1, 2. Kɛmɔti a ɔbahola yeayɛ se kɛ yɛ ngome yɛbabikye Gyihova ɛ, na duzu a Gyisɛse Kelaese ɛyɛ ɛmaa yɛ wɔ ɛhye anwo a?

 WƆMINLI ɛlɛ ɔ? Bie a ɛkakye mekɛ bie mɔɔ ɛnee ɛlɛtu adenle wɔahɔkpɔla ɛ gɔnwo anzɛɛ wɔ busuanli bie na ɛminlinle la. Mekɛ mɔɔ ɛlua adenle ne azo na ɛnnwu ɛleka mɔɔ ɛlɛkɔ la, ɛgyinlanle na ɛbizale awie ɛmaanle ɔhilele wɔ adenle ne ɔ? Nea kɛzi anrɛɛ ɛ nye balie, saa awie mɔɔ le atiakunlukɛnlɛma la angile wɔ ɛleka mɔɔ ɔwɔ kɛ ɛfa ala, emomu, ɔhanle kɛ: “Wɔmɔ toa me. Na mebava wɔ meahɔ ɛkɛ.” Nea kɛzi anrɛɛ wɔ ahonle badɔ wɔ azule nu la!

² Yɛbahola yɛaha ye kɛ, Gyisɛse Kelaese ɛyɛ debie zɛhae bie ɛmaa yɛ. Ɔhale yɛ ngome a, anrɛɛ yɛnrɛhola yɛnrɛbikye Nyamenle. Kɛmɔ bɛva ɛtane bɛwo alesama na bɛnli munli la ati, bɛminli yɛɛ “bɛhwe bɛ nwo bɛvi ngoane ne mɔɔ Nyamenle fa maa la anwo.” (Ɛfɛsɛsema 4:17, 18) Yɛhyia moalɛ amaa yɛanwu adenle ne. Gyisɛse mɔɔ le atiakunlukɛnlɛma la ɛmmaa yɛ adehilelɛ nee folɛdulɛ ala; emomu, yeyɛ neazo kɛnlɛma yemaa yɛ. Kɛ mɔɔ yɛnwunle ye wɔ Tile 1 ne anu la, Gyisɛse ɛlɛto ɛsalɛ avɛlɛ yɛ nuhua ko biala, ɔse: “Bɛla badoa me.” (Maake 10:21) Noko eza yemaa yɛnwu deɛmɔti ɔwɔ kɛ yɛdie ɛsalɛdolɛ ne yɛto nu la. Mekɛ bie, Gyisɛse hanle kɛ: “Mame a mele adenle ne nee nɔhalɛ ne nee ngoane ne a. Awie biala ɛmba Selɛ ne ɛkɛ kyesɛ ɔdua me nwo zo.” (Dwɔn 14:6) Maa yɛzuzu ninyɛne bie mɔ mɔɔ ɔti kyesɛ yɛdua Ralɛ ne angomekye anwo zo na yɛahɔ Selɛ ne ɛkɛ la anwo. Akee mɔɔ zɔhane ninyɛne ne  mɔ wɔ yɛ adwenle nu la, yɛbazuzu deɛmɔti amgba Gyisɛse a le “adenle ne, nɔhalɛ ne, nee ngoane ne” la anwo.

3. Duzu ati a Gyisɛse a yɛdua ɔ nwo zo yɛbikye Nyamenle a?

³ Mɔɔ limoa, yɛdua Gyisɛse anwo zo yɛbikye Nyamenle, ɔluakɛ Gyihova ɛnwu kɛ ɔfɛta kɛ ɔfa gyima mɔɔ hyia kpalɛ la ɔwula ɔ Ra ne asa anu. a Selɛ ne ɛmaa yeyɛ awie titili mɔɔ ɔbalua ɔ nwo zo yeamaa ye bodane ne mɔ ara nu a. (2 Kɔlentema 1:20; Kɔlɔsaema 1:18-20) Amaa yɛade gyima titili mɔɔ Ralɛ ne di la abo la, ɔwɔ kɛ yɛsuzu mɔɔ zile wɔ Yidɛn tola ne anu, ɛleka mɔɔ agyalɛma mɔɔ limoa la hɔbokale Seetan anwo na bɛdele atua bɛtiale Gyihova la anwo.​—Gyɛnɛsese 2:16, 17; 3:1-6.

