1. Duzu a ɔwɔ kɛ yɛyɛ na yɛazɔ Nyamenle anye ɛ?

AMAA yɛ nee Nyamenle anyia agɔnwolɛvalɛ kpalɛ mɔɔ anyelielɛ wɔ nu la, ɔwɔ kɛ yɛtwe yɛ nwo yɛfi adalɛ ɛzonlenlɛ nwo bɔkɔɔ. Ɔwɔ kɛ yɛfa nɔhalɛ ɛzonlenlɛ yɛtɛnla aze. Menli mgbe mgbe mɔɔ wɔ azɛlɛ ye azo ɛleka biala la ɛlɛyɛ zɔ ɛnɛ.

2. Nienwu a bɛnwu Gyihova Alasevolɛ a, na bɛ gyima a le boni?

² Kɛ mɔɔ Baebolo ne ɛha ɛdo ɛkɛ ne la, nɔhalɛ azonvolɛ le “menli pemgbenleamgbe anzɛɛ ekpunli kpole” mɔɔ “bɛvi mbusua, maanle, aneɛ nee menli ngakyile kɔsɔɔti anu” a bɛra a. (Yekile 7:9) Wɔ azɛlɛ 235 azo, Gyihova Alasevolɛ mgbe dɔɔnwo ɛlɛboa menli wɔ anyebolo zo bɛamaa bɛazukoa Gyihova ɛlɔlɛ ndenle ne mɔ nee mɔɔ ɔkpondɛ kɛ bɛyɛ la.

3. Nwane a Alasevolɛ ne mɔ sonle ye a, na ɛzonlenlɛ ngakyile boni a bɛkpo a?

³ Alasevolɛ ne mɔ die to nuhua kɛ Gyihova angomekye a fɛta ɛzonlenlɛ a. Bɛkpo kɛ bɛkɛbɔ bɛ ti aze bɛkɛmaa awozonle anzɛɛ Nyamenle ɛzonlenlɛ nu nvoninli biala. (1 Dwɔn 5:21) Bɛnlua epezilɛ anzɛɛ amaamuo ngakyile mɔɔ si adalɛ ɛzonlenlɛ nu diedi yɛɛ ‘sunsum ɛtane ngilehilelɛ’ adua la azo bɛnli mowuamra eni. (1 Timote 4:1) Noko akee, bɛkyekye bɛdabɛ mɔɔ bɛ nwo ɛha la arɛle ɔlua Nyamenle ɛwɔkɛ mɔɔ yebɔ kɛ ɔbadwazo mowuamra yeara paladaese wɔ azɛlɛ ye azo mɔɔ bɛkilehile nu bɛkile bɛ la azo.​—Dwɔn 5:28, 29; Gyima ne 24:15.

4. Duzu kpɔkɛ a Nyamenle menli si wɔ ngonyiayelɛ nwo a?

⁴ Alasevolɛ ne mɔ ɛnva bɛ nwo ɛnwula ngonyiayelɛ, silihyelɛ, anzɛɛ ayɛne nyɛleɛ nu, ɔluakɛ, bɛze kɛ nyɛleɛ ɛhye mɔ vi Abɔnsam. Bɛnva bɛ rɛle bɛnwula ngonyiayelɛ nu kɛ bɛ anwobanebɔlɛ​—bɛ rɛle amuala wɔ Gyihova anu.​—Mrɛlɛbulɛ 18:10.

5. Adenle boni azo a Gyihova Alasevolɛ ‘ɛnle ewiade ye ɛdeɛ’ a?

⁵ Gyisɛse hanle kɛ ye ɛdoavolɛma ne ‘ɛnle ɛtane ewiade ye ɛdeɛ.’ (Dwɔn 17:16) Gyisɛse mumua ne anva ɔ nwo anwula ye mekɛ zo maanyɛlɛ nu. (Dwɔn 6:15) Wɔ adenle ko ne ala azo, Alasevolɛ ne mɔ ɛnva bɛ nwo ɛnwula ewiade ɛhye maanyɛlɛ, ye maanlehulolɛ, nee ye dibilɛ ɛpelelɛ nu. Noko, bɛtua bɛ adwule na bɛdi maanle mɔɔ bɛde nu la mɛla zo.​—Dwɔn 15:19; Wulomuma 13:1, 7.

6. Agyalɛ nee ewolebɔlɛ nwo adehilelɛ boni a Nyamenle azonvolɛ fa di gyima a?

⁶ Ɔluakɛ Alasevolɛ ne mɔ yɛ ɛnzolɛ maa maanle mgbanyima la ati, bɛnea kɛ bɛva bɛ agyalɛ bɛwula mɛla bo. (Taetɛse 3:1) Bɛdi Nyamenle adehilelɛ zo, ɛhye ati bɛngya mraalɛ dɔɔnwo. (1 Timote 3:2) Bieko, ɔluakɛ Nyamenle azonvolɛ fa Baebolo adehilelɛ di gyima wɔ bɛ ɛbɛlabɔlɛ nu la ati, ɔnda ɔnzi kɛ bɛ agyalɛ kɔwie ewolebɔlɛ nu.

