1-3. Edwɛkɛ boni a dole Gyisɛse a, na duzu a ɔyɛle a?

 MENLI dɔɔnwo bie ɛlɛkpondɛ Gyisɛse ahye ye. Bɛdedɛ konle dadeɛ nee ahoholombaka yɛɛ sogyama boka bɛ nwo, ɛnee bɛ nwo zonle kpalɛ. Bɛ muala bɛnyia adwenle ɛtane kɛ bɛdua awozinli nu wɔ Gyɛlusalɛm gua ne mɔ azo na bɛapɛ Kedelɔn Bɔnza ne bɛahɔ Ɔlivi Boka ne azo. Siane ne ɛlɛta, noko bɛdedɛ tɛkɛ nee ahɛnlaneɛ. Asoo amungu ne ɛheda siane ne anye la ati a bɛdedɛ ahɛnlaneɛ ɔ? Anzɛɛ bɛdwenle kɛ ahenle mɔɔ bɛkpondɛ ye bahye ye la vea awozinli ne anu ɔ? Mɔɔ yɛze la a le kɛ: Saa awie dwenle kɛ ɛzulolɛ ti Gyisɛse bavea a, ɛnee ɔnze ye kpalɛ.

² Ɛnee Gyisɛse ze edwɛkɛ mɔɔ bado ye la. Noko yeannriandi, ɔgyinlanle ɛkɛ. Ɛnee Dwudase mɔɔ mekɛ bie le ɔ gɔnwo mɔɔ ɔdie ye ɔdi la a li menli ne ati a. Dwudase zile ye ahonle vole Gyisɛse mɔɔ ɛnee le ɔ menle la anloa anwo na ɔluale zo ɔyele ye ɔmaanle. Noko, Gyisɛse ziele ɔ nwo dii. Akee ɔragyinlanle menli ne anyunlu. Ɔbizale bɛ kɛ: “Nwane a bɛkpondɛ ye a?” Bɛbuale ye kɛ: “Gyisɛse mɔɔ vi Nazalɛte la.”

³ Saa menli dɔɔnwo zɛhae mɔɔ dedɛ akodeɛ la ba menli nwo zo a, ɛzulolɛ ka bɛ. Bie a ɛnee kɛ menli ne suzu kɛ Gyisɛse mɔɔ gyi bɛ nyunlu ɛkɛ ne la bayɛ la ɛne. Noko, yeanzulo, yeannriandi yɛɛ yeambɔ adalɛ biala. Emomu, ɔhanle ye sikalɛ kɛ: “Medame ɛne.” Kɛzi ɔziele ɔ nwo dii, na ɔnyianle akɛnrasesebɛ la zinle menli ne anwo. Bɛhɔle bɛ nzi na bɛdule bɛguale aze!​—Dwɔn 18:1-6; Mateyu 26:45-50; Maake 14:41-46.

4-6. (a) Duzu a bɛvale Nyamenle Ara ne bɛtotole nwo a, na duzu ati ɔ? (b) Ndenle nsa boni mɔ azo a Gyisɛse luale hilele kɛ ɔlɛ akɛnrasesebɛ a?

⁴ Duzu a maanle Gyisɛse ziele ɔ nwo dii wɔ sɔnea kpole ɛhye anu a? Ɛnee ɔlɛ akɛnrasesebɛ la ati ɔ. Akɛnrasesebɛ le  subane mɔɔ hyia mɔɔ ɔwɔ kɛ adekilevolɛ nyia la anu ko, na awie biala ɛnlɛ akɛnrasesebɛ ɛndɛla Gyisɛse. Yɛzukoale kɛzi Gyisɛse bɛlɛ ɔ nwo aze na ɔle bɛtɛɛ la wɔ tile mɔɔ li ɛhye anyunlu la anu. Ɔfɛta kɛ bɛvɛlɛle ye “Boaneralɛ ne” la. (Dwɔn 1:29) Noko, Gyisɛse akɛnrasesebɛ ne maanle bɛvale duma fofolɛ bɛvɛlɛle ye. Baebolo ne ka Nyamenle Ara ne anwo edwɛkɛ kɛ: “Nea! Dwuda abusua nu awenade ne.”​—Yekile 5:5.