4. Edwɛkɛ boni a Yidɛn atuadelɛ ne vale rale a, na duzu a Gyihova yɛle kɛ ɔbava yeaziezie zɔhane edwɛkɛ ne a?

⁴ Atuadelɛ ne mɔɔ hɔle zo wɔ Yidɛn la vale edwɛkɛ mɔɔ baha awie biala mɔɔ wɔ anwuma nee aze la rale: Asoo amgba Gyihova le nwuanzanwuanza, ɔle kpalɛ, ɔle tenlene yɛɛ ɔlɛ ɛlɔlɛ ɔ? Amaa bɛaziezie edwɛkɛ ɛhye mɔɔ hyia la, Gyihova zile kpɔkɛ kɛ ɔwɔ kɛ ralɛ mɔɔ le sunsum nu abɔdeɛ mɔɔ di munli la ba azɛlɛ ye azo. Ɛnee gyima kpole la ralɛ ɛhye anyunlu​—ɔbava ye ngoane yeamaa yeava yeade ɔ Ze duma nwo na yeayɛ ɛkpɔnedeɛ yeamaa alesama. Saa ralɛ ne mɔɔ bɛkpa ye la di nɔhalɛ kɔ ewule nu a, ɔbamaa bɛali ngyegyelɛ kɔsɔɔti mɔɔ Seetan atuadelɛ ne vale rale la anwo gyima. (Hibuluma 2:14, 15; 1 Dwɔn 3:8) Noko, Gyihova lɛ sunsum nu mralɛ mɔɔ di munli la mgbe mgbe dɔɔnwo. (Daneɛle 7:9, 10) Bɛ nuhua boni a ɔyele ye kɛ ɔyɛ gyima ɛhye mɔɔ hyia la ɛ? Gyihova yele “ɔ Ra kokye ne” mɔɔ nzinlii bɛvɛlɛle ye Gyisɛse Kelaese la.​—Dwɔn 3:16.

5, 6. Kɛzi Gyihova lale ye ali kɛ ɔlɛ anwodozo wɔ ɔ Ra ne anu ɛ, na duzu ati a ɔnyianle ɔ Ra ne anu anwodozo a?

 ⁵ Asoo ɔwɔ kɛ ahenle mɔɔ Gyihova yele ye la si yɛ nwo? Kyɛkyɛ! Ɛnee Selɛ ne lɛ anwodozo kpole wɔ ɔ Ra kokye ne anu. Wɔ ɛvoya dɔɔnwo kolaa na Gyihova Ara ne ara azɛlɛ ye azo la, ɔhanle ɔdole ɛkɛ ne kɛ Ralɛ ɛhye bali nɔhalɛ, ɔnva nwo kɛ ɔbanwu amaneɛ dɔɔnwo la. (Ayezaya 53:3-7, 10-12; Gyima ne 8:32-35) Suzu edwɛkɛ ɛhye anwo nea. Ralɛ ɛhye le kɛ abɔdeɛ kɔsɔɔti mɔɔ ze nrɛlɛbɛ la, ɔlɛ adenle ɔsi ɔ ti anwo kpɔkɛ. Noko, ɛnee Gyihova lɛ anwodozo wɔ ɔ Ra ne anu ɔti ɔhanle ye nɔhalɛlilɛ nwo edwɛkɛ ɔdole ɛkɛ. Duzu ati a Gyihova nyianle ɔ Ra ne anu anwodozo a? Ɔluakɛ Gyihova ze ɔ Ra ne kpalɛ. Ɔze kɛzi ɔ Ra ne kulo kɛ ɔsɔ ɔ nye la. (Dwɔn 8:29; 14:31) Ralɛ ne kulo Selɛ ne, yɛɛ Gyihova noko kulo ɔ Ra ne. (Dwɔn 3:35) Ɛlɔlɛ mɔɔ Selɛ ne nee Ralɛ ne lɛ maa bɛ nwo la maa bɛyɛ ko na bɛdie bɛ nwo bɛdi bɔkɔɔ.​—Kɔlɔsaema 3:14.

⁶ Saa yɛnea gyima titili mɔɔ Ralɛ ne di, anwodozo mɔɔ Selɛ ne lɛ ye wɔ ye nu, yɛɛ ɛlɔlɛ mɔɔ maa Selɛ ne nee Ralɛ ne yɛ ko la a, asoo ɔsi yɛ nwo kɛ Gyisɛse angome a yɛdua ɔ nwo zo yɛbikye Nyamenle ɔ? Noko debie bieko wɔ ɛkɛ mɔɔ ɔti Ralɛ ne angomekye a bahola ahile yɛ adenle ahɔ Selɛ ne ɛkɛ a.

7, 8. Kɛmɔti a Gyisɛse holale hanle ye wienyi kɛ awie biala ɛnze Selɛ ne “kɛ Ralɛ ne” la ɛ?

⁷ Ɔwɔ kɛ yɛyɛ ninyɛne bie mɔ amaa yɛahola yɛabikye Gyihova. (Edwɛne 15:1-5) Nyamenle Ara ne ala a ze mɔɔ ɔwɔ kɛ yɛyɛ amaa yɛali Nyamenle ngyinlazo ne mɔ azo na yɛanyia ɔ nyunlu ɛlolɛ la. Gyisɛse hanle kɛ: “Me Ze ɛva ninyɛne kɔsɔɔti ɛmaa me, na awie biala ɛnze Ralɛ ne kpalɛ kɛ Selɛ ne; yɛɛ awie biala ɛnze Selɛ ne kpalɛ kɛ Ralɛ ne nee awie biala mɔɔ Ralɛ ne kulo kɛ ɔda ye ali ɔkile ye la.”  (Mateyu 11:27) Maa yɛnlea deɛmɔti Gyisɛse holale hanle ye wienyi kɛ, awie biala ɛnze Selɛ ne “kɛ Ralɛ ne” la.

⁸ Kɛ “abɔdeɛ muala anu belamunli ralɛ” la, agɔnwolɛvalɛ titili wɔ Ralɛ ne nee Gyihova avinli. (Kɔlɔsaema 1:15) Suzu agɔnwolɛvalɛ titili mɔɔ ɛnee wɔ Selɛ ne nee Ralɛ ne avinli wɔ mekɛ tendenle mɔɔ ɛnee bɛ mu nwiɔ ala a bɛwɔ ɛkɛ​—ɔvi mekɛ mɔɔ ɔbɔle Gyisɛse kɔkpula kɛ bɛbɔle sunsum nu abɔdeɛ ne mɔ la azo. (Dwɔn 1:3; Kɔlɔsaema 1:16, 17) Nea nwolɛ adenle mɔɔ sonle bolɛ mɔɔ ɛnee Ralɛ ne lɛ wɔ ɔ Ze anwo ɛkɛ la, ɔzukoale kɛzi Selɛ ne suzu ninyɛne nwo, ye ɛhulolɛdeɛ, ye ngyinlazo nee ye ndenle ne mɔ. Nɔhalɛ nu, saa yɛka kɛ Gyisɛse ze Selɛ ne kpalɛ tɛla awie biala a, ɛnee yɛtɛbɔle adalɛ. Kɛmɔ ɛnee Gyisɛse bikye ɔ Ze kpalɛ la ati ɔholale ɔmaanle bɛnwunle ɔ Ze kpalɛ ɔdɛlale awie biala.

9, 10. (a) Ndenle boni mɔ a Gyisɛse luale zo maanle bɛnwunle ɔ Ze a? (b) Amaa Gyihova alie yɛ ado nu la, duzu a ɔwɔ kɛ yɛyɛ a?

⁹ Gyisɛse ngilehilelɛ ne lale ye ali bɔkɔɔ kɛ ɔze kɛzi Gyihova dwenle, ɔte nganeɛ nee mɔɔ ɔkpondɛ yeavi ye azonvolɛ ɛkɛ ne la. b Gyisɛse lale Selɛ ne ali wɔ adenle fofolɛ mɔɔ yɛ nwanwane la azo. Gyisɛse hanle kɛ: “Mɔɔ ɛnwu me la ɛnwu Selɛ ne noko.” (Dwɔn 14:9) Gyisɛse zukoale ɔ Ze kpalɛ wɔ debie biala mɔɔ ɔhanle nee mɔɔ ɔyɛle la anu. Yemɔti saa yɛkenga ye wɔ Baebolo ne anu kɛ, Gyisɛse dendɛle kɛnlɛma nee tumi zo wɔ ye ngilehilelɛ nu, ɔvi anwunvɔnezelɛ nu ɔyɛle awie mɔ ayile na alɔbɔlɛ hunle ye maanle ɔzunle a​—ɛnee yɛbahola yɛayɛ nwolɛ nvoninli wɔ yɛ adwenle nu kɛ, Gyihova a ɛlɛka na ɔlɛyɛ zɔhane ninyɛne ne mɔ a. (Mateyu 7:28, 29; Maake 1:40-42; Dwɔn 11:32-36) Ralɛ ne ɛdendɛlɛ nee ye nyɛleɛ maa yɛnwu ɔ Ze ndenle nee ye ɛhulolɛdeɛ ne kpalɛ. (Dwɔn 5:19; 8:28; 12:49, 50) Ɛhye ati, amaa Gyihova alie yɛ ado nu la, ɔwɔ kɛ yɛtie Gyisɛse ngilehilelɛ ne na yɛsukoa ye neazo ne.​—Dwɔn 14:23.

 ¹⁰ Kɛmɔ Gyisɛse ze Gyihova kpalɛ na ɔsukoa ye kpalɛ la ati, ɔnyɛ nwanwane kɛ Gyihova ɛzi kpɔkɛ kɛ Ralɛ ne a bɛdua ɔ nwo zo bɛbikye Selɛ ne a. Kɛkala mɔɔ yɛde ɔ bo kɛ Gyisɛse ala a yɛdua ɔ nwo zo yɛbikye Gyihova la, maa yɛzuzu Gyisɛse edwɛkɛ ne mɔɔ ɔse: “Mame a mele adenle ne nee nɔhalɛ ne nee ngoane ne a. Awie biala ɛmba Selɛ ne ɛkɛ kyesɛ ɔdua me nwo zo” la anwo.​—Dwɔn 14:6.

11. (a) Duzu ati a Gyisɛse ala a yɛbahola yɛalua ɔ nwo zo yɛ nee Nyamenle anyia agɔnwolɛvalɛ kpalɛ a? (b) Kɛzi edwɛkɛ mɔɔ wɔ Dwɔn 14:6 la si gyinlabelɛ titili mɔɔ Gyisɛse lɛ la azo ɛ? (Nea ɔbodwɛkɛ ne.)

¹¹ Yɛlimoa yɛzukoa kɛ yɛnrɛhola yɛnrɛbikye Nyamenle kyesɛ yɛdua Gyisɛse anwo zo. Suzu mɔɔ ɛhye kile fɔɔnwo maa yɛ la anwo. Gyisɛse a le “adenle ne” a ɔluakɛ ɔ nwo zo ala a yɛbahola yɛalua na yɛ nee Nyamenle anyia agɔnwolɛvalɛ kpalɛ a. Kɛmɔti a ɔle zɔ ɛ? Ɔlua nɔhalɛ mɔɔ Gyisɛse lile hɔle ewule nu la azo, ɔvale ye ngoane ɔyɛle ɛkpɔnedeɛ. (Mateyu 20:28) Saa tɛ ɛkpɔnedeɛ ɛhye a, anrɛɛ ɔbayɛ se kɛ yɛbahola yɛabikye Nyamenle. Ɛtane maa ɛweɛne da sonla nee Nyamenle avinli, ɔluakɛ Gyihova le nwuanzanwuanza yɛɛ ɔnlie ɛtane ɔndo nu. (Ayezaya 6:3; 59:2) Noko, Gyisɛse afɔlebɔlɛ ne yele ɛweɛne ne vile ɛkɛ; ɔyɛle debie mɔɔ hyia mɔɔ bɛfa bɛkpɔda ɛtane la. (Hibuluma 10:12; 1 Dwɔn 1:7) Saa yɛdie Nyamenle nziezielɛ mɔɔ yelua Kelaese anwo zo yeyɛ la yɛto nu na yɛnyia diedi wɔ nu a, yɛbahola yɛanyia Gyihova anyunlu ɛlolɛ. Adenle bieko ɛnle ɛkɛ mɔɔ yɛbahola yɛalua zo ‘yɛaziezie yɛ nee Nyamenle avinli a.’ c​—Wulomuma 5:6-11.

12. Duzu ati a Gyisɛse a le “adenle ne” a?

¹² Saa ɔba ye asɔneyɛlɛ nwo a, Gyisɛse a le “adenle ne” a. Gyisɛse ala a yɛbahola yɛalua ɔ nwo zo yɛabikye Gyihova  wɔ asɔneyɛlɛ nu, na yɛanyia anwodozo kɛ ɔbadie yɛ a. (1 Dwɔn 5:13, 14) Gyisɛse mumua ne hanle kɛ: “Debie biala mɔɔ bɛkɛbiza Selɛ ne wɔ me duma nu la, ɔkɛva ɔkɛmaa bɛ. . . . Bɛbiza, na bɛ sa kɛha ye amaa bɛ fɛlɛkolilɛ ne ali munli.” (Dwɔn 16:23, 24) Ɔfɛta kɛ yɛbikye Gyihova wɔ asɔneyɛlɛ nu wɔ Gyisɛse duma nu na yɛfɛlɛ ye “Yɛ Ze.” (Mateyu 6:9) Eza Gyisɛse le “adenle ne” ɔluakɛ yeyɛ neazo mɔɔ di munli la yemaa yɛ. Kɛ mɔɔ yɛlimoa yɛnwu ye la, Gyisɛse zukoale ɔ Ze wɔ adenle mɔɔ di munli la azo. Ɔti, Gyisɛse neazo ne kile yɛ kɛzi ɔwɔ kɛ yɛbɔ yɛ ɛbɛla amaa yɛazɔ Gyihova anye la. Yemɔti, amaa yɛabikye Gyihova la, ɔwɔ kɛ yɛdi Gyisɛse neazo ne anzi.​—1 Pita 2:21.

13, 14. (a) Kɛzi Gyisɛse lale ye ali kɛ ɔka nɔhalɛ ɛ? (b) Amaa Gyisɛse ayɛ “nɔhalɛ ne” la, duzu a ɛnee ɔwɔ kɛ ɔyɛ a, na kɛmɔti ɛ?

¹³ Gyisɛse hanle Selɛ ne ngapezo edwɛkɛ ne anwo nɔhalɛ ne dahuu. (Dwɔn 8:40, 45, 46) Gyisɛse ambɔ adalɛ angile awie biala ɛlɛ. (1 Pita 2:22) Ye kpɔvolɛma bɔbɔ liele dole nu kɛ ‘ɔkilehile Nyamenle adenle ne wɔ nɔhalɛ nu.’ (Maake 12:13, 14) Noko akee, mekɛ mɔɔ Gyisɛse hanle kɛ “Mame a mele . . . nɔhalɛ ne” la, ɛnee tɛ nɔhalɛ ne mɔɔ ɔdi wɔ ye edwɛkɛhanlɛ nee ye ngilehilelɛ nu la angomekye ati a ɔhanle ye zɔ a. Ɛnee ninyɛne dɔɔnwo boka nwolɛ.

¹⁴ Kakye kɛ, wɔ ɛvoya dɔɔnwo anu kolaa na Gyisɛse ara azɛlɛ ye azo la, Gyihova vale ye sunsum ne maanle bɛhɛlɛle Mɛzaya anzɛɛ Kelaese ne anwo ngapezo dɔɔnwo wɔ Baebolo ne anu. Ngapezo ne mɔ hanle ye ɛbɛlabɔlɛ, ɛzonlenlɛ gyima nee ye ewule nwo edwɛkɛ dɔɔnwo. Eza ɛnee ngapezo dɔɔnwo wɔ Mosisi Mɛla ne anu mɔɔ twe adwenle kɔ Mɛzaya ne anwo zo a. (Hibuluma 10:1) Asoo Gyisɛse bali nɔhalɛ ahɔ ewule nu na yeamaa ngapezo kɔsɔɔti mɔɔ fale ɔ nwo la ara nu ɔ? Yemɔ ala a bamaa yeala ali kɛ Gyihova le Nyamenle mɔɔ ye ngapezo ba nu a. Ɛnee ɛzonlelilɛ  kpole la Gyisɛse anwo zo. Gyisɛse luale kɛzi ɔbɔle ye ɛbɛla​—edwɛkɛ biala mɔɔ ɔhanle nee debie biala mɔɔ ɔyɛle la azo, ɔmaanle ngapezo ne mɔ mɔɔ fale ɔ nwo la yɛle nɔhalɛ. (2 Kɔlentema 1:20) Ɛhye ati, ɛnee Gyisɛse a le “nɔhalɛ ne” a. Ɔluakɛ Gyisɛse maanle Gyihova ngapezo edwɛkɛ ne yɛle nɔhalɛ.​—Dwɔn 1:17; Kɔlɔsaema 2:16, 17.

