Tumi Mɔɔ Ewudwazo Anyelazo ne Lɛ La
Tile 9
Tumi Mɔɔ Ewudwazo Anyelazo ne Lɛ La
1. Saa ewudwazo anyelazo ne ɛnle ɛkɛ a, anrɛɛ duzu tɛnlabelɛ a mɔwuamra baha nu a?
YƐ NUHUA ko biala ɛminli dɔvolɛ wɔ ewule nu ɛlɛ. Saa ewudwazo ɛnle ɛkɛ a, anrɛɛ yɛnlɛ anyelazo biala kɛ yɛbanwu bɛ bieko. Anrɛɛ bɛbaha tɛnlabelɛ ɛhye mɔɔ Baebolo ne ka nwolɛ edwɛkɛ la anu: “Mɔwuamra ɛnze ɛhwee, . . . gyima anzɛɛ ndwenlenwo anzɛɛ adwenle anzɛɛ nrɛlɛbɛ biala ɛnle Ɛbolɔ mɔɔ ɛlɛkɔ la.”—Nolobɔvo ne 9:5, 10.
2. Anyelazo mɔɔ yɛ nwanwane la boni a ewudwazo ne maa yɛnyia a?
2 Gyihova vi anwunvɔnezelɛ nu ɛlua ewudwazo ne azo ɛbuke nwolɛ adenle kɛ menli pemgbenleamgbe mɔɔ ɛwu la badwazo na bɛanyia dahuu ngoane. Ɛhye kile kɛ ɛbahola wɔanyia anyelazo mɔɔ wula anwosesebɛ la kɛ kenlebie ɛ nee wɔ alɔvolɛ mɔɔ ɛla wɔ ewule nu la babɔ nu adɛnla Nyamenle ewiade fofolɛ ne anu.—Maake 5:35, 41, 42; Gyima ne 9:36-41.
3. (a) Adenle boni azo a ewudwazo ne ɛrayɛ debie mɔɔ anwo hyia wɔ Gyihova atiakunlukpɔkɛ mɔɔ ɔmaa yeara nu la anu ɛ? (b) Mekɛ boni a ewudwazo anyelazo ne wula yɛ anwosesebɛ kpalɛ a?
3 Ewudwazo ne ati, ɔngyia kɛ yɛsulo ewule. Gyihova bahola amaa Seetan adenle amaa yeayɛ mɔɔ ɔkola la biala kɛ ɔmaa ye ɛzonle ne mɔɔ se, “sonla kɛhulo kɛ ɔkɛdɛnla ngoane nu tɛla kɛ ɔkɛminli anwonyia biala mɔɔ ɔlɛ la” ara nu, noko Gyihova ɛnrɛmaa ɔnrɛzɛkye ye azonvolɛ mɔɔ di nɔhalɛ la bɔkɔɔ. (Dwobu 2:4) Gyisɛse lile nɔhalɛ manle Nyamenle hɔle ewule nu, ɛhye ati Nyamenle noko dwazole ye manle ɔhɔle anwuma. Ɔlua zo, Gyisɛse holale vale bolɛ mɔɔ ye dasanli ngoane mɔɔ di munli mɔɔ ɔvale ɔbɔle afɔle sonle la hɔmanle ɔ Ze, na ɛhye ɛbuke ngoanelielɛ nwo adenle ɛmaa yɛ. Ɔlua ewudwazo ne azo “mboane ekpunli ekyi” ne mɔɔ nee Kelaese bali agya la, lɛ anyelazo kɛ bɛ nee ye babɔ nu ali tumi wɔ anwuma Belemgbunlililɛ ne anu. (Luku 12:32) Menli mɔɔ ɛha la noko lɛ anyelazo kɛ bɛbadwazo bɛ bɛamaa bɛadɛnla aze dahuu wɔ paladaese azɛlɛ zo. (Edwɛndolɛ 37:11, 29) Saa Keleseɛnema yia sɔnea mɔɔ kola maa bɛwu la a, bɛbu ewudwazo anyelazo ne kɛ “tumi bedevinli” mɔɔ wula bɛ anwosesebɛ a.—2 Kɔlentema 4:7.
