1, 2. Duzu ati a selɛ bie ara nrenyia tie ye a ɔ nye die a, na saa yɛtie Gyihova a kɛzi ɔte nganeɛ ɛ?

 SELƐ bie gyi nvɛnzɛlɛ nu ɛlɛnea ɔ ra nrenyia mɔɔ nee ɔ gɔnwo mɔ ɛlɛdi nwɔhoa la. Bɛ bɔlo ne vi alienwo ɛkɛ ɛhɔdɔ kale adenle ne azo. Kakula nrenyia ne ɛlɛnea bɔlo ne koonwu. Ɔ gɔnwo mɔ ko ka kile ye kɛ ɔnriandi ɔhɔva ɔrɛla, noko kakula nrenyia ne woso ɔ ti. Ɔka kɛ, “Bɛse memmakɔ lɔ.” Ye papa anye ɛlie.

² Duzu ati a ye papa anye ɛlie a? Ɔluakɛ yeha yehile ɔ ra ne kɛ ɔ ngomekye ɔmmapɛ kale adenle ne. Saa kakula ne yɛ tieyɛ ɔnva nwo kɛ ɔnze kɛ ye papa ɛlɛnea ye a, papa ne nwu kɛ ɔ ra ne ɛlɛsukoa tieyɛ na ɛhye babɔ ɔ nwo bane. Kɛ yɛ anwuma Selɛ Gyihova noko te nganeɛ la ɛne. Nyamenle ze kɛ saa yɛbahola yɛali nɔhalɛ na yɛanyia ninyɛne mgbalɛ mɔɔ bara kenle bie la a, ɔwɔ kɛ yɛsukoa kɛ yɛbava yɛ rɛle yɛawula ye nu na yɛadie ye. (Mrɛlɛbulɛ 3:5, 6) Ɔti, ɔmaanle yɛ kilehilevolɛ kpalɛ mɔɔ tɛla biala la.

3, 4. Adenle boni azo a Gyisɛse ‘zukoale tieyɛ’ na “ɔlile munli” a? Maa neazo.

³ Baebolo ne ka Gyisɛse anwo edwɛkɛ mɔɔ yɛ azibɛnwo la kɛ: “Ɔle ralɛ bɔbɔ ɛdeɛ, noko ɔzukoale tieyɛ ɔvile amaneɛ mɔɔ ɔnwunle ye la anu. Na mekɛ mɔɔ ɔlile munli la, ɔrayɛle awie mɔɔ bɛdabɛ mɔɔ bɛtie ye la amuala balua ɔ nwo zo anyia dahuu ngoanelielɛ a.” (Hibuluma 5:8, 9) Ralɛ ɛhye dɛnlanle anwuma ɛvolɛ dɔɔnwo. Ɔnwunle kɛ Seetan nee anwumabɔvolɛma bie mɔ dele atua, noko belamunli Ralɛ ɛhye ande atua. Bɛhanle ɔ nwo ngapezo kɛ: “Meande atua.” (Ayezaya 50:5) Adenle boni azo a Ralɛ ɛhye mɔɔ di munli na ɔyɛ tieyɛ la “zukoale tieyɛ” a? Kɛ ɔyɛle mɔɔ awie mɔɔ di munli dɛba la ‘lile munli’ɛ?

 ⁴ Suzu neazo ɛhye anwo nea. Sogyanli bie lɛ konle dadeɛ. Bɛtɛfale bɛtɛkɔle konle ɛlɛ, noko ɔle dadeɛ mɔɔ bɛyɛ ye kpalɛ yɛɛ ɔle kɛnlɛma. Noko ɔkakyi dadeɛ ɛhye ɔfa ɔdie mɔɔ ye bulalɛ ne yɛ se kpalɛ la. Bɛva dadeɛ fofolɛ ɛhye bɛhɔ konle dɔɔnwo. Asoo ɔzile kpɔkɛ kpalɛ ɔ? Zɔhane ala a nvonleɛ biala ɛnle tieyɛ mɔɔ Gyisɛse yɛle kolaa na yeara azɛlɛ ye azo la anwo a. Noko, mɔɔ ɔrale azɛlɛ ye azo la, ye tieyɛ ne lile munli kpalɛ. Sɔnea mɔɔ anrɛɛ ɛnrɛdo Gyisɛse ɛlɛ wɔ anwuma lɔ la zɔle ye tieyɛ nleanle maanle ɔlile munli bɔkɔɔ.