15. Duzu a kile kɛ awie ɛlɛda ye ali kɛ ɔlɛ diedi wɔ Ralɛ ne anu a, na ɔyɛ zɔ a duzu a ɔbanyia a?

¹⁵ Gyisɛse a le “ngoane ne” a, ɔluakɛ ɔ ngomekye a yɛbahola yɛalua ɔ nwo zo yɛanyia “nɔhalɛ ngoane ne” a. (1 Timote 6:19) Baebolo ne ka kɛ: “Awie biala mɔɔ kɛla ye ali kɛ ɔlɛ diedi wɔ Ralɛ ne anu la lɛ dahuu ngoane; mɔɔ ɛndie Ralɛ ne la ɛnrɛnyia ngoane, emomu Nyamenle ɛyavalɛ wɔ ɔ nwo zo.” (Dwɔn 3:36) Duzu a kile kɛ yɛlɛda ye ali kɛ yɛlɛ diedi wɔ Nyamenle Ara ne anu a? Ɔkile kɛ, yɛdie yɛdi kɛ ɔnle nu a, yɛnrɛhola yɛnrɛnyia ngoane. Eza ɔkile kɛ yɛdua yɛ nyɛleɛ zo yɛda yɛ diedi ali, yɛkɔ zo yɛsukoa Gyisɛse na yɛbɔ mɔdenle yɛfa ye ngilehilelɛ nee ye neazo ne yɛbɔ yɛ ɛbɛla. (Gyemise 2:26) Ɛhye ati, saa yɛda ye ali kɛ yɛlɛ diedi wɔ Nyamenle Ara ne anu a, yɛbanyia dahuu ngoane​—“mboane ekpunli ekyi” ne mɔɔ bɛva sunsum ne bɛkpokpa bɛ la badɛnla aze wɔ anwuma mɔɔ bɛnrɛwu ɛlɛ a yɛɛ “mboane gyɛne” ne mɔɔ “menli ekpunli kpole” ne boka nwo la bali munli na badɛnla azɛlɛ ye azo dahuu.​—Luku 12:32; 23:43; Yekile 7:9-17; Dwɔn 10:16.

16, 17. (a) Kɛzi Gyisɛse bayɛ “ngoane ne” amaa menli bɔbɔ mɔɔ bɛwu la ɛ? (b) Anwodozo boni a yɛbahola yɛanyia a?

¹⁶ Na menli mɔɔ bɛwu la noko ɛ? Gyisɛse a le “ngoane ne” maa bɛdabɛ noko a. Mɔɔ ɔhale ekyii na Gyisɛse adwazo ɔ gɔnwo Lazalɛse avi ewule nu la, ɔhanle ɔhilele Lazalɛse adiema raalɛ Maata kɛ: “Mame a mele ewudwazo ne nee ngoane ne a. Mɔɔ kɛlie me kɛli la, saa ɔwu bɔbɔ a ɔbara ngoane nu.” (Dwɔn 11:25) Gyihova ɛva “ewule nee  Nla sanvɛ ne” ɛmaa ɔ Ra ne, na yemaa ye tumi kɛ ɔdwazo menli mɔɔ ɛwu la. (Yekile 1:17, 18) Gyisɛse mɔɔ bɛwula ye anyunlunyia la bava zɔhane sanvɛ ne abuke alesama Nla ne na yeadwazo menli mɔɔ bɛzie bɛ wɔ ɛkɛ ne la amuala.​—Dwɔn 5:28, 29.

¹⁷ “Mame a mele adenle ne, nɔhalɛ ne, nee ngoane ne a”​—edwɛkɛ sikalɛ ɛhye mɔɔ Gyisɛse hanle la maa yɛnwu bodane mɔɔ ye ɛbɛlabɔlɛ nee ye azɛlɛ ye azo ɛzonlenlɛ gyima ne gyi zolɛ la. Zɔhane edwɛkɛ ne anwo hyia yɛ kpalɛ ɛnɛ. Kakye kɛ Gyisɛse hanle zɔhane edwɛkɛ ne la, ɔdoale zo ɔhanle kɛ: “Awie biala ɛmba Selɛ ne ɛkɛ kyesɛ ɔdua me nwo zo.” (Dwɔn 14:6) Gyisɛse edwɛkɛ ne le nɔhalɛ ɛnɛ, kɛ mɔɔ ɛnee ɔde wɔ mekɛ mɔɔ ɔhanle la. Ɛhye ati, yɛbahola yɛanyia anwodozo kpole kɛ saa yɛtoa Gyisɛse a, yɛnrɛminli ɛlɛ. Ɔ ngomekye ala a ɔbahile yɛ adenle yɛahɔ “Selɛ ne ɛkɛ” a.

