Kɔ zo Ka Nyamenle Edwɛkɛ ne Akɛnrasesebɛ Zo
Tile 19
Kɔ zo Ka Nyamenle Edwɛkɛ ne Akɛnrasesebɛ Zo
1. (a) Duzu edwɛkɛ a Gyisɛse ɛdoavolɛ ne mɔ bɔle ye nolo a, na duzu a Dwuuma bie mɔ yɛle ye wɔ nwo a? (b) Kpuyia boni mɔ a yɛbahola yɛabiza a?
BƐKPOKPALE Gyisɛse Kelaese, Nyamenle Ara ne, kɛ kenlebie azɛlɛ ye kɔsɔɔti azo Belemgbunli la asɛɛ ye ɛvolɛ 2,000 ɛne. Ɛzonlenlɛ nu mgbanyima mɔɔ ɛnee kpɔ Gyisɛse la manle bɛhunle ye, noko Gyihova dwazole ye vile ewule nu. Ɔlua Gyisɛse anwo zo ɛnee akee yɛbahola yɛanyia dahuu ngoane. Noko akee, mɔɔ Gyisɛse ɛdoavolɛ ne mɔ bɔ edwɛkpa ɛhye nolo la, bɛkpɔle bɛ. Bɛguale bie mɔ efiade, bɛbilale bɛ empele bɔbɔ na bɛduale bɛ kpunli kɛ bɛmmabɔ Gyisɛse duma bieko. (Gyima ne 4:1-3, 17; 5:17, 18, 40) Duzu a ɛnee bɛbayɛ a? Saa ɛdawɔ a, anrɛɛ duzu a ɛbayɛ a? Anrɛɛ ɛbahɔ zo wɔali daselɛ akɛnrasesebɛ zo ɔ?
2. (a) Edwɛkɛ fɛlɛko boni a ɔwɔ kɛ bɛbɔ ye nolo ɛnɛ a? (b) Nwane mɔ a ɔwɔ kɛ ka edwɛkpa ne a?
2 Bɛvale Gyisɛse Kelaese bɛziele Nyamenle Belemgbunlililɛ ne azo Belemgbunli wɔ anwuma kɛ ɔli tumi wɔ ye “kpɔvolɛma anwo zo” wɔ ɛvolɛ 1914 ne anu. (Edwɛndolɛ 110:2) Bieko, bɛvuandinle Seetan nee ye sunsum evinli ne mɔ bɛguale azɛlɛ ye azo. (Yekile 12:1-5, 7-12) Ewiade ɛtane ɛhye awieleɛ mekɛ ne bɔle ɔ bo. Saa mekɛ ɛhye kɔ ye awieleɛ a, Nyamenle bazɛkye Seetan ngyehyɛleɛ ne kɔsɔɔti. (Daneɛle 2:44; Mateyu 24:21) Bɛdabɛ mɔɔ bɛbanyia bɛ ti la bɛanyia anyelazo kɛ bɛbadɛnla aze dahuu wɔ azɛlɛ ne mɔɔ bɛbayɛ ye paladaese la azo. Saa wɔlie edwɛkpa ɛhye wɔli a, ɛbahulo kɛ ɛbɔ ye nolo ɛkile awie mɔ. (Mateyu 24:14) Noko ɛnea a, duzu a menli bayɛ ye wɔ nwo a?
3. (a) Duzu a menli yɛ ye Belemgbunlililɛ edwɛkɛ ne anwo a? (b) Kpuyia boni a ɔwɔ kɛ yɛbiza yɛ nwo a?
3 Mekɛ mɔɔ ɛlɛbɔ Belemgbunlililɛ edwɛkpa ne nolo la, bie mɔ badie, noko menli dɔɔnwo anye ɛnrɛlie nwo. (Mateyu 24:37-39) Bie mɔ bagolo ɛ nwo anzɛɛ bɛbadwazo bɛatia wɔ. Gyisɛse bɔle yɛ kɔkɔ kɛ ɛkpɔlɛ ne bahola avi yɛ sua nu amra ɛkɛ. (Luku 21:16-19) Eza ɔbahola yeavi yɛ gyima anzɛɛ yɛ sukulu nu. Wɔ maanle bie mɔ anu, arane ɛva ɔ sa ɛdo Gyihova Alasevolɛ gyima zo bɔbɔ. Saa ɛyia gyinlabelɛ zɛhae bie a, asoo ɛbava akɛnrasesebɛ wɔaha Nyamenle edwɛkɛ ne na wɔagyinla “kpundii wɔ diedi ne anu”?—1 Kɔlentema 16:13.
Yɛnva Yɛ Nwo Yɛndo Yɛ Nwo Zo
4. (a) Amaa yɛayɛ Nyamenle nɔhalɛ azonvolɛ la, duzu a hyia kpalɛ a? (b) Duzu ati a Keleseɛne ayia ne mɔ anwo hyia a?
4 Mɔɔ hyia kpalɛ amaa yɛahola yɛazonle Gyihova la a le kɛ yɛbava yɛ nwo yɛado nziezielɛ mɔɔ yeyɛ la azo. Nziezielɛ ɛhye mɔ ko a le asafo ayia ne mɔ. Ngɛlɛlera ne tu yɛ folɛ kɛ ɔnle kɛ yɛbu yɛ nye yɛgua ayia ɛhye mɔ azo. (Hibuluma 10:23-25) Bɛdabɛ mɔɔ bɛhɔ zo bɛli nɔhalɛ kɛ Gyihova Alasevolɛ la bɔ mɔdenle nee bɛ mediema azonvolɛ yia nu dahuu. Ayia ɛhye mɔ boa maa yɛte Ngɛlɛlera ne abo kpalɛ. Eza bɛmaa ndelebɛbo mɔɔ yɛlɛ ye nɔhalɛ bie mɔ mɔɔ yɛze bɛ dɛba la anwo la nyi, na yɛyɛ nla wɔ kɛzi yɛfa yɛdi gyima la anu. Yɛ nee yɛ mediema Keleseɛnema yɛ ko wɔ ɛzonlenlɛ nu na ɔwula yɛ anwosesebɛ ɔmaa yɛyɛ Nyamenle ɛhulolɛdeɛ. Gyihova sunsum ne dua asafo ne azo fa adehilelɛ maa yɛ, na ɔlua zɔhane sunsum ne azo Gyisɛse wɔ yɛ avinli.—Mateyu 18:20; Yekile 3:6.
5. Duzu a Gyihova Alasevolɛ yɛ ye bɛ ayia ne mɔ anwo wɔ mekɛ mɔɔ bɛva bɛ sa bɛdo bɛ gyima ne azo la ɛ?
5 Asoo ɛkɔ ayia ne mɔ amuala dahuu, na ɛfa mɔɔ bɛka ye ɛkɛ ne la ɛdi gyima? Saa ɔdwu mekɛ ne bie na bɛfa bɛ sa bɛto Gyihova Alasevolɛ gyima ne azo a, bɛkyehyɛ menli ne anu ekpunli ngyikyi bɛmaa bɛyia awie mɔ azua nu. Bɛkakyihakyi ɛleka nee mekɛ mɔɔ bɛyia la na ɛhye kola yɛ anwongyelelɛ ɔluakɛ ɔyɛ a bɛyɛ ayia ne bie nɔɔzo. Mediema mrenya nee mraalɛ mɔɔ di nɔhalɛ la bɔ mɔdenle kɔ ayia ɛhye mɔ anu ko biala, ɔnvane nwolɛ kɛ ɔmaa bɛ nwo kyele bɛ na ɔfa bɛ ngoane ɔto esiane nu la.
6. Duzu a saa yɛyɛ a ɔbahile kɛ yɛfa yɛ nwo yɛto Gyihova anwo zo a, na adenle boni azo a ɛhye baboa yɛ amaa yɛava akɛnrasesebɛ yɛaha edwɛkɛ ne a?
6 Saa yɛnwu kɛ yɛhyia Nyamenle moalɛ na yɛfi ahonle nu yɛsɛlɛ ye dahuu a ɔmaa yɛsukoa kɛzi yɛfa yɛ nwo yɛto Gyihova anwo zo la. Asoo ɛyɛ zɔ? Gyisɛse yɛle asɔne fane dɔɔnwo wɔ mekɛ mɔɔ ɔyɛ ye azɛlɛ ye azo gyima ne la. (Luku 3:21; 6:12, 13; 22:39-44) Nɔe ne mɔɔ ye alehyenlɛ a bɛbɔle ye baka nu la, ɔdule ye ɛdoavolɛ ne mɔ folɛ kɛ: “Bɛzinza, bɛzɛlɛ na bɛangɔndɔ munzule nu.” (Maake 14:38) Saa menli tua bɛ nzo wɔ Belemgbunlililɛ edwɛkɛ ne mɔɔ yɛka la anwo a, ɔkola ɔmaa yɛ sa nu to. Saa menli golo yɛ nwo anzɛɛ kpɔ yɛ a, ɔkola ɔmaa yɛte nganeɛ kɛ yɛmua yɛ nloa amaa yɛazi ngyegyelɛ ne adenle. Noko saa yɛfi ahonle nu yɛsɛlɛ Nyamenle sunsum ne moalɛ amaa yɛahola yɛava akɛnrasesebɛ yɛadendɛ a, ɔboa ɔmaa yɛgyinla sɔnea ɛhye mɔ amuala anloa.—Luku 11:13; Ɛfɛsɛsema 6:18-20.
Daselɛlilɛ wɔ Akɛnrasesebɛ zo nwo Kɛlɛtokɛ
7. (a) Duzu ati a kɛlɛtokɛ mɔɔ wɔ Gyima ne la anwo hyia yɛ a? (b) Bua kpuyia ne mɔ mɔɔ wɔ ɛdendɛkpunli ɛhye awieleɛ la na si kɛzi ɔbaboa yɛ la azo.
7 Kɛlɛtokɛ mɔɔ wɔ Ɛzoanvolɛma Gyima ne buluku ne anu la anwo hyia yɛ muala. Ɔmaa yɛnwu kɛzi ɛzoanvolɛ ne mɔ nee ɛdoavolɛ gyɛne mɔɔ lumua la—menli mɔɔ lɛ nganeɛdelɛ kɛ yɛdayɛ ala la—gyinlanle ngyegyelɛ nloa na bɛhilele kɛ bɛle Gyihova alasevolɛ mɔɔ di nɔhalɛ na eza bɛ kɛnra yɛse a. Maa yɛlua kpuyia ɛhye mɔ nee ngɛlɛlera mɔɔ wɔ ɛke la azo yɛzuzu kɛlɛtokɛ ne foa bie anwo. Mekɛ mɔɔ yɛlɛyɛ ɛhye la, suzu kɛzi deɛ mɔɔ ɛlɛkenga la bahola aboa ɛdawɔ mumua ne la anwo.
Ɛnee ɛzoanvolɛ ne mɔ le menli mɔɔ ɛzukoa nwoma kpole ɔ? Asoo ɛnee bɛle menli mɔɔ bɛnzulo debie ɔnvane nwolɛ mɔɔ bazi biala la ɔ? (Dwɔn 18:17, 25-27; 20:19; Gyima ne 4:13)
Duzu a boale Pita manle ɔdendɛle akɛnrasesebɛ zo wɔ Dwuuma kɔɔto ne mɔɔ ɛnee ɛbua Nyamenle Ara ne ewule fɔlɛ la anyunlu a? (Mateyu 10:19, 20; Gyima ne 4:8)
Kolaa na bɛava ɛzoanvolɛ ne mɔ bɛara Dwuuma kɔɔto kpole ne anyunlu la, duzu a ɛnee bɛlɛyɛ ye wɔ dapɛne ne mɔ anu a? (Gyima ne 1:14; 2:1, 42)
Mekɛ mɔɔ mgbanyima ne mɔ duale ɛzoanvolɛ ne mɔ kɛ bɛmmabɔ Gyisɛse duma bɛkilehile la, duzu edwɛkɛ a Pita nee Dwɔn hanle a? (Gyima ne 4:19, 20)
Mɔɔ bɛyele bɛ bɛvile efiade la, nwane moalɛ a ɛzoanvolɛ ne mɔ kpondɛle a? Asoo bɛyɛle asɔne kɛ ɛkpɔlɛ ne abo ɛpɛ, anzɛɛ bɛyɛle duzu? (Gyima ne 4:24-31)
Adenle boni azo a Gyihova luale vale moalɛ manle wɔ mekɛ mɔɔ ɛnee agbɔvolɛ kpondɛ kɛ bɛsi edwɛkɛhanlɛ gyima ne adenle la ɛ? (Gyima ne 5:17-20)
Duzu a ɛzoanvolɛ ne mɔ yɛle hilele kɛ bɛte deɛ mɔɔ ɔti bɛyele bɛ bɛvile efiade la abo a? (Gyima ne 5:21, 41, 42)
Mekɛ mɔɔ ɛkpɔlɛ manle ɛdoavolɛ ne mɔ bɔle asande bɔbɔ la, duzu a bɛhɔle zo bɛyɛle a? (Gyima ne 8:3, 4; 11:19-21)
8. Debie kpalɛ boni a vi alumua ɛdoavolɛ ne mɔ ɛzonlenlɛ gyima ne anu rale a, na kɛ ɔyɛle mɔɔ yɛnyia adenle yɛlɛyɛ gyima ko ne ala bie ɛ?
8 Edwɛkpa ɛhanlɛ gyima ne anyɛ mgbane. Bɛzɔnenle ɛdoavolɛ kɛyɛ 3,000 wɔ Pɛntekɔso 33 .Y.M. “Menli dɔɔnwo kpalɛ, mraalɛ nee mrenya mɔɔ liele Awulae lile la rabokale bɛ nwo.” (Gyima ne 2:41; 4:4; 5:14) Nzinlii, Sɔɔlo mɔɔ vi Taasɛse, mɔɔ yɛle Nyamenle menli kpɔdekpɔde kpole la bɔbɔ rayɛle Keleseɛnenli na ɔbɔle ɔ bo ɔvale akɛnrasesebɛ ɔlile nɔhalɛ ne anwo daselɛ. Bɛravɛlɛle ye ɛzoanvolɛ Pɔɔlo. (Galeehyeama 1:22-24) Gyima ne mɔɔ bɛbɔle ɔ bo ɛvoya ne mɔɔ lumua la anu la abo ɛtɛpɛle. Yenyia anyuhɔlɛ kpole wɔ awieleɛ mekɛ ɛhye anu, na yedwu azɛlɛ ye azo ɛleka biala. Yɛnyia adenle yɛlɛyɛ bie, na mekɛ mɔɔ yɛlɛyɛ ɛhye la, yɛbahola yɛazukoa debie yɛavi neazo kpalɛ mɔɔ alasevolɛ mɔɔ lile nɔhalɛ mɔɔ li yɛ nyunlu yɛle la anu.
9. (a) Nienwu a Pɔɔlo yɛle ye ɛzonlenlɛ gyima ne a? (b) Ndenle boni azo a ɛfa ɛka Belemgbunlililɛ edwɛkɛ ne ɛkile awie mɔ a?
9 Mekɛ mɔɔ Pɔɔlo zukoale Gyisɛse Kelaese anwo nɔhalɛ ne la, duzu a ɔyɛle a? Ndɛndɛ ne ala “ɔhɔbɔle nolo kɛ Gyisɛse, ‘Yemɔ a ɔle Nyamenle Ara ne a.’” (Gyima ne 9:20) Ɔ nye zɔle kɛzi Nyamenle lole ye la na ɔnwunle kɛ awie biala hyia edwɛkpa ne mɔɔ yede la. Ɛnee Pɔɔlo le Dwuunli na kɛmɔ bɛ amaamuo ne kile la, ɔhɔle nyianu azua ne mɔ anu ɔhɔlile daselɛ. Eza ɔhanle edwɛkɛ ne wɔ azua nu nee gua ne mɔ azo. Ɛnee ɔlɛ ɛhulolɛ kɛ ɔbahɔ azɛlɛsinli fofolɛ nu yeahɔbɔ edwɛkpa ne nolo.—Gyima ne 17:17; 20:20; Wulomuma 15:23, 24.
10. (a) Ɛnee Pɔɔlo lɛ akɛnrasesebɛ ɛdeɛ noko kɛzi ɔhilele kɛ ɔvale adwenle ɔdole adenle mɔɔ ɔvale zo ɔlile daselɛ la anwo a? (b) Kɛ yɛbazi yɛala Pɔɔlo subane ne bie ali wɔ mekɛ mɔɔ yɛlɛdi yɛ mbusua, yɛ gyima nu amra anzɛɛ yɛ gɔnwo mɔ sukuluma daselɛ la ɛ?
10 Ɛnee Pɔɔlo lɛ akɛnrasesebɛ noko ɔvale adwenle ɔdole mɔɔ ɔyɛle la anwo, kɛmɔ ɔwɔ kɛ yɛdayɛ noko yɛyɛ ye la. Ɔgyinlanle ɛwɔkɛ mɔɔ Nyamenle bɔle Dwuuma nlenya mɔ la azo ɔlile bɛ daselɛ. Yɛɛ ɔgyinlanle ninyɛne mɔɔ ɛnee Gilikima ze ye la azo a ɔ nee bɛ dendɛle a. Ɔdwu mekɛ ne bie a ɔdua ɔdaye mumua ne ye anwubielɛ wɔ nɔhalɛ ne ɛzukoalɛ nu azo a ɔdi daselɛ a. Ɔhanle kɛ: “Meyɛ ɛhye mɔ amuala wɔ Edwɛkpa ne ati, amaa meanyia nwolɛ nyilalɛ ne bie.”—1 Kɔlentema 9:20-23; Gyima ne 22:3-21.
11. (a) Duzu a Pɔɔlo yɛle amaa ɔ nee ye agbɔvolɛ angɔ zo anzu kpolera a? (b) Mekɛ boni a nrɛlɛbɛ wɔ nu kɛ yɛkɛzukuezukoa Pɔɔlo neazo ne a, adenle boni azo? (d) Nienwu a yɛbanyia anwosesebɛ yɛava yɛaha edwɛkɛ ne akɛnrasesebɛ zo a?
11 Ɛnee saa Pɔɔlo banwu ye kɛ dwazotia ti ɔwɔ kɛ ɔkɔka edwɛkɛ ne wɔ ɛleka fofolɛ a ɔkɔ, na ɔ nee menli mɔɔ dwazo tia ye la ɛnzu kpolera. (Gyima ne 14:5-7; 18:5-7; Wulomuma 12:18) Noko yeanze edwɛkpa ne anwo nyiane ɛlɛ. (Wulomuma 1:16) Pɔɔlo anye anlie menli mɔɔ dwazole tiale ye la amumuyɛ nee bɛ basabasayɛlɛ ne anwo, noko “yɛ Nyamenle ne manle [ye] akɛnrasesebɛ” manle ɔhɔle zo ɔhanle edwɛkɛ ne. Ɔhanle Kɛ: “Awulae gyinlanle me nzi, na ɔmanle me anwosesebɛ. Zɔhane ati mengolale membɔle Edwɛkpa ne nolo.” (1 Tɛsalonaekama 2:2; 2 Temɔte 4:17) Gyisɛse mɔɔ le Keleseɛne asafo ne Ati la kɔ zo maa yɛ anwosesebɛ mɔɔ yɛhyia la amaa yɛahola yɛayɛ gyima ne mɔɔ ɔhanle ɔdole ɛkɛ ne kɛ bɛbayɛ ye yɛ mekɛ ye la.—Maake 13:10.
12. Duzu a kile kɛ Keleseɛnema lɛ akɛnrasesebɛ a, na duzu a maa bɛyɛ zɔ a?
12 Yɛlɛ mɔɔ ɔti ɔwɔ kɛ yɛkɔ zo yɛka Nyamenle edwɛkɛ ne wɔ akɛnrasesebɛ zo, kɛmɔ Gyisɛse nee Nyamenle nɔhalɛ azonvolɛ gyɛne yɛle ye ɛvoya ne mɔɔ lumua la anu la. Noko yɛnle menli mɔɔ yɛndwenle awie mɔ anwo anzɛɛ yɛfa edwɛkpa ne yɛtinlitinli menli mɔɔ ɛngulo la anwo zo a. Yɛmkpo aze ɔluakɛ menli anye ɛnlie edwɛkɛ ne anwo la ati; anzɛɛ yɛngyakyi ye ɛhanlɛ ɔlua ɛkpɔlɛ ti. Kɛmɔ Gyisɛse yɛle la, yɛka Nyamenle Belemgbunlililɛ ne anwo edwɛkɛ kɛ yemɔ a le arane mɔɔ fɛta kɛ ɔdi azɛlɛ ye kɔsɔɔti azo a. Yɛfa akɛnrasesebɛ yɛka nwolɛ edwɛkɛ ɔboalekɛ yɛgyi Gyihova, Maanzaleɛ Belemgbunli ne agyakɛ anu, yɛɛ edwɛkɛ ne mɔɔ yɛka la ɛnvi yɛdayɛ mumua ne, emomu ɔvi Gyihova. Ɔwɔ kɛ ɛlɔlɛ mɔɔ yɛlɛ yɛmaa Gyihova la a ka yɛ kpalɛ maa yɛye ye ayɛlɛ a.—Felepaema 1:27, 28; 1 Tɛsalonaekama 2:13.
Suzu nwo Fa Ti Nu
• Duzu ati a ɔwɔ kɛ yɛka Belemgbunlililɛ edwɛkɛ ne yɛkile awie biala mɔɔ yɛbayia ye la ɛ, na duzu a ɔwɔ kɛ yɛnea ye adenle a?
• Kɛ yɛbayɛ yɛahile kɛ yɛnva yɛ nwo yɛndo yɛ nwo zo wɔ Gyihova ɛzonlenlɛ nu ɛ?
• Ɛzukoalɛdeɛ kpalɛ boni a yɛnyia ye wɔ Ɛzoanvolɛma Gyima ne buluku ne anu a?
[Debiezukoalɛ kpuyia ne mɔ]
[Nvoninli ne mɔ wɔ mukelɛ 173]
Kɛmɔ bɛyɛle ye tete ne la, Gyihova azonvolɛ ɛnɛ fa akɛnrasesebɛ ka Nyamenle edwɛkɛ ne