Ewudwazo ne Anwo Hyia Maa Keleseɛnema
4. (a) Adenle boni azo a ewudwazo ne boka “ɛzukoalɛdeɛ ne mɔ mɔɔ lumua la” anwo a? (b) Adwenle boni a ewiade ne lɛ ye wɔ ewudwazo ne anwo a?
4 Kɛmɔ Hibuluma 6:1, 2 ka la, ewudwazo ne boka “ɛzukoalɛdeɛ ne mɔ mɔɔ lumua la” anwo. Ɔboka ninyɛne mɔɔ yɛ diedi gyi zo mɔɔ saa ɔnle nu a yɛnrɛhola yɛnrɛyɛ Keleseɛnema mɔɔ ɛdi la anwo. (1 Kɔlentema 15:16-19) Noko akee, ewiade ne ɛnlie ewudwazo nwo ngilehilelɛ mɔɔ Baebolo ne fa maa la ɛndo nu. Kɛmɔ bɛnde mɔɔ Baebolo ne kilehile la abo kpalɛ la ati, bɛ nuhua dɔɔnwo bu ngoane mɔɔ bɛlɛ kɛkala la kɛ yemɔ a le nɔhalɛ ngoane ne a. Ɛhye ati bɛdi anyelielɛ nzi. Akee bɛdabɛ mɔɔ bɛli amaamuo ngakyile mɔɔ bɛyɛ ye wɔ ɛzonlenlɛ nu anzi na bɛsuzu kɛ sonla lɛ ɛkɛla mɔɔ ɛnwu ɛlɛ la noko wɔ ɛkɛ. Noko zɔhane diedi ne nee Baebolo nu ewudwazo ngilehilelɛ ne ɛnyia fee, ɔluakɛ saa menli lɛ ɛkɛla mɔɔ ɛnwu ɛlɛ la a, ɛnee ewudwazo ne anwo ɛngyia. Saa yɛbɔ mɔdenle kɛ yɛfa diedi nwiɔ ɛhye yɛado nwo a, ɔmaa yɛ adwenle ka bɔ nu na ɔmmaa yɛnnyia anyelazo. Kɛ ɔkɛyɛ na yɛaboa menli mɔɔ kulo kɛ nwu nɔhalɛ ne la ɛ?
5. (a) Saa awie bade ewudwazo ne abo a, duzu a ɔhyia kɛ ɔnwu ye a? (b) Ngɛlɛlera boni mɔ a ɛbava wɔahilehile ɛkɛla ne, nee tɛnlabelɛ mɔɔ mɔwuamra wɔ nu la anu a? (d) Saa awie ɛlɛfa Baebolo ngilebɛbo mɔɔ maa nɔhalɛ ne anye minli la ali gyima a, duzu a yɛbahola yɛayɛ a?
5 Saa menli ɛhye mɔ bade ewudwazo nziezielɛ kɛnlɛma ne abo a, ɔwɔ kɛ bɛnyia ɛkɛla ne nee tɛnlabelɛ mɔɔ mɔwuamra wɔ nu la anwo nɔhalɛ ngilehilelɛ. Mekɛ dɔɔnwo ne ala ngɛlɛlera ekyi bie ala a anwo la hyia amaa menli mɔɔ Baebolo nu nɔhalɛ ne anwo ɛhɔne ɛlɛku bɛ la ade edwɛkɛ ɛhye abo. (1 Kɔlentema 15:45; Edwɛndolɛ 146:3, 4; Gyemise 5:20) Noko akee, adwuleso Baebolo ngilebɛbo nee ye pɛsinli bie mɔ maa ɛkɛla nwo nɔhalɛ edwɛkɛ mɔɔ Baebolo ne kilehile la anye minli. Yemɔti ɔbayɛ kpalɛ kɛ yɛbazuzu edwɛkɛ agbɔkɛ mɔɔ bɛvale bɛlile gyima wɔ aneɛ mɔɔ bɛlumua bɛvale bɛhɛlɛle Baebolo ne anu la anwo.
