Mɔɔ Wɔ Ɛzɔnenlɛ ne Kile La
Tile 12
Mɔɔ Wɔ Ɛzɔnenlɛ ne Kile La
1. Duzu ati a ɔwɔ kɛ nzule nu ɛzɔnenlɛ nwo kyia yɛ a?
WƆ ƐVOLƐ 29 Y.M. anu, Dwɔn Sɔnevolɛ ne vale Gyisɛse sonlabaka ne amuala wulale Azule Dwɔdan anu zɔnenle ye. Ɛnee Gyihova ɛlɛnea ɛhye na ɔhilele kɛ ɔdie ɔto nu. (Mateyu 3:16, 17) Gyisɛse luale ɛhye azo pɛle kilemunli dole ɛkɛ manle ye ɛdoavolɛma. Ye ɛvolɛ nsa nee foa anzi, Gyisɛse vale adehilelɛ ɛhye manle ye ɛdoavolɛma ne: “Bɛva tumi muala mɔɔ wɔ anwuma nee aze la bɛmaa me. Yemɔti bɛhɔ maanle ti nee maanle bo, bɛmaa menli ɛrayɛ me ɛdoavolɛma; bɛzɔne bɛ wɔ Selɛ ne, Ralɛ ne nee Sunsum Nwuanzanwuanza ne duma nu.” (Mateyu 28:18, 19) Asoo wɔmaa bɛzɔne wɔ kɛmɔ Gyisɛse hilele la? Saa ɛtɛyɛle zɔ a, asoo ɛlɛsiezie ɛ nwo wɔayɛ zɔ ɔ?
2. Ɛzɔnenlɛ nwo edwɛkɛ boni mɔ a ɔwɔ kɛ yɛye ɔ nloa a?
2 Kɛ ɔde ye biala la, ɔwɔ kɛ awie biala mɔɔ kulo kɛ sonle Gyihova na ɔtɛnla ye tenlene ewiade ne anu la te mɔɔ ɛzɔnenlɛ kile la abo kpalɛ. Edwɛkɛ mɔɔ ɔwɔ kɛ yɛbua la bie mɔ a le: Asoo ndelebɛbo mɔɔ wɔ ɛnɛ Keleseɛnema ɛzɔnenlɛ ne anu la nee Gyisɛse ɛdeɛ ne le ko ɔ? Duzu a “Selɛ ne, Ralɛ ne nee Sunsum Nwuanzanwuanza ne duma nu” mɔɔ bɛsɔne awie la kile a? Duzu a awie yɛ a ɛnee ɔlɛyɛ mɔɔ Keleseɛnema nzule nu ɛzɔnenlɛ ne kile la ɛ?
Dwɔn Ɛzɔnenlɛ Ne
3. Nwane mɔ angomekye a ɛnee Dwɔn ɛzɔnenlɛ ne wɔ ɛkɛ ne maa bɛ a?
3 Ɔhale kɛyɛ siane nsia na bɛazɔne Gyisɛse la, Dwɔn Sɔnevolɛ ne hɔle Dwudiya fienemgbole ne anu na ɔbɔle nolo kɛ: “Bɛnlu bɛ nwo na Anwuma Belemgbunlililɛ ne ɛbikye!” (Mateyu 3:1, 2) Menli dɔɔnwo diele mɔɔ Dwɔn hanle la na bɛlile zolɛ. Bɛrahanle bɛ ɛtane bɛhilele, bɛnlunle bɛ nwo, na bɛmanle Dwɔn zɔnenle bɛ wɔ Azule Dwɔdan anu. Ɛnee ɛzɔnenlɛ zɔhane le Dwuuma angomekye ɛdeɛ.—Luku 1:13-16; Gyima ne 13:23, 24.
