TILE 10
“Bɛhɛlɛ Kɛ”
“Ɛnɛ, ngɛlɛlera ɛhye . . . ɛra nu”
1-3. Nɔhalɛ edwɛkɛ boni a ɛnee Gyisɛse kulo kɛ menli mɔɔ wɔ Nazalɛte la te ɔ bo a, na daselɛ boni a ɔmaanle bɛnwunle ye a?
GYISƐSE bɔle ye ɛzonlenlɛ gyima ne abo la ɛtɛkyɛle. Kelaese ɛzia ɛra ye sua zo Nazalɛte. Ɛnee ye bodane a le kɛ ɔmaa menli ne ade nɔhalɛ edwɛkɛ bie mɔɔ hyia kpalɛ la abo: Ɔdaye a ɔle Mɛzaya ne mɔɔ bɛhanle ɔ nwo edwɛkɛ bɛdole ɛkɛ ne la! Daselɛ boni a ɔmaanle bɛnwunle ye a?
2 Menli dɔɔnwo anye la kɛ ɔbayɛ nwanwane debie. Bɛde nwanwane ninyɛne mɔɔ Gyisɛse ɛyɛ la. Noko, yeanyɛ sɛkɛlɛneɛ biala. Emomu, ɔhɔle nyianusua ne anu kɛ mɔɔ ɔta ɔyɛ ye la. Ɔdwazole kɛ ɔkenga debie, na bɛvale Ayezaya nwomamobɔleɛ ne bɛmaanle ye. Ɔle nwomamobɔleɛ tendenle, na Gyisɛse dɛlɛle nu too ɔnwunle ɛleka mɔɔ ɔkpondɛ la. Akee ɔgengale edwɛkɛ mɔɔ ɛnɛ wɔ Ayezaya 61:1-3 la.—Luku 4:16-19.
3 Tievolɛma ne ze edwɛkɛ ɛhye. Ɔle ngapezo mɔɔ fale Mɛzaya ne anwo. Menli mɔɔ wɔ nyianusua ne anu la amuala ɛlɛnea ye. Ɛkɛ ne ɛyɛ dii. Akee Gyisɛse bɔle ɔ bo hilehilele nu kɛ: “Ɛnɛ, ngɛlɛlera ɛhye mɔɔ megenga mehile bɛ la ɛra nu.” Ye ɛdendɛlɛ ne zinle bɛ nwo, noko ɛnee bɛ nuhua dɔɔnwo ɛlɛkpondɛ sɛkɛlɛneɛ bie. Akee Gyisɛse vale akɛnrasesebɛ hanle neazo bie mɔɔ wɔ Ngɛlɛlera ne anu mɔɔ kile kɛ bɛnlɛ diedi la. Yeangyɛ, Nazalɛte amra bɔle mɔdenle kɛ bɛku ye!—Luku 4:20-30.
4. Neazo boni a Gyisɛse yɛle wɔ ye ɛzonlenlɛ gyima ne anu a, na duzu a yɛbazuzu nwo wɔ tile ɛhye anu a?
4 Kenle zɔhane Gyisɛse yɛle neazo bie na ɔlile zo wɔ ye ɛzonlenlɛ gyima ne anu. Ɔvale ɔ nwo ɔdole Nyamenle Edwɛkɛ ne mɔɔ bɛva sunsum ne bɛhɛlɛle la azo. Ɔle nɔhalɛ kɛ nwanwane ninyɛne mɔɔ ɔyɛle la maanle ɔlale ali kɛ Nyamenle sunsum ne wɔ ɔ nwo zo. Noko, ɛnee Ngɛlɛlera Nwuanzanwuanza ne anwo hyia Gyisɛse tɛla debie biala. Maa yɛzuzu neazo bie mɔ mɔɔ ɔyɛle la anwo. Yɛbazuzu kɛzi yɛ Menle ne hwenle adwenle hɔle Nyamenle Edwɛkɛ ne azo, ɔgyinlanle Nyamenle Edwɛkɛ ne anzi, na ɔhilehilele Nyamenle Edwɛkɛ ne anu la anwo.