7. Kɛzi Alasevolɛ ne mɔ kulo bɛ nwo ngoko ngoko ɛ?

⁷ Alasevolɛ ne mɔ kulo bɛ nwo. Ɔwɔ nuhua kɛ bɛvi aneɛ nee maanle ngakyile nu la, ɛlɔlɛ ɛhye nee ɛlɔlɛ mɔɔ bɛlɛ bɛmaa Nyamenle la ka bɛ bɔ nu wɔ nɔhalɛ mediemayɛlɛ nu. Saa esiane si anzɛɛ ɛhyianlɛ mekɛ dwazo a, Alasevolɛ ne mɔ yɛ ye ndɛndɛ boa bɛ nwo. Alasevolɛ ne mɔ da ɛlɔlɛ ali wɔ kɛzi bɛbɔ bɛ ɛbɛla la anu.​—Dwɔn 13:35.

8. Nyɛleɛ ɛtane ɛtane boni a Nyamenle menli kpo a?

⁸ Gyihova menli bɔ mɔdenle kpalɛ amaa bɛava nɔhalɛlilɛ yɛɛ tenleneyɛlɛ bɛadɛnla aze. Bɛkpo awuleyɛlɛ, adalɛbɔlɛ, adwɔmanebɔlɛ, nzabolɛ, yɛɛ gualilɛ nu nyɛleɛ mɔɔ ɛngile nɔhalɛlilɛ la. Kunlima ɛmbo bɛ ye mɔ. Kolaa na bie mɔ arayɛ Alasevolɛ la bɛvale bɛ nwo bɛwulale ninyɛne ɛhye mɔ anu, noko ɔlua Gyihova moalɛ zo bɛgyakyi. “Bɛbia bɛ; bɛde bɛ nwo” wɔ Nyamenle anye zo.​—1 Kɔlentema 6:9-11.

9. Duzu a buluku ko hanle ye wɔ Abibile Maanle sunsumsɔne nwo a?

⁹ Nɔhalɛ nu, ɛzonlenlɛ ngakyile dɔɔnwo kile kɛ bɛnwu nɔhalɛ ne. Bie a bɛbava nwanwane gyima mɔɔ bɛyɛ la a bɛahile a. Kɛ neazo la, buluku ko hanle vanenle mɔɔ bɛfɛlɛ bɛ sunsumsɔne wɔ Abibile Maanle nu la anwo kɛ: “Gyima mɔɔ ngonyiama nee ninsivolɛma yɛ la ɛrali [Kilisiene eku fofolɛ ne mɔ] asa nu. . . . Bɛkile kɛ bɛka edwɛkɛ bɛmaa ɔba nu na bɛyɛ nwanwane ninyɛne. Ngapezoma mɔɔ wɔ bɛ nu la nyia ɛnyelɛzodeɛnwunlɛ na bɛkile ɛlalɛ bo. Bɛfa nzule nee nwole nwuanzanwuanza, nzonle, kyɛnɛlɛ yɛɛ ɛyɛlɛ bɛyɛ ayile na bɛfa bie bɛmaa menli bɔ bɛ nwo bane fi ewule nwo.”

10, 11. Duzu ati a mɔɔ bɛkile kɛ le nwanwane ninyɛne mɔɔ bɛyɛ ye ɛnɛ la ɛngile kɛ ɛzonlenlɛ bie vi Nyamenle ɛ?

¹⁰ Menli mɔɔ wɔ ɛzonlenlɛ ɛhye mɔ anu la ka kɛ bɛ nwanwane gyima ne kile kɛ Nyamenle ɛyila bɛ ɛzonlenlɛ ne. Noko nwanwane gyima ɛngile kɛ Nyamenle die ɛzonlenlɛ bie to nu. Seetan maa adalɛ azonvolɛ bie mɔ tumi maa bɛyɛ ‘nwanwane ninyɛne mgbole.’ (2 Tɛsalonaekama 2:9) Bieko, Baebolo ne hanle dole ɛkɛ ne kɛ nwanwane ahyɛlɛdeɛ mɔɔ vi Nyamenle, mɔɔ le kɛ ngapezo, aneɛ ngakyile ɛhanlɛ, yɛɛ nwoma ɛnwunlɛ mgbole “bapɛ nu aze.”​—1 Kɔlentema 13:8.