6. Kɛzi ɛbahola wɔaboa awie wɔamaa yeade mɔɔ ɛkɛla ne kile la abo ɛ?
6 New World Translation ne bahola aboa yɛ amaa yɛahilehile edwɛkɛ ɛhye anu kpalɛ, ɔluakɛ ɛleka biala mɔɔ Hibulu edwɛkɛkpɔkɛ neʹphesh nee Giliki edwɛkɛkpɔkɛ psy·kheʹ finde la ɔkile ɔ bo kɛ “ɛkɛla.” Bɛhile ngɛlɛlera ngakyile mɔɔ fa edwɛkɛ agbɔkɛ ɛhye mɔ di gyima la wɔ Baebolo ngilebɛbo ɛhye mokanwo ne anu. Baebolo ngilebɛbo dɔɔnwo ɛnva edwɛkɛ kpɔkɛ ko ala ɛngile edwɛkɛ agbɔkɛ zɔhane mɔ anu. Emomu bɛkile ɔ bo “ɛkɛla,” “sonla,” “menli,” “tease abɔdeɛ,” “awie,” yɛɛ “ngoane”; yemɔti bɛkile “me neʹphesh” abo kɛ “medame” yɛɛ “wɔ neʹphesh” abo kɛ “ɛdawɔ.” Saa yɛfa Baebolo ngilebɛbo ngakyile yɛto New World Translation ne anwo a ɔbaboa sukoavo ne yeamaa yeanwu kɛ edwɛkɛ agbɔkɛ mɔɔ aneɛ mɔɔ bɛlumua bɛvale bɛhɛlɛle Baebolo ne fa di gyima mɔɔ bɛkile ɔ bo “ɛkɛla” la gyi ɛkɛ maa menli nee nane kɔsɔɔti. Noko edwɛkɛ agbɔkɛ ɛhye mɔ ɛngile kɛ ɛkɛla ne le debie mɔɔ ɛnyelɛ ɛnnwu ye, anzɛɛ bɛsɔ nu a ɔnyɛ boɛ mɔɔ kɔ zo tɛnla aze wɔ sonlabaka ne ewule nzi a.
7. Kɛzi ɛbava Baebolo ne wɔahilehile tɛnlabelɛ mɔɔ menli mɔɔ wɔ Sheol, Hades, yɛɛ Gehenna wɔ nu la anu ɛ?
7 New World Translation ne eza fa edwɛkɛkpɔkɛ “Sheol” gyinla ɛkɛ maa Hibulu edwɛkɛkpɔkɛ sheʼohlʹ yɛɛ ɔfa “Hades” ɔgyinla ɛkɛ ɔmaa Giliki edwɛkɛkpɔkɛ haiʹdes yɛɛ “Gehenna” noko ɔmaa Giliki edwɛkɛkpɔkɛ geʹen·na. “Sheol” nee “Hades” kile deɛ ko ne ala. (Edwɛndolɛ 16:10; Gyima ne 2:27, NW) Baebolo ne maa ɔda ali wienyi kɛ Sheol nee Hades kile Ɛbolɔ na bɛfa bɛbeta ewule nwo, na tɛ ngoane. (Edwɛndolɛ 89:48; Yekile 20:13) Ngɛlɛlera ne eza twe adwenle kɔ anyelazo mɔɔ yemɔ a le kɛ menli mɔɔ wɔ Ɛbolɔ la balua ewudwazo zo azia ara ngoane nu la azo. (Dwobu 14:13; Gyima ne 2:31) Noko menli mɔɔ wɔ Gehenna la ɛdeɛ, anyelazo biala ɛnle ɛkɛ ne kɛ kenlebie bɛbazia bɛara ngoane nu, yɛɛ ɔnga ɛkɛla ne anwo edwɛkɛ kɛ ɔde ngoane nu wɔ ɛkɛ.—Luku 12:5.
