TILE 18
“Kɔ Zo Toa Me”
1-3. (a) Kɛzi Gyisɛse vile ye ɛzoanvolɛma ne anwo ɛkɛ ne hɔle ɛ, na duzu ati a ɛnee ɔngyia kɛ bɛdi alɔbɔlɛ a? (b) Duzu ati a ɔhyia kɛ yɛnwu mɔɔ Gyisɛse ɛlɛyɛ ɔvi mekɛ mɔɔ ɔhɔle anwuma la ɛ?
MRENYIA bulu nee ko gyi boka bie azo. Ɛlɔlɛ nee anyelielɛ ɛyi bɛ tɛkɛɛ wɔ mekɛ mɔɔ bɛlɛnea ahenle mɔɔ tɔ zo 12 la. Ahenle mɔɔ bɛlɛnea ye la a le Gyisɛse mɔɔ bɛdwazo ye na yezia yerayɛ Gyihova sunsum nu ralɛ mɔɔ lɛ tumi kpole la. Gyisɛse ɛboɔboa ye ɛzoanvolɛma ne anloa wɔ Ɔlivi Boka ne azo kɛ ɔ nee bɛ di nrɛlaleɛ mɔɔ li awieleɛ la.
2 Ɔlivi Boka ne bikye Gyɛlusalɛm. Yɛɛ Kedelɔn Bɔnza ne noko la Gyɛlusalɛm nee Ɔlivi Boka ne avinli. Ɔbayɛ kɛ Gyisɛse hakyele ninyɛne dɔɔnwo mɔɔ hɔle zo wɔ ɛkɛ ne la. Bɛtani mɔɔ Gyisɛse dwazole Lazalɛse wɔ ɛkɛ ne la wɔ ye ndololeɛ nu. Ɔtɛkyɛle biala, Gyisɛse vi ɛleka bie mɔɔ bikye Bɛtefagye la dɛnlanle asoaso zo hɔle Gyɛlusalɛm wɔ konimlilɛ nu. Ɔbayɛ kɛ Ɔlivi Boka ne azo a Gɛtesɛmani tola ne mɔɔ Gyisɛse hɔle nu kolaa na bɛahye ye la wɔ a na ɛnee ɔle mekɛ mɔɔ anu yɛ se kpalɛ. Boka ko ye ala azo a Gyisɛse nee ɔ gɔnwo mɔ mɔɔ ɔkulo bɛ kpalɛ nee ye ɛdoavolɛma ɛyia nu kɛ bɛdi nrɛlaleɛ a. Ɔhanle edwɛkɛ mɔɔ maa anwosesebɛ la dɔɔnwo. Akee ɔbɔle ɔ bo kɛ ɔkɔ anwuma! Ɛzoanvolɛma ne gyinlanle ɛkɛ ne koonwu na bɛ nye hale bɛ Menle ne mɔɔ bɛkulo ye kpalɛ mɔɔ ɔlɛkɔ anwuma la anwo. Awieleɛ kolaa ne, amungu ne hedale ɔ nwo zo na bɛannwu ye bieko.—Gyima ne 1:6-12.
3 Ɛnea a nrɛlaleɛlilɛ ɛhye yɛ anyelielɛ noko eza ɔyɛ alɔbɔlɛ ɔ? Kyɛkyɛ. Nɔhalɛ nu, anwumabɔvolɛma nwiɔ ramaanle ɛzoanvolɛma ne anwosesebɛ. (Gyima ne 1:10, 11) Ɔwɔ kɛ ɛzoanvolɛma ne anye die kɛ Gyisɛse ɛlɛkɔ anwuma la. Nyamenle Edwɛkɛ ne maa yɛnwu mɔɔ Gyisɛse ɛlɛyɛ ye wɔ anwuma la. Ɔhyia kpalɛ kɛ yɛnwu mɔɔ Gyisɛse ɛlɛyɛ ɔvi mekɛ mɔɔ ɔhɔle anwuma la. Duzu ati ɔ? Kakye edwɛkɛ mɔɔ Gyisɛse hanle hilele Pita la: “Kɔ zo toa me.” (Dwɔn 21:19, 22) Ɔwɔ kɛ yɛ muala yɛkɔ zo yɛtoa Gyisɛse alehyenlɛ biala na tɛ mekɛ ezinra bie anu ala. Amaa yɛayɛ zɔ la, ɔwɔ kɛ yɛnwu mɔɔ yɛ Menle ne ɛlɛyɛ ye kɛkala nee gyima mɔɔ bɛva bɛmaa ye wɔ anwuma la.
