dievolɛ la bara awieleɛ. Baebolo ne kilehile nu kɛ: “Saa bɛfa ninyɛne kɔsɔɔti bɛwula Kelaese belemgbunlililɛ ne abo a, akee ɔdaye Ralɛ mumua ne, ɔbava ɔ nwo yeawula Nyamenle mɔɔ vale ninyɛne kɔsɔɔti wulale ɔ bo la abo, amaa Nyamenle ali ninyɛne kɔsɔɔti azo belemgbunli.”—1 Kɔlentema 15:28.
14. Duzu a alesama mɔɔ ɛli munli la bayia a, na duzu ati ɔ?
14 Ɛhye anzi, alesama mɔɔ di munli la kɔsɔɔti banyia adenle ahile kɛ bɛkulo kɛ bɛsonle nɔhalɛ Nyamenle kokye ne dahuu. Yemɔti, kolaa na Gyihova alie bɛ ado nu kɛ ɔ mra la ɔbamaa alesama mɔɔ ɛli munli la ayia sɔnea mɔɔ li awieleɛ. Bɛbaye Seetan nee sunsum evinli ne mɔ bɛavi efiade. Noko ɛhye ɛnrɛmaa bɛdabɛ mɔɔ bɛkulo Gyihova nɔhalɛ nu la ngoane ɛnrɛvi bɛ sa. Emomu, Gyihova bazɛkye Seetan nee ye sunsum evinli ne mɔ yɛɛ menli mɔɔ bamaa bɛabɛlɛbɛla bɛ amaa bɛayɛ Gyihova anwo anzosesebɛ la bɔkɔɔ.—Yekile 20:7-10.
15. Gyinlabelɛ boni a Gyihova abɔdeɛ mɔɔ ze nrɛlɛbɛ la kɔsɔɔti bazia anyia a?
15 Akee Gyihova bava alesama mɔɔ ɛli munli na bɛgyinlanle ye tumililɛ ne anzi wɔ sɔnea ne mɔɔ li awieleɛ la anu la ayɛ ɔ mra. Ɔvi zɔhane mekɛ ne mɔɔ kɔ la, bɛbanyia anyunlunyia fanwodi ne mɔɔ Nyamenle amra lɛ ye la na bɛaboka Nyamenle abusua kpole ne anwo. Abɔdeɛ mɔɔ ze nrɛlɛbɛ la kɔsɔɔti, mɔɔ wɔ anwuma nee mɔɔ wɔ azɛlɛ ye azo la, baha abɔ nu bieko na bɛazonle ye kɛ nɔhalɛ Nyamenle kokye. Ɛnee akee Gyihova atiakunlukpɔkɛ ne ɛra nu anyunlunyia nu! Ɛbahulo kɛ ɛkɛboka zɔhane abusua kpole ne mɔɔ badɛnla ɛkɛ dahuu wɔ anyelielɛ nu la anwo ɔ? Saa ɛkulo ɛdeɛ a, ɛnee yɛwula wɔ anwosesebɛ kɛ tie mɔɔ Baebolo ne ka ye wɔ 1 Dwɔn 2:17 la: “Ewiade nee nuhua atiakunluwɔzo ninyɛne ne mɔ amuala bapɛ nu aze, na sonla ne mɔɔ yɛ Nyamenle ɛhulolɛdeɛ la de aze dahuu.”
Suzu nwo Fa Ti Nu
• Kolaa na Yidɛn atuadelɛ ne azi la, duzu abusuabɔlɛ a ɛnee Gyihova azonvolɛ kɔsɔɔti nee ye lɛ a?
• Ɛzonlelilɛ boni a Nyamenle azonvolɛ lɛ a?
• Nwane mɔ a bɔ zo mɔɔ barayɛ Nyamenle amra a, na kɛzi ɛhye fane Gyihova atiakunlukpɔkɛ mɔɔ ɔlɛ ye kɛ abɔdeɛ kɔsɔɔti bayɛ ko azonle ye la anwo ɛ?
[Debiezukoalɛ kpuyia ne mɔ]
[Nvoninli wɔ mukelɛ 190]
Menli mɔɔ yɛ tieyɛ la badɛnla paladaese azɛlɛ zo