8. Adenle boni azo a saa awie te ewudwazo ne abo kpalɛ a ɔkola ɔka ye subane nee ye nyɛleɛ a?
8 Saa awie te edwɛkɛ ɛhye mɔ abo kpalɛ a ɔbaboa ye yeamaa yeade mɔɔ ewudwazo ne kile maa ye la noko abo. Ɔbaranyia anyezɔlɛ yeamaa ɛlɔlɛ nziezielɛ kɛnlɛma ɛhye mɔɔ Gyihova yɛ la. Anyelazo mɔɔ yɛlɛ kɛ kenlebie yɛ nee mɔwuamra babɔ nu adɛnla Nyamenle ewiade fofolɛ ne anu bieko la maa nyane mɔɔ menli mɔɔ bɛ alɔvolɛ ɛwu di la azo te. Ninyɛne ɛhye mɔ mɔɔ yɛbade ɔ bo la eza hyia amaa yɛade mɔɔ Kelaese ewule ne kile la abo. Alumua Keleseɛnema ne nwunle kɛ Gyisɛse Kelaese ewudwazo ne azo a Keleseɛnema diedi ne gyi a, na ɔrabukele adenle mɔɔ bamaa awie mɔ noko anyia ewudwazo a. Bɛbɔle mɔdenle bɛbɔle Gyisɛse ewudwazo ne nee anyelazo mɔɔ ɔfa ɔmaa la anwo nolo. Zɔhane ala a ɛnɛ, menli mɔɔ te ewudwazo ne abo na bɛlɛ nwolɛ anyezɔlɛ la bɔ mɔdenle ka nɔhalɛ edwɛkɛ ɛhye mɔɔ sonle bolɛ la kile menli gyɛne a.—Gyima ne 5:30-32; 10:42, 43.
Ɔbava ‘Ɛbolɔ Sanvɛ ne’ Yeali Gyima
9. Adenle boni azo a Gyisɛse dumua fa “Ewule nee Ɛbolɔ sanvɛ ne” di gyima a?
9 Ɔwɔ kɛ bɛdabɛ mɔɔ bɛ nee Kelaese babɔ nu ali tumi wɔ anwuma Belemgbunlililɛ ne anu la kɔsɔɔti wu. Noko bɛze edwɛkɛ ɛhye mɔɔ ɔhanle ɔwulale bɛ anwosesebɛ la kpalɛ: “Menwule, na kɛkala mede aze dahuu. Melɛ Ewule nee Ɛbolɔ sanvɛ ne.” (Yekile 1:18) Duzu a ɛnee ɔkpondɛ yeahile a? Ɛnee ɔlɛtwe adwenle yeahɔ mɔɔ dole ye la azo. Ɔdaye noko ɔwule. Noko Nyamenle ammaa yeanga Ɛbolɔ. Wɔ ye ewule ne anzi kenle nsa, Gyihova mumua ne dwazole ye kɛ sunsum nu abɔdeɛ na ɔmanle ye damɛnlangoate ngoane. (Gyima ne 2:32, 33; 10:40) Bieko, Nyamenle vale “Ewule nee Ɛbolɔ sanvɛ ne” manle ye kɛ ɔva ɔye menli gyɛne noko ɔvi Ɛbolɔ na ɔlie bɛ ɔvi Adam ɛtane ne tumi bo. Kɛmɔ Gyisɛse lɛ zɔhane sanvɛ ne la ati, ɔkola ɔdwazo ye nɔhalɛ ɛdoavolɛma ɔfi ewule nu. Ɔdumua ɔdwazo ye asafo ne anu amra mɔɔ bɛva sunsum bɛkpokpa bɛ la, na ɔmaa bɛnyia damɛnlangoate ngoane ahyɛlɛdeɛ ne mɔɔ sonle bolɛ la wɔ anwuma, kɛmɔ ɔ Ze vale manle ye la.—Wulomuma 6:5; Felepaema 3:20, 21.