Mɔɔ Gyisɛse Ɛlɛyɛ Ɔvi Mekɛ Mɔɔ Ɔhɔle Anwuma La
4. Kɛzi Baebolo ne hanle mɔɔ Gyisɛse sia kɔ anwuma a ɔbayɛ la dole ɛkɛ ɛ?
4 Ngɛlɛlera ne ɛnga mɔɔ zile wɔ anwuma wɔ mekɛ mɔɔ Gyisɛse hɔdwule ɛkɛ, kɛzi bɛliele ye nee anyelielɛ mɔɔ ɔ nee ɔ Ze nyianle la anwo edwɛkɛ. Noko, Baebolo ne hanle mɔɔ Gyisɛse sia kɔ anwuma a ɔbayɛ la dole ɛkɛ. Ɛze ɔ, Dwuuma vale ɛvolɛ mɔɔ bo 1,500 la lile ɛvoyia bie mɔɔ anwo hyia la. Ɛvolɛ biala ɛnee ɛsɔfo kpanyinli ne kɔ ɛzonlenlɛsua ne anu Nwuanzanwuanza nu Nwuanzaanwu ɛleka ne kɔkponde afɔlebɔlɛ mogya ne wɔ ngyekyeleɛ ɛlɛka ne anyunlu wɔ Mgbɔdalɛ Kenle ne. Wɔ kenle zɔhane, ɛnee ɛsɔfo kpanyinli ne yɛ mɔɔ Mɛzaya ne bayɛ ye kenle bie la. Ɛnee ɛvoyia zɔhane bodane a le ɛtane mgbɔdalɛ. Na Gyisɛse lile zɔhane bodane ne anwo gyima kokye wɔ mekɛ mɔɔ ɔziale ɔhɔle anwuma la. Ɔhɔle Gyihova tumivolɛ kpole ne anyunlu wɔ anwuma—ɛleka mɔɔ le nwuanzanwuanza tɛla ɛleka biala la—na ɔvale bolɛ mɔɔ ye ɛkpɔnedeɛ ne sonle la ɔhɔmanle ɔ Ze. (Hibuluma 9:11, 12, 24) Asoo Gyihova liele dole nu?
5, 6. (a) Duzu a kile kɛ Gyihova liele Kelaese ɛkpɔnenlɛ afɔlebɔlɛ ne dole nu a? (b) Nwane mɔ a nyia ɛkpɔnedeɛ ne azo nvasoɛ a, na adenle boni azo ɔ?
5 Saa yɛnea mɔɔ zile wɔ kenle ekyi bie anu wɔ mekɛ mɔɔ Gyisɛse ziale hɔle anwuma la a, yɛbanwu mualɛ ne. Ɛnee Kilisienema kɛyɛ 120 ɛyia wɔ Gyɛlusalɛm ɛbolɔnsam bie azo na arɛlevilɛ nu ala dede bie vi anwuma kɛ anwoma kpole bie la rayile sua ne mɔɔ bɛwɔ nu la anu. Debie mɔɔ le kɛ senle mɔɔ zɔho ɛtafinlimalɛ la razinzele bɛ nuhua ko biala anwo zo na sunsum nwuanzanwuanza ne yile bɛ tetɛkɛɛ na bɛbɔle ɔ bo kɛ bɛka aneɛ ngakyile. (Gyima ne 2:1-4) Mɔɔ zile la kile kɛ bɛwo maanle fofolɛ bie, sunsum nu Yizilayɛ, “abusua mɔɔ bɛkpa nu bɛye bɛ” nee “alehelɛ ɛsɔfoma” mɔɔ bayɛ Nyamenle ɛhulolɛdeɛ wɔ azɛlɛ ye azo la. (1 Pita 2:9) Ɔda ali kɛ Gyihova Nyamenle ɛlie Kelaese ɛkpɔnenlɛ afɔlebɔlɛ ne ɛdo nu bɔkɔɔ. Sunsum nwuanzanwuanza ne mɔɔ bɛwolale bɛguale la boka nyilalɛ mɔɔ limoa mɔɔ ɛkpɔnedeɛ ne ɛmaa yɛnyia la anwo.