4. Duzu ati a ɛnee ɔwɔ kɛ Dwuuma mɔɔ wɔ ɛvoya ne mɔɔ lumua la anu la nu bɛ nwo ndɛndɛ a?
4 Ɛnee ɔwɔ kɛ zɔhane Dwuuma ne nu bɛ nwo ndɛndɛ. Bɛ nlenya mɔ nee Gyihova Nyamenle yɛle maanle ngyehyɛleɛ anzɛɛ ngyekyeleɛ wɔ 1513 K.Y.M., wɔ Saenae Boka ne abo. Bɛyɛle ɛtane kpole, bɛanli ngyekyeleɛ ne azo, yemɔti bɛlile nwolɛ fɔlɛ. Wɔ Gyisɛse mekɛ zo ɛnee bɛ gyinlabelɛ ne ɛnle kpalɛ fee. Ɛnee Gyihova “kenle kpole anu ɛzulolɛ ne” mɔɔ Malakae hanle nwolɛ edwɛkɛ ziele la ɛbikye. Zɔhane “kenle” ne rale ɛvolɛ 70 Y.M. anu, mekɛ mɔɔ Wulomu sogyama razɛkyele Gyɛlusalɛm, ye ɛzonlenlɛ sua ne, nee Dwuuma mɔɔ bo mgbe ko la. Kolaa na ɛzɛkyelɛ ne ara la, bɛzoanle Dwɔn Sɔnevolɛ ne mɔɔ ɛnee bɔ nɔhalɛ ɛzonlenlɛ nwo mɔdenle la, amaa “yeaziezie [Gyihova] menli ne yeamaa ye.” Ɛnee ɔwɔ kɛ bɛnu bɛ nwo bɛfi ninyɛne mɔɔ Mosisi Mɛla ne tendɛ tia la anwo na bɛsiezie bɛ nwo bɛmaa Nyamenle Ra ne, Gyisɛse, mɔɔ ɛnee Gyihova ɛlɛsoa ye bɛ ɛkɛ ne la.—Malakae 4:4-6; Luku 1:17; Gyima ne 19:4.
5. (a) Mekɛ mɔɔ Gyisɛse rale kɛ bɛzɔne ye la, duzu ati a ɛnee Dwɔn ɛmkpondɛ kɛ ɔsɔne ye a? (b) Duzu a ɛnee Gyisɛse ɛzɔnenlɛ ne kile a?
5 Gyisɛse boka bɛdabɛ mɔɔ bɛrale kɛ Dwɔn ɛzɔne bɛ la anwo. Duzu ati ɔ? Kɛmɔ ɛnee Dwɔn ze kɛ ɛtane biala ɛnle Gyisɛse anwo la ati, ɔzele ye kɛ: “Wɔmɔ a ɔwɔ kɛ ɛsɔne me a, na duzu ati a wɔra kɛ menzɔne wɔ ɛ?” Noko ɛnee Gyisɛse ɛzɔnenlɛ ne le debie gyɛne anwo sɛkɛlɛneɛ. Yemɔti Gyisɛse buale kɛ: “Maa ɔyɛ zɔhane kɛkala. Ɔluakɛ ɔle kpalɛ kɛ yɛfa zɛhae adenle zo yɛyɛ mɔɔ Nyamenle kpondɛ kɛ yɛyɛ la.” (Mateyu 3:13-15) Kɛmɔ ɛnee ɛtane biala ɛnle Gyisɛse anwo la ati ɛnee ye ɛzɔnenlɛ ne ɛngile kɛ ɔlɛnu ɔ nwo yeavi ɛtane nwo; yɛɛ ɛnee ɔngyia kɛ ɔyila ɔ nwo zo ɔmaa Nyamenle, ɔluakɛ ɛnee ɔvi maanle mɔɔ bɛlumua bɛyila zo bɛmaa Gyihova la anu. Emomu, ɛnee ye ɛzɔnenlɛ wɔ mekɛ mɔɔ ɛnee yeli ɛvolɛ 30 la le debie titile. Ɛnee ɔkile kɛ ɔlɛtu ɔ nwo yeamaa ye anwuma Selɛ ne na yeahɔ zo yeayɛ Ye ɛhulolɛdeɛ.
6. Kɛzi Gyisɛse manle ɔ nye bolole Nyamenle ɛhulolɛdeɛ ɛyɛlɛ nwo ɛ?
6 Mɔɔ ɛnee Nyamenle kulo kɛ Kelaese Gyisɛse yɛ la fane Belemgbunlililɛ ne anwo. (Luku 8:1) Ɛnee ye dasanli ngoane mɔɔ ɔbava yeabɔ afɔle kɛ ɛkpɔnedeɛ na bɛagyinla zo bɛayɛ ngyekyeleɛ fofolɛ la noko boka nwo. (Mateyu 20:28; 26:26-28; Hibuluma 10:5-10) Gyisɛse manle mɔɔ ɛnee ye ɛzɔnenlɛ ne kile la anwo hyianle ye. Yeammaa debie biala andenda ɔ gyakɛ anu. Ɔmanle Nyamenle Belemgbunlililɛ ne anwo nolobɔlɛ yɛle ye gyima titile na ɔhɔle zo ɔyɛle Nyamenle ɛhulolɛdeɛ ɔhɔdwule ewule nu.—Dwɔn 4:34.