10. Mekɛ boni a Keleseɛnema mɔɔ di nɔhalɛ mɔɔ bɛkpokpa bɛ la ewudwazo ne bɔle ɔ bo a?
10 Mekɛ boni a Keleseɛnema mɔɔ di nɔhalɛ mɔɔ bɛkpokpa bɛ la banyia anwuma ewudwazo ne a? Baebolo ne kile kɛ yebɔ ɔ bo dɛba. Ɛzoanvolɛ Pɔɔlo hilehilele nu kɛ bɛbadwazo bɛ ‘wɔ Kelaese ɛralɛ ne’ mɔɔ bɔle ɔ bo wɔ ɛvolɛ 1914 ne la anu. (1 Kɔlentema 15:23) Kɛkala saa nɔhavoma mɔɔ bɛkpokpa bɛ la wie bɛ azɛlɛ ye azo gyimalilɛ ne wɔ ye ɛralɛ ne anu a, ɔngyia kɛ bɛkɛhendɛ wɔ ewule nu toonwo bɛ Menle ne kɛzia kɛra. Saa bɛwu a, bɛdwazo bɛ wɔ sunsum nu, bɛkakyi bɛ ɛkɛ ne ala. Nea anyelielɛ mɔɔ bɛlɛ kɛ “bɛ gyima kpalɛ mɔɔ bɛdi la li bɛ nzi” a!—1 Kɔlentema 15:51, 52; Yekile 14:13.
11. Ewudwazo boni a wɔ ɛkɛ ne maa menli kɔsɔɔti a, na mekɛ boni a ɔbabɔ ɔ bo a?
11 Noko tɛ menli mɔɔ bali tumi wɔ anwuma Belemgbunlililɛ ne anu la ewudwazo angomekye a wɔ ɛkɛ a. Ɛvɛlɛlɛ mɔɔ Yekile 20:6 vɛlɛle anwuma ewudwazo ne “alumua ewudwazo” la kile kɛ ewudwazo bieko wɔ ɛkɛ. Menli mɔɔ banyia ewudwazo ɛhye la badɛnla paladaese azɛlɛ zo dahuu. Mekɛ boni a ewudwazo ɛhye babɔ ɔ bo a? Yekile buluku ne da ye ali kɛ ɛhye babɔ ɔ bo wɔ mekɛ mɔɔ bɛbaye “anwuma nee azɛlɛ”—ngyehyɛleɛ ɛtane ɛhye nee nuhua tumililɛ kɔsɔɔti—bɛavi ɛkɛ la. Ngyehyɛleɛ ɛtane ɛhye awieleɛ ɛbikye kpalɛ. Ɛhye anzi wɔ mekɛ mɔɔ Nyamenle ɛhile la anu, azɛlɛ ye azo ewudwazo ne babɔ ɔ bo.—Yekile 20:11, 12.
12. Nwane mɔ a baboka nɔhavoma mɔɔ bɛbadwazo bɛ bɛara azɛlɛ ye azo la anwo a, na duzu ati a ɛhye le anyelazo mɔɔ yɛ anyelielɛ a?