⁵ Bɛta bɛfa awenade bɛgyinla ɛkɛ bɛmaa akɛnrasesebɛ. Asoo ɛ nee awenade nyinli mɔɔ ɛnyi la ɛyia ɛlɛ? Saa wɔyia bie ɛlɛ a, ɛnee ɔda ali kɛ tunli ne mɔɔ ɔla nu wɔ nanezielɛleka ne la a bɔle ɛ nwo bane a. Noko ɛhye bɔbɔ bahola amaa ɛzulolɛ aha wɔ. Saa ɛlɛnea nane kpole ɛhye mɔɔ anwo yɛ se la na ɔdaye noko ɔlɛnea wɔ kpoonwu a, ɛkola ɛnwu kɛ debie biala ɛnle ɛkɛ mɔɔ bamaa ɛzulolɛ aha awenade na yeanriandi a. Baebolo ne ka awenade nwo edwɛkɛ kɛ, “ɔle katakyie wɔ nane ne mɔ anu, ɔnzia ɔ nzi wɔ awie biala anyunlu.” (Mrɛlɛbulɛ 30:30) Akɛnrasesebɛ zɛhae a ɛnee Kelaese lɛ a.

⁶ Maa yɛzuzu ndenle nsa mɔɔ Gyisɛse luale zo hilele kɛ ɔlɛ akɛnrasesebɛ kɛ awenade la anwo: ɔgyinlanle nɔhalɛ ne anzi, ɔvale pɛlepɛlelilɛ ɔyɛle gyima yɛɛ ɔgyinlanle dwazotia nloa. Eza yɛbanwu kɛ yɛ kɔsɔɔti​—saa bɛvale akɛnrasesebɛ bɛwole yɛ anzɛɛ bɛanva bɛanwo yɛ bɔbɔ a​—yɛbahola yɛazukoa Gyisɛse yɛanyia akɛnrasesebɛ.

7-9. (a) Mɔɔ Gyisɛse lile ɛvolɛ 12 la duzu a zile a, na duzu ati a mɔɔ zile la bahola amaa ɛzulolɛ aha wɔ ɛ? (b) Kɛzi Gyisɛse nyianle akɛnrasesebɛ wɔ mekɛ mɔɔ ɔ nee kilehilevolɛma ne ɛlɛtendɛ wɔ ɛzonlenlɛsua ne anu la ɛ?

⁷ Fane dɔɔnwo ne ala, ɔhyia akɛnrasesebɛ na awie ahola agyinla nɔhalɛ ne anzi wɔ ewiade mɔɔ Seetan, “adalɛ kɔsɔɔti bɛ ze” ne nea zo la anu. (Dwɔn 8:44; 14:30) Gyisɛse angendɛ too yeanyɛ kpanyinli kolaa na yeayɛ ɛhye. Mɔɔ Gyisɛse lile ɛvolɛ 12 mɔɔ bɛhɔlile Akpabɛnwo ɛvoyia ne wɔ Gyɛlusalɛm  bɛwiele la, ye awovolɛ annwu ye. Mɛle nee Dwosefi kpondɛle Gyisɛse ɛsesebɛ too kenle nsa. Nzinlii, bɛnwunle ye wɔ ɛzonlenlɛsua ne anu. Ɛnee duzu a ɔlɛyɛ ye wɔ ɛkɛ a? Ɛnee “ɔde kilehilevolɛma ne avinli ɔlɛtie bɛ na ɔlɛbizebiza bɛ edwɛkɛ.” (Luku 2:41-50) Suzu mɔɔ hɔle zo wɔ ɛkɛ ne la anwo nea.