18. Duzu a ɔwɔ kɛ yɛyɛ amaa yɛayɛ Gyisɛse nɔhalɛ ɛdoavolɛma a?

¹⁸ Kɛmɔ Gyisɛse gyimalilɛ ne le titili na ɔze Selɛ ne kpalɛ la ati, ɔle kpalɛ kɛ yɛtoa ye. Kɛ mɔɔ yɛnwunle ye wɔ tile ne mɔɔ li ɛhye anyunlu anu la, saa yɛle Gyisɛse ɛdoavolɛma kpalɛ a yɛ nyɛleɛ a yɛfa yɛkile a, na ɔnle kɛ yɛka anzɛɛ yɛte nganeɛ kɛ yɛle zɔ ala. Saa yɛle Kelaese ɛdoavolɛma a, ɔkile kɛ yɛsukoa ye ngilehilelɛ nee ye neazo ne na yɛfa yɛbɔ yɛ ɛbɛla. (Dwɔn 13:15) Buluku ɛhye mɔɔ ɛlɛkenga ye kɛkala la bahola aboa wɔ yeamaa wɔayɛ ɛhye.

19, 20. Kɛzi buluku ɛhye bahola aboa wɔ yeamaa wɔayɛ Kelaese ɛdoavolɛ ɛ?

¹⁹ Wɔ tile ne mɔ mɔɔ doɔdoa zo la anu, yɛbazukoa Gyisɛse ɛbɛlabɔlɛ nee ye ɛzonlenlɛ gyima ne anwo ninyɛne dɔɔnwo. Bɛhyehyɛ tile ɛhye mɔ anu bɛyɛ ye foa nsa. Mɔɔ limoa la, yɛbanwu ye subane nee ninyɛne mɔɔ ɔyɛle la. Mɔɔ tɔ zo nwiɔ, yɛbazuzu mɔdenle mɔɔ ɔbɔle wɔ edwɛkɛhanlɛ ne nee ye ngilehilelɛ nu ɔvale ɔyɛle neazo ɔmaanle  yɛ la anwo. Mɔɔ tɔ zo nsa, yɛbazuzu ɛlɔlɛ mɔɔ ɔlale ye ali la anwo. Ɔvi Tile 3 ne mɔɔ kɔ la, ngilehilelɛ ɛlɛka bie wɔ ɛkɛ mɔɔ ɔ ti se, “Kɛ Ɔkɛyɛ Na Wɔayɛ Gyisɛse Ɛdoavolɛ Ɛ?” Bɛziezie ngɛlɛlera nee kpuya mɔɔ wɔ ɛkɛ la kɛ ɔboa yɛ ɔmaa yɛdwenledwenle kɛzi yɛbahola yɛazukoa Gyisɛse wɔ yɛ ɛdendɛlɛ nee yɛ nyɛleɛ nu la anwo.

²⁰ Ɔlua mɔɔ Gyihova Nyamenle ɛyɛ ɛmaa wɔ la ati, ɔnle kɛ ɛminli, na ɛtwe ɛ nwo ɛfi ɔ nwo ɔlua ɛtane mɔɔ bɛva bɛwo wɔ la ati. Gyihova bɔle afɔle kpole, ɔvile ɛlɔlɛ nu ɔzoanle ɔ Ra ne ɔmaanle ɔrahilele yɛ kɛzi yɛ nee Nyamenle bahola anyia agɔnwolɛvalɛ kpalɛ la. (1 Dwɔn 4:9, 10) Maa zɔhane ɛlɔlɛ kpole ne ɛha wɔ na bɔ mɔdenle die Gyisɛse ɛsalɛdolɛ ne mɔɔ se: “Bɛla badoa me” la azo.​—Dwɔn 1:43.