¹¹ Gyisɛse bɔle kɔkɔ kɛ: “Tɛ awie biala mɔɔ kɛvɛlɛ me kɛ, ‘Awulae, Awulae’ la a banyia Anwuma Belemgbunlililɛ ne a, na bɛdabɛ mɔɔ bɛyɛ mɔɔ Egya mɔɔ wɔ anwuma la kpondɛ kɛ bɛyɛ la a banyia ye a. Saa Ndɛnebualɛ Kenle ne dwu a, dɔɔnwo ne ala baha ahile me kɛ, ‘Awulae, Awulae! Yɛluale wɔ duma nu yɛbɔle Edwɛkpa ne nolo, yɛluale wɔ duma nu yɛdudule [sunsum ɛtane, NW] dɔɔnwo na yɛyɛle nwanwane ninyɛne!’ Na mebaze bɛ kɛ, Menze bɛ. Bɛvi ɛkɛ ne bɛhɔ. Nindavoma!”​—Mateyu 7:21-23.

12. Nwane mɔ a banyia anwuma Belemgbunlililɛ ne a?

¹² Nwane mɔ a, akee, banyia anwuma Belemgbunlililɛ ne a? Menli mɔɔ yɛ Nyamenle ɛhulolɛdeɛ la ɔ.

13. Duzu gyima a Nyamenle kile kɛ ye menli ɛyɛ ɛnɛ, na nwane mɔ a ɛlɛyɛ a?

¹³ Boni a Nyamenle kulo kɛ ye menli yɛ ɛnɛ a? Gyisɛse hanle kɛ: “Bɛbabɔ Edwɛkpa ɛhye mɔɔ fane . . . Belemgbunlililɛ ne anwo la nolo wɔ aleɛabo amuala, amaa yeayɛ daselɛlilɛ yeamaa aleɛabo amra kolaa na awieleɛ ne ara.” (Mateyu 24:14) Ɛhye a le gyima mɔɔ Gyihova Alasevolɛ ɛlɛfa mɔdenlebɔlɛ ayɛ a.

14. Nyamenle Belemgbunlililɛ ne a le duzu, na nwane mɔ a bali tumi wɔ Belemgbunlililɛ ne anu a?

¹⁴ Wɔ “aleɛabo amuala” Gyihova Alasevolɛ ɛlɛbɔ Nyamenle Belemgbunlililɛ ne nolo kɛ ɔle anwuma arane mɔɔ bali azɛlɛ ye amuala azo wɔ tenleneyɛlɛ nu a. Bɛkilehile kɛ Gyihova ɛye Gyisɛse Kelaese kɛ Belemgbunlililɛ ne azo Belemgbunli, na ɔ gɔnwo mɔ ebialilɛma 144,000 mɔɔ vi alesama anu la boka ɔ nwo.​—Daneɛle 7:14, 18; Yekile 14:1, 4.

15. Duzu a Belemgbunlililɛ ne bazɛkye a?

¹⁵ Alasevolɛ ne mɔ fa Baebolo ne di gyima kile menli kɛ Nyamenle Belemgbunlililɛ ne bazɛkye Seetan ewiade ne amuala. Adalɛ ɛzonlenlɛ nee ye ngilehilelɛ ne mɔɔ ɛnwula Nyamenle anyunlunyia na ɔwula Seetan anyunlunyia la bavi ɛkɛ! (Yekile 18:8) Eza dasanli tumililɛ mɔɔ dwazo tia Nyamenle la bavi ɛkɛ!​—Daneɛle 2:44

16. Nwane mɔ a Gyisɛse Kelaese bali bɛ nwo zo tumi a, na nienwu a bɛbadɛnla a?

¹⁶ Mɔɔ boka ye bieko la, Gyihova Alasevolɛ bɔ ye nolo kɛ Gyisɛse Kelaese bamaa bɛdabɛ mɔɔ bɛyɛ mɔɔ Nyamenle kpondɛ la anyia nvasoɛ kpole. Bɛbayɛ ye maanlema wɔ azɛlɛ ye azo. Baebolo ne bɔ ɛwɔkɛ kɛ: “Ɔluakɛ mɔɔ ɛnlɛ bie la fɛlɛ a ɔdie ye zo, ɔdie ehyianli nee mɔɔ ɛnlɛ boavolɛ la zo. Ɔnwu mɔɔ ɛnlɛ anwosesebɛ nee mɔɔ ɛnlɛ bie la anwunvɔne, na ɔdie mɔɔ ɛnlɛ bie la ngoane.”​—Edwɛndolɛ 72:12, 13.

17. Nwane mɔ angomekye a ɛlɛbɔ Nyamenle Belemgbunlililɛ ne nolo a?

¹⁷ Menli ekpunli bieko ɛnle ɛkɛ mɔɔ yɛ Nyamenle ɛhulolɛdeɛ, bɔ Belemgbunlililɛ edwɛkpa ne nolo a. Gyihova Alasevolɛ ala a ɛlɛbɔ Nyamenle Belemgbunlililɛ ne nolo wɔ azɛlɛ ye azo amuala a.