⁸ Tetedwɛkɛ kɛlɛvoma ka kɛ ɛzonlenlɛ nu mgbanyima bie mɔ ta kendɛ wɔ ɛzonlenlɛsua ne anu wɔ mekɛ mɔɔ bɛkɛli ɛvoyia ne mɔ bɛkɛwie la na bɛkilehile wɔ abenlana mgbole ne mɔ ko anu. Menli tɛnla bɛ nwo ɛkɛ ne tie bɛ na bɛbiza bɛ kpuya. Kilehilevolɛma ɛhye mɔ ze nwoma. Bɛze Mosisi Mɛla ne yɛɛ mɛla mɔɔ menli ɛli nee amaamuo kpomgbondee ne mɔɔ ɛvolɛ biala bɛfa bie bɛboka nwo la kpalɛ. Saa ɛde bɛ avinli a, anrɛɛ kɛzi ɛbade nganeɛ ɛ? Wɔ ahonle badu ɔ? Ɔbahola yeara ye zɔ. Na saa wɔli ɛvolɛ 12 pɛ ɛ? Ngakula dɔɔnwo se nyiane. (Gyɛlɛmaya 1:6) Bie mɔ ɛngulo kɛ bɛ kilehilevolɛma anye bara bɛ nwo zo wɔ sukulu; bɛsulo kɛ bɛbavɛlɛ bɛ bɛabiza bɛ edwɛkɛ, bɛbaye bɛ kɛ bɛyɛ debie, bɛbabɔ bɛ anyiemgba anzɛɛ bɛbagolo bɛ nwo.

⁹ Noko, ɛnee Gyisɛse de menli ɛhye mɔ mɔɔ ɛbe la avinli, ɔlɛfa akɛnrasesebɛ yeabizebiza bɛ edwɛkɛ. Na ɔyɛle mɔɔ tɛla ɛhye la bɔbɔ. Kɛlɛtokɛ ne ka kɛ: “Kɛzi ɔte edwɛkɛ bo nee ye nyelebɛnloa ne zinle bɛdabɛ mɔɔ ɛnee bɛlɛtie ye la anwo.” (Luku 2:47) Baebolo ne ɛnga edwɛkɛ mɔɔ ɔhanle la ɛdeɛ, noko yɛkola yɛnwu kɛ yeanga adalɛ edwɛkɛ mɔɔ ɛzonlenlɛ nu kilehilevolɛma ɛhye mɔ ka la bie. (1 Pita 2:22) Emomu, ɔhanle nɔhalɛ mɔɔ wɔ Nyamenle Edwɛkɛ ne anu la, na ɔzinle ye tievolɛma ne anwo kɛ kakula mɔɔ ɛli ɛvolɛ 12 la kola fa nwunu nee akɛnrasesebɛ zɛhae kilehile edwɛkɛ nu la.

10. Kɛzi Kilisiene ngakula mɔɔ wɔ ɛkɛ ɛnɛ la sukoa Gyisɛse akɛnrasesebɛ ne ɛ?

¹⁰ Ɛnɛ, Kilisiene ngakula dɔɔnwo sukoa Gyisɛse neazo ne. Nɔhalɛ nu, bɛnle kɛ Gyisɛse mɔɔ di munli la. Noko, bɛngendɛ na bɛyɛ mgbanyinli a bɛagyinla nɔhalɛ ne anzi. Bɛdua  nrɛlɛbɛ adenle zo bɛbiza menli kpuya, bɛtie bɛ na bɛfi ɛbulɛ nu bɛka nɔhalɛ ne anwo edwɛkɛ bɛkile bɛ wɔ sukulu anzɛɛ ɛleka mɔɔ bɛde la. (1 Pita 3:15) Ngakula ɛhye mɔ dɔɔnwo ɛboa bɛ gɔnwo mɔ sukuluma, kilehilevolɛma nee bɛ kpalɛzoamra bɛmaa bɛrayɛ Kelaese ɛdoavolɛma. Nea kɛzi Gyihova anye die bɛ akɛnrasesebɛ ne anwo a! Ye Edwɛkɛ ne fa ngakula ɛhye mɔ toto ɛbɔlɛ mɔɔ tɔ la anwo, ɔluakɛ mɔɔ bɛyɛ la maa anwosesebɛ.​—Edwɛne 110:3.