6 Ɔvi zɔhane mekɛ ne, Kelaese ɛdoavolɛma mɔɔ wɔ ewiade amuala la ɛnyia ɛkpɔnedeɛ ne azo nvasoɛ. Saa yɛboka “mboane ekpunli ekyi” ne mɔɔ bɛkpokpa bɛ mɔɔ bɛ nee Kelaese bali tumi wɔ anwuma la anwo anzɛɛ yɛboka “mboane gyɛne” ne mɔɔ Belemgbunlililɛ ne bali bɛ nwo zo tumi wɔ azɛlɛ ye azo la anwo o, yɛ muala yɛnyia ɛkpɔnedeɛ ne azo nvasoɛ. (Luku 12:32; Dwɔn 10:16) Yemɔ a bɛlua zo bɛva yɛ ɛtane bɛhyɛ yɛ na yɛnyia anyelazo a. Saa yɛkɔ zo ‘yɛda ye ali kɛ yɛlɛ diedi’ wɔ ɛkpɔnedeɛ ne anu na yɛtoa Gyisɛse alehyenlɛ biala a, yɛbanyia adwenle mɔɔ anu te la nee kenle bie anyelazo kpalɛ.—Dwɔn 3:16.
7. Tumi boni a bɛvale bɛmaanle Gyisɛse wɔ mekɛ mɔɔ ɔziale ɔhɔle anwuma la ɛ, na kɛ ɔkɛyɛ na wɔaboa ye ɛ?
7 Duzu a Gyisɛse ɛlɛyɛ ɔvi mekɛ mɔɔ ɔziale ɔhɔle anwuma la ɛ? Bɛmaa ye tumi kpole. (Mateyu 28:18) Nɔhalɛ nu, Gyihova kpale ye kɛ ɔnlea Kilisiene asafo ne azo, na yeva ɛlɔlɛ nee pɛlepɛlelilɛ yeyɛ gyima ɛhye. (Kɔlɔsaema 1:13) Kɛ mɔɔ bɛhanle bɛdole ɛkɛ la, Gyisɛse ɛkpa mrenyia mɔɔ fɛta la kɛ bɛnlea ye mboane ne. (Ɛfɛsɛsema 4:8) Kɛ neazo la, ɔkpale Pɔɔlo kɛ ‘ɛzoanvolɛ ɔmaanle maanle maanle ne’ na ɔzoanle ye ɔmaanle ɔhɔbɔle edwɛkpa ne nolo wɔ moamoa. (Wulomuma 11:13; 1 Timote 2:7) Mɔɔ ɛvoya mɔɔ limoa ɛlɛkɔ ye awieleɛ la, Gyisɛse vale nganvolɛ, folɛdulɛ nee ɛdenrɛdenrɛlɛ maanle asafo ngakyile nsuu mɔɔ wɔ Wulomu maanzinli ne mɔɔ wɔ Ehyea anu la. (Yekile, tile 2-3) Asoo ɛdie ɛdi kɛ Gyisɛse a le Kilisiene asafo ne Ati ɔ? (Ɛfɛsɛsema 5:23) Amaa wɔahɔ zo wɔadoa ye la, ɔwɔ kɛ ɛyɛ tieyɛ na ɛboa ɛmaa koyɛlɛ tɛnla asafo ne mɔɔ ɛwɔ nu la anu.
8, 9. Tumi boni a bɛvale bɛmaanle Gyisɛse wɔ ɛvolɛ 1914 a, na duzu a ɔwɔ kɛ ɛhye ka yɛ maa yɛyɛ a?
