1, 2. (a) Duzu ati a sinzavolɛma ne mɔɔ hɔle Gyisɛse ɛhyelɛ la vale bɛ sa mgbane ziale a? (b) Duzu a maanle Gyisɛse yɛle kilehilevolɛ kpalɛ a?

 FALASIIMA ne ɛva ɛya kpole. Gyisɛse wɔ ɛzonlenlɛsua ne anu ɛlɛkilehile ɔ Ze anwo debie. Menli mɔɔ ɛlɛtie ye la anu ɛhyɛ nwiɔ; bɛ nuhua dɔɔnwo ɛlie Gyisɛse ɛli noko bie mɔ kulo kɛ bɛkye ye. Ɛzonlenlɛ nu mgbanyima ne mɔ ɛva ɛya yemɔti bɛzoa sinzavolɛma kɛ bɛhɔhye Gyisɛse. Noko sinzavolɛma ne vale bɛ sa mgbane ziale rale. Ɛsɔfo mgbanyima ne mɔ nee Falasiima ne bizale bɛ kɛ: “Duzu ati a bɛanva ye bɛamba ɛ?” Sinzavolɛma ne buale bɛ kɛ: “Awie biala ɛtɛtendɛle zɛhae ɛlɛ.” Bɛ nye liele Gyisɛse ngilehilelɛ ne anwo kpalɛ ɔti bɛangola bɛangye ye. a​—Dwɔn 7:45, 46.

² Tɛ sinzavolɛma ne angomekye a anye liele Gyisɛse ngilehilelɛ ne anwo a. Menli dɔɔnwo rayiale kɛ bɛtie ye. (Maake 3:7, 9; 4:1; Luku 5:1-3) Duzu a maanle Gyisɛse yɛle kilehilevolɛ kpalɛ a? Kɛ mɔɔ yɛnwunle ye wɔ Tile 8 ne anu la, ɛnee ɔkulo nɔhalɛ ne mɔɔ ɔkilehile la yɛɛ ɔkulo menli noko. Ɛnee eza ɔze adenle kpalɛ mɔɔ bɛdua zo bɛkilehile la. Maa yɛzuzu ndenle kpalɛ zɛhae anu nsa nee kɛzi yɛbahola yɛazukoa ye la anwo.

3, 4. (a) Duzu ati a Gyisɛse vale edwɛkɛ mɔɔ ɔ bo ɛdelɛ ɛnyɛ se la hilehilele a? (b) Duzu ati a Boka Zo Ɛdendɛlɛ ne le ngilehilelɛ zɛhae anwo neazo a?

³ Fa wɔ adwenle bu edwɛkɛ agbɔkɛ ngakyile mɔɔ anrɛɛ  Gyisɛse bahola ava ali gyima la. Noko, yeanva edwɛkɛ agbɔkɛ mɔɔ ɔ bo ɛdelɛ yɛ se la yeangilehile ɔluakɛ ɛnee ye tievolɛma ne anu dɔɔnwo “ɛnze nwoma yɛɛ bɛnlɛ dibilɛ.” (Gyima ne 4:13) Ɛnee ɔdwenle bɛ nwo ɔti yeangilehile bɛ ninyɛne mɔɔ bɛnrɛde ɔ bo la. (Dwɔn 16:12) Ɛnee ye edwɛkɛ ne le sikalɛ noko nwolɛ hyia kpalɛ.

⁴ Kɛ neazo la, suzu Boka Zo Ɛdendɛlɛ ne mɔɔ wɔ Mateyu 5:3–7:27 la anwo nea. Gyisɛse dule folɛ kpalɛ wɔ zɔhane ɛdendɛlɛ ne anu. Edwɛkɛ kpomgbondee biala ɛnle nu. Nɔhalɛ nu, edwɛkɛkpɔkɛ ko bɔbɔ ɛnle nu mɔɔ kakula ɛnrɛde ɔ bo a! Ɔnyɛ nwanwane kɛ mɔɔ Gyisɛse wiele la “ye ngilehilelɛ ne zinle menli dɔɔnwo ne” mɔɔ ɔbayɛ kɛ ɛyazonlɛma, mboaneneavolɛma yɛɛ fɛlɛkyevoma boka nwo la anwo a.​—Mateyu 7:28.