11, 12. Mɔɔ Gyisɛse yɛle kpanyinli la, kɛzi ɔvale akɛnrasesebɛ ɔgyinlanle nɔhalɛ ne anzi ɛ?

¹¹ Mɔɔ Gyisɛse nyinle la, ɔvale akɛnrasesebɛ ɔgyinlanle nɔhalɛ ne anzi fane dɔɔnwo. Nɔhalɛ nu, ɔyiale dwazotia mɔɔ yɛ ɛzulolɛ la wɔ ye ɛzonlenlɛ gyima ne mɔlebɛbo. Ɛnee ɔwɔ kɛ Gyisɛse mɔɔ le sonla, na ɔnle anwumabɔvolɛ kpanyinli la gyinla sɔnea mɔɔ Seetan, Gyihova kpɔvolɛ mɔɔ lɛ tumi na ɔ nwo yɛ ɛzulolɛ kpalɛ la bava ara ɔ nwo zo la anloa. Gyisɛse nee Seetan anyɛ adwenle na ɔmaanle ɔnwunle kɛ ɔnva Ngɛlɛlera ne anu edwɛkɛ ne ɔnli gyima wɔ adenle kpalɛ zo. Gyisɛse vale akɛnrasesebɛ hanle kɛ: “Fi ɛke kɔ Seetan!” ɔvale ɔpɛle sɔnea ne azo.​—Mateyu 4:2-11.

¹² Yemɔti Gyisɛse yɛle neazo wɔ ye ɛzonlenlɛ gyima ne anu, ɔvale akɛnrasesebɛ ɔhonle ɔtiale ɔ Ze Edwɛkɛ ne mɔɔ bɛkyibehyiba ye anzɛɛ bɛfa bɛdi gyima wɔ adenle ɛtane zo la. Ɛnɛ noko adalɛ ngilehilelɛ ɛbu zo. Gyisɛse hanle hilele ye mekɛ zo ɛzonlenlɛ nu mgbanyima kɛ: “Bɛva bɛ amaamuo ne mɔɔ bɛkilehile la bɛzɛkye Nyamenle edwɛkɛ ne.” (Maake 7:13) Ɛnee menli dɔɔnwo bu mgbanyima ɛhye mɔ kpalɛ, noko Gyisɛse vale akɛnrasesebɛ kpale bɛ nwo ɛdanlɛ kɛ bɛle nabalabama, anyenzinliravolɛma mɔɔ kile menli adenle a. a (Mateyu 23:13, 16) Kɛ ɔkɛyɛ na yɛazukoa Gyisɛse akɛnrasesebɛ ne ɛ?

13. Duzu a yɛkakye wɔ Gyisɛse mɔɔ ɔwɔ kɛ yɛsukoa ye la anwo a, noko nwolɛ adenle boni a yɛlɛ a?

 ¹³ Ɔwɔ kɛ yɛkakye kɛ yɛnlɛ Gyisɛse tumi mɔɔ maa ɔnwu ahonle nu anzɛɛ ɔfa ɔbua ndɛne la bie. Noko, yɛbahola yɛazukoa ye akɛnrasesebɛ ne mɔɔ ɔvale ɔgyinlanle nɔhalɛ ne anzi la. Kɛ neazo la, saa yɛkpa adalɛ edwɛkɛ mɔɔ bɛka ye wɔ Nyamenle, ye bodane nee ye Edwɛkɛ ne anwo la anwo ɛdanlɛ a, ɛnee yɛlɛmaa wienyi ne ada wɔ ewiade mɔɔ Seetan mɛlɛbɛla ɛmaa yeha awozinli nu la anu. (Mateyu 5:14; Yekile 12:9, 10) Yɛboa menli yɛmaa bɛnyia fanwodi wɔ adalɛ ngilehilelɛ mɔɔ maa bɛyɛ ngɛkɛlɛ, ɛzulolɛ ka bɛ na ɔsɛkye agɔnwolɛvalɛ mɔɔ bɛ nee Nyamenle lɛ la anwo. Nea nwolɛ adenle mɔɔ yɛnyia kɛ yɛbanwu kɛ Gyisɛse ɛwɔkɛ ɛhye ɛlɛba nu a: “Nɔhalɛ ne bamaa bɛanyia fanwodi”!​—Dwɔn 8:32.

14, 15. (a) Adenle ko mɔɔ Gyisɛse luale zo maanle bɛnwunle “mɔɔ pɛlepɛlelilɛ kile la” a le boni? (b) Mɔɔ Gyisɛse nee Samɛleanli raalɛ ne ɛlɛtendɛ la, menli nwo adwenle ɛtane boni a yeannyia a?

¹⁴ Baebolo ngapezo hanle kɛ Mɛzaya ne bamaa maanle maanle ne anwu “mɔɔ pɛlepɛlelilɛ kile la.” (Ayezaya 42:1; Mateyu 12:18) Nɔhalɛ nu, Gyisɛse yɛle zɔ wɔ mekɛ mɔɔ ɔwɔ azɛlɛ ye azo la. Ɔvale akɛnrasesebɛ kpole ɔlile pɛlepɛle, yeanyɛ nyeyenu ɛlɛ. Kɛ neazo la, yeannyia menli nwo adwenle  ɛtane mɔɔ ɛnee ɛbu zo wɔ ye mekɛ zo mɔɔ ɛngyi Ngɛlɛlera ne azo la bie.

¹⁵ Mekɛ mɔɔ Gyisɛse nee Samɛleanli raalɛ bie dendɛle wɔ Saekaa bula ne azo la, ɔzinle ye ɛdoavolɛma ne anwo. Duzu ati ɔ? Zɔhane mekɛ ne, ɛnee Dwuuma kyi Samɛleama; subane ɛtane ɛhye bɔle ɔ bo mekɛ tendenle kolaa na Gyisɛse ara azɛlɛ ye azo. (Ɛzela 4:4) Bieko, ɛnee ɛzonlenlɛ nu kilehilevolɛma bie mɔ ɛmbu mraalɛ. Mɛla mɔɔ kilehilevolɛma ɛhye mɔ lile na nzinlii bɛhɛlɛle bɛdole ɛkɛ ne la ka kɛ ɔnle kɛ nrenyia nee raalɛ di adwelie; bɛhanle bɔbɔ kɛ ɔnfɛta kɛ bɛkɛhilehile mraalɛ Nyamenle Mɛla ne. Ɛnee bɛbu Samɛlea mraalɛ titili kɛ bɛ nwo ɛnde. Gyisɛse annyia menli nwo adwenle ɛtane zɛhae bie na ɔhilehilele Samɛleanli raalɛ ne (mɔɔ ɛnee bɔ ɛbɛlatane la) wɔ bagua nu, na ɔmaanle ɔnwunle ye bɔbɔ kɛ ɔdaye a ɔle Mɛzaya ne a.​—Dwɔn 4:5-27.

16. Duzu ati a ɔhyia akɛnrasesebɛ na Kilisienema annyia menli nwo adwenle ɛtane a?

¹⁶ Asoo wɔyia bɛdabɛ mɔɔ bɛlɛ menli nwo adwenle ɛtane la ɛlɛ ɔ? Ɔbahola yeara ye kɛ bɛgolo menli mɔɔ asolo bɛ kɔla anzɛɛ bɛvi maanle gyɛne nu la anwo, bɛtendɛ bɛtia bɛdabɛ mɔɔ bɛ nee bɛ awodeɛ ɛnle ko, anzɛɛ bɛmbu menli mɔɔ bɛ nee bɛ ɛnzɛ wɔ ezukoa anzɛɛ gyinlabelɛ nu la. Kelaese ɛdoavolɛma ɛnnyia menli nwo adwenle ɛtane zɛhae, na bɛbɔ mɔdenle bɛye adwenle ɛtane zɛhae biala bɛfi bɛ ahonle nu. (Gyima ne 10:34) Ɔwɔ kɛ yɛ nuhua ko biala nyia akɛnrasesebɛ amaa yeali pɛlepɛle.