Ɔhwenle Adwenle Ɔhɔle Nyamenle Edwɛkɛ Ne Azo
5. Duzu a ɛnee Gyisɛse kulo kɛ ye tievolɛma ne nwu ye a, na kɛzi ɔhilele kɛ ye edwɛkɛ ne le nɔhalɛ ɛ?
5 Ɛnee Gyisɛse kulo kɛ menli nwu ɛleka mɔɔ ye ngilehilelɛ ne vi la. Ɔhanle kɛ: “Mɔɔ mekilehile la ɛnle me ɛdeɛ, emomu ɔle mɔɔ zoanle me la ɛdeɛ.” (Dwɔn 7:16) Mekɛ bie ɔhanle kɛ: “Membɔ me ti anu menyɛ debie; emomu meka mɔɔ Selɛ ne hilehilele me la ala.” (Dwɔn 8:28) Eza ɔhanle kɛ: “Edwɛkɛ mɔɔ meka mekile bɛ la, membɔ me ti anu a meka a, emomu Selɛ ne mɔɔ ɔ nee me le ko la yɛɛ ɔlɛyɛ ye gyima a.” (Dwɔn 14:10) Adenle ko mɔɔ Gyisɛse luale zo hilele kɛ ye edwɛkɛ ne le nɔhalɛ la a le kɛ ɔhwenle adwenle ɔhɔle Nyamenle Edwɛkɛ ne azo fane dɔɔnwo.
6, 7. (a) Duzu a kile kɛ Gyisɛse vale ye ngilehilelɛ ne dɔɔnwo vile Hibulu Ngɛlɛlera ne anu a, na kɛmɔti a ɔyɛ azibɛnwo ɛ? (b) Kɛzi ɛnee Gyisɛse ngilehilelɛ ne le ngakyile fi mɛla kilehilevolɛma ne ɛdeɛ ne anwo ɛ?
6 Saa ɛsukoa Gyisɛse edwɛkɛ mɔɔ bɛhɛlɛ bɛdo ɛkɛ ne la kpalɛ a ɛbanwu kɛ ɔvale ye ngilehilelɛ ne dɔɔnwo ɔvile Hibulu Ngɛlɛlera ne anu mbuluku mɔɔ bo foa ko la anu. Alimoa ne, bie a ɛnrɛnwu kɛ ɛhye yɛ azibɛnwo biala. Bie a ɔbazi ɛ nwo bɔbɔ kɛ ye edwɛkɛhanlɛ nee ye ngilehilelɛ gyima mɔɔ ɔyɛle ye wɔ ɛvolɛ nsa nee foa anu la yeangola yeanga Ngɛlɛlera ne anu mbuluku mɔɔ ɛnee wɔ ɛkɛ la amuala anu edwɛkɛ la. Noko ɔbahola yeara ye kɛ ɔyɛle zɔ. Kakye kɛ edwɛkɛ mɔɔ Gyisɛse hanle nee gyima mɔɔ ɔyɛle la anu ekyi bie a bɛhɛlɛle a. (Dwɔn 21:25) Nɔhalɛ nu, ɛbahola wɔava dɔnehwele ekyi bie wɔagenga edwɛkɛ mɔɔ Gyisɛse hanle mɔɔ bɛhɛlɛ la amuala. Fa ye kɛ ɛlɛka Nyamenle nee ye Belemgbunlililɛ ne anwo edwɛkɛ wɔ dɔnehwele ekyi bie anu na ɛlɛtwe adwenle wɔahɔ mbuluku mɔɔ bo foa ko mɔɔ wɔ Hibulu Ngɛlɛlera ne anu la azo! Eza fane dɔɔnwo ne ala ɛnee Gyisɛse ɛnlɛ nwomamobɔleɛ mɔɔ bɛhɛlɛ nu la ɔ sa nu. Mekɛ mɔɔ ɔmaanle ye Boka Zo Ɛdendɛlɛ ne la, ɔvale ye ngilehilelɛ ne dɔɔnwo ɔvile Hibulu Ngɛlɛlera ne anu—ɛnee ɔ muala wɔ ɔ ti anu!