Keleseɛnema Nzule nu Ɛzɔnenlɛ
7. Ɔvi Pɛntekɔso 33 Y.M. mɔɔ ba la, adehilelɛ boni a bɛva bɛmaa Keleseɛnema wɔ ɛzɔnenlɛ nwo a?
7 Dwɔn zɔnenle Gyisɛse ɛdoavolɛma mɔɔ lumua la nzule nu na ɔhilele bɛ adenle ɔmanle bɛhɔle Gyisɛse ɛkɛ kɛ menli mɔɔ banyia anwuma Belemgbunlililɛ ne la. (Dwɔn 3:25-30) Gyisɛse manle ɛdoavolɛ ɛhye mɔ adehilelɛ na bɛdabɛ noko bɛzɔnenle menli wɔ ndelebɛbo ko ne ala mɔɔ Dwɔn vale zɔnenle menli la anu. (Dwɔn 4:1, 2) Noko akee, ɔvi Pɛntekɔso 33 Y.M., mɔɔ ba la bɛbɔle ɔ bo kɛ bɛdi adehilelɛ mɔɔ se bɛzɔne menli “wɔ Selɛ ne, Ralɛ ne nee Sunsum Nwuanzanwuanza ne duma nu” la azo. (Mateyu 28:19) Ɔbayɛ nvasoɛ yeamaa wɔ kɛ ɛbazuzu mɔɔ zɔhane edwɛkɛ ne kile la anwo.
8. Duzu a “Selɛ ne . . . duma nu” mɔɔ bɛsɔne yɛ la kile a?
8 Duzu a “Selɛ ne . . . duma nu” mɔɔ bɛsɔne yɛ la kile a? Ɔkile kɛ yɛdie Nyamenle duma, ye dibilɛ, ye atiakunlukpɔkɛ, yɛɛ ye mɛla ne mɔ yɛto nu. Suzu mɔɔ ɛhye mɔ amuala kile la anwo. (1) Mɔɔ fane ye duma ne anwo la Baebolo ne ka kɛ: “Maa bɛnwu kɛ ɛdawɔ ɛ ngomekye, mɔɔ wɔ duma a le Gyihova la a ɛle Anwuma Anwumanli wɔ azɛlɛ ye amuala azo a.” (Edwɛndolɛ 83:18, NW) (2) Gyɛlɛmaya 10:10 ka ye wɔ ye dibilɛ ne anwo kɛ: “Na wɔmɔ [Gyihova], ɛle nɔhalɛ Nyamenle.” (3) Mɔɔ fane ye tumi ne anwo la, Yekile 4:11 ka kɛ: “Yɛ Awulae nee yɛ Nyamenle! Ɛfɛta anyunlunyia, enililɛ, nee tumi. Ɔluakɛ ɛdawɔ a ɛbɔle ninyɛne kɔsɔɔti a. Wɔ ɛhulolɛ zo yɛɛ ɛbɔle bɛ a. Wɔ ɛhulolɛ zo yɛɛ bɛwɔ ɛkɛ a.” (4) Eza noko ɔwɔ kɛ yɛnwu ye kɛ Gyihova a le Ngoane Maavolɛ mɔɔ ɛbɔ kpɔkɛ kɛ ɔdie yɛ yeavi ɛtane nee ewule nu a: “Ngoanelielɛ vi [Gyihova].” (Edwɛndolɛ 3:8; 36:9) (5) Ɔwɔ kɛ yɛdie yɛto nu kɛ Gyihova le Mɛla Divolɛ Bedevinli: “[Gyihova] a le yɛ ndɛnebuavolɛ a, [Gyihova] a sie yɛ a, [Gyihova] a le yɛ belemgbunli a.” (Ayezaya 33:22) Ɔluakɛ ɔlɛ dibilɛ ɛhye mɔ amuala la ati, bɛdu yɛ folɛ kɛ: “Fa wɔ ahonle muala, wɔ ɛkɛla muala, nee wɔ adwenle muala kulo Awulae wɔ Nyamenle ne.”—Mateyu 22:37.
