Tɛnla Aze Dahuu Wɔ Paladaese Azɛlɛ Zo
Foa 8
Tɛnla Aze Dahuu Wɔ Paladaese Azɛlɛ Zo
1, 2. Kɛzi asetɛnla bayɛ wɔ Nyamenle Belemgbunlililɛ ne tumililɛ bo ɛ?
1 Saa Nyamenle ye ninyɛndane nee amaneɛnwunlɛ fi azɛlɛ ye azo na ɔfa ye ewiade fofolɛ ne mɔɔ ye anwuma Belemgbunlililɛ ne bali zo wɔ ɛlɔlɛ nu la ɔba a, kɛzi asetɛnla bayɛ ɛ? Nyamenle ɛbɔ ɛwɔkɛ kɛ ‘ɔbabuke ɔ sa nu, yeamaa tease abɔdeɛ biala akunlu adwo ɔ nwo.’—Edwɛndolɛ 145:16.
2 Ninyɛne mgbalɛ boni mɔ a ɛkulo a? Asoo ɛngulo asetɛnla mɔɔ yɛ anyelielɛ, gyima kpalɛ, anwonyia, ɛleka kɛnlɛma, menli avinli anzondwolɛ, anzɛɛ ɛngulo nzisi, anwodolɛ, amaneɛnwunlɛ nee ewule mɔɔ ɛnle ɛkɛ la ɔ? Na sunsum nu gyinlabelɛ kpalɛ noko ɛ? Ɔnrɛhyɛ ninyɛne ɛhye mɔ amuala bara nu wɔ Nyamenle Belemgbunlililɛ ne tumililɛ bo. Yɛ mɔɔ Baebolo ngapezo ka ye wɔ nyilalɛ kɛnlɛma ɛhye mɔɔ bara ewiade fofolɛ ne anu anwo la nzonlɛ.
Alesama Banyia Anzondwolɛ Kpalɛ
3-6. Duzu anwodozo a yɛlɛ kɛ menli badɛnla aze anzondwolɛ nu wɔ ewiade fofolɛ ne anu a?
3 Nyamenle maa “bɛgyakyi konle wɔ azɛlɛ ye amuala azo; ɔbubu ɛda nee atwɛ ne mɔ, ɔfa senle ɔyela konle ehwili ne mɔ!”—Edwɛndolɛ 46:9.
4 “Bɛbabolo bɛ konle dadeɛ ne mɔ bɛayɛ ɛyazonlɛ mbulalɛ, na bɛbabolo bɛ atwɛ ne mɔ bɛayɛ ɛdedadeɛ. Maanle ko nee maanle ko ɛnrɛho bieko, yɛɛ bɛnrɛzukoa konle ɛhonlɛ bieko.”—Ayezaya 2:4.
5 “Bɛlɛvoma bava azɛlɛ ne ayɛ bɛ ɛdeɛ, na bɛ nye alie bɛ ɛkpazilɛ nwo.”—Edwɛndolɛ 37:11.
6 “Azɛlɛ ye azo amuala ɛyɛ diinyi, anzonudwolɛ ɛra, na bɛkpakye bɛ ne nu bɛto edwɛne.”—Ayezaya 14:7.
Menli nee Nane Badɛnla Anzondwolɛ Nu
7, 8. Anzondwolɛ boni a bara menli nee nane avinli a?
7 “Bɛdi nee boane ralɛ badɛnla, yɛɛ boboduma nee abɔnkye ralɛ bala ɛleka ko. Ɛnlankɛ ralɛ nee awenade babɔ nu adidi, na kakula yɛɛ banlea bɛ nwo zo a. Ɛnlankɛ nee ezizile babɔ nu adidi, bɛ mra babɔ nu ala ɛleka ko, na awenade bali ndile kɛ ɛnlankɛ ralɛ la. Kakula mɔɔ la nyɛfonlɛ nloa la nee ɛwɔlɛ bali nwɔhoa, yɛɛ kakula mɔɔ ɛdudu agyakɛ la bava ɔ sa awula bɔna bɔne nu. Bɛnrɛboda anzɛɛ bɛnrɛhu awie.”—Ayezaya 11:6-9.
8 “Kenle zɔhane me nee ɛbɔ nu nanemgbole, anwomanyunlu nloma, yɛɛ debie biala mɔɔ twenle ɔ kɛnra aze la bayɛ ngyekyeleɛ; . . . na me menli ne adɛnla bɛ nwo adɔ bɛ.”—Hozia 2:18.