7 Gyisɛse ngilehilelɛ ne mɔɔ ɔvale ɔvile Nyamenle Edwɛkɛ ne anu la maa yɛnwu kɛ ɛnee ɔbu Nyamenle Edwɛkɛ ne kpalɛ. “Kɛzi ɔhilehilele la zinle bɛ nwo, ɔluakɛ ɛnee ɔlɛkilehile bɛ kɛ awie mɔɔ lɛ tumi, na ɔnle kɛ mɛla kilehilevolɛma ne la.” (Maake 1:22) Saa mɛla kilehilevolɛma ne ɛlɛkilehile a bɛtwe adwenle bɛkɔ mɛla mɔɔ menli ɛhyehyɛ nee tete kilehilevolɛma mɔɔ ɛbe la edwɛkɛ zo. Noko Gyisɛse andwe adwenle angɔ mɛla ɛhye anzɛɛ kilehilevolɛma bie edwɛkɛ zo ɛlɛ. Emomu ɔvale ye ngilehilelɛ ne ɔgyinlanle Nyamenle Edwɛkɛ ne azo. Ɔhanle ye fane dɔɔnwo kɛ: “Bɛhɛlɛ kɛ.” Ɔhanle edwɛkɛ ɛhye fane dɔɔnwo ɔvale ɔhilehilele ye ɛdoavolɛma na eza ɔvale ɔdenrɛle nzuzulɛ mɔɔ ɛnfɛta la.
8, 9. (a) Kɛzi Gyisɛse hilele kɛ Nyamenle Edwɛkɛ ne a maanle ye tumi wɔ mekɛ mɔɔ ɔdele ɛzonlenlɛsua ne anwo la ɛ? (b) Adenle boni azo a ɛzonlenlɛ nu mgbanyima mɔɔ wɔ ɛzonlenlɛsua ne anu la ambu Nyamenle Edwɛkɛ ne fee ɛ?
8 Mɔɔ Gyisɛse dele Gyɛlusalɛm ɛzonlenlɛsua ne anwo la, ɔhanle kɛ: “Bɛhɛlɛ kɛ, ‘Bɛbavɛlɛ me sua ne asɔneyɛlɛ sua,’ noko bɛmɛ bɛlɛyɛ ye nwule feabelɛ.” (Mateyu 21:12, 13; Ayezaya 56:7; Gyɛlɛmaya 7:11) Ɔlimoale ɔyɛle nwanwane gyima dɔɔnwo wɔ ɛzonlenlɛsua ne anu, na aleɛ hyenle la yɛɛ ɔdele nwo a. Ngakula mrenyia dɔɔnwo bie anye liele mɔɔ ɔyɛle la anwo na bɛbɔle ɔ bo bɛyele ye ayɛlɛ. Noko, ɛzonlenlɛ nu mgbanyima ne mɔ vale ɛya na bɛbizale Gyisɛse saa ɔte mɔɔ ngakula ne mɔ ɛlɛka la a. Ɔbuale kɛ: “Ɛhɛe. Asoo bɛtɛkengale ɛhye, ‘Ngakula nee mbɔdɔma anloa anu a, wɔziezie ayɛlɛyelɛ’ ɔ?” (Mateyu 21:16; Edwɛne 8:2) Ɛnee Gyisɛse kulo kɛ menli ɛhye mɔ nwu kɛ Nyamenle Edwɛkɛ ne maa nwolɛ adenle kɛ bɛyɛ zɔ.
9 Nzinlii ɛzonlenlɛ nu mgbanyima ɛhye mɔ boɔboale bɛ nloa hɔbizale Gyisɛse kɛ: “Tumi boni a ɛfa ɛyɛ ninyɛne ɛhye mɔ a?” (Mateyu 21:23) Ɛnee Gyisɛse ɛmaa bɛnwu ɛleka mɔɔ ye tumi ne vi la wienyi. Tɛ debie fofolɛ ɛnee ɔlɛkilehile a. Mɔɔ wɔ ɔ Ze Edwɛkɛ ne anu la a ɛnee ɔlɛkilehile nu a. Ɔti, ɛnee ɛsɔfo ne mɔ nee mɛla kilehilevolɛma ne ɛmbu Gyihova nee ye Edwɛkɛ ne fee. Ɔfɛta kɛ Gyisɛse dendɛle tiale bɛ na ɔmaanle bɛ adwenle ɛtane ne lale ali la.—Mateyu 21:23-46.
10. Kɛ ɔkɛyɛ na yɛazukoa kɛzi Gyisɛse vale Nyamenle Edwɛkɛ ne lile gyima la ɛ, na ninyɛne boni mɔ a yɛlɛ mɔɔ ɛnee Gyisɛse ɛnlɛ bie a?
10 Ɛnɛ, nɔhalɛ Kilisienema fa Nyamenle Edwɛkɛ ne di gyima wɔ bɛ ɛzonlenlɛ gyima ne anu kɛ mɔɔ Gyisɛse yɛle la. Bɛze Gyihova Alasevolɛ wɔ ewiade amuala kɛ bɛbɔ mɔdenle bɛka Baebolo ne anu edwɛkɛ bɛkile menli. Yɛ mbuluku ne mɔ ka Baebolo ne anu edwɛkɛ yɛɛ bɛtwe adwenle bɛkɔ zo fane dɔɔnwo. Eza wɔ yɛ ɛzonlenlɛ gyima ne anu, yɛbɔ mɔdenle yɛka Ngɛlɛlera ne anu edwɛkɛ yɛkile menli mekɛ biala. (2 Timote 3:16) Saa awie maa yɛ adenle maa yɛkenga Baebolo ne yɛkile ye na yɛ nee ye suzu nvasoɛ mɔɔ wɔ Nyamenle Edwɛkɛ ne azo nee mɔɔ ɔkile la anwo a, nea kɛzi yɛ nye die la! Yɛngola yɛngakye edwɛkɛ kɛ Gyisɛse la noko yɛlɛ ninyɛne dɔɔnwo mɔɔ boa yɛ mɔɔ ɛnee Gyisɛse ɛnlɛ bie a. Yɛlɛ Baebolo ne kɔsɔɔti mɔɔ bɛyɛ ye wɔ aneɛ dɔɔnwo anu la, yɛɛ mbuluku dɔɔnwo mɔɔ boa yɛ maa yɛnwu ngyɛnu biala mɔɔ yɛkpondɛ la. Bɛmaa yɛva Baebolo ne yɛli gyima na yɛhwe menli adwenle yɛhɔ zo wɔ mekɛ biala mɔɔ yɛbanyia nwolɛ adenle la!
Ɔgyinlanle Nyamenle Edwɛkɛ Ne Anzi
11. Duzu ati a ɛnee ɔwɔ kɛ Gyisɛse gyinla Nyamenle Edwɛkɛ ne anzi fane dɔɔnwo a?
11 Gyisɛse nwunle kɛ bɛta bɛfa Nyamenle Edwɛkɛ ne bɛdi gyima wɔ adenle ɛtane zo, noko yeanzi ɔ nwo. Gyisɛse hanle hilele ɔ Ze wɔ asɔneyɛlɛ nu kɛ: “Wɔ edwɛkɛ le nɔhalɛ.” (Dwɔn 17:17) Ɛnee Gyisɛse ze kɛ Seetan mɔɔ “nea ewiade ye azo la” le “adalɛ nee adalɛ kɔsɔɔti bɛ ze.” (Dwɔn 8:44; 14:30) Gyisɛse kpole sɔnea mɔɔ Seetan vale rale ɔ nwo zo la na ɔvale Ngɛlɛlera ne anu edwɛkɛ ɔlile gyima fane nsa. Seetan anye fuu vale Edwɛne buluku ne anu edwɛkɛ lile gyima wɔ adenle ɛtane zo, noko Gyisɛse maanle ɔnwunle kɛ Nyamenle Edwɛkɛ ne ɛngile zɔ.—Mateyu 4:6, 7.
12-14. (a) Kɛzi ɛzonlenlɛ nu mgbanyima ne mɔ hilele kɛ bɛnva Mosisi Mɛla ne bɛnli gyima ɛ? (b) Kɛzi Gyisɛse gyinlanle Nyamenle Edwɛkɛ ne anzi ɛ?
12 Gyisɛse gyinlanle Ngɛlɛlera Nwuanzanwuanza ne mɔɔ bɛanva bɛanli gyima wɔ adenle kpalɛ zo anzɛɛ bɛangile ɔ bo kpalɛ la anzi fane dɔɔnwo. Ɛzonlenlɛ nu kilehilevolɛma mɔɔ ɛnee wɔ ye mekɛ zo la anva Nyamenle Edwɛkɛ ne anli gyima kpalɛ. Bɛzile ninyɛne ngyikyi mɔɔ wɔ Mosisi Mɛla ne anu la azo fane dɔɔnwo noko bɛammaa menli anli ngyinlazo mɔɔ wɔ nu la azo. Yemɔti bɛamba menli ne anzonle Nyamenle nɔhalɛ nu, emomu bɛmaanle kɛzi menli bu bɛ la anwo hyianle bɛ dɛlale ninyɛne mɔɔ nwolɛ hyia mɔɔ le kɛ pɛlepɛlelilɛ, anwunvɔnezelɛ nee nɔhalɛlilɛ la. (Mateyu 23:23) Kɛzi Gyisɛse maanle bɛdele Nyamenle Mɛla ne abo ɛ?
13 Gyisɛse vale edwɛkɛ ‘bɛde kɛ bɛhanle kɛ’ lile gyima fane dɔɔnwo wɔ ye Boka Zo Ɛdendɛlɛ ne anu ɔvale ɔhwenle adwenle ɔhɔle Mosisi Mɛla ne anu edwɛkɛ bie azo. Na akee yeadoa zo kɛ “meka meahile bɛ kɛ” yeava yeahile mɔɔ ngyinlazo bie kile wɔ Mɛla ne anu la. Asoo ɛnee ɔlɛtendɛ yeatia Mɛla ne ɔ? Kyɛkyɛ, ɛnee ɔlɛkilehile nu. Kɛ neazo la, ɛnee menli ne ze mɛla mɔɔ se, “Mmayɛ kodiawu” la kpalɛ. Noko Gyisɛse hanle hilele bɛ kɛ saa bɛkpɔ awie a ɛnee bɛnli ngyinlazo mɔɔ wɔ mɛla ɛhye anu la azo. Zɔhane ala a, awie nyia awie mɔɔ ɛnle ɔ hu anzɛɛ ɔ ye la anwo atiakunluwɔzo ɛtane a ɛnee ɔnli Nyamenle mɛla mɔɔ tia agyalɛzɛkyelɛ la ngyinlazo ne azo a.—Mateyu 5:17, 18, 21, 22, 27-39.
14 Eza Gyisɛse hanle kɛ: “Bɛde kɛ bɛhanle kɛ: ‘Kulo ɛ gɔnwo na kpɔ wɔ kpɔvolɛ.’ Noko, meka meahile bɛ kɛ: Bɛhɔ zo bɛhulo bɛ kpɔvolɛma na bɛzɛlɛ bɛmaa menli mɔɔ yɛ bɛ kpɔdekpɔde la.” (Mateyu 5:43, 44) Asoo mɛla mɔɔ se “kpɔ wɔ kpɔvolɛma” la vi Nyamenle Edwɛkɛ ne anu? Kyɛkyɛ, ɛzonlenlɛ nu mgbanyima ne mɔ a bɔle bɛ ti anu hilehilele zɔ a. Bɛbɔle bɛ ti anu bɛzɛkyele Nyamenle Mɛla ne mɔɔ di munli la. Gyisɛse ammaa bɛanva sonla amaamuo bɛanzɛkye Nyamenle Edwɛkɛ ne.—Maake 7:9-13.
15. Kɛzi Gyisɛse honle tiale mɔdenle mɔɔ bɛbɔle kɛ bɛmaa Nyamenle Mɛla ne ayɛ kɛ asɛɛ ɔle kyengye somaa la ɛ?
15 Ɛzonlenlɛ nu mgbanyima ne mɔ maanle ɔyɛle kɛ asɛɛ Nyamenle Mɛla ne le kyengye somaa. Mekɛ mɔɔ Gyisɛse ɛdoavolɛma lua hwiiti ɛya bie anu na bɛtetele ma ne ekyi la, Falasiima bie mɔ hanle kɛ bɛlɛsɛkye Ɛnwomenlelielɛ kenle ne. Gyisɛse vale neazo bie vile Ngɛlɛlera ne anu ɔmaanle bɛnwunle kɛ Nyamenle Edwɛkɛ ne ɛngile kɛ ɔwɔ kɛ bɛyɛ kyengye zɔ. Ɔhanle ɛzonlenlɛsua ne anu paano ne mɔɔ bɛfa bɛkile mɔɔ bɛlile ye wɔ alienwo la anwo edwɛkɛ kokye ne mɔɔ wɔ Ngɛlɛlera ne anu la—paano ne mɔɔ Devidi nee ɔ gɔnwo mɔ mɔɔ ɛhɔne ɛlɛku bɛ lile la. Gyisɛse maanle Falasiima ne nwunle kɛ bɛnde Gyihova anwunvɔnezelɛ nee ahunluyelɛyelalɛ ne abo.—Maake 2:23-27.
16. Kɛzi ɛzonlenlɛ nu mgbanyima ne mɔ yɛle Mosisi mɛla mɔɔ fale ewolebɔlɛ nwo la ɛ, na duzu a Gyisɛse yɛle ye wɔ nwo a?
16 Eza ɛzonlenlɛ nu mgbanyima ne mɔ luale adenle bie azo maanle bɛbule bɛ nye bɛguale Nyamenle Mɛla ne azo. Kɛ neazo la, Mɛla ne maanle adenle kɛ saa nrenyia nwu “debie ɛtane” wɔ ɔ ye anwo—bie a ngyegyelɛ kpole mɔɔ bahola abɔ abusua ne anyiemgba la a, ɔkola ɔbɔ ye ewole. (Ditilɔnomi 24:1) Noko, wɔ Gyisɛse mekɛ zo, ɛzonlenlɛ nu mgbanyima ne mɔ gyinlanle edwɛkɛ ɛhye azo maanle adenle kɛ nrenyia bahola abɔ ɔ ye ewole wɔ edwɛkɛ biala anwo—saa ɔto aleɛ bɔbɔ na ɔyela a! a Gyisɛse hilele kɛ bɛhakyi Mosisi edwɛkɛ mɔɔ ɔnyianle ɔvile Nyamenle ɛkɛ la bɔkɔɔ. Akee ɔvale Gyihova agyalɛ nwo ngyinlazo mɔɔ ɛnee wɔ ɛkɛ ne wɔ mɔlebɛbo ne, mɔɔ yemɔ a le kɛ ɔwɔ kɛ nrenyia biala gya raalɛ ko, na adwɔmane ɛbɛla angomekye a bɛgyinla zo bɛbɔ ewole la ɔziele ɛkɛ.—Mateyu 19:3-12.
17. Kɛ ɔkɛyɛ na Kilisienema azukoa Gyisɛse na bɛagyinla Nyamenle Edwɛkɛ ne anzi ɛnɛ ɛ?
17 Zɔhane ala a ɛnɛ noko Kelaese ɛdoavolɛma te nganeɛ kɛ ɔwɔ kɛ bɛgyinla Ngɛlɛlera Nwuanzanwuanza ne anzi a. Saa ɛzonlenlɛ nu mgbanyima ka kɛ ɛbɛla kpalɛ nwo ngyinlazo mɔɔ wɔ Nyamenle Edwɛkɛ ne anu la ɛkpa nwo a ɛnee bɛlɛtendɛ bɛatia Baebolo ne. Eza saa ɛzonlenlɛ bie ka adalɛ edwɛkɛ na ɔka kɛ ɔvi Baebolo ne anu a ɛnee ɔlɛtendɛ yeatia Baebolo ne. Yɛbu ye kɛ ɔle nwolɛ adenle kpole kɛ yɛbamaa bɛanwu nɔhalɛ ne mɔɔ wɔ Nyamenle Edwɛkɛ ne anu la—kɛ neazo la, yɛkile kɛ Nyamenle ɛnle Nsa-Ko. (Ditilɔnomi 4:39) Noko, yɛtendɛ kɛnlɛma na yɛdua bɛtɛɛyɛlɛ, mɛlɛbɛnwoaze yɛɛ ɛbulɛ zo yɛyɛ ɛhye.—1 Pita 3:15, 16.
Ɔhilehilele Nyamenle Edwɛkɛ Ne Anu
18, 19. Neazo boni mɔ a kile kɛ ɛnee Gyisɛse kola kilehile Nyamenle Edwɛkɛ ne anu kpalɛ a?