9. Duzu a “Ralɛ ne . . . duma nu” mɔɔ bɛsɔne yɛ la kile a?
9 Duzu a “Ralɛ ne . . . duma nu” mɔɔ bɛsɔne yɛ la kile a? Ɔkile kɛ yɛdie Gyisɛse Kelaese tumi, ye duma, nee ye dibilɛ yɛto nu. Ye duma Gyisɛse ne abo a le “Gyihova le Ngoanelielɛ.” Kɛmɔ ɔle Nyamenle Ara mɔɔ ɔwole ye kokye na ɔle abɔdeɛ muala anu belamunli la ati a ɔlɛ dibilɛ zɔhane a. (Mateyu 16:16; Kɔlɔsaema 1:15, 16) Dwɔn 3:16 ka Ralɛ ɛhye anwo edwɛkɛ kɛ: “Nyamenle hulole ewiade amra [alesama mɔɔ fɛta ɛlielɛ la] kpole kpalɛ la ati yɛɛ ɔvale Ɔ Ra kokye ne ɔmanle a, amaa awie biala mɔɔ kɛlie ye kɛli la anwu na yeanyia ngoane mɔɔ ɛnlɛ awieleɛ.” Ɔluakɛ Gyisɛse lile nɔhalɛ hɔle ewule nu la ati, Nyamenle dwazole ye vile mɔwuamra anu na ɔmanle ye tumi fofolɛ. Kɛmɔ ɛzoanvolɛ Pɔɔlo hanle la, Nyamenle “ɛkpogya [Gyisɛse] zo na yemaa ye” dibilɛ mɔɔ tɛla abɔdeɛ muala mɔɔ wɔ maanzaleɛ ye anu la. Ɛhye ati, “anwuma nee aze nee [azɛlɛ bo] amuala bahoto Gyisɛse na bɛali ye duma ne eni, na awie biala aha ye baguase kɛ, Gyisɛse Kelaese le Awulae, bɛava bɛawula Nyamenle Selɛ ne anyunlunyia.” (Felepaema 2:9-11) Yemɔti, ɔwɔ kɛ yɛdi mɛla mɔɔ Gyihova dua Gyisɛse anwo zo fa maa yɛ la azo.—Dwɔn 15:10.
10. Duzu a “Sunsum Nwuanzanwuanza ne duma nu” mɔɔ bɛsɔne yɛ la kile a?
10 Duzu a “Sunsum Nwuanzanwuanza ne duma nu” mɔɔ bɛsɔne yɛ la kile a? Ɔkile kɛ yɛdie gyima mɔɔ sunsum nwuanzanwuanza ne yɛ la yɛto nu. Na duzu a le sunsum nwuanzanwuanza ne? Ɔle Gyihova nyɛleɛ tumi mɔɔ ɔfa ɔdi ye atiakunlukpɔkɛ nwo gyima a. Gyisɛse zele ye ɛdoavolɛ ne mɔ kɛ: “Mebabiza Selɛ ne meamaa yeamaa bɛ Boavolɛ fofolɛ, na ɔ nee bɛ aradɛnla dahuu . . . yemɔ a le Sunsum ne mɔɔ baye nɔhalɛ ne . . . ahile bɛ la.” (Dwɔn 14:16, 17) Ɛnee duzu a ɛhye baboa bɛ amaa bɛayɛ a? Gyisɛse zele bɛ bieko kɛ: “Saa Sunsum Nwuanzanwuanza ne ba bɛ nwo zo a bɛbanyia tumi, na bɛali me nwo daselɛ wɔ Gyɛlusalɛm, nee Dwudiya amuala nee Samɛlea bɛahɔdwu aleɛabo ɛleka biala.” (Gyima ne 1:8) Sunsum nwuanzanwuanza ne a Gyihova vale boale manle bɛhɛlɛle Baebolo ne a: “Nyamenle [ngapezoma] edwɛkɛ kpɔkɛ ko biala mɔɔ bɛhanle la ɛnvi sonla. Sunsum Nwuanzanwuanza ne a wolole bɛ manle bɛhanle zɔhane edwɛkɛ ne mɔɔ vi Nyamenle ɛkɛ ne la a.” (2 Pita 1:21) Adenle ko mɔɔ yɛdua zo yɛkile kɛ yɛdie gyima mɔɔ sunsum nwuanzanwuanza ne yɛ yɛto nu la a le kɛ yɛbazukoa Baebolo ne. Bieko a le kɛ yɛbazɛlɛ Gyihova ɛkɛ ne moalɛ na yɛazo “Sunsum ne ma” ɛhye mɔ: “Ɛhulolɛ, anyelielɛ, anzonudwolɛ, abotane, atiakunlukɛnlɛmayɛlɛ, kpalɛyɛlɛ, nɔhalɛlilɛ, mɛlɛbɛnwoaze, yɛɛ bɛ nwo zo ɛhomolɛ.”—Galeehyeama 5:22, 23.
11. (a) Duzu a ɛzɔnenlɛ mɔɔ bɛyɛ ye ɛnɛ la kile a? (b) Adenle boni azo a ɛzɔnenlɛ le kɛ awie mɔɔ ɛwu na bɛdwazo ye la ɛ?
11 Ɔvi ɛvolɛ 33 Y.M. mɔɔ ba la, Dwuuma nee menli mɔɔ ɛhakyi ɛrayɛ Dwuuma la a bɛlumua bɛzɔnenle bɛ wɔ adenle mɔɔ Gyisɛse hilele la azo a. Mekɛ ekyi guale nu wɔ ɛhye anzi la, bɛmanle Samɛleama noko nyianle adenle rayɛle Keleseɛnema. Akee wɔ ɛvolɛ 36 Y.M. anu, bɛdole ɛsalɛ bɛvɛlɛle maanle maanle ne anu amra. Ɛnee ɔwɔ kɛ Dwuuma, menli mɔɔ ɛhakyi ɛrayɛ Dwuuma, Samɛleama, nee maanle maanle ne anu amra ko biala si ɔ ti anwo kpɔkɛ yila ɔ nwo zo maa Gyihova kɛ ɔbazonle Ye na yeali Ɔ Ra ne anzi, kolaa na bɛazɔne ye. Ɛhye a Keleseɛnema nzule nu ɛzɔnenlɛ mɔɔ bɛyɛle ye tete ne nee mɔɔ bɛyɛ ye ɛnɛ la kile a. Kɛmɔ ɛzɔnenlɛ le debie mɔɔ yɛsie ye la anwo sɛkɛlɛneɛ la ati, nzule nu mɔɔ bɛnoma awie bɔkɔɔ la le ɔ nwo zo ɛyilalɛ ne anwo sɛkɛlɛneɛ mɔɔ fɛta a. Nzule nu mɔɔ bɛnoma wɔ la kile kɛ ɛlɛwu wɔamaa anzɛɛ ɛlɛsie wɔ ɛbɛla dɛba ne. Saa bɛmaa wɔ zo a, ɔle sɛkɛlɛneɛ mɔɔ kile kɛ bɛdwazo wɔ na ɛlɛba wɔarayɛ Nyamenle ɛhulolɛdeɛ. “Ɛzɔnenlɛ kokye” ɛhye a wɔ ɛkɛ ne maa nɔhalɛ Keleseɛnema kɔsɔɔti a. Saa bɛsɔne bɛ a ɛnee bɛrayɛ Gyihova Alasevolɛ mɔɔ Nyamenle ɛlie bɛ ɛdo nu kɛ ye azonvolɛ a.—Ɛfɛsɛsema 4:5; 2 Kɔlentema 6:3, 4.
12. Duzu a Keleseɛnema nzule nu ɛzɔnenlɛ ne nee ye le ko a, wɔ adenle boni azo?
12 Wɔ Nyamenle anyunlu ɛzɔnenlɛ zɛhae kola yɛ ngoanelielɛ kpole. Kɛ neazo la, mekɛ mɔɔ ɛzoanvolɛ Pita hanle Nowa ɛlɛne ne mɔɔ bɛvale bɛliele Nowa nee ye abusua ne wɔ Azuyilɛ ne anu anwo edwɛkɛ wiele la, ɔhɛlɛle kɛ: “Ɛzɔnenlɛ le sɛkɛlɛneɛ mɔɔ gyi ɛkɛ maa [Nowa mekɛ zo] nzule ne a. Ɔnle sonlabaka nwo evinli ɛnrinzinlɛ, ɔle Nyamenle nyunlu modolɛ kɛ ɔmaa bɛ adwenle mɔɔ anu la ɛkɛ ne wienyi la, amaa ɔlua Awulae Gyisɛse Kelaese ewudwazo ne azo bɛalie bɛ ngoane.” (1 Pita 3:21) Ɛnee ɛlɛne ne le daselɛ mɔɔ kile kɛ Nowa ɛli nɔhalɛ ɛyɛ Nyamenle gyima ne bɔkɔɔ a. Bɛbobɔle ɛlɛne ne bɛwiele la, nzule “yile zɛkyele ewiade dɛba ne.” (2 Pita 3:6) Nowa nee ye abusua ne, “bɛle mɔtwɛ, mɔɔ ɛnee bɛwɔ ɛlɛne ne anu wɔ azule ne anye la yɛɛ bɛliele bɛ ngoane a.”—1 Pita 3:20.
13. Duzu anu a bɛdua nzule nu ɛzɔnenlɛ zo bɛdie Keleseɛnenli bɛfi a?
13 Ɛnɛ, bɛdabɛ mɔɔ ɔlua diedi mɔɔ bɛlɛ ye wɔ Kelaese ewudwazo ne anu la ati bɛyila bɛ nwo zo bɛmaa Gyihova la maa bɛsɔne bɛ bɛfa bɛyɛ bɛnwozoyilalɛ ne anwo sɛkɛlɛneɛ. Bɛkɔ zo bɛyɛ mɔɔ Nyamenle kulo kɛ bɛyɛ ye ɛnɛ la, na bɛlie bɛ bɛvi munzule mekɛ ɛhye anu. (Galeehyeama 1:3, 4) Bɛnrɛzɛkye bɛ bɛnrɛboka ɛnɛ ewiade ɛtane ne anwo. Bɛlie bɛ bɛvi ɛzɛkyelɛ ɛhye anu na Nyamenle ɛmaa bɛ adwenle mɔɔ anu te. Ɛzoanvolɛ Dwɔn bɔ Nyamenle azonvolɛ ɛwɔkɛ kɛ: “Ewiade nee nuhua atiakunluwɔzo ninyɛne ne mɔ amuala bapɛ nu aze, na sonla ne mɔɔ yɛ Nyamenle ɛhulolɛdeɛ la de aze dahuu.”—1 Dwɔn 2:17.
Yɛ Ɛwɔkɛ ne Mɔɔ Yɛdi Zo
14. Duzu ati a ɛzɔnenlɛ angomekye ɛngile kɛ awie banyia ngoane a?
14 Ɔle nvonleɛ kɛ yɛkɛzuzu kɛ ɛzɔnenlɛ angomekye kile kɛ awie banyia ngoane. Saa awie dua Gyisɛse Kelaese anwo zo yila ɔ nwo zo maa Gyihova na ɔkɔ zo ɔdi nɔhalɛ ɔyɛ Nyamenle ɛhulolɛdeɛ ɔkɔ awieleɛ a, yɛɛ ye ɛzɔnenlɛ ne bahola alie ye ngoane a. “Sonla mɔɔ kɛgyinla kpundii kɛhɔ awieleɛ la banyia ngoane mɔɔ ɛnlɛ awieleɛ.”—Mateyu 24:13.
15. (a) Duzu a Nyamenle kulo kɛ Keleseɛnema mɔɔ bɛzɔne bɛ la yɛ ye ɛnɛ a? (b) Kɛzi Kelaese ɛdoavolɛyɛlɛ nwo hyia wɔ yɛ ɛbɛlabɔlɛ nu ɛ?
15 Ɛnee debie bieko mɔɔ Nyamenle kulo kɛ Gyisɛse yɛ la fane kɛzi ɔbava ye dasanli ngoane yeali gyima la anwo. Ɛnee ɔwɔ kɛ ɔfa ye ngoane ɔbɔ afɔle. Wɔ yɛ afoa nu, ɔwɔ kɛ yɛfa yɛ sonlabaka ne yɛmaa Nyamenle na yɛkɔ zo yɛfi yɛ ahonle nu yɛyɛ Nyamenle ɛhulolɛdeɛ. (Wulomuma 12:1, 2) Saa ɔyɛ na yɛ nye fuu yɛkɔbɔ ɛbɛla mɔɔ wɔ ewiade ne anu la bie anzɛɛ yɛmaa nwonane afoa nu ninyɛne dɔɔnwo ɛkpondɛlɛ di yɛ ti, na yɛnnyia mekɛ mɔɔ fɛta la yɛnzonle Nyamenle a, ɛnee yɛnyɛ ye ɛhulolɛdeɛ. (1 Pita 4:1-3; 1 Dwɔn 2:15, 16) Mekɛ mɔɔ Dwuunli bie bizale kɛ duzu a ɔyɛ na yeanyia dahuu ngoane la, Gyisɛse manle ɔdele ɔ bo kɛ ɛbɛla kpalɛ ɛbɔlɛ nwo hyia. Noko Gyisɛse manle ɔnwunle debie mɔɔ anwo hyia kpalɛ kpalɛ a: yemɔ a le kɛ ɔbayɛ Kelaese ɛdoavolɛ. Na ɛhye a anwo hyia kpalɛ wɔ yɛ ɛbɛlabɔlɛ nu a. Ɔnle kɛ yɛmaa nwonane afoa nu ninyɛne di ɛhye anyunlu.—Mateyu 19:16-21.
16. (a) Belemgbunlililɛ ne anwo gyima boni a Keleseɛnema amuala lɛ ye yɛ a? (b) Kɛmɔ bɛhile ye wɔ mukelɛ 116 nee 117 la, ndenle kpalɛ mɔɔ yɛdua nu yɛyɛ Belemgbunlililɛ ne anwo gyima la bie mɔ a le boni? (d) Ahonle muala nu mɔɔ yɛfi yɛyɛ daselɛlilɛ gyima ne la di duzu anwo daselɛ?
16 Ɔwɔ kɛ eza yɛsi zolɛ bieko kɛ ɛnee ɔle Nyamenle ɛhulolɛdeɛ kɛ Gyisɛse babɔ Nyamenle Belemgbunlililɛ ne nolo. Ɛnee bɛkpokpa Gyisɛse mumua ne kɛ Belemgbunli. Noko mekɛ mɔɔ ɔwɔ azɛlɛ ye azo la ɔbɔle mɔdenle ɔlile Belemgbunlililɛ ne anwo daselɛ. Ɔwɔ kɛ yɛyɛ daselɛlilɛ gyima ko ne ala bie, na ɔwɔ kɛ yɛfi ahonle nu yɛyɛ. Saa yɛyɛ zɔ a ɛnee yɛlɛkile kɛ yɛ nye sɔ Gyihova tumililɛ na yɛkulo yɛ gɔnwo mɔ menli. (Mateyu 22:36-40) Eza yɛkile kɛ yɛ nee yɛ gɔnwo mɔ diedima mɔɔ wɔ ewiade amuala mɔɔ le Belemgbunlililɛ ne anwo nolobɔlɛma la le ko. Yɛ muala yɛbɔ nu yɛfa koyɛlɛ yɛpele kɛ yɛ sa kɛha dahuu ngoane wɔ azɛlɛ ye azo wɔ Belemgbunlililɛ zɔhane tumililɛ bo.
Suzu nwo Fa Ti Nu
• Koyɛlɛ boni a wɔ Gyisɛse ɛzɔnenlɛ ne nee ɛnɛ nzule nu ɛzɔnenlɛ nu a, na duzu ngakyile a wɔ nu a?
• Duzu a “Selɛ ne, Ralɛ ne nee Sunsum Nwuanzanwuanza ne duma nu” mɔɔ bɛsɔne awie la kile a?
• Duzu a yɛyɛ a ɛnee ɔkile kɛ yɛlɛdi yɛ Keleseɛne nzule nu ɛzɔnenlɛ nwo ɛwɔkɛ ne azo a?
[Debiezukoalɛ kpuyia ne mɔ]
[Nvoninli ne mɔ wɔ mukelɛ 116, 117]
NDENLE MƆƆ YƐDUA ZO YƐBƆ BELEMGBUNLILILƐ NE NOLO
Wɔ anlenkɛ nloa
Yɛ mbusua
Yɛ gyima nu amra
Ka kile sukuluma
Ka ye guazo
Anyelielɛma mɔɔ yɛkpɔla bɛ bieko
Sua nu Baebolo ɛzukoalɛ