5. Duzu ati a ɛnee Gyisɛse tieyɛ ne anwo hyia a, na duzu a yɛbazuzu nwo wɔ tile ɛhye anu a?

⁵ Ɛnee tieyɛ nwo hyia kpole kpalɛ wɔ gyima mɔɔ Gyisɛse bayɛ ye wɔ azɛlɛ ye azo la anu. Gyisɛse le “Adam ne mɔɔ li amozi la,” ɔti ɔyɛle mɔɔ yɛ awovolɛ mɔɔ limoa angola yɛ la, ɔyɛle tieyɛ ɔmaanle Gyihova Nyamenle wɔ sɔnea nu bɔbɔ. (1 Kɔlentema 15:45) Noko, ɛnee Gyisɛse tieyɛ ne vi ahonle nu. Gyisɛse vale ye adwenle, ye ahonle, nee ye ɛkɛla kɔsɔɔti yɛle tieyɛ. Na ɔvale anyelielɛ a ɔyɛle a. Ɛnee ɔ Ze ne ɛhulolɛdeɛ mɔɔ ɔbayɛ la hyia ye kpalɛ tɛla aleɛlilɛ! (Dwɔn 4:34) Duzu a baboa yɛ yeamaa yɛazukoa Gyisɛse tieyɛ ne a? Maa yɛlimoa yɛzuzu deɛmɔti ɔyɛle tieyɛ la anwo. Saa yɛnyia ye adwenle ne bie a, ɔbaboa yɛ yeamaa yɛagyinla sɔnea nloa na yɛayɛ Nyamenle ɛhulolɛdeɛ. Akee yɛbazuzu nvasoɛ mɔɔ saa yɛyɛ tieyɛ kɛ Kelaese a yɛbanyia la bie mɔ anwo.

6, 7. Deɛmɔti Gyisɛse yɛle tieyɛ la bie mɔ a le boni?

⁶ Ɛnee Gyisɛse tieyɛ ne vi ye ahonle nu. Kɛ mɔɔ yɛnwunle ye wɔ Tile 3 ne anu la, ɛnee Kelaese mɛlɛbɛnwoaze ne vi ahonle nu. Anwomemaazo ɛmmaa menli ɛnyɛ tieyɛ, noko mɛlɛbɛnwoaze maa yɛfi ahonle nu yɛtie Gyihova. (Ɛzɛdɔso 5:1, 2; 1 Pita 5:5, 6) Eza ninyɛne mɔɔ Gyisɛse kulo nee mɔɔ ɔkyi la boale ye maanle ɔyɛle tieyɛ.

⁷ Mɔɔ tɛla biala la, ɛnee Gyisɛse kulo Gyihova, ye anwuma Selɛ ne. Yɛbazuzu ɛlɔlɛ ɛhye anwo dɔɔnwo wɔ Tile 13 ne  anu. Ɛlɔlɛ ɛhye maanle Gyisɛse nyianle Nyamenle anwo ɛzulolɛ. Ɛnee ɔkulo Gyihova na ɔbu ye kpalɛ yemɔti ɛnee ɔsulo kɛ ɔbayɛ debie mɔɔ ɔ Ze anye ɛnlie nwo la. Ninyɛne mɔɔ maanle bɛdiele Gyisɛse asɔneyɛlɛ la anu ko a le nyamenlezulolɛ. (Hibuluma 5:7) Gyihova anwo ɛzulolɛ le debie titili ko mɔɔ Gyisɛse bava ali tumi kɛ Mɛzaya Belemgbunli a.​—Ayezaya 11:3.

8, 9. Kɛ mɔɔ bɛhanle bɛdole ɛkɛ la, kɛzi ɛnee Gyisɛse bu pɛlepɛlelilɛ nee amumuyɛyɛlɛ ɛ, na kɛzi ɔlale ɛhye ali ɛ?

⁸ Saa yɛkulo Gyihova a yɛkyi ninyɛne mɔɔ Gyihova kyi la. Kɛ neazo la, yɛ ngapezo edwɛkɛ ɛhye mɔɔ fale Mɛzaya Belemgbunli ne anwo la nzonlɛ: “Ɛhulole tenleneyɛlɛ, na ɛhyile amumuyɛyɛlɛ. Ɛhye ati a Nyamenle, wɔ Nyamenle ne vale fɛlɛkolilɛ nwole kpokpale wɔ dɛlale ɛ gɔnwo mɔ la.” (Edwɛne 45:7) Ɛnee Gyisɛse ‘agɔnwo mɔ’ a le arelemgbunli gyɛne  mɔɔ vi Belemgbunli Devidi abusua nu la. Mɔɔ bɛkpokpale Gyisɛse la, ɔ nye liele dɛlale arelemgbunli ɛhye mɔ. Duzu ati ɔ? Ɔluakɛ ɔnyianle ahatualɛ kpole ɔdɛlale bɛ ɛdeɛ ne yɛɛ ye Belemgbunlililɛ ne bava nvasoɛ dɔɔnwo ara. Ɔnyianle ahatualɛ ɔluakɛ pɛlepɛlelilɛ mɔɔ ɔkulo yɛɛ amumuyɛ mɔɔ ɔkyi la maanle ɔdiele Nyamenle wɔ debie biala anu.

⁹ Kɛzi Gyