Ko Tia Sunsum Evinli ne Mɔ
Tile 8
Ko Tia Sunsum Evinli ne Mɔ
1. Duzu ati a ɔwɔ kɛ yɛmaa gyima mɔɔ sunsum evinli ne mɔ di la kyia yɛ a?
MENLI dɔɔnwo ɛnlie ɛnli kɛ sunsum evinli wɔ ɛkɛ. Noko ɛhye ɛnle ngoayɛ edwɛkɛ. Saa bɛdie bɛdi o, bɛnlie bɛnli o, sunsum evinli ne mɔ wɔ ɛkɛ na bɛbɔ mɔdenle kɛ bɛbɛlɛbɛla awie biala, mɔɔ Gyihova azonvolɛ noko boka nwolɛ a. Nɔhalɛ nu, bɛmɛ bɔbɔ a sunsum evinli ne mɔ anye sa bɛ kpalɛ a. Ɛzoanvolɛ Pɔɔlo ka ɛhye anwo bie la, ɔhɛlɛle kɛ: “Tɛ menli a yɛ nee bɛ ɛlɛko a; sunsum nu tumivolɛma, ewiade arelemgbunli anzɛɛ maanlebuvolɛma, ewiade amra mɔɔ sie ɛnɛ mekɛ ye awozinli nu amra, yɛɛ sunsum nu anwuma ɛlɔnema amumuyɛ yɛɛ yɛ nee bɛ ɛlɛko a.” (Ɛfɛsɛsema 6:12) Wɔ yɛ mekɛ ye anu, ngyegyelɛ mɔɔ sunsum evinli ne mɔ fa ba la ɛyɛ kpole ɔluakɛ bɛvuandi Seetan bɛdo azɛlɛ ye azo na kɛmɔ ye mekɛ ɛha ekyii bie la ati yeva ɛya kpole.—Yekile 12:12.
2. Duzu a baboa amaa yɛali konle mɔɔ yɛ nee sunsum evinli ne mɔ ɛlɛko la anu konim a?
2 Asoo sonla nee sunsum evinli bahola aho na yeali konim? Ɛhɛe, saa yɛfa yɛ nwo yɛto Gyihova anwo zo bɔkɔɔ a. Ɔwɔ kɛ yɛtie ye na yɛdi ye Edwɛkɛ ne azo. Saa yɛyɛ zɔ a, yɛbahola yɛahoati nwonane nu, ɛbɛlabɔlɛ nu, nee nganeɛdelɛ nu ngyegyelɛ mɔɔ Seetan fa ba menli mɔɔ wɔ ye tumi bo la anwo zo la.—Gyemise 4:7.
Ewiade Arelemgbunli Mɔɔ wɔ Anwuma
3. Nwane mɔ a Seetan kpɔ bɛ kpole a, na adenle boni azo?
3 Gyihova ɛha kɛzi ɔnwu ninyɛne mɔɔ ɛlɛkɔ zo wɔ ewiade la ɛhile yɛ. Ɔmanle ɛzoanvolɛ Dwɔn nwunle “nane kɔkɔlɛ anwo ɛzulolɛ bie mɔɔ le kɛ ɛlɛnrɛne” mɔɔ gyi ɛkɛ ne maa Seetan la wɔ ɛnyelɛzodeɛnwunlɛ nu. Ɛnee nane ne ɛziezie ɔ nwo kɛ saa bɛfa Nyamenle Mɛzaya Belemgbunlililɛ ne bɛsie anwuma wɔ 1914 anu ala a, ɔbazɛkye ye. Kɛmɔ Seetan angola ye sɛkye la ati, ɔvale ɛkpɔlɛ mɔɔ anu yɛ se la ɔrale Belemgbunlililɛ ne agyakɛnugyinlavolɛma mɔɔ wɔ azɛlɛ ye azo la anwo zo. (Yekile 12:3, 4, 13, 17) Ɛnee kɛzi Seetan baho konle ɛhye ɛ? Ɔbalua menli mɔɔ gyi ɔ gyakɛ anu wɔ azɛlɛ ye azo la anwo zo.
4. Nwane a maa ewiade arelemgbunli tumi a, na duzu ati a yɛka ye zɔ ɛ?
4 Akee bɛvale nane bie mɔɔ ati le nsuu na ɔlɛ mɛne bulu la bɛhilele Dwɔn. Nane ɛhye lɛ tumi wɔ “maanle biala, aneɛ biala, abusua ekpunli biala nee menli ngakyile kɔsɔɔti anwo zo.” Nane zɔhane gyi ɛkɛ ne maa ewiade maanyɛlɛ ngyehyɛleɛ kɔsɔɔti. Bɛhanle bɛhilele Dwɔn kɛ “nane anwo ɛzulolɛ ne mɔɔ zɔho ɛlɛnrɛne la [Seetan Abɔnsam] vale ye tumi ne, ye belemgbunli ebia ne, yɛɛ ye anwosesebɛ kpole ne manle ye [nane ati nsuu ne].” (Yekile 13:1, 2, 7) Ɛhɛe, Seetan a maa ewiade arelemgbunli kɔsɔɔti tumi a. Ɛhye ati kɛmɔ ɛzoanvolɛ Pɔɔlo hɛlɛle la, nɔhalɛ nu, “ewiade arelemgbunli” ne mɔ a le “sunsum nu anwuma ɛlɔnema amumuyɛ” ne mɔ mɔɔ sie menli mɔɔ di tumi wɔ azɛlɛ ye azo la a. Ɔwɔ kɛ menli mɔɔ kulo kɛ sonle Gyihova la kɔsɔɔti te edwɛkɛ ɛhye abo kpalɛ.—Luku 4:5, 6.
5. Nienwu a bɛlɛboɔboa ewiade arelemgbunli nloa bɛahɔ a?
5 Ɔwɔ nuhua kɛ maanlebuvolɛma dɔɔnwo kile kɛ bɛsonle Nyamenle ɛdeɛ, noko maanle biala ɛnle ɛkɛ mɔɔ die Gyihova anzɛɛ Gyisɛse Kelaese mɔɔ Gyihova ɛkpa ye kɛ Belemgbunli la tumililɛ ne ɔto nu a. Bɛ muala bɛpele kɛ bɛbali tumi. Ɛnɛ, kɛmɔ Yekile kile la, “sunsum ɛtane” ne mɔ ɛlɛboɔboa ewiade arelemgbunli ne mɔ anloa amaa bɛahɔho “Nyamenle Bedevinli ne [konle] Kenle kpole ne anu” wɔ Amagɛdɔn.—Yekile 16:13, 14, 16; 19:17-19.
6. Duzu ati a ɔhyia kɛ yɛnea boɛ na yɛanva yɛ nwo yɛanwula Seetan ngyehyɛleɛ nu ɛ?
6 Alehyenlɛ biala, alesama yia ezukoa nwo ngyegyelɛ, maanyɛlɛ, mbusua avinli, nee ɛzonlenlɛ nu, konle konle mɔɔ kpakyekpakye menli nu a. Wɔ konle konle ɛhye mɔ anu, menli ta dua bɛ nyɛleɛ nee bɛ ɛdendɛlɛ zo kile maanle, abusua, aneɛ, anzɛɛ ekpunli bie mɔɔ bɛgyi ɔ nzi la. Saa bɛnva bɛ nwo bɛnwula konle bie anu bɔbɔ a, ɛkola ɛfa bɛ nyɛleɛ ɛkile afoa mɔɔ bɛgyi la. Noko ɔnvane nwolɛ ahenle holɛ ko mɔɔ bɛgyi ɔ nzi anzɛɛ adenle mɔɔ bɛlua zolɛ la, nwane afoa a bɛwɔ a? Baebolo ne ka ye wienyi kɛ: “Abɔnsam di ɛtane ewiade ye azo belemgbunli.” (1 Dwɔn 5:19) Ɛnee akee kɛ ɔkɛyɛ na bɛambɛlɛbɛla awie bɛamboka menli mɔɔ ɛha la anwo ɛ? Kyesɛ ɔgyinla Nyamenle Belemgbunlililɛ ne anzi kpalɛ na ɔtwe ɔ nwo ɔfi ewiade edwɛkɛ kɔsɔɔti anu.—Dwɔn 17:15, 16.
Abɔnsam Mɛlɛbɛla Ndenle ne Mɔ
7. Kɛzi Seetan fa ye anyedelɛ ne di gyima wɔ adalɛ ɛzonlenlɛ nu ɛ?
7 Ɔbɔ ye tete ne toonwo, Seetan ɛbɔ mɔdenle kɛ ɔdua ɛkpɔlɛ zo yeahwe menli yeavi nɔhalɛ ɛzonlenlɛ nu. Eza ɔlua mɛlɛbɛla adenle zo ɔlɛbɔ mɔdenle kɛ ɔbanyia menli. Yeva adalɛ ɛzonlenlɛ yebɛlɛbɛla menli dɔɔnwo yemaa bɛde nganeɛ kɛ bɛlɛsonle Nyamenle na ɔlua zo yemaa bɛha awozinli nu. Kɛmɔ bɛnlɛ Nyamenle anwo nɔhalɛ ndelebɛbo yɛɛ bɛnlɛ nɔhalɛ ne anwo ɛhulolɛ la ati, bɛ nye die anyelielɛ ninyɛne anzɛɛ adalɛ nwanwane ninyɛne mgbole mɔɔ bɛyɛ ye wɔ ɛzonlenlɛ nu la biala anwo. (2 Tɛsalonaekama 2:9, 10) Noko Baebolo ne bɔ yɛ kɔkɔ kɛ menli mɔɔ ɛnee sonle wɔ nɔhalɛ nu bɔbɔ la “bie mɔ bakpo bɛ diedi ne kenle bie; bɛbadie sunsum adalɛma edwɛkɛ na bɛali mbɔnsam ngilehilelɛ ne mɔ azo.” (1 Temɔte 4:1) Kɛzi ɛhye kola ba ye zɔ ɛ?
8. Saa yɛlɛsonle Gyihova bɔbɔ a kɛzi Seetan kola dua adalɛ ɛzonlenlɛ zo bɛlɛbɛla yɛ ɛ?
8 Abɔnsam dua yɛ sinlidɔlɛ zo bɛlɛbɛla yɛ. Asoo yɛtɛdɛ sonla nwo ɛzulolɛ? Saa zɔhane a ɔde a, yɛbagyakyi yɛ nɔhalɛlilɛ nu wɔ mekɛ mɔɔ yɛ mbusua anzɛɛ yɛ gɔnwo mɔ kɛva adalɛ ɛzonlenlɛ nu nyɛleɛ kɛgyegye yɛ la. Asoo yɛmemaa yɛ nwo zo ɔ? Saa ɔle zɔ a, ɔbayɛ yɛ nyane kɛ awie kɛhwi yɛ nyunlu anzɛɛ kɛkpo adwenle nzuzulɛ mɔɔ yɛbu ye kɛ ɔle kpalɛ la. (Mrɛlɛbulɛ 15:10; 29:25; 1 Temɔte 6:3, 4) Kɛ anrɛɛ yɛkɛzenza yɛ adwenle yɛkɛmaa ɔ nee Kelaese ɛdeɛ ne kɛyɛ ko la, yɛbadie bɛdabɛ mɔɔ bɛkile kɛ saa yɛkenga Baebolo ne na yɛbɔ ɛbɛla kpalɛ ala a ɛnee yewie la, ɔluakɛ bɛka mɔɔ yɛkulo kɛ yɛte la. (2 Temɔte 4:3) Yemɔti saa yɛfa yɛ nwo yɛahɔwula ɛzonlenlɛ bie anu o, saa yɛtɛnla mɔɔ yɛwɔ nu la anu o, ɔnvane Seetan anwo. Mɔɔ ɔkpondɛ la a le kɛ yɛkɛkpo kɛ yɛkɛzonle Gyihova wɔ adenle mɔɔ Nyamenle dua ye Edwɛkɛ ne nee ye ahyehyɛdeɛ ne azo kile kɛ yɛzonle la.
9. Kɛzi Seetan dua nrɛlɛbɛ adenle zo fa nrenya nee raalɛ nla di ye atiakunlukpɔkɛ nwo gyima ɛ?
9 Eza Seetan dua nrɛlɛbɛ adenle zo bɛlɛbɛla menli maa bɛfa atiakunluwɔzo kpalɛ bɛdi gyima wɔ adenle ɛtane zo. Bie a le nla nwo atiakunluwɔzo. Kɛmɔ menli dɔɔnwo mɔɔ wɔ ewiade la ɛkpo ɛbɛlabɔlɛ kpalɛ nwo ngyinlazo mɔɔ wɔ Baebolo ne anu la ati, bɛbu menli mɔɔ tɛgyale bɛ nwo la avinli nla kɛ anyelielɛ debie mɔɔ ɛtane biala ɛnle nwo anzɛɛ adenle mɔɔ menli fa zo kile kɛ bɛnyi a. Na bɛdabɛ mɔɔ bɛgya la noko ɛ? Bɛ nuhua dɔɔnwo sɛkye agyalɛ. Mekɛ mɔɔ agyalɛma ne di nɔhalɛ maa bɛ nwo bɔbɔ la, bɛ nuhua dɔɔnwo ne ala bɔ ewole anzɛɛ tete agyalɛ nu amaa bɛava sonla fofolɛ. Seetan dua ndenle ɛhye mɔ azo di ye atiakunlukpɔkɛ nwo gyima. Yemɔti ɔbɛlɛbɛla menli ɔmaa bɛdi mekɛ ekyi nu anyelielɛ nzi, mɔɔ bɛndwenle kɛzi ɔbaha bɛ nee bɛ gɔnwo mɔ, ye titile, abusuabɔlɛ mɔɔ bɛ nee Gyihova nee ɔ Ra ne lɛ la anwo a.—1 Kɔlentema 6:9, 10; Galeehyeama 6:7, 8.
10. Ndenle boni azo a Seetan pe kɛ ɔtwehwe yɛ adwenle yeahɔ nla nu ɛbɛlatane nee basabasayɛlɛ zo a?
10 Atiakunluwɔzo kpalɛ bieko mɔɔ wɔ ɛkɛ ne la a le ɛnwomenlelielɛ. Saa yɛfa adenle kpalɛ zo yɛdie yɛ menle a, ɔmaa yɛnyia ahomeka wɔ nwonane nu, adwenle nu, nee nganeɛdelɛ nu. Noko saa Seetan pe nrɛlɛbɛ adenle zo maa ninyɛne mɔɔ yɛfa yɛdie yɛ nye wɔ mekɛ mɔɔ yɛlɛdie yɛ menle la yɛ debie mɔɔ bahwe yɛ adwenle avi Nyamenle anwo a, duzu a yɛbayɛ a? Kɛ neazo la, yɛze ye wienyi kɛ Gyihova kyi nla nu ɛbɛlatane nee basabasayɛlɛ. Noko, asoo yɛtɛnla yɛnea ninyɛne ɛhye mɔ wɔ mekɛ mɔɔ bɛlɛyɛ bɛ wɔ video nu, tɛlevihyɛne zo, anzɛɛ bagua nu la ɔ? Kakye kɛ, wɔ mekɛ mɔɔ Seetan efiade ɛlalɛ ne ɛbikye la ɔbahɔ zo yeamaa ninyɛne ɛhye mɔ ayɛ mɔɔ ɛkpɔlɔ bɔkɔɔ a, ɔluakɛ “amumuyɛma nee adalɛma bahɔ zolɛ amaa bɛ ti ayɛ se kpalɛ, bɛbabɛlɛbɛla awie mɔ na bɛabɛlɛbɛla bɛdabɛ bɛ ngome bɛ nwo.” (2 Temɔte 3:13; Yekile 20:1-3) Yemɔti ɔwɔ kɛ yɛkɔ zo yɛnea boɛ wɔ Seetan mɛlɛbɛla ndenle ne mɔ anwo.—Mɔlebɛbo 6:13; Edwɛndolɛ 11:5; Wulomuma 1:24-32.
11. Ndenle boni azo a awie mɔɔ ze sunsum evinli nwo nɔhalɛ edwɛkɛ bɔbɔ la annea boa a ɔbahola yeadɔ ɛhane nu a?
11 Eza yɛze kɛ menli mɔɔ fa bɛ nwo wula sunsum evinli nyɛleɛ ngakyile ne mɔ—debie ɛbizalɛ, ayɛne ɛbɛla, nwomenle nloa zo ɛdendɛlɛ—nu la yɛ ninyɛne mɔɔ Gyihova kyi la. Mekɛ mɔɔ ɛhye wɔ yɛ adwenle nu la, yɛnrɛhɔ abisa wɔ menli mɔɔ nee sunsum evinli di ngitanwo la ɛkɛ, yɛɛ yɛnrɛhɔva bɛ yɛnrɛra yɛ sua nu yɛnrɛmaa bɛnrɛrayɛ bɛ sunsum evinli nyɛleɛ ne mɔ. Noko saa bɛba tɛlevihyɛne anzɛɛ Intanɛte zo a, yɛbadie bɛ ɔ? Ɔwɔ nuhua kɛ yɛnrɛhɔ sonla mɔɔ bɔ munzule la ɛkɛ kɛ ɔyɛ yɛ ayile ɛdeɛ, noko asoo yɛbava nyɛma yɛado yɛ ra bo anzɛɛ ɔ sa, yɛadwenle kɛ yemɔ babɔ ɔ nwo bane ɔ? Mekɛ mɔɔ yɛze kɛ Baebolo ne tua silihyelɛ la, asoo yɛbamaa menli mɔɔ bɔ munzule la ali yɛ adwenle ɔ?—Mɛla ne 18:10-12; Galeehyeama 5:19-21.
12. (a) Adenle boni azo a bɛfa edwɛne bɛdi gyima bɛmaa yɛdwenle ninyɛne mɔɔ yɛze kɛ ɛnle kpalɛ la anwo a? (b) Kɛzi adenle mɔɔ awie fa zo siezie ɔ nwo, yɛ ye enrinli, anzɛɛ tendɛ la kile kɛ ɔlɛsukuezukoa menli mɔɔ Gyihova ɛnlie bɛ ɛndo nu la nyɛleɛ ɛ? (d) Duzu a ɔwɔ kɛ yɛyɛ na yɛandɔ Seetan ɛhane nu a?
12 Baebolo ne ka kɛ yɛye adwɔmanebɔlɛ nee nyɛleɛ ɛtane ɛtane (nee adwenle evinli) wɔ yɛ nu bɔkɔɔ. (Ɛfɛsɛsema 5:3-5) Noko saa bɛfa ninyɛne ɛhye mɔ bɛhyehyɛ edwɛne bɛmaa ɔyɛ fɛ a, duzu a yɛyɛ ye wɔ nwo a? Asoo yɛbɔ ɔ bo yɛto edwɛne ɛhye mɔ mɔɔ kanvo nla nu ɛbɛlatane, nyile ɛtane ɛtane mɔɔ bɛno bɛdielie bɛ nye, nee nyɛleɛ evinli la ɔ? Anzɛɛ wɔ mekɛ mɔɔ yɛze kɛ ɔnle kɛ yɛsukuezukoa menli mɔɔ fa bɛ nwo wula ninyɛne ɛhye mɔ anu la, asoo yɛsiezie yɛ nwo, yɛyɛ yɛ enrinli, anzɛɛ yɛtendɛ kɛmɔ bɛyɛ ye la? Nea esiane mɔɔ wɔ ndenle mɔɔ Seetan dua zo bɛlɛbɛla menli maa bɛdi ye adwenle ɛtane ne anzi la anu a! (2 Kɔlentema 4:3, 4) Ɔwɔ kɛ yɛtwe yɛ nwo yɛfi ewiade ne mɔɔ ɛde atua la anwo amaa Seetan anva ye mɛlɛbɛla ndenle ne mɔ angye yɛ. Ɔhyia kɛ yɛmaa menli mɔɔ “ewiade arelemgbunli . . . mɔɔ sie ɛnɛ mekɛ ye awozinli nu amra” gyi ɛkɛ ne maa bɛ la tɛnla yɛ adwenle nu na yɛmia yɛ nwo yɛko yɛtia bɛ ngyegyelɛ biala.—1 Pita 5:8; Ɛfɛsɛsema 6:12.
Ninyɛne Mɔɔ Bamaa Yɛali Konim
13. Ɔwɔ nuhua kɛ yɛnli munli ɛdeɛ, noko duzu a yɛbahola yɛayɛ na yɛali ewiade ne mɔɔ Seetan sie la azo konim a?
13 Kolaa na Gyisɛse awu la, ɔhanle ɔhilele ye ɛzoanvolɛ ne mɔ kɛ: “Bɛgyinla kpundii. Meli ɛtane ewiade ɛhye anwo zo konim!” (Dwɔn 16:33) Ɛnee bɛdabɛ noko bɛbahola bɛali konim. Ye ɛvolɛ 60 anzi, ɛzoanvolɛ Dwɔn hɛlɛle kɛ: “Nwane a di ewiade ye anwo zo konim a? Yemɔ a le sonla ne mɔɔ die di kɛ Gyisɛse le Nyamenle Ara la.” (1 Dwɔn 5:5) Saa yɛtie Gyisɛse ane na yɛfa yɛ nwo yɛto Nyamenle Edwɛkɛ ne azo kɛmɔ Gyisɛse yɛle la a, ɛnee yɛlɛda diedi zɛhae ali. Duzu bieko a anwo hyia a? Ɔwɔ kɛ yɛfa yɛ nwo yɛbeta asafo ne mɔɔ Gyisɛse a le ɔ Ti la. Saa yɛfo a, ɔwɔ kɛ yɛfi ahonle nu yɛnu yɛ nwo na yɛdua Gyisɛse afɔle ne azo yɛkpondɛ Nyamenle ɛkɛ ne ɛtane fakyɛ. Saa yɛyɛ zɔ a, yɛdayɛ noko yɛbali konim ɔnvane nwolɛ kɛ yɛnli munli na yɛfo la.—Edwɛndolɛ 130:3, 4.
14. Kenga Ɛfɛsɛsema 6:13-17, na dua kpuyia nee ngɛlɛlera ne mɔ mɔɔ wɔ ɛdendɛkpunli ɛhye anu la azo suzu kɛzi sunsum nu konle tɛladeɛ ne foa biala anwo bahola ara wɔ nvasoɛ la anwo.
14 Ɔwɔ kɛ yɛwula “Nyamenle konle tɛladeɛ ne amuala” mɔɔ yɛngyakyi ye foa bie, amaa yɛali konim. Yɛsɛlɛ wɔ buke Ɛfɛsɛsema 6:13-17 wɔ wɔ Baebolo ne anu, na kenga kɛzi ɔka konle tɛladeɛ ne anwo edwɛkɛ la. Akee, mekɛ mɔɔ ɛlɛye kpuyia mɔɔ wɔ ɔ bo ɛke anloa la, suzu kɛzi konle tɛladeɛ ne foa biala kola bɔ ɛ nwo bane la anwo.