8 Bɛmaanle Gyisɛse tumi kpole bieko wɔ 1914 ne anu. Wɔ zɔhane ɛvolɛ ne anu, bɛkpale ye kɛ Gyihova Mɛzaya Belemgbunlililɛ ne azo Belemgbunli. Mɔɔ Gyisɛse bɔle ye tumililɛ ne abo la, “konle zile anwuma.” Duzu a vi nu rale a? Bɛvuandinle Seetan nee ye sunsum ɛtane ne mɔ bɛguale azɛlɛ ye azo, na ɛhye maanle mekɛ mɔɔ anu yɛ se la bɔle ɔ bo. Konle, ɛtanelilɛ, ɛzulolɛ, ewulenzane, azɛlɛkpusulɛ yɛɛ ɛhɔne mɔɔ ɛbu zo wɔ azɛlɛ ye azo ɛnɛ la kakye yɛ kɛ kɛkala Gyisɛse ɛlɛdi tumi wɔ anwuma. Seetan a ‘ɛlɛnea ewiade ɛhye’ azo a na ɔbayɛ ye wɔ “mekɛ ekyi bie” anu. (Yekile 12:7-12; Dwɔn 12:31; Mateyu 24:3-7; Luku 21:11) Noko, Gyisɛse ɛlɛmaa menli mɔɔ wɔ ewiade amuala la adenle kɛ bɛlie ye tumililɛ ne bɛdo nu.
9 Ɔhyia kɛ yɛgyinla Mɛzaya Belemgbunli ne afoa. Ɔwɔ kɛ alehyenlɛ ko biala yɛsi kpɔkɛ mɔɔ ɔ nye die nwo la, na tɛ mɔɔ ewiade ɛhye mɔɔ ɛkpɔlɔ la kulo la ɔ. Saa “arelemgbunli Belemgbunli yɛɛ awulae mɔ Awulae” ne to ɔ nye wɔ azɛlɛ ye azo nea alesama a ɔnwu ninyɛne mɔɔ ka ye ɛya nee mɔɔ maa ɔ nye die la. (Yekile 19:16) Duzu ati ɔ?
Mɔɔ Ka Mɛzaya Belemgbunli Ne Ɛya Nee Mɔɔ Maa Ɔ Nye Die La
10. Subane boni a Gyisɛse lɛ a, na duzu a ka yɛ Menle ne ɛya a?
10 Yɛ Menle ne anye die dahuu kɛ ɔ Ze la. (1 Timote 1:11) Mɔɔ Gyisɛse wɔ azɛlɛ ye azo la ɛnee ɔnle kyengye mɔɔ debie biala ɛnzɔ ɔ nye a. Noko, ninyɛne dɔɔnwo ɛlɛkɔ zo wɔ azɛlɛ ye azo ɛnɛ mɔɔ ka ye ɛya kpole a. Yeva adalɛ ɛzonlenlɛ kɔsɔɔti mɔɔ bɛka kɛ bɛle Kilisienema la anwo ɛya. Ɔhanle ɔdole ɛkɛ ne kɛ: “Tɛ awie biala mɔɔ kɛze me kɛ, ‘Awulae, Awulae,’ la a bahɔ anwuma Belemgbunlililɛ ne anu a, emomu mɔɔ ɔyɛ mɔɔ me Ze mɔɔ wɔ anwuma la kulo la angome a bahɔ nu a. Kenle zɔhane, menli dɔɔnwo baha ahile me kɛ: ‘Awulae, Awulae, asoo . . . yɛanyɛ nwanwane gyima dɔɔnwo wɔ wɔ duma nu ɔ?’ Na mebaze bɛ kɛ: ‘Menze bɛ! Bɛvi me nwo ɛke bɛhɔ, bɛmɛ mɔɔ bɛnli mɛla zo a!’”—Mateyu 7:21-23.
11-13. Duzu ati a ɔsi menli bie mɔ anwo kɛ Gyisɛse ɛva bɛdabɛ mɔ bɛyɛ “nwanwane gyima dɔɔnwo” wɔ ye duma nu la anwo ɛya a? Maa neazo.
11 Bie a zɛhae edwɛkɛ ne si menli dɔɔnwo mɔɔ ɛnɛ fɛlɛ bɛ nwo Kilisienema la anwo. Duzu ati a Gyisɛse badendɛ anyebolo zo ahile menli mɔɔ ɛyɛ “nwanwane gyima dɔɔnwo” wɔ ye duma nu la ɛ? Kilisienemaanle ne anu asɔne ne mɔ ɛyɛ nyele, bɛboa ehyiavolɛma, bɛsisi asopiti nee sukulu ngakyile na bɛyɛ ninyɛne dɔɔnwo. Amaa wɔanwu deɛmɔti Gyisɛse ɛva bɛ nwo ɛya la, maa yɛnlea neazo bie.