5. Ka ninyɛne sikalɛ mɔɔ Gyisɛse hanle mɔɔ nvasoɛ dɔɔnwo wɔ zo la bie mɔ anwo edwɛkɛ.

⁵ Gyisɛse vale edwɛkɛ sikalɛ mɔɔ ɔ bo ɛdelɛ ɛnyɛ se la lile gyima na ɔhanle ninyɛne dɔɔnwo mɔɔ nvasoɛ wɔ zo la anwo edwɛkɛ. Ɛnee bɛnlɛ mbuluku mɔɔ bɛkɛlɛ nu wɔ zɔhane mekɛ ne a, ɔti adenle mɔɔ ɔluale zo ɔhilehilele bɛ la maanle ye edwɛkɛ ne hale ye tievolɛma adwenle nee bɛ ahonle nu. Neazo bie mɔ ɛne: “Bɛgyakyi ndɛnebualɛ na bɛambua bɛ ndɛne.” “Menli mɔɔ te kpɔkɛ la ɛngyia ayileyɛvolɛ nwo, emomu menli mɔɔ ɛnde kpɔkɛ la a hyia bie a.” “Sunsum ne kulo, noko nwonane ne le bɛtɛɛ.” “Bɛva Siza ɛdeɛ bɛmaa Siza, na bɛva Nyamenle ɛdeɛ bɛmaa Nyamenle.” “Anyelielɛ dɔɔnwo wɔ ɛmaanlɛ nu tɛla ɛlielɛ.” b (Mateyu 7:1; 9:12; 26:41; Maake 12:17; Gyima ne 20:35) Ɔhanle edwɛkɛ ɛhye mɔ la asɛɛ ye ɛvolɛ 2,000 ɛne, noko nvasoɛ tɛbɔ zo.

6, 7. (a) Amaa yɛ ngilehilelɛ ne anu ala ɛkɛ la, duzu ati a ɔwɔ kɛ yɛfa edwɛkɛ agbɔkɛ mɔɔ ɔ bo ɛdelɛ ɛnyɛ se la yɛdi gyima a? (b) Kɛ ɔkɛyɛ na yɛanga edwɛkɛ dɔɔnwo mɔɔ Baebolo sukoavo bie ɛnrɛde ɔ bo la ɛ?

 ⁶ Kɛ ɔkɛyɛ na yɛahilehile ninyɛne mɔɔ ɔ bo ɛdelɛ ɛnyɛ se la ɛ? Mɔɔ hyia kpalɛ a le kɛ yɛbava edwɛkɛ agbɔkɛ mɔɔ menli dɔɔnwo te ɔ bo la yɛali gyima. Nɔhalɛ titili mɔɔ wɔ Nyamenle Edwɛkɛ ne anu la abo ɛdelɛ ɛnyɛ se. Gyihova ɛmaa bɛlɛvoma mɔɔ lɛ ahonle kpalɛ la ɛnwu ye bodane ne mɔ. (1 Kɔlentema 1:26-28) Yɛfa edwɛkɛ agbɔkɛ mɔɔ ɔ bo ɛdelɛ ɛnyɛ se la yɛkilehile nɔhalɛ ne mɔɔ wɔ Nyamenle Edwɛkɛ ne anu la anu.

⁷ Saa yɛ ngilehilelɛ bayɛ sikalɛ a, ɔwɔ kɛ yɛnea na yɛanga ninyɛne dɔɔnwo mɔɔ Baebolo sukoavo bie ɛnrɛde ɔ bo la anwo edwɛkɛ. Ɔti, saa yɛ nee awie ɛlɛsukoa Baebolo ne a, ɔngyia kɛ yɛkilehile ninyɛne kɔsɔɔti anu; anzɛɛ yɛmaa debiezukoalɛ ne kɔ ndɛndɛ somaa kɛ asɛɛ yɛsukoa ninyɛne dɔɔnwo a yemɔ a anwo hyia kpalɛ a. Emomu, nrɛlɛbɛ wɔ nu kɛ yɛbamaa sukoavo ne ngyianlɛ nee mɔɔ ɔkola ɔyɛ la ahile dodo mɔɔ ɔwɔ kɛ yɛsukoa la. Yɛ bodane a le kɛ yɛboa sukoavo ne yɛamaa yeayɛ Kelaese ɛdoavolɛ na yeazonle  Gyihova. Ɔti, ɔwɔ kɛ yɛnyia mekɛ yɛboa sukoavo ne yɛmaa ɔte mɔɔ ɔlɛsukoa la abo kpalɛ. Saa yɛyɛ zɔ a yɛɛ Baebolo ne anu nɔhalɛ ne baha ye ahonle na yeava mɔɔ yezukoa la yeali gyima a.​—Wulomuma 12:2.

8, 9. (a) Duzu ati a Gyisɛse bizale kpuya a? (b) Kɛzi Gyisɛse bizale Pita kpuya ɔmaanle ɔdele ɛzonlenlɛsua ne anwo adwuledualɛ ne abo ɛ?

⁸ Gyisɛse bizale kpuya wɔ mekɛ bɔbɔ mɔɔ anrɛɛ ɔbahola yeava mekɛ ekyi bie yeaha mɔɔ ɔkulo kɛ ye tievolɛma ne te la. Ɛnee duzu ati a ɔbizale kpuya a? Ɔdwu mekɛ ne bie a ɔbiza kpuya ɔmaa adwenle ɛtane mɔɔ menli mɔɔ dwazo tia ye lɛ la da ali na bɛyɛ koonwu. (Mateyu 21:23-27; 22:41-46) Noko, fane dɔɔnwo ne ala ɔbizale kpuya ɔmaanle ye ɛdoavolɛma ne hilele bɛ adwenle na ɔluale zo ɔtetele bɛ. Ɔti ɔbizale kpuya le kɛ, “Kɛzi bɛdwenle nwo ɛ?” anzɛɛ “Ɛdie ɛhye ɛdi ɔ?” (Mateyu 18:12; Dwɔn 11:26) Gyisɛse kpuya ne mɔ maanle ye edwɛkɛ ne hanle ye ɛdoavolɛma ne ahonle. Suzu neazo ko anwo nea.

⁹ Mekɛ bie adwuledievolɛma bizale Pita saa Gyisɛse tua ɛzonlenlɛsua adwule ne a. c Ɛkɛ ne ala Pita buale kɛ, “Ɛhɛe!” Nzinlii Gyisɛse bizale ye kɛ: “Saemɔn, kɛzi ɛdwenle nwo ɛ? Nwane mɔ a azɛlɛ ye azo arelemgbunli maa bɛtua adwule anzɛɛ ninyɛne nwo adwule a? Bɛ mra anzɛɛ nyɛvolɛ?” Pita buale kɛ: “Nyɛvolɛ ɔ.” Gyisɛse hanle kɛ: “Ɛnee ɔnle kɛ mralɛ ne mɔ tua adwule.” (Mateyu 17:24-27) Kpuya ne maanle Pita dele edwɛkɛ ne abo ɔluakɛ ɛnee belemgbunli anwo amra ɛndua adwule. Ɔti kɛmɔ Gyisɛse le anwuma Belemgbunli ne mɔɔ bɛsonle ye wɔ ɛzonlenlɛsua ne anu Ara kokye la ati ɔnle kɛ ɔtua adwule. Yɛ ye nzonlɛ  kɛ Gyisɛse anga mualɛ ne angile Pita, emomu ɔbizale Pita kpuya ɔmaanle ɔnwunle mualɛ ne na bie a ɔnwunle kɛ kenle fofolɛ ɔwɔ kɛ ɔdwenle kpalɛ na yeabua kpuya.