17. Duzu a Gyisɛse yɛle ye wɔ ɛzonlenlɛsua ne anu a, na duzu ati ɔ?

¹⁷ Akɛnrasesebɛ eza hanle Gyisɛse maanle ɔyɛle debie mɔɔ bamaa Nyamenle menli ne nee nɔhalɛ ɛzonlenlɛ nwo ade la. Wɔ ye ɛzonlenlɛ gyima ne mɔlebɛbo, ɔhɔle Gyɛlusalɛm ɛzonlenlɛsua ne anu na ɔzinle ɔ nwo kɛ ɛnee menli ɛlɛdi gua na bɛlɛsenza ezukoa wɔ ɛkɛ ne la. Gyisɛse vale ɛya na ɔvoanle anyeboloma ɛhye mɔ na ɔvuandinle bɛ ninyɛne ne mɔ ɔguale ye lɔ. (Dwɔn 2:13-17) Nzinlii mɔɔ ye ɛzonlenlɛ gyima  ne ɛlɛkɔ awieleɛ la, ɔyɛle ɛhye bieko. (Maake 11:15-18) Mɔɔ ɔyɛle la maanle ɔnyianle agbɔvolɛ dɔɔnwo, noko yeangyakyi. Duzu ati ɔ? Ɔvi ye ngakula nu, ɔhanle kɛ ɛzonlenlɛsua zɔhane le ɔ Ze sua​—ɛnee ɔle ye anyebolo edwɛkɛ. (Luku 2:49) Ɛnee ɔnrɛmaa nwolɛ adenle kɛ bɛgua nɔhalɛ ɛzonlenlɛ nwo evinli wɔ ɛzonlenlɛsua ne anu. Ye mɔdenlebɔlɛ ne maanle ɔvale akɛnrasesebɛ ɔyɛle mɔɔ hyia kɛ ɔyɛ la.

18. Kɛzi Kilisienema bahola ahile kɛ bɛlɛ akɛnrasesebɛ amaa asafo ne anwo ade ɛnɛ ɛ?

¹⁸ Kelaese ɛdoavolɛma kulo kɛ bɛ ɛbɛlabɔlɛ nee ɛzonlenlɛ mɔɔ bɛfa bɛmaa Nyamenle la anwo te ɛnɛ. Saa bɛnwu kɛ bɛ gɔnwo Kilisienenli bie ɛyɛ ɛtane kpole bie a, bɛmbu bɛ nye bɛngua zo. Bɛfa akɛnrasesebɛ bɛka nwolɛ edwɛkɛ. (1 Kɔlentema 1:11) Bɛbɔ mgbanyima ne mɔ amaneɛ. Mgbanyima ne mɔ kola boa menli mɔɔ ɛnde kpɔkɛ wɔ sunsum nu la na eza bɛnea bɛmaa Gyihova mboane ne anwo te.​—Gyemise 5:14, 15.

19, 20. (a) Nzisi boni a ɛnee yebu zo wɔ Gyisɛse mekɛ zo a, na duzu a ɛnee bɛkpondɛ kɛ Gyisɛse yɛ a? (b) Duzu ati a Kelaese ɛdoavolɛma ɛnva bɛ nwo ɛnwulowula maanyɛlɛ nee basabasayɛlɛ nu a, na nvasoɛ ko mɔɔ bɛnyia wɔ ɛhye azo la a le boni?

¹⁹ Noko, asoo ɔwɔ kɛ yɛnyia adwenle kɛ Gyisɛse honle tiale nzisi kɔsɔɔti ɔ? Nɔhalɛ nu, ɛnee ɔnwu nzisi bie mɔ. Ɛnee maanle gyɛne a nea ye sua zo amra anwo zo a. Wulomu sogyama hilele Dwuuma nyane, bɛmaanle bɛduale adwule mgbole yɛɛ bɛvale bɛ nloa bɛwulowulale bɛ Nyamenle ɛzonlenlɛ nu bɔbɔ. Ɔnyɛ nwanwane kɛ ɛnee menli dɔɔnwo kpondɛ kɛ Gyisɛse fa ɔ nwo wulowula ye mekɛ zo maanyɛlɛ nu la. (Dwɔn 6:14, 15) Ɛnee eza ɔwɔ kɛ ɔnyia akɛnrasesebɛ bieko.