12 Nwane mɔ a banyia azɛlɛ ye azo ewudwazo ne a? Gyihova azonvolɛ mɔɔ dɛnlanle aze tete ne, mrenya nee mraalɛ mɔɔ ɔlua diedi mɔɔ bɛlɛ ye wɔ ewudwazo ne anu la ati bɛkpole “ewiade anu fanwodi biala la” boka menli ɛhye mɔ anwo. Menli ɛhye mɔ gyinlanle ɛkpɔlɛ nloa lile nɔhalɛ manle Nyamenle hɔle ewule nu mɔɔ bɛanzulo a. Nea anyelielɛ mɔɔ ɔbayɛ kɛ yɛbanwu bɛ bieko na yɛade ninyɛne mɔɔ Baebolo ne ka ye bɛ nwo la yɛavi bɛdabɛ mumua ne bɛ ɛkɛ a! Ebɛle mɔɔ le Gyihova ye nɔhalɛ dasevolɛ mɔɔ lumua; Yinɔko nee Nowa mɔɔ vale Nyamenle kɔkɔbɔlɛ manle wɔ akɛnrasesebɛ zo kolaa na Azuyilɛ ne ara; Ebileham nee Sɛla mɔɔ zonlenle anwumabɔvolɛma ɛyɛvolɛ; Mosisi mɔɔ bɛluale ɔ nwo zo bɛvale Mɛla ne bɛmanle wɔ Saenae Boka ne azo; ngapezoma mɔɔ lɛ akɛnrasesebɛ mɔɔ le kɛ Gyɛlɛmaya mɔɔ vale ɔ nye nwunle Gyɛlusalɛm ɛzɛkyelɛ ne wɔ ɛvolɛ 607 K.Y.M.; nee Dwɔn Sɔnevolɛ ne mɔɔ dele vile Nyamenle anloa nu kɛ ɔlɛdi Ɔ Ra Gyisɛse anwo daselɛ la kɔsɔɔti banyia azɛlɛ ye azo ewudwazo ne bie. Mrenya nee mraalɛ nɔhavoma dɔɔnwo mɔɔ bawu ewiade ɛtane ɛhye awieleɛ mekɛ ye anu la noko boka nwo.—Hibuluma 11:4-38; Mateyu 11:11.
13, 14. (a) Duzu a bara Ɛbolɔ nee menli mɔɔ wɔ nu la anwo zo a? (b) Nwane mɔ noko a bɛbadwazo bɛ a, na duzu ati ɔ?
13 Saa ɛye Nyamenle nɔhalɛ azonvolɛ ne mɔ ɛsie ahane a, bɛbadwazo menli gyɛne noko bavi ewule nu mɔɔ awie biala ɛnrɛha Ɛbolɔ a. “Ɛbolɔ sanvɛ ne” mɔɔ Gyisɛse bava ali gyima la maa yɛnwu kɛ bɛbadwazo alesama mɔɔ wɔ Ɛbolɔ la amuala. Mɔɔ fane ɛhye anwo la ɛzoanvolɛ Dwɔn nwunle ye wɔ ɛnyelɛzodeɛnwunlɛ nu kɛ bɛvuandi Ɛbolɔ bɛdo “senle tandane ne anu.” (Yekile 20:14) Duzu a ɛhye kile a? Ɔkile kɛ bɛbazɛkye Ɛbolɔ bɔkɔɔ. Ɔnrɛwa ɛkɛ bieko, bɛbaye mɔwuamra amuala bavi nu ɔluakɛ saa ɛye Gyihova nɔhalɛ azonvolɛ mɔɔ bɛbadwazo bɛ la ɛfi ɛkɛ a, Gyisɛse bavi anwunvɔnezelɛ nu adwazo ɛtanevolɛma noko. Nyamenle Edwɛkɛ ne bɔ yɛ ɛwɔkɛ kɛ: “Ɛtanevolɛma nee kpalɛyɛlɛma badwazo ara ngoane nu.”—Gyima ne 24:15.