10. Kɛ ɔkɛyɛ na yɛava kpuya yɛali gyima kpalɛ wɔ azua nu daselɛlilɛ nu ɛ?

¹⁰ Kɛ ɔkɛyɛ na yɛava kpuya yɛali gyima kpalɛ wɔ yɛ ɛzonlenlɛ gyima ne anu ɛ? Saa yɛlɛyɛ azua nu daselɛlilɛ gyima ne a, yɛbahola yɛabiza menli kpuya yeamaa bɛ nye alie yɛ edwɛkɛ ne anwo na yɛalua zo yɛaha edwɛkpa ne yɛahile bɛ. Kɛ neazo la, saa yɛkɔto kpanyinli bie a, yɛbahola yɛavi ɛbulɛ nu yɛabiza ye kɛ, “Bɛwole wɔ too mɔɔ yeradwu ɛnɛ la duzu nzenzaleɛ a wɔnwu ye wɔ ewiade a?” Saa ɔtendɛ ɔwie a, ɛbahola wɔabiza kɛ, “Ɛnea a duzu a bamaa ewiade ye ayɛ kpalɛ ɛ?” (Mateyu 6:9, 10) Saa yɛkɔto mame mɔɔ lɛ ngakula la noko a yɛbahola yɛabiza kɛ, “Asoo wɔdwenle kɛzi ewiade ɛhye bayɛ wɔ mekɛ mɔɔ ɛ mra ne mɔ bayɛ mgbanyinli la anwo ɔ?” (Edwɛne 37:10, 11) Saa yɛgua yɛ nye aze wɔ mekɛ mɔɔ yɛlɛkɔ awuke bie anu la a, ɔbamaa yɛanwu kpuya mɔɔ suamenle ne anye balie nwo la.

11. Kɛ ɔkɛyɛ na yɛava kpuya yɛali gyima kpalɛ wɔ mekɛ mɔɔ yɛlɛyɛ Baebolo ɛzukoalɛ la ɛ?

¹¹ Kɛ ɔkɛyɛ na yɛava kpuya yɛali gyima kpalɛ wɔ mekɛ mɔɔ yɛlɛyɛ Baebolo ɛzukoalɛ la ɛ? Saa yɛbiza kpuya kpalɛ a ɔbamaa yɛanwu mɔɔ wɔ sukoavo ne ahonle nu la. (Mrɛlɛbulɛ 20:5) Kɛ neazo la, fa ye kɛ yɛlɛsukoa Nyia Anyelielɛ Dahuu! d buluku ne ɛzukoalɛdeɛ 43, ɔse,  “Kɛzi Ɔwɔ Kɛ Kilisienema Bu Nza Ɛ?” Ɛzukoalɛdeɛ ne ka kɛzi Nyamenle bu nza dɔɔnwo ɛnlonlɛ nee nzabolɛ la anwo edwɛkɛ. Sukoavo ne mualɛ bahola ahile kɛ ɔte mɔɔ Baebolo ne kilehile la abo, noko asoo ɔdie ɔto nu? Yɛbahola yɛabiza kɛ, “Asoo nrɛlɛbɛ wɔ adwenle Nyamenle mɔɔ lɛ ye wɔ edwɛkɛ ɛhye anwo la anu ɔ?” Yɛbahola yɛabiza noko kɛ, “Kɛ ɔkɛyɛ na wɔava edwɛkɛ ɛhye wɔali gyima wɔ wɔ ɛbɛlabɔlɛ nu ɛ?” Noko kakye kɛ ɔwɔ kɛ yɛbiza ye wɔ nrɛlɛbɛ adenle zo na yɛdi sukoavo ne eni. Yɛngulo kɛ yɛbiza kpuya mɔɔ bamaa yeabɔ anyiemgba la.​—Mrɛlɛbulɛ 12:18.

12-14. (a) Kɛzi Gyisɛse boale menli maanle bɛdele ye ngilehilelɛ ne abo ɛ? (b) Mekɛ mɔɔ Falasiima ne hanle kɛ Gyisɛse tumi ne vi Seetan ɛkɛ ne la, edwɛkɛ boni a ɔhanle a?

¹² Kɛmɔ ɛnee Gyisɛse adwenle di munli la ati, ɛnee ɔze kɛzi bɛ nee awie mɔ suzu edwɛkɛ nwo la kpalɛ. Ɛnee ɔdua nrɛlɛbɛ adenle zo ɔbɔ dwazotiama adalɛ edwɛkɛ ɔgua. Fane dɔɔnwo ne ala ɔ nee ye ɛdoavolɛma ne zuzule ninyɛne nwo amaa bɛade ɔ bo. Maa yɛnlea neazo bie mɔ.

¹³ Gyisɛse yɛle nrenyia bie mɔɔ anye ɛzi, ɔle mumule na sunsum ɛtane wɔ ɔ nwo ayile wiele la, Falasiima ne hanle kɛ: “Nrenyia ɛhye dua Biyɛlezibɛbe [Seetan], sunsum ɛtane ne mɔ kpanyinli ne anwo zo a ɔtu sunsum ɛtane ne mɔ a.” Bɛliele bɛdole nu kɛ tumi mɔɔ bo sonla ɛdeɛ zo la a bahola adu sunsum ɛtane a. Noko, bɛhanle kɛ Gyisɛse tumi ne vi Seetan ɛkɛ. Ɛnee edwɛkɛ ne le adalɛ yɛɛ eza ndelebɛbo ɛnle nu. Gyisɛse maanle bɛnwunle kɛ bɛvo, ɔbuale kɛ: “Belemgbunlililɛ biala mɔɔ anu kɛhyɛ na bɛko bɛtia bɛ nwo la ɛnrɛgyinla, yɛɛ suakpole anzɛɛ awuke biala mɔɔ anu kɛhyɛ na bɛko bɛtia bɛ nwo la babɔ. Yemɔti, saa Seetan tu Seetan a, ɛnee ɔlɛko yeatia ɔ nwo; na kɛ ɔkɛyɛ na ye belemgbunlililɛ ne agyinla ɛ?” (Mateyu 12:22-26) Ɛnee Gyisɛse ɛlɛka  kɛ: “Saa Seetan gyima a meyɛ na mesɛkye ninyɛne mɔɔ Seetan ɛyɛ la a, se ɛnee Seetan ɛlɛko atia ɔ nwo na ɔnrɛhyɛ ɔbadɔ aze o.” Asoo bɛbahola bɛazu edwɛkɛ ɛhye mɔɔ ndelebɛbo wɔ nu la anwo kpolera?

¹⁴ Ɛnee Gyisɛse nee bɛ ɛtɛwiele. Kɛmɔ ɔze kɛ Falasiima ne ɛdoavolɛma bie mɔ ɛdu sunsum ɛtane ɛlɛ la ati, ɔluale nrɛlɛbɛ adenle zo ɔbizale bɛ kpuya sikalɛ kɛ: “Saa medua Biyɛlezibɛbe anwo zo a metu sunsum ɛtane ne mɔ a, ɛnee nwane anwo zo a bɛ mra ne mɔ [anzɛɛ, ɛdoavolɛma] dua tu bɛ a?” (Mateyu 12:27) Ɛnee Gyisɛse ɛlɛka kɛ: “Saa mefa Seetan tumi a metu sunsum ɛtane ne mɔ a, ɛnee tumi ko ne ala a bɛ ɛdoavolɛma ne fa di gyima a.” Duzu a Falasiima ne baha a? Bɛnrɛlie bɛnrɛdo nu kɛ Seetan tumi a ɛnee bɛ ɛdoavolɛma ne fa yɛ gyima a. Ɔti, Gyisɛse kpuya ne maanle bɛ adwenle ɛtane ne lale ali na bɛliele mɔɔ bɛngulo kɛ bɛka la bɛdole nu. Saa yɛkenga kɛzi Gyisɛse nee bɛ zuzule edwɛkɛ nwo la a, asoo ɔnyɛ anyelielɛ? Akee dwenle menli mɔɔ ɛnee wɔ kɛ ɛkɛ ne la anwo nea, bɛdele kɛzi Gyisɛse hanle edwɛkɛ ne nee ɛnelɛ mɔɔ ɔvale ɔhanle la na ɔbayɛ kɛ ɛhye hanle bɛ kpalɛ.

15-17. Maa neazo mɔɔ kile kɛzi Gyisɛse vale “ɛnee fane nyɛ” hilehilele ɔ Ze anwo nɔhalɛ ne la.

¹⁵ Eza Gyisɛse hilehilele deɛmɔti menli bahola anyia ɔ Ze anu anwodozo na bɛabikye ye la anu kpalɛ. Ɛnee ɔta ɔfa “ɛnee fane nyɛ” ɔ nee menli suzu ninyɛne nwo, na ɔmaa ye tievolɛma nyia ninyɛne mɔɔ bɛze ye dɛba la anwo ndelebɛbo kpalɛ. Ndotonwo zɛhae maa menli te edwɛkɛ bo kpalɛ. Maa yɛzuzu nwolɛ neazo nwiɔ pɛ anwo.

¹⁶ Mekɛ mɔɔ Gyisɛse ɛdoavolɛma hanle kɛ ɔhile bɛ kɛzi bɛyɛ asɔne la, ɔhanle ɛhulolɛ mɔɔ alesama awovolɛ mɔɔ ɛnli munli lɛ kɛ bɛbava “ahyɛlɛdeɛ kpalɛ” bɛamaa bɛ mra la anwo edwɛkɛ. Akee ɔdwulale ye edwɛkɛ ne kɛ: “Na saa bɛmɛ bɔbɔ mɔɔ bɛle ɛtanevolɛma la, bɛze kɛzi bɛfa  ahyɛlɛdeɛ kpalɛ bɛmaa bɛ mra a, ɛnee fane nyɛ yɛɛ bɛ Ze mɔɔ wɔ anwuma la ɛnrɛva sunsum nwuanzanwuanza ne ɛnrɛmaa bɛdabɛ mɔɔ bɛbiza ye la ɛ!” (Luku 11:1-13) Gyisɛse vale ndotonwo lile gyima. Saa alesama awovolɛ mɔɔ ɛnli munli la fa ninyɛne mɔɔ bɛ mra hyia nwo la maa bɛ a, ɛnee fane nyɛ yɛɛ yɛ anwuma Selɛ ne mɔɔ di munli na ɔtenrɛ wɔ debie biala anu la ɛnrɛva sunsum nwuanzanwuanza ɛnrɛmaa ye nɔhalɛ azonvolɛ mɔɔ bɛlɛ bɛ nwo aze biza ye la ɛ?

¹⁷ Gyisɛse vale ndotonwo lile gyima wɔ mekɛ mɔɔ ɔlɛtu folɛ wɔ adwenleadwenle nwo la. Ɔhanle kɛ: “Bɛnlea ahɔhɔsɛlɛ: Bɛnlua ma yɛɛ bɛnde; bɛnlɛ bonwolo anzɛɛ ɛleka mɔɔ bɛfa aleɛ bɛsie; noko Nyamenle maa bɛ aleɛ. Asoo bɛ nwo ɛngyia ɛndɛla nloma ɔ? Bɛnlea kɛzi ɛbɔ nu aloa nyi la: Bɛnyɛ gyima anzɛɛ bɛnnwo ndanlɛ . . . Yemɔti, saa zɛhae a Nyamenle siezie ɛbɔ nu ndile mɔɔ ɛnɛ bɛfifi a ɛhyema ɛnee bɛyela bɛ la a, asoo ɔnrɛheda bɛdabɛ noko ndanlɛ, bɛmɛ mɔɔ bɛ diedi le ekyi a!” (Luku 12:24, 27, 28) Saa Gyihova nea nloma nee felawɔse a, ɛnee fane nyɛ a ɔnrɛnlea alesama mɔɔ kulo ye na bɛsonle ye la ɛ? Adenle zɛhae mɔɔ Gyisɛse luale zo nee ye tievolɛma zuzule edwɛkɛ nwo la hanle bɛ ahonle.

18, 19. Kɛ ɔkɛyɛ na yɛ nee awie mɔɔ se ɔnnwu Nyamenle la ati ɔnlie ye ɔnli la azuzu edwɛkɛ nwo ɛ?

¹⁸ Wɔ daselɛlilɛ nu, yɛkulo kɛ yɛfa edwɛkɛ mɔɔ ndelebɛbo wɔ nu la yɛboa menli. Eza yɛkulo kɛ yɛdua edwɛkɛ mɔɔ tɔ ɛnzolɛ nu la azo yɛkilehile Gyihova anwo nɔhalɛ edwɛkɛ ne. (Gyima ne 19:8; 28:23, 24) Asoo ɛhye kile ɔwɔ kɛ yɛmaa yɛ edwɛkɛ yɛ kpomgbondee ɔ? Kyɛkyɛ. Gyisɛse neazo ne maa yɛnwu kɛ saa menli bade yɛ edwɛkɛ bo a ɔwɔ kɛ yɛka edwɛkɛ mɔɔ ɔ bo ɛdelɛ ɛnye se la yɛkile bɛ.