Bɛva nɔhalɛ bɛyɛ akyeso bɛhye
Ɔwɔ nuhua kɛ yɛze nɔhalɛ ne ɛdeɛ, noko kɛzi debie mɔɔ yɛbazukoa, Baebolo nu nɔhalɛ edwɛkɛ mɔɔ yɛbadwenledwenle nwo, nee debiezukoalɛ mɔɔ yɛbahɔ ye dahuu la babɔ yɛ nwo bane ɛ? (1 Kɔlentema 10:12, 13; 2 Kɔlentema 13:5; Felepaema 4:8, 9)
Bɛva pɛlepɛlelilɛ anzɛɛ tenleneyɛlɛ bɛyɛ bulalɛ enyinlike bɛbutu bɛ kɛnra azo
Nwane tenlene ngyinlazodeɛ a le ɛhye? (Yekile 15:3)
Fa ndonwo kilehile kɛzi saa awie anva Gyihova tenlene ngyinlazo anli gyima a ɔbayia sunsum nu ngyegyelɛ la anu. (Mɛla ne 7:3, 4; 1 Samoɛle 15:22, 23)
Bɛva anzondwolɛ Edwɛkpa ne bɛyɛ mgbɔlaboa bɛwula
Kɛzi anzondwolɛ nwo ngyehyɛleɛ mɔɔ Nyamenle ɛyɛ mɔɔ le kɛ asɛɛ mgbɔlaboa bie a yɛfa yɛawula yɛahɔ menli ne ɛkɛ yɛ nee bɛ azuzu nwo dahuu la bahola ayɛ anwobanebɔlɛ amaa yɛ ɛ? (Edwɛndolɛ 73:2, 3; Wulomuma 10:15; 1 Temɔte 5:13)
Bɛva diedi bɛyɛ bɛ sa nu enyinlike
Saa yɛ diedi si pi a, duzu a yɛbayɛ wɔ mɔdenle mɔɔ awie mɔ bɔ kɛ bɛnwunlonwunla yɛ anzɛɛ bɛmaa yɛ sa nu ado la anwo a? (2 Arelemgbunli 6:15-17; 2 Temɔte 1:12)
Bɛva ngoanelielɛ bɛyɛ bulalɛ kyɛlɛ bɛzoa
Kɛzi ngoanelielɛ nwo anyelazo ne boa maa awie koati nwonane afoa nu ninyɛne dɔɔnwo ɛkpondɛlɛ nwo ɛhane ɛ? (1 Temɔte 6:7-10, 19)
Bɛva Nyamenle Edwɛkɛ ne kɛ konle dadeɛ mɔɔ Sunsum ne fa maa la
Duzu a ɔwɔ kɛ yɛfa yɛ nwo yɛto zo wɔ mekɛ mɔɔ yɛlɛko yɛatia ngyegyelɛ mɔɔ kola sɛkye yɛ sunsum nu boɛlilɛ anzɛɛ yɛ gɔnwo mɔ ɛdeɛ la ɛ? (Edwɛndolɛ 119:98; Mrɛlɛbulɛ 3:5, 6; Mateyu 4:3, 4)
Duzu bieko a anwo hyia na yɛali konim wɔ yɛ sunsum nu konle ne anu a? Fane nyɛ a ɔwɔ kɛ yɛfa yɛdi gyima a? Nwane mɔ a ɔwɔ kɛ yɛfa yɛdi gyima yɛboa bɛ a? (Ɛfɛsɛsema 6:18, 19)
15. Duzu a ɔwɔ kɛ yɛyɛ na yɛahola yɛaho sunsum nu konle ne akɛnrasesebɛ zo a?
15 Kɛ Kelaese sogyama la, yɛboka ɛlɔne kpole mɔɔ ɛlɛko sunsum nu konle ne la anwo. Saa yɛmaa yɛ nye da ɛkɛ na yɛfa Nyamenle konle tɛladeɛ ne amuala yɛwula a, yɛnrɛho yɛnrɛdɔ wɔ konle ɛhye anu. Emomu, yɛ neazo ne bawula yɛ gɔnwo mɔ mɔɔ yɛ nee bɛ sonle Nyamenle la anwosesebɛ. Yɛbayɛ mɔɔ bɛziezie yɛ na yɛlɛ ɛhulolɛ kpole kɛ yɛbɔ Nyamenle Mɛzaya Belemgbunlililɛ ne, anwuma arane ne mɔɔ Seetan kyi ye kɔkɔkɔkɔ la anwo edwɛkpa ne nolo akɛnrasesebɛ zo a.
Suzu nwo Fa Ti Nu
• Duzu ati a Gyihova azonvolɛ ɛnva bɛ nwo ɛnwulowula ewiade edwɛkɛ nu ɛ?
• Seetan mɛlɛbɛla ndenle mɔɔ ɔfa zo ɔsɛkye Keleseɛnema sunsum nu boɛlilɛ la bie mɔ a le boni?
• Kɛzi sunsum nu konle tɛladeɛ ne mɔɔ Nyamenle ɛva ɛmaa la bɔ yɛ nwo bane wɔ yɛ sunsum nu konle ne anu ɛ?
[Debiezukoalɛ kpuyia ne mɔ]
[Nvoninli ne mɔ wɔ mukelɛ 76]
Bɛlɛboɔboa maanle maanle ne mɔ anloa bɛahɔ Amagɛdɔn