18 Mekɛ mɔɔ bɛhɛlɛle Hibulu Ngɛlɛlera ne la ɛnee Gyisɛse wɔ anwuma. Nea kɛzi ɔ nye liele kɛ ɔnyianle adenle ɔrale azɛlɛ ye azo na ɔrahilehilele Nyamenle Edwɛkɛ ne anu a! Kɛ neazo la, suzu kenle mɔɔ ɔdwazole ɔvile ewule nu na ɔyiale ye ɛdoavolɛma nwiɔ wɔ Ɛmeeyɛse adenle ne azo la anwo nea. Kolaa na bɛanwu ye sonla holɛ la, bɛhanle kɛzi bɛ Menle ne mɔɔ bɛkulo ye la ewule ɛmaa bɛ rɛle ɛbɔ na bɛ adwenle ɛyɛ basaa la anwo edwɛkɛ bɛhilele ye. Duzu a ɔhanle a? “Ɔbɔle ɔ bo ɔvile Mosisi nee Ngapezoma ne kɔsɔɔti anwo zo, na ɔhilehilele bɛ ninyɛne mɔɔ fale ɔ nwo mɔɔ wɔ Ngɛlɛlera ne anu la kɔsɔɔti anu.” Kɛzi ɔhanle bɛ ɛ? Nzinlii bɛhanle bɛhilele bɛ nwo ngoko kɛ: “Asoo mekɛ mɔɔ ɔlɛtendɛ yeahile yɛ wɔ adenle ne anu na ɔlɛkilehile Ngɛlɛlera ne anu yeahile yɛ la, yeanga yɛ ahonle kpole ɔ?”—Luku 24:15-32.
19 Nzinlii wɔ kenle ko ne ala, Gyisɛse nee ye ɛzoanvolɛma ne nee menli gyɛne yiale nu. Yɛ mɔɔ ɔyɛle ɔmaanle bɛ la nzonlɛ: “Ɔbukele bɛ adwenle nu kpalɛ ɔmaanle bɛdele Nyamenle Edwɛkɛ ne abo.” (Luku 24:45) Ɔda ali kɛ anyelielɛ mɔɔ bɛnyianle la maanle bɛhakyele ninyɛne ɛhye mɔ dɔɔnwo mɔɔ Gyisɛse yɛle maanle bɛ nee awie biala mɔɔ ɛnee kulo kɛ ɔtie la. Fane dɔɔnwo ne ala ɔfa ngɛlɛlera mɔɔ menli dɔɔnwo ze la na ɔkilehile nu ɔmaa ɔka ye tievolɛma ahonle na ɔtɛnla bɛ adwenle nu—ɔmaa bɛnyia Nyamenle Edwɛkɛ ne anu ndelebɛbo fofolɛ mɔɔ boa kpalɛ la.
20, 21. Kɛzi Gyisɛse hilehilele edwɛkɛ mɔɔ Gyihova hanle hilele Mosisi wɔ kpɔkɛ ne mɔɔ ɛlɛsɔ la anu ɛ?
20 Mekɛ bie ɛnee Gyisɛse ɛlɛtendɛ ahile Sadusiima ekpunli bie. Bɛle Dwuuma ɛzonlenlɛ ne anu eku mɔɔ nee Dwuuma ɛsɔfo ne mɔ a yɛ gyima a, noko bɛnlie ewudwazo ne bɛnli. Gyisɛse hanle hilele bɛ kɛ: “Mɔɔ fale mowuamra ewudwazo ne anwo la, asoo bɛtɛkengale mɔɔ Nyamenle hanle hilele bɛ kɛ: ‘Mame a mele Ebileham Nyamenle ne nee Ayezeke Nyamenle ne yɛɛ Gyekɔbo Nyamenle ne’ la ɔ? Ɔnle mowuamra Nyamenle, emomu teasema Nyamenle.” (Mateyu 22:31, 32) Ɛhye le ngɛlɛlera mɔɔ ɛnee bɛze ye kpalɛ, Mosisi mɔɔ Sadusiima ne bu ye kpalɛ la a hɛlɛle a. Ɛnwu kɛzi tumi wɔ Gyisɛse ngilehilenu ne anu la ɔ?
