TUMIVOLƐ BEDEVINLI NYAMENLE ne a Bɔle ewiade ye amuala a. Yɛ ngoane ɛnɛ nee mɔɔ yɛbanyia ye kenle bie la, gyi ɔ nwo zo. Ɔlɛ tumi mɔɔ ɔfa ɔyila a yɛɛ ɔlɛ tumi mɔɔ ɔfa ɔtwe bɛ nzo a. Ɔlɛ ngoane nee ewule zo tumi. Saa ɔdie yɛ ɔto nu a, ɔbawie yɛ boɛ; saa yeanlie yɛ yeando nu a, ɔbayɛ munzule yeamaa yɛ. Nea kɛ nwolɛ si hyia kɛ yɛ ɛzonlenlɛ bazɔ ɔ nye a!

Menli dua ndenle dɔɔnwo azo sonle. Saa ɛzonlenlɛ le kɛ adenle a, asoo Nyamenle die ɛzonlenlɛ nu ndenle ne mɔ amuala to nuhua? Kyɛkyɛ, ɔnlie ɔ muala ɔndo nu. Nyamenle ngapezonli, Gyisɛse, hilele kɛ ndenle nwiɔ pɛ ala a wɔ ɛkɛ ne a. Ɔhanle kɛ: ‘Adenle kpolomgbolo ne kɔ ɛzɛkyelɛ nu yɛɛ . . . menli dɔɔnwo kpalɛ a fa zɔhane adenle ne azo a. Na adenle ne mɔɔ kɔ ngoane mɔɔ ɛnlɛ awieleɛ la anu la le ɛdenraa, . . . yɛɛ menli ekyi bie a nwu ye a.’​—Mateyu 7:13, 14.

Ɛzonlenlɛ ngakyile nwiɔ pɛ ala a wɔ ɛkɛ ne a: ko kɔ dahuu ngoane nu yɛɛ ko kɔ ɛzɛkyelɛ nu. Buluku ɛhye atiakunlukpɔkɛ a le kɛ ɔboa wɔ yeamaa wɔanwu adenle ne mɔɔ kɔ dahuu ngoane nu la.