14 Bɛnrɛdwazo ɛtanevolɛma ne mɔ anu biala kɛ ɔrɛla na bɛbua ye ewule fɔlɛ ɛkɛ ne ala. Emomu wɔ asetɛnla kɛnlɛma ne mɔɔ Nyamenle Belemgbunlililɛ ne bava ara azɛlɛ ye amuala azo la anu, bɛbaboa ɛtanevolɛma ne mɔ bɛamaa bɛabɔ ɛbɛla mɔɔ nee Gyihova ndenle ne mɔ yia la. Ɛnyelɛzodeɛnwunlɛ ne kile kɛ bɛbabuke “teasema buluku” ne anu. Ɛhye ati, bɛbanyia adenle bɛabɔ ɛbɛla mɔɔ bamaa bɛava bɛ aluma bɛawula buluku ne anu a. Bɛbabua bɛ nuhua ko biala ndɛne wɔ mɔɔ ɔbayɛ ye wɔ ewudwazo ne anzi la anwo. (Yekile 20:12, 13) Yemɔti, saa yɛsuzu mɔɔ vi nu bara la anwo a, yɛnwu kɛ bɛ ɛdeɛ ne bahola ayɛ “ngoane mɔɔ ɛnlɛ awieleɛ” la ewudwazo na tɛ kɛ bɛbua “bɛ ewule fɔlɛ” mɔɔ bɛngola bɛngoati a.—Dwɔn 5:28, 29.
15. (a) Nwane mɔɔ a bɛnrɛdwazo bɛ a? (b) Duzu a ɔwɔ kɛ ewudwazo ne anwo nɔhalɛ ndelebɛbo ka yɛ maa yɛyɛ a?
15 Noko akee, tɛ awie biala mɔɔ ɛwu la a bɛbadwazo ye a. Bie mɔ yɛle ɛtane mɔɔ bɛfa bɛkyɛ a ɔnyɛ boɛ a. Menli ɛhye mɔ ɛnle Ɛbolɔ, emomu bɛwɔ Gehenna, ɛleka mɔɔ bɛbanyia dahuu ɛzɛkyelɛ la. Menli mɔɔ bɛbazɛkye bɛ wɔ “anwongyelelɛ” kpole ne mɔɔ ɛbikye la anu la boka menli ɛhye mɔ anwo. (Mateyu 12:31, 32; 24:21, 22; 25:41, 46; 2 Tɛsalonaekama 1:6-9) Ɛhye ati, ɔwɔ nuhua kɛ Gyihova baze bɛdabɛ mɔɔ bɛwɔ Ɛbolɔ la anwunvɔne na yeadwazo bɛ ɛdeɛ, noko ewudwazo anyelazo ne ɛngile kɛ ɔwɔ kɛ yɛbɔ ɛbɛla biala mɔɔ yɛkulo la. Ewudwazo biala ɛnle ɛkɛ ne ɛmmaa bɛdabɛ mɔɔ bɛ nye fuu bɛdwazo bɛtia Gyihova tumililɛ la. Ɔwɔ kɛ ndelebɛbo ɛhye ka yɛ ahonle maa yɛbɔ ɛbɛla mɔɔ nee Nyamenle ɛhulolɛdeɛ le ko la yɛfa yɛkile kɛ yɛlɛ anyezɔlɛ kpole yɛmaa ye ɛlolɛ ne.
Ewudwazo Anyelazo ne Wula Anwosesebɛ
16. Kɛzi ewudwazo anyelazo ne wula yɛ anwosesebɛ ɛ?
16 Ewudwazo anyelazo ne wula yɛdayɛ mɔɔ yɛdie yɛdi la anwosesebɛ kpole. Kɛkala mɔɔ yɛlɛyɛ mgbanyinli la, yɛze kɛ yɛnrɛhola yɛnrɛlua ayileyɛlɛ zo yɛnrɛdu ewule yɛnrɛzie dahuu. (Nolobɔvo ne 8:8) Saa yɛzonle Gyihova nɔhalɛ nu wɔ ye ahyehyɛdeɛ ne anu a, ɛnee yɛlɛ anyelazo kpalɛ. Yɛze kɛ saa yɛwu bɔbɔ a, ɔlua ewudwazo ne ati yɛbadɛnla aze bieko wɔ Nyamenle mekɛ kpalɛ nu. Na nea anyelielɛ mɔɔ zɔhane mekɛ ne bayɛ a! Kɛmɔ ɛzoanvolɛ Pɔɔlo hanle la, yemɔ a le “nɔhalɛ ngoane ne” a.—1 Temɔte 6:19; Hibuluma 6:10-12.
17. Duzu a baboa amaa yɛahola yɛali nɔhalɛ yɛamaa Gyihova a?
17 Ɛnwunlɛ mɔɔ yɛnwu kɛ ewudwazo wɔ ɛkɛ na yɛnwu Ahenle mɔɔ nziezielɛ ɛhye vi ye la maa yɛ diedi nu mia. Ɛhye wula yɛ anwosesebɛ maa yɛkɔ zo yɛdi nɔhalɛ yɛmaa Nyamenle, saa bɔbɔ agbɔvolɛ mɔɔ ati yɛ se la fa ewule nwunlonwunla yɛ a. Seetan ɛva ewule ɛnwunlonwunla menli ɛmaa bɛrayɛ ye ngɛkɛlɛ. Noko Gyisɛse anzulo ewule. Ɔlile nɔhalɛ ɔmanle Gyihova ɔhɔle ewule nu. Gyisɛse luale ye ɛkpɔnelɛ afɔlebɔlɛ ne azo yɛle nziezielɛ mɔɔ bamaa yealie awie mɔ noko yeavi ewule nwo ɛzulolɛ nu a.—Hibuluma 2:14, 15.
18. Duzu a ɛboa Gyihova azonvolɛ ɛmaa bɛlie duma kɛ nɔhalɛlilɛma a?
18 Ɔlua diedi mɔɔ Gyihova azonvolɛ lɛ ye Kelaese afɔlebɔlɛ ne nee ewudwazo ne anu la ati, bɛralie duma kɛ nɔhalɛlilɛma. Saa bɛyia ɛkpɔlɛ mɔɔ anu yɛ se a bɛkile kɛ bɛkulo Gyihova, yemɔti bɛnzulo kɛ “bɛkɛva bɛ ngoane bɛkɛdo aze.” (Yekile 12:11) Bɛkile kɛ bɛze nrɛlɛbɛ yemɔti bɛmkpo Keleseɛne ngyinlazo bɛnva bɛmbɔ ngoane mɔɔ bɛlɛ ye kɛkala la anwo bane. (Luku 9:24, 25) Bɛze kɛ saa bɛfa nɔhalɛlilɛ bɛgyinla Gyihova tumililɛ ne anzi na ngoane mɔɔ bɛlɛ ye kɛkala la fi bɛ sa bɔbɔ a, ɔbalua ewudwazo ne azo yeayila bɛ. Asoo ɛlɛ zɔhane diedi ne bie? Saa ɛkulo Gyihova na ɛ nye die ewudwazo anyelazo ne anwo amgba a, ɛbanyia bie.
Suzu nwo Fa Ti Nu
• Duzu ati a ɔhyia kɛ awie kɛnyia ɛkɛla ne nee tɛnlabelɛ mɔɔ mɔwuamra wɔ nu la anwo ndelebɛbo amaa yeade ewudwazo ne abo kpalɛ ɛ?
• Nwane mɔ a bɛbadwazo bɛ bɛavi ewule nu a, na kɛ ɔwɔ kɛ ɛhye ka yɛ ɛ?
• Kɛzi ewudwazo anyelazo ne wula yɛ anwosesebɛ ɛ?
[Debiezukoalɛ kpuyia ne mɔ]
[Nvoninli wɔ mukelɛ 84, 85]
Gyihova ɛbɔ ɛwɔkɛ kɛ kpalɛyɛlɛma nee ɛtanevolɛma badwazo ara ngoane nu