²⁰ Gyisɛse hilehilele nu kɛ ye Belemgbunlililɛ ne ɛnvi ewiade ɛhye anu. Ɔyɛle neazo ɔmaanle ye ɛdoavolɛma kɛ bɛhwe bɛ nwo bɛvi maanyɛlɛ nu konle mɔɔ kɔ zo la anwo na bɛva bɛ adwenle bɛzie Nyamenle Belemgbunlililɛ ne anwo edwɛkpa ne nolobɔlɛ zo. (Dwɔn 17:16; 18:36) Mekɛ mɔɔ menli  dɔɔnwo ne rale ye ɛhyelɛ la, ɔyɛle neazo kɛnlɛma ɔvale ɔhilele kɛ ɔngyi afoa biala. Pita hwenle ye dadeɛ ne ɛkɛ ne ala na ɔbodale nrenyia bie. Bie a ɛ nee Pita bayɛ adwenle. Saa bɛyɛ basabasa a ye adenle zo a ɛnee zɔhane nɔe ne ɔ, ɔluakɛ ɛnee bɛkulo kɛ bɛkye Nyamenle Ara ne mɔɔ ɔtɛyɛle ɛtane biala la. Noko, Gyisɛse hilele mɔɔ ɔwɔ kɛ ye ɛdoavolɛma yɛ ɔvi mekɛ zɔhane badwu ɛnɛ la: “Sia fa wɔ dadeɛ ne wula ɔbo zo ne, ɔluakɛ bɛdabɛ mɔɔ bɛtwe dadeɛ la kɔsɔɔti bawu dadeɛ nloa.” (Mateyu 26:51-54) Ɛnee ɔwɔ kɛ Kelaese ɛdoavolɛma nyia akɛnrasesebɛ na bɛahola bɛ nee menli adɛnla anzodwolɛ nu, kɛ mɔɔ ɔde ye ɛnɛ ala la. Kɛmɔ Kilisienema ɛngyinla afoa biala la ati, Nyamenle menli ɛmboka konle ngakyile mɔɔ bɛho, menli dɔɔnwo ɛhunlɛ nee basabasayɛlɛ mɔɔ le kɛ ɛhye mɔ mɔɔ ɛbu zo la anwo. Akɛnrasesebɛ mɔɔ bɛlɛ la a ɛmaa bɛhola bɛyɛ ɛhye a.

21, 22. (a) Moalɛ boni a Gyisɛse nyianle kolaa na yeayia sɔnea mɔɔ anu yɛ se kpalɛ la a? (b) Kɛzi Gyisɛse nyianle akɛnrasesebɛ too hɔle awieleɛ ɛ?

²¹ Ɛnee Gyihova Ara ne ze kɛ ɔbayia dwazotia mɔɔ anu yɛ se kpalɛ la wɔ azɛlɛ ye azo. (Ayezaya 50:4-7) Bɛvale ewule bɛnwunlonwunlanle ye fane dɔɔnwo, na mɔɔ li awieleɛ la a le mɔɔ bɛha nwolɛ edwɛkɛ wɔ tile ɛhye mɔlebɛbo la. Kɛzi Gyisɛse vale akɛnrasesebɛ gyinlanle sɔnea ɛhye anloa ɛ? Ɛkakye mɔɔ ɛnee Gyisɛse ɛlɛyɛ wɔ mekɛ mɔɔ menli ne rale ye ɛhyelɛ la ɔ? Ɛnee ɔlɛsɛlɛ Gyihova ɛsesebɛ. Na duzu a Gyihova yɛle a? Baebolo ne ka kɛ “ɔdiele” Gyisɛse. (Hibuluma 5:7) Gyihova zoanle anwumabɔvolɛ vile anwuma kɛ ɔramaa ɔ Ra akɛnrasesebɛ ne anwosesebɛ.​—Luku 22:42, 43.