¹⁹ Kɛ neazo la, saa awie ka kɛ ɔnnwu Nyamenle la ati ɔnlie ye ɔnli a kɛzi yɛbabua ye ɛ? Yɛbahola yɛamaa baha ninyɛne mɔɔ bɛnwu ye alehyenlɛ biala anwo edwɛkɛ na yɛ bɛ azuzu  kɛzi bɛrale la anwo. Yɛbahola yɛaha kɛ: “Saa ɛlua kpɔkɛ bie anu na ɛkɔto sua kɛnlɛma bie mɔɔ aleɛ dɔɔnwo wɔ nu a, asoo ɛnrɛlie ɛnrɛdo nu kɛ awie a zile a? Zɔhane ala a, saa yɛnwu ninyɛne ngɛnlɛma mɔɔ ɛbɔ yɛ ɛyia nee aleɛ mɔɔ wɔ azɛlɛ ye azo la a, asoo nrɛlɛbɛ ɛnle nu kɛ yɛbalie yɛado nu kɛ awie a yɛle ninyɛne ɛhye mɔ amuala ɔ? Baebolo mumua ne ka kɛ: ‘Sua biala awie a si a, na ahenle mɔɔ yɛle ninyɛne kɔsɔɔti la a le Nyamenle.’” (Hibuluma 3:4) Noko saa yɛkilehile edwɛkɛ nu kpalɛ bɔbɔ a, tɛ awie biala a balie ado nu a.​—2 Tɛsalonaekama 3:2.

20, 21. (a) Kɛzi yɛbava “ɛnee fane nyɛ” yɛahilehile Gyihova subane nee ye ndenle ne mɔ anu ɛ? (b) Duzu a yɛbazuzu nwo wɔ tile mɔɔ doa zo la anu a?

²⁰ Yɛbahola yɛava “ɛnee fane nyɛ” yɛahilehile Gyihova subane nee ye ndenle ne mɔ anu wɔ mekɛ mɔɔ yɛlɛkilehile  wɔ daselɛlilɛ nu anzɛɛ wɔ asafo ne anu la. Kɛ neazo la, saa yɛkulo kɛ yɛkile kɛ abɔnsam senle ngilehilelɛ ne gua Gyihova anwo evinli a yɛbahola yɛaha kɛ: “Selɛ mɔɔ lɛ ɛlɔlɛ la boni a bava ɔ ra asa awula senle nu yeava yeahwe ɔ nzo a? Ɛnea a ɛnee abɔnsam senle ngilehilelɛ ne ɛnga yɛ anwuma Selɛ ne ɛya ɔ?” (Gyɛlɛmaya 7:31) Saa yɛkulo kɛ yɛmaa diedinli bie mɔɔ arɛle ɛbɔ la anwosesebɛ kɛ Gyihova kulo ye a, yɛbahola yɛaha kɛ: “Saa ngɛsanloma nretee bɔbɔ sonle bolɛ wɔ Gyihova anye zo a ɛnee fane nyɛ a ɔnrɛnlea ye azonvolɛ mɔɔ wɔ azɛlɛ ye azo la anu ko biala, mɔɔ ɛdawɔ ɛboka nwo la ɛ?” (Mateyu 10:29-31) Saa yɛ nee menli suzu edwɛkɛ nwo zɛhae a ɔbaha bɛ ahonle.

²¹ Ndenle nsa mɔɔ Gyisɛse luale zo hilehilele mɔɔ yɛzuzu nwolɛ la ɛmaa yɛnwu kɛ, sinzavolɛma ne mɔɔ angola angye Gyisɛse la anwudu bɛ edwɛkɛ nu wɔ mekɛ mɔɔ bɛhanle kɛ: “Awie biala ɛtɛtendɛle zɛhae ɛlɛ” la. Wɔ tile mɔɔ doa zo la anu, yɛbazuzu ndonwo mɔɔ Gyisɛse luale zo hilehilele mɔɔ menli dɔɔnwo anye die nwo la anwo.