21 Mosisi nee Gyihova dendɛle wɔ kpɔkɛ ne mɔɔ ɛlɛsɔ la anwo wɔ kɛyɛ ɛvolɛ 1514 K.Y.M. (Ɛzɛdɔso 3:2, 6) Mekɛ zɔhane ɛnee Ebileham ɛwu yeli ɛvolɛ 329, Ayezeke ɛwu yeli ɛvolɛ 224 yɛɛ Gyekɔbo ɛwu yeli ɛvolɛ 197. Noko Gyihova hanle kɛ: “Mame a mele” bɛ Nyamenle a. Ɛnee Sadusiima ne mɔ ze kɛ Gyihova ɛnle kɛ awozonle ɛzonlenlɛma nyamenle bie mɔɔ nea mowuamra anwo zo a. Kyɛkyɛ, ɔle “teasema” Nyamenle kɛ mɔɔ Gyisɛse hanle la. Duzu a ɛhye kile a? Tumi wɔ Gyisɛse adwulaleɛ edwɛkɛ ne anu: “Ɔ nye zo a bɛ muala bɛde aze.” (Luku 20:38) Gyihova mɔɔ ɔ rɛle ɛnvi edwɛkɛ la kakye ye azonvolɛ mɔɔ ɔkulo bɛ edwɛkɛ mɔɔ bɛwu la. Kɛmɔ Gyihova bodane a le kɛ ɔbadwazo bɛ la ati ɔhanle bɛ nwo edwɛkɛ kɛ bɛde aze. (Wulomuma 4:16, 17) Asoo yeangilehile Nyamenle Edwɛkɛ ne anu kɛnlɛma ɔ? Ɔnyɛ azibɛnwo kɛ ‘ɔyɛle menli dɔɔnwo ne nwanwane la!’—Mateyu 22:33.
22, 23. (a) Kɛ ɔkɛyɛ na yɛazukoa kɛzi Gyisɛse hilehilele Nyamenle Edwɛkɛ ne anu la ɛ? (b) Duzu a yɛbazuzu nwo wɔ tile mɔɔ doa zo la anu a?
22 Kilisienema ɛnyia nwolɛ adenle kɛ bɛbazukoa kɛzi Gyisɛse hilehilele Nyamenle Edwɛkɛ ne anu la ɛnɛ. Nɔhalɛ nu, yɛ adwenle ne ɛnli munli. Noko, yɛkola yɛka ngɛlɛlera bie mɔ mɔɔ menli dɔɔnwo ze ye dɛba la anwo edwɛkɛ yɛkile bɛ na yɛkilehile nu wɔ adenle mɔɔ bɛtɛsuzule nwolɛ ɛlɛ bɔbɔ la azo. Kɛ neazo la, bie a bɛha edwɛkɛ “Wɔ duma nwo ɛde” yɛɛ “Wɔ Belemgbunlililɛ ɛrɛla” fane dɔɔnwo wɔ bɛ ɛbɛlabɔlɛ nu, noko bɛnze Nyamenle duma anzɛɛ ye Belemgbunlililɛ ne. (Mateyu 6:9, 10) Saa awie tie yɛ a, nea kɛzi yɛnyia nwolɛ adenle kɛnlɛma yɛdua adenle sikalɛ mɔɔ anu la ɛkɛ la azo yɛkilehile Baebolo nu nɔhalɛ ɛhye mɔ anu yɛkile ye a!
23 Saa yɛlɛkilehile menli nɔhalɛ ne na yɛtwe bɛ adwenle yɛkɔ Nyamenle Edwɛkɛ ne azo, yɛgyinla ɔ nzi na yɛkilehile nu a ɛnee yɛlɛsukoa Gyisɛse. Akee bɛmaa yɛzuzu ndenle kpalɛ mɔɔ Gyisɛse luale zo maanle nɔhalɛ mɔɔ wɔ Baebolo ne anu la hanle ye tievolɛma ahonle la bie mɔ anwo.
a Ɛvoya mɔɔ limoa la anu tetedwɛkɛ kɛlɛvolɛ Josephus, mɔɔ ɛnee ɔdaye mumua ne ɔle Falasiinli mɔɔ ɛbɔ ɔ ye ewole la nzinlii hanle kɛ ɛnee mrenyia kola “gyinla debie biala azo bɔ ewole (na mrenyia dɔɔnwo yɛle zɔ).”