²² Mɔɔ Gyisɛse nyianle anwosesebɛ wiele la, yeangyɛ ɔhanle ɔhilele ye ɛzoanvolɛma ne kɛ: “Bɛdwazo, bɛmaa yɛhɔ.” (Mateyu 26:46) Suzu akɛnrasesebɛ mɔɔ ɔvale ɔhanle edwɛkɛ  ɛhye la anwo nea. Ɔhanle kɛ “bɛmaa yɛhɔ,” noko ɛnee ɔze kɛ ɔbaha yeahile menli ne kɛ bɛgyakyi ɔ gɔnwo mɔ, ɔze kɛ gɔnwo mɔ bakpo ye anriandi yɛɛ ɔze kɛ ɔ ngomekye a ɔbagyinla amaneɛnwunlɛ mɔɔ tɛla biala wɔ ye ɛbɛlabɔlɛ nu la anloa a. Ɔ ngomekye ɔgyinlanle mgbɔvodɛne, agolobɛnwo, kpɔdekpɔdeyɛlɛ nee ewule nyane nloa. Wɔ ɔ muala anu, ɔhɔle zo ɔvale akɛnrasesebɛ ɔgyinlanle ɔ nloa.

23. Kilehile deɛmɔti Gyisɛse anva ɔ nwo ando esiane nu wɔ mekɛ mɔɔ bɛkpɔle ye na ɔyiale ewule nwo sɔnea la anu.

²³ Gyisɛse vale ɔ nwo dole esiane nu ɔ? Kyɛkyɛ; sonla mɔɔ fa ɔ nwo to esiane nu la ɛnlɛ akɛnrasesebɛ kpalɛ. Nɔhalɛ nu, Gyisɛse hilehilele ye ɛdoavolɛma kɛ bɛmaa bɛ nye ɛla ɛkɛ,  bɛhwe bɛ nwo bɛvi esiane nwo amaa bɛahɔ zo bɛayɛ Nyamenle ɛhulolɛdeɛ. (Mateyu 4:12; 10:16) Noko, wɔ ɛke ɛnee Gyisɛse ze kɛ ɔtwe ɔ nwo a ɔnyɛ boɛ. Ɛnee ɔze kɛ ɔlɛyɛ Nyamenle ɛhulolɛdeɛ. Ɛnee Gyisɛse ɛbɔ kpɔkɛ kɛ ɔbahɔ zo yeali nɔhalɛ, ɔti ɛnee ɔwɔ kɛ ɔkɔ zo ɔgyinla sɔnea ne anu.

24. Duzu ati a yɛbahola yɛanyia anwodozo kɛ yɛbahola yɛava akɛnrasesebɛ yɛagyinla sɔnea biala mɔɔ yɛbayia ye la anloa a?

²⁴ Nea kɛzi Gyisɛse ɛdoavolɛma dɔɔnwo ɛva akɛnrasesebɛ ɛzukoa bɛ Menle ne neazo ne la! Bɛ nuhua dɔɔnwo ɛgyinla kpundii wɔ agolobɛnwo, ɛkpɔlɛ, efiadelalɛ, kpɔdekpɔdeyɛlɛ nee ewule nu bɔbɔ. Nienwu a menli mɔɔ ɛnli munli la nyia akɛnrasesebɛ zɛhae fi a? Tɛ bɛ anwosesebɛ ɔ. Kɛ mɔɔ Gyisɛse nyianle moalɛ vile Nyamenle ɛkɛ ne la, zɔhane ala a ye ɛdoavolɛma noko nyia moalɛ a. (Felepaema 4:13) Yemɔti, mmasulo mɔɔ bazi kenle bie la ɛlɛ. Bɔ kpɔkɛ kɛ ɛbagyinla kpundii na Gyihova bamaa wɔ akɛnrasesebɛ mɔɔ ɛhyia la. Maa edwɛkɛ mɔɔ yɛ Adekilevolɛ Gyisɛse hanle kɛ: “Bɛnyia akɛnrasesebɛ! Meli ewiade ne anwo zo konim!” la ɛmaa wɔ anwosesebɛ.​—Dwɔn 16:33.