1. Saa ‘yɛtwe yɛbikye Nyamenle’ a, boni a bara a?

GYIHOVA kulo bɛdabɛ mɔɔ bɛsonle ye la. Saa ɛsonle Gyihova a, ɔbayila wɔ ɛnɛ nee kenle bie noko. Baebolo ne ka kɛ: “Bɛhwe bɛbikye Nyamenle, na ɔdaye noko ɔkɛbikye bɛ.”​—Gyemise 4:8.

2. Kɛzi yɛkola yɛbikye Nyamenle ɛ, na kɛ ɛhye bazi aha yɛ asɔneyɛlɛ ɛ?

² Amaa wɔabikye Nyamenle la, ɔwɔ kɛ ɛsukoa ye Edwɛkɛ ne na ɛfa ɛdi gyima. Saa ɛyɛ asɔne ɛmaa ɔ nee ye ɛhulolɛdeɛ yɛ ko a, ɔbadie wɔ asɔneyɛlɛ ne na yeabua wɔ. Kilisiene ɛzoanvolɛ Dwɔn hɛlɛle kɛ: “Yɛsi pi wɔ Nyamenle anu, yɛɛ yɛdie yɛdi kɛ saa yɛdua ye ɛhulolɛ zo yɛbiza ye debie biala a ɔtie yɛ. Na kɛmɔ yɛze kɛ yɛbiza ye debie a ɔtie yɛ la ati, eza yɛze kɛ yɛ sa ka mɔɔ yɛbiza yɛfi ye ɛkɛ ne la.”​—1 Dwɔn 5:14, 15.

3-7. Kɛ yɛbazi yɛanyia nrɛlɛbɛ mɔɔ vi Nyamenle ɛkɛ la ɛ, na kɛzi ɔbaboa yɛ ɛ?

³ Eza bieko, saa ɛtwe ɛbikye Nyamenle a, ɔbamaa wɔanyia nrɛlɛbɛ mɔɔ bɛfa bɛgyinla alehyenlɛ ko biala ɛbɛla nu ngyegyelɛ nloa la. Baebolo ne ka kɛ: “Saa bɛ nuhua bie hyia nrɛlɛbɛ a, ɔzɛlɛ Nyamenle na ɔkɛva ɔkɛmaa ye.”​—Gyemise 1:5.

⁴ Kɛ nrɛlɛbɛ mɔɔ vi Nyamenle ɛkɛ la si kola boa wɔ ɛ? Yeanyɛ boɛ fee la, ɔkola ɔboa wɔ ɔmaa ɛnwu ninyɛne mɔɔ ɛnzɔ Gyihova anye la. Eza ɛkola ɛnwu deɛ mɔɔ ɔti ninyɛne ɛhye mɔ ɛndenrɛ nee mɔɔ ɛbahola wɔayɛ na wɔahwe ɛ nwo wɔavi nwolɛ la. Adwenle zɛhae kola bɔ ɛ nwo bane fi ngyegyelɛ dɔɔnwo mɔɔ menli yia la anwo. Kɛ neazo la, Nyamenle folɛdulɛ mɔɔ fane ɛbɛlabɔlɛ mɔɔ anwo te la azo ɛlilɛ bɔ Nyamenle menli anwo bane fi ɛnrenzɛlɛ mɔɔ bɛ nye ɛnla, nla nu ewule ngakyile, yɛɛ agyalɛ mɔɔ anyelielɛ ɛnle nu anzɛɛ agyalɛ ɛzɛkyelɛ nwo.

⁵ Duzu bieko a nrɛlɛbɛ mɔɔ Nyamenle fa maa la kola yɛ maa wɔ a? Ɔkola ɔboa wɔ ɔmaa ɛnyia nvasoɛ mɔɔ tɛla biala la wɔ ɛbɛlabɔlɛ nu. Ɔkola ɔboa wɔ ɔmaa ɛsi ɛbɛlabɔlɛ nu ninyɛne, mɔɔ le kɛ ezukoa zo ɛnleanlɛ la anwo kpɔkɛ kpalɛ. Ɛbahola wɔava ninyɛne mgbalɛ wɔazie ɛ nye zo na wɔagyakyi ninyɛne mɔɔ anwo ɛnlɛ nvasoɛ la anzililɛ.

⁶ Nrɛlɛbɛ mɔɔ vi Nyamenle ɛkɛ la eza kola boa maa agɔnwolɛvalɛ mɔɔ la ɛ nee awie mɔ avinli la yɛ boɛ. Ɛbahola wɔanyia abusua asetɛnla mɔɔ anyelielɛ wɔ nu a. Ɛ nee menli gyɛne bahola anyia agɔnwolɛvalɛ kpalɛ, na wɔanyia ɛbulɛ, bɔbɔ wɔavi menli mɔɔ ɛnzonle Nyamenle la ɛkɛ.

⁷ Eza bieko, nrɛlɛbɛ mɔɔ vi Nyamenle ɛkɛ mɔɔ ɛbanyia la bamaa wɔ ɛbɛlabɔlɛ anyia ngɔzo. Ɔbaboa wɔ yeamaa wɔagyinla asetɛnla ɛsesebɛ nee arɛlebɔlɛ nloa. Eza ɛbanyia kenle bie nwo adwenle kpalɛ, mɔɔ tenrɛ la. Adwenle kpalɛ ɛhye bamaa wɔanyia adwenle nee nwonane nu kpɔkɛdelɛ kpalɛ.​—Mrɛlɛbulɛ 14:30; Ayezaya 48:17.

8. Saa ɛsonle Nyamenle a, duzu a ɛnrɛzulo a?

⁸ Saa ɛsonle nɔhalɛ Nyamenle ne a, ɛbalie ɛ nwo wɔavi ɛzulolɛ mɔɔ gyegye bɛdabɛ mɔɔ bɛnzonle ye la anwo. Ɔluakɛ ɛze kɛ mowuamra ɛnle ngoane nu wɔ bɛ nla ne mɔ anu la ati, ɛnrɛzulo bɛdabɛ mɔɔ bɛwu la. Ɔluakɛ ɛlɛ anwodozo wɔ Nyamenle ɛwɔkɛ  mɔɔ yebɔ kɛ ɔbadwazo mowuamra la anu la ati, ɛnrɛzulo kɛ ɛkɛwu. Na kɛ mɔɔ ɛze kɛ Nyamenle lɛ tumi kpole la ati, ɛnrɛzulo ayɛne anzɛɛ silihyelɛ.​—Dwɔn 8:32.

9-11. Nwane mɔ a bɛadɛnla Paladaese a, na nwane mɔ a ɛnrɛdɛnla ɛkɛ ne bie a?

⁹ Saa ɛtwe ɛbikye Nyamenle a, ɛnrɛzulo mɔɔ bara kenle bie la. Kɛ mɔɔ yɛze la, Baebolo ne hanle ngyegyelɛ mɔɔ yɛnwu ye azɛlɛ ye azo ɛnɛ la anwo edwɛkɛ dole ɛkɛ. Gyihova maa yɛnwu ye kɛ ninyɛne ɛhye mɔ ɛnrɛdɛnla ɛkɛ dahuu; ɔnrɛhyɛ Nyamenle Belemgbunlililɛ ne bayɛ azɛlɛ ye paladaese.​—Luku 21:10, 11, 31; 23:43.

¹⁰ Bɛdabɛ mɔɔ bɛtwe bɛbikye Gyihova na bɛsonle ye la angomekye a badɛnla Paladaese a. Baebolo ne ka kɛ: “Ɔnrɛhyɛ biala ɛnee amumuyɛnli ne abo zo ɛminli, ɛbahɔnlea ɛleka mɔɔ ɔwɔ la, na ɛnrɛnwu ye. Na bɛlɛvoma bava azɛlɛ ne ayɛ bɛ ɛdeɛ, na bɛ nye alie bɛ ɛkpazilɛ nwo.”​—Edwɛndolɛ 37:10, 11.

¹¹ Bɛdabɛ mɔɔ bɛyɛ anzosesebɛ bɛbu bɛ nye bɛgua Nyamenle tenlene mɛla ne azo la ngoane babɔ bɛ bɔkɔɔ. (2 Tɛsalonaekama 1:8, 9) Bɛ bo zo baminli. Bɛbazɛkye bɛ nee Seetan yɛɛ ye sunsum ɛtane ne mɔ bɔkɔɔ. (Yekile 20:10, 14) Na bɛdabɛ mɔɔ bɛsukoa Gyihova anwo debie na bɛsonle ye la anye bɛalie wɔ Paladaese wɔ azɛlɛ ye azo.

12. Duzu a Baebolo ne ka ye wɔ kenle bie anwo a?

¹² Gyihova lɛ ninyɛne mgbalɛ maa bɛdabɛ mɔɔ bɛkulo ye la! Wɔmɔ nea mɔɔ ye Edwɛkɛ ne ka wɔ Paladaese azɛlɛ ne azo ɛdɛnlanlɛ nwo la:

• Aleɛ babu zolɛ: ‘Aleɛ babu azɛlɛ ne azo; abɛlɛ bazi agole wɔ awoka ne mɔ azo.’​—Edwɛndolɛ 72:16.

• Azua mgbalɛ: “Bɛbasisi azua bɛadɛnla nu.”​—Ayezaya 65:21.

• Gyima mɔɔ yɛ anyelielɛ: “Na me menli ne mɔɔ mekpa nu meye bɛ la badidi bɛ sa anloa gyima nwo bɛ nye alie ahyɛ. Bɛnrɛvɛ ɛvɛlɛ mgbane.”​—Ayezaya 65:22, 23.

• Anwodolɛ ɛnle ɛkɛ: “Na awie biala mɔɔ wɔ sua ne azo la ɛnrɛha kɛ, ‘Me nwo ɛdo me.’”​—Ayezaya 33:24.

• Bɔtɔvoma ɛnle ɛkɛ: “Anyezinlirama anye badukue, anzondilirama anzo badukue. Abuburama bawuluwulu kɛ ahɛtɛboɛ, yɛɛ mumulema bava anyelielɛ ado edwɛne.”​—Ayezaya 35:5, 6.

• Nyane, alɔbɔlɛ, anzɛɛ ewule ɛnle ɛkɛ: “[Nyamenle bakyikyi] bɛ nye anwo monle. Ewule ɛnle ɛkɛ bieko, monle ɛnle ɛkɛ, nyane ɛnle ɛkɛ, ɛzunlɛ ɛnle ɛkɛ ne bieko. Ɔluakɛ alimoa ninyɛne ne mɔ ɛze ɛhɔ.”​—Yekile 21:4.

• Konle ɛnle ɛkɛ: “[Nyamenle maa] bɛgyakyi konle wɔ azɛlɛ ye amuala azo.”​—Edwɛndolɛ 46:9.

• Dahuu ngoane: “Tenlenema bava azɛlɛ ne ayɛ bɛ ɛdeɛ, na bɛadɛnla zolɛ dahuu.”​—Edwɛndolɛ 37:29.

13. Nwane angomekye a kola maa azɛlɛ ye yɛ paladaese a, na duzu ati ɔ?

¹³ Menli ɛnrɛhola ɛnrɛva ninyɛne zɛhae mɔ ɛnrɛra ɛlɛ, noko Gyihova lɛ tumi mɔɔ ɔbava yeayɛ debie biala mɔɔ yeha kɛ ɔbayɛ la. Debie biala ɛngola ɛnzi ye adenle wɔ mɔɔ ɔkulo kɛ ɔyɛ la anwo. Baebolo ne ka kɛ: “Ɔluakɛ debie biala ɛnle ɛkɛ mɔɔ Nyamenle ɛnrɛhola ɛnrɛyɛ a.”​—Luku 1:37.

14. Kɛzi ɛbahola wɔalua adenle ne mɔɔ kɔ dahuu ngoane nu la anu ɛ?

¹⁴ Gyihova lua ye Alasevolɛ ne mɔ anwo zo ɔlɛmaa menli mɔɔ wɔ ɛleka biala la adenle kɛ “bɛva anuhɔlɛ ɛdenraa ne anu bɛwolo” na bɛlua adenle ne mɔɔ kɔ dahuu ngoane nu la anu. Ɔrɛla ye kɛ ɛbaboka menli mɔɔ lɛ anyelielɛ mɔɔ die ɛvɛlɛlɛ zɔhane azo la anwo. Ɔrɛla ye kɛ ɛbava nɔhalɛ ɛzonlenlɛ wɔadɛnla aze na wɔanyia Gyihova nyilalɛ dahuu!​—Mateyu 7:13, 14.