12 Nrenyia bie nee ɔ ye ɛlɛtu adenle. Bɛnrɛhola bɛ nee bɛ mra ne mɔ ɛnrɛhɔ, yemɔti bɛvale awie kɛ ɔnlea bɛ. Bɛhanle bɛhilele ye sikalɛ kɛ: “Nea ngakula ne mɔ boɛ. Maa bɛ aleɛ, maa bɛ nwo ɛyɛ bɔkɔbɔkɔ na bɔ bɛ nwo bane.” Noko, mɔɔ awovolɛ ne mɔ rale la, ɔzinle bɛ nwo kɛ bɛnwunle kɛ ɛhɔne ɛwie bɛ mra ne mɔ ku la. Ngakula ne mɔ anwo ɛyɛ evinli, bɛnde kpɔkɛ yɛɛ bɛ nwo ɛyɛ alɔbɔlɛ. Bɛlɛsu bɛavɛlɛ ahenle mɔɔ bɛse ɔnlea bɛ la, noko ɔmpili bɛ. Duzu ati ɔ? Ɔgyi kpolike zo ɔ nye ɛbolo ɔlɛkyikyi nvɛnzɛlɛ ne mɔ anu. Awovolɛ ne mɔ vale ɛya na bɛbizale ye nwolɛ edwɛkɛ. Ɔbuale bɛ kɛ: “Ɔti bɛ nye ɛnzɔ mɔɔ meyɛ la ɔ? Nea kɛ memaa bɛ nvɛnzɛlɛ ne anu ɛyɛ kɛnlɛma a! Eza meziezie bɛ sua ne anu memaa bɛ!” Asoo awovolɛ ne mɔ akunlu badwo ɔ? Kyɛkyɛ! Tɛ mɔɔ bɛhanle kɛ ɔyɛ la ɛne; bɛse ɔnlea bɛ mra ne mɔ. Bɛbava ɔ nwo ɛya ɔluakɛ yeanli bɛ adehilelɛ zo.
13 Kilisienemaanle ne ɛbɔ bɛ ɛbɛla kɛ zɔhane ahenle mɔɔ bɛbɔle ye ɛkpa la. Gyisɛse vale adehilelɛ maanle ye ɛdoavolɛma kɛ bɛlua Nyamenle Edwɛkɛ ne azo bɛmaa ye menli ne sunsum nu aleɛ, bɛhilehile bɛ na bɛboa bɛ bɛmaa bɛ nwo ɛde wɔ sunsum nu. (Dwɔn 21:15-17) Noko, Kilisienemaanle ne anli adehilelɛ ɛhye azo. Yemaa ɛhɔne ɛhu menli wɔ sunsum nu na yeva ye adalɛ ngilehilelɛ ne yeda bɛ nye zo mɔɔ bɛnze Baebolo nu nɔhalɛ titili bie mɔ a. (Ayezaya 65:13; Emɔso 8:11) Mɔdenle bɔbɔ mɔɔ ɔlɛbɔ kɛ ɔmaa ewiade ne ayɛ boɛ la ɛmmaa ɔnli benle wɔ ye anzosesebɛ ne anwo. Nɔhalɛ nu, ewiade ɛhye le kɛ sua mɔɔ ɔnrɛhyɛ na babubu ye la! Nyamenle Edwɛkɛ ne ka ye wienyi kɛ ɔnrɛhyɛ bɛbazɛkye Seetan ewiade ne.—1 Dwɔn 2:15-17.
14. Gyima boni a maa Gyisɛse anye die ɛnɛ a, na duzu ati ɔ?
14 Noko saa Gyisɛse nea azɛlɛ ye azo na ɔnwu menli mgbe mgbe mɔɔ ɛlɛdi ye mɛla zo bɛamaa menli arayɛ ɛdoavolɛma la a, ɔ nye die kpole. (Mateyu 28:19, 20) Nea nwolɛ adenle kpole mɔɔ yɛnyia kɛ yɛbamaa Mɛzaya Belemgbunli ne anye alie la! Bɛmaa yɛbɔ kpɔkɛ kɛ yɛbahɔ zo yɛaboa “akɛlɛ nɔhavo nee badwema ne.” (Mateyu 24:45) Kilisienema ekpunli ekyi ɛhye mɔɔ bɛkpokpa bɛ la ɛyɛ tieyɛ na bɛlɛkile edwɛkɛhanlɛ gyima ne adenle yɛɛ bɛlɛmaa Kelaese mboane ne aleɛ, bɛnle kɛ Kilisienemaanle ne anu ɛsɔfo ne mɔ la.
15, 16. (a) Kɛzi Gyisɛse bu ɛlɔlɛ mɔɔ menli ɛnlɛ ye ɛnɛ la ɛ, na duzu a maa yɛnwu ye zɔ a? (b) Duzu ati a Gyisɛse ɛva Kilisienemaanle ne anwo ɛya a?
15 Yɛkola yɛka ye wienyi kɛ saa Belemgbunli ne nwu kɛ menli ɛnlɛ ɛlɔlɛ wɔ azɛlɛ ye azo ɛnɛ a ɔka ye ɛya kpole. Yɛkakye mekɛ mɔɔ Falasiima ne dendɛle tiale Gyisɛse kɛ ɔlɛyɛ ayile wɔ Ɛnwomenlelielɛ kenle la. Ɛnee bɛ ti yɛ se, bɛle kyengye yɛɛ bɛbɔ bɛ ti anu bɛkile Mosisi Mɛla ne nee mɛla gyɛne mɔɔ wɔ ɛkɛ la abo. Menli dɔɔnwo nyianle nwanwane ninyɛne mɔɔ Gyisɛse yɛle la azo nvasoɛ! Noko Falasiima ne andwenle anyelielɛ, anwodɔlɛ nee kɛzi zɛhae nwanwane ninyɛne ne mɔ maanle menli diedi yɛle kpole la anwo. Kɛzi Gyisɛse bule mɔɔ bɛyɛle la ɛ? Mekɛ bie “ɔvale ɛya ɔnleanle bɛ ɔyiale, na ɔlile bɛ ahonle ɛsesebɛ ne anwo nyane.”—Maake 3:5.
16 Ɛnɛ, Gyisɛse nwu ninyɛne dɔɔnwo mɔɔ maa ɔdi “nyane” a. Amaamuo nee ngilehilelɛ mɔɔ ɛngyi Ngɛlɛlera ne azo la a Kilisienemaanle ne anu adekilevoma li ɔ nzi a. Eza Nyamenle Belemgbunlililɛ ne anwo edwɛkpa ne mɔɔ bɛlɛbɔ ye nolo la ka bɛ ɛya. Wɔ maanle dɔɔnwo anu, ɛsɔfo ne mɔ maa menli dwazo tia Kilisienema mɔɔ ɛlɛdi nɔhalɛ aha edwɛkɛ ne mɔɔ Gyisɛse hanle bie la. (Dwɔn 16:2; Yekile 18:4, 24) Mekɛ ko ne ala, ɛsɔfo ɛhye mɔ si bɛ menli ne adua kɛ bɛhɔ konle na bɛhu awie mɔ—kɛ asɛɛ bɛyɛ zɔ a ɔsɔ Gyisɛse Kelaese anye la!
17. Kɛzi Gyisɛse nɔhalɛ ɛdoavolɛma maa ɔ nye die ɛ?
17 Noko Gyisɛse nɔhalɛ ɛdoavolɛma kulo menli. Bɛbɔ edwɛkpa ne nolo bɛkile “menli ngakyile kɔsɔɔti” kɛ mɔɔ Gyisɛse yɛle la, ɔnva nwo kɛ bɛyia ɛkpɔlɛ la. (1 Timote 2:4) Eza ɛlɔlɛ mɔɔ bɛda ye ali bɛkile bɛ nwo la le ngakyile, na yemɔ titili a maa menli nwu kɛ bɛle Kelaese ɛdoavolɛma a. (Dwɔn 13:34, 35) Kɛmɔ bɛkulo bɛ gɔnwo mɔ Kilisienema, bɛbu bɛ, na bɛdi bɛ eni la ati ɔkile kɛ amgba bɛdoa Gyisɛse—ɛhye maa Mɛzaya Belemgbunli ne anye die!
18. Duzu a gyegye yɛ Menle ne a, noko kɛ ɔkɛyɛ na yɛamaa ɔ nye alie ɛ?
18 Eza ɔwɔ kɛ yɛkakye kɛ saa yɛ Menle ne ɛdoavolɛma angyinla kpundii, bɛmaa Gyihova anwo ɛlɔlɛ mɔɔ bɛlɛ la ka aze, na bɛgyakyi ye ɛzonlenlɛ a, ɔgyegye ye kpole. (Yekile 2:4, 5) Noko, Gyisɛse anye die bɛdabɛ mɔɔ bɛgyinla nu bɛkɔ awieleɛ la anwo. (Mateyu 24:13) Ɛhye ati, bɛmaa Kelaese edwɛkɛ ne ɛhɔ zo ɛdɛnla yɛ adwenle nu: “Kɔ zo toa me.” (Dwɔn 21:19) Maa yɛnlea nyilalɛ bie mɔ mɔɔ Mɛzaya Belemgbunli ne bamaa menli mɔɔ gyinla kpundii kɔ awieleɛ anyia la.
Nyilalɛ Mɔɔ Belemgbunli Ne Nɔhalɛ Azonvolɛ Banyia La
19, 20. (a) Nyilalɛ boni mɔ a Gyisɛse ɛdoavolɛma nyia ye ɛnɛ a? (b) Kɛzi yɛtoa Kelaese a ɔbayɛ yɛ ze dahuu ɛ?
19 Yɛtoa Gyisɛse a yɛbanyia nyilalɛ ɛnɛ. Saa yɛfa Kelaese yɛyɛ yɛ Menle, yɛdi ye adehilelɛ zo na yɛfa ye neazo ne yɛbɔ yɛ ɛbɛla a, yɛbanyia debie kpalɛ mɔɔ menli mɔɔ wɔ ewiade ye kpondɛ la noko bɛnnyia ye la. Yɛbanyia gyima mɔɔ nyilalɛ wɔ nu mɔɔ gyi bodane kpalɛ zo, abusua mɔɔ mediema diedima mɔɔ koyɛlɛ nee ɛlɔlɛ wɔ bɛ avinli a wɔ nu, adwenle mɔɔ anu te yɛɛ anzodwolɛ. Ye sikalɛ nu, yɛbanyia anyelielɛ nee ahunlundwolɛ wɔ yɛ ɛbɛlabɔlɛ nu. Akee yɛbanyia nyilalɛ mɔɔ tɛla ɛhye mɔ bɔbɔ la.
20 Gyihova ɛkpa Gyisɛse kɛ “Dahuu Selɛ” ɛmaa bɛdabɛ mɔɔ bɛlɛ anyelazo kɛ bɛbadɛnla azɛlɛ ye azo dahuu la. Gyisɛse bali Adam mɔɔ maanle ɔ bo zo amra nwunle amaneɛ dɔɔnwo la agyakɛ anu. (Ayezaya 9:6, 7) Saa yɛdie Gyisɛse yɛto nu kɛ yɛ “Dahuu Selɛ” na yɛdie ye yɛdi a yɛbanyia dahuu ngoane kenle bie. Eza ɔbamaa yɛabikye Gyihova Nyamenle kpalɛ. Kɛ mɔɔ yɛnwu ye la, saa yɛbɔ mɔdenle yɛsukoa Gyisɛse neazo ne alehyenlɛ biala a yemɔ a le adenle kpalɛ mɔɔ yɛbalua zo yɛali edwɛkɛ ɛhye mɔɔ se: “Bɛzukoa Nyamenle kɛ mralɛ kulovolɛma” la azo a.—Ɛfɛsɛsema 5:1.
21. Kɛzi Kelaese ɛdoavolɛma maa wienyi ta wɔ ewiade ɛtane ɛhye anu ɛ?
21 Saa yɛsukoa Gyisɛse nee ɔ Ze Gyihova a, yɛnyia nwolɛ adenle kɛnlɛma bie. Yɛmaa wienyi ne ta. Wɔ ewiade ɛtane ɛhye mɔɔ Seetan ɛlɛbɛlɛbɛla menli mgbe mgbe yeamaa bɛazukoa ye subane ne la anu, yɛdayɛ mɔɔ yɛdoa Kelaese la maa wienyi kpole bie ta—Ngɛlɛlera ne anu nɔhalɛ ne, Kilisiene subane kpalɛ, anyelielɛ kpalɛ, nɔhalɛ anzodwolɛ yɛɛ ɛlɔlɛ. Mekɛ ko ne ala, yɛkɔ zo yɛbikye Gyihova, na ɛhye a le bodane kpalɛ mɔɔ gyi awie biala anye zo a.
22, 23. (a) Nyilalɛ boni mɔ a bɛdabɛ mɔɔ bɛfa nɔhalɛlilɛ bɛtoa Gyisɛse la banyia ye kenle bie a? (b) Duzu a ɔwɔ kɛ yɛbɔ kpɔkɛ kɛ yɛbayɛ a?
22 Eza dwenle mɔɔ Gyihova kulo kɛ ɔdua Mɛzaya Belemgbunli ne anwo zo ɔyɛ ɔmaa yɛ kenle bie la anwo nea. Ɔnrɛhyɛ, Belemgbunli ne nee Seetan nee ye ewiade ne baho. Gyisɛse bali konim! (Yekile 19:11-15) Yemɔ anzi, Kelaese babɔ ye Ɛvolɛ Apenle Ko Tumililɛ ne abo wɔ azɛlɛ ye azo. Ye anwuma arane ne bamaa dasanli biala mɔɔ di nɔhalɛ la anyia ɛkpɔnedeɛ ne azo nvasoɛ na yeali munli. Akee pɛ ye nvoninli kɛ ɛte kpɔkɛ kpalɛ, ɛle kpavolɛ anzɛɛ bɛlɛra mɔɔ ɛ nwo yɛ se na ɛlɛfa anyelielɛ wɔaboa alesama mɔɔ koyɛlɛ wɔ bɛ avinli la wɔamaa bayɛ azɛlɛ ye paladaese! Wɔ Ɛvolɛ Apenle Ko ne awieleɛ, Gyisɛse bava tumililɛ ne azia amaa ɔ Ze. (1 Kɔlentema 15:24) Saa ɛkɔ zo ɛfa nɔhalɛlilɛ ɛtoa Kelaese a ɛbanyia nyilalɛ kɛnlɛma bie mɔɔ kɛkala ɛnrɛhola ɛnrɛva wɔ adwenle ɛnrɛbu kɛzi ɔbayɛ la—“anyunlunyia fanwodi ne mɔɔ Nyamenle amra lɛ la”! (Wulomuma 8:21) Nɔhalɛ nu, yɛbanyia nyilalɛ kɔsɔɔti mɔɔ vile Adam nee Yive asa la. Yɛbayɛ Gyihova amra mrenyia nee mraalɛ na sinlidɔlɛ mɔɔ Adam ɛtane ne vale rale la bavi yɛ nwo bɔkɔɔ. Nɔhalɛ nu, ‘ewule ɛnrɛdɛnla ɛkɛ bieko.’—Yekile 21:4.
23 Kakye kpavolɛ sukoavolɛ tumivolɛ ne mɔɔ yɛhanle ɔ nwo edwɛkɛ wɔ Tile 1 ne anu la. Ɔkpole Gyisɛse ɛsalɛdolɛ ne mɔɔ se: “Bɛla badoa me” la. (Maake 10:17-22) Mmayɛ zɔhane nvonleɛ ne bie ɛlɛ! Emomu, fa anyelielɛ die Gyisɛse ɛsalɛdolɛ ne azo. Bɔ mɔdenle gyinla kpundii, kɔ zo toa Mboaneneavolɛ Kpalɛ ne alehyenlɛ biala nee ɛvolɛ biala, amaa wɔadɛnla ngoane nu na wɔanwu mekɛ mɔɔ ɔbamaa Gyihova bodane ngakyile ne mɔ amuala ara nu bɔkɔɔ la!