Kpɔkɛdelɛ Kpalɛ, Dahuu Ngoane
9-14. Ka kɛzi kpɔkɛdelɛ bayɛ wɔ ewiade fofolɛ ne anu la anwo edwɛkɛ.
9 “Anyenzinlirama anye badukue, anzondilirama anzo badukue. Abuburama bawuluwulu kɛ ahɛtɛboɛ, yɛɛ mumulema bava anyelielɛ ado edwɛne.”—Ayezaya 35:5, 6.
10 Nyamenle bakyikyi “bɛ nye anwo monle. Ewule ɛnle ɛkɛ bieko, monle ɛnle ɛkɛ, nyane ɛnle ɛkɛ, ɛzunlɛ ɛnle ɛkɛ ne bieko. Ɔluakɛ alumua ninyɛne ne mɔ ɛze ɛhɔ.”—Yekile 21:4.
11 “Awie biala mɔɔ wɔ sua ne azo la ɛnrɛha kɛ, ‘Me nwo ɛdo me.’”—Ayezaya 33:24.
12 “Maa ye nwonane ɛzia ɛyɛ kɛ ye mgbavolɛ nu, na ɔnyia ye mgbavolɛ nu anwosesebɛ ne bieko.”—Dwobu 33:25.
13 “Nyamenle ahyɛlɛdeɛ ne mɔɔ ɔfa ɔmaa mgbane la a le ngoane mɔɔ ɛnlɛ awieleɛ wɔ yɛ Awulae Kelaese Gyisɛse ati.”—Wulomuma 6:23.
14 “Awie biala mɔɔ kɛlie ye kɛli la . . . [banyia] ngoane mɔɔ ɛnlɛ awieleɛ.”—Dwɔn 3:16.
Mɔwuamra Bazia Ara Ngoane Nu
15-17. Duzu anyelazo a wɔ ɛkɛ ne maa mɔwuamra a?
15 “Menli kɔsɔɔti, ɛtanevolɛma nee kpalɛyɛlɛma badwazo ara ngoane nu.”—Gyima ne 24:15.
16 “Mekɛ ɛlɛba mɔɔ mɔwuamra amuala [mɔɔ Nyamenle kakye bɛ la] bade ɔ ne wɔ bɛ nla ne mɔ anu, na bɛvi bɛ nla ne mɔ anu bɛbavinde:”—Dwɔn 5:28, 29.
17 “Nyevile kpule menli mɔɔ yeva bɛ la. Ewule nee Ɛbolɔ yele bɛ ɛdeɛ mɔɔ bɛvale bɛziele la vindele.”—Yekile 20:13.
Ninyɛne Babu Paladaese Azɛlɛ ne Azo
18-22. Duzu a azɛlɛ ne amuala bahakyi ayɛ a?
18 “Mebamaa ezule anyenye wɔ bɛ ɛlobɔ ne mɔ anloa ayɛ nyilalɛ amaa bɛ. Ɛbɔ nu mbaka bazo ma amaa bɛ, na azɛlɛ ne amaa bɛ aleɛ ahye na bɛ nwo adɔ bɛ wɔ bɛ maanle ne anu.”—Yizikeɛle 34:26, 27.
19 “Azɛlɛ ye ɛhye aleɛ dɔɔnwo ɛmaa yɛ, Nyamenle, yɛ Nyamenle ne, ɛyila yɛ.”—Edwɛndolɛ 67:6.
20 “Ɛsɛlɛ nee azɛlɛ resee bali fɛlɛko, fienemgbole anye balie, zolɛ abɔ ndotolo.”—Ayezaya 35:1.
21 “Awoka mgbole nee ngyikyi ne mɔ amuala babɔ nu ado edwɛne, na ɛbɔ nu mbaka kɔsɔɔti babɔ bɛ sa nu. Sepelɛse mbaka bafifi ɛleka mɔɔ mbowule wɔ la, mbaka mgbole bafifi ɛleka mɔɔ mbowunyɛma wɔ la.”—Ayezaya 55:12, 13.
22 “Me nee wɔ bahɔ Paladaese.”—Luku 23:43.
Awie Biala Banyia Sua Kpalɛ
23, 24. Anwodozo boni a yɛlɛ kɛ awie biala banyia sua kpalɛ a?
23 “Bɛbasisi azua bɛadɛnla nu, . . . Bɛnrɛsisi azua na awie mɔ gyɛne adɛnlɛdɛnla nu; bɛnrɛlua na awie mɔ gyɛne ali. . . . Na me menli ne mɔɔ mekpa nu meye bɛ la badidi bɛ sa anloa gyima nwo bɛ nye alie ahyɛ. Bɛnrɛvɛ ɛvɛlɛ mgbane, anzɛɛ bɛnrɛwo mralɛ bɛnrɛmaa munzule ɛnrɛzi bɛ nwo zo.”—Ayezaya 65:21-23.
24 “Awie biala badɛnla ye vanye egyinli nu, yɛɛ ye feege mbaka bo anzonudwolɛ nu; awie ɛnrɛha bɛ ɛzulolɛ.”—Maeka 4:4.
Ɛbahola Wɔadɛnla Aze Dahuu wɔ Paladaese
25. Asetɛnla kɛnlɛma boni a wɔ ɛkɛ maa yɛ kenlebie a?
25 Kenlebie asetɛnla kɛnlɛma boni a le ɛhye! Nea kɛzi yɛbahola yɛanyia asetɛnla mɔɔ lɛ atiakunlukpɔkɛ kpalɛ ɛnɛ, saa yɛfa yɛ nwo yɛto anyelazo kpundii mɔɔ wɔ ɛkɛ ne kɛ wɔ Nyamenle ewiade fofolɛ ne anu ngyegyelɛ mɔɔ wɔ ɛkɛ ɛnɛ la kɔsɔɔti bavi ɛkɛ ne la azo a! “Ninyɛne dɛba ne mɔ abo zo baminli mɔɔ awie ɛnrɛhakye bɛ bieko a.” (Ayezaya 65:17) Nea kɛzi ɔkyekye yɛ rɛle kɛ yɛbadɛnla aze dahuu a; Nyamenle bame “ewule bɔkɔɔ.”—Ayezaya 25:8.
26. Duzu a ɔwɔ kɛ ɛyɛ na wɔadɛnla aze dahuu wɔ Nyamenle ewiade fofolɛ ne anu a?
26 Ɛbahulo kɛ ɛbadɛnla aze dahuu wɔ zɔhane Paladaese ewiade fofolɛ ne mɔɔ ɛbikye kpalɛ la anu ɔ? Bie a ɛbabiza kɛ, ‘Duzu a ɔwɔ kɛ meyɛ amaa meanyia Nyamenle anyunlu ɛlolɛ wɔ ewiade ɛhye awieleɛ na meadɛnla aze wɔ ye ewiade fofolɛ ne anu a?’ Ɔhyia kɛ ɛyɛ mɔɔ Gyisɛse hilele ye wɔ asɔne bie mɔɔ ɔyɛle ɔmanle Nyamenle la anu: “Ngoane mɔɔ ɛnlɛ awieleɛ la a le kɛ bɛkɛnwu kɛ wɔmɔ a ɛle nɔhalɛ Nyamenle kokye ne a, na bɛkɛnwu Gyisɛse Kelaese, mɔɔ wɔzoa ye la.”—Dwɔn 17:3.
27. Duzu a ɔwɔ kɛ ɛyɛ na wɔanyia Nyamenle atiakunlukpɔkɛ ne anu nyilalɛ ne bie a?
27 Yemɔti, kpondɛ Baebolo, na nea kɛ mɔɔ wɔgenga ye buluku ɛhye anu la le nɔhalɛ a. Kpondɛ menli mɔɔ sukoa na bɛkilehile Baebolo nu nɔhalɛ ɛhye mɔ la. Twe ɛ nwo fi adalɛ ɛzonlenlɛ mɔɔ kilehile ninyɛne mɔɔ ɛnle Baebolo nu la anwo. Sukoa kɛzi ɛ nee menli mgbe mgbe dɔɔnwo mɔɔ ɛlɛyɛ Nyamenle ɛhulolɛdeɛ la bahola andɛnla azɛlɛ ye azo dahuu wɔ paladaese, kɛmɔ Nyamenle atiakunlukpɔkɛ ne de la. Na dwenle mɔɔ Nyamenle Edwɛkɛ ne ka ye wɔ kenlebie mɔɔ ɛbikye la anwo la boɛ: “Ewiade nee nuhua atiakunluwɔzo ninyɛne ne mɔ amuala bapɛ nu aze, na sonla ne mɔɔ yɛ Nyamenle ɛhulolɛdeɛ la de aze dahuu.”—1 Dwɔn 2:17.
[Debiezukoalɛ kpuyia ne mɔ]
[Nvoninli wɔ mukelɛ 31]
Ɔnrɛhyɛ Nyamenle atiakunlukpɔkɛ mɔɔ ɔlɛ kɛ ɔmaa azɛlɛ ye ayɛ paladaese la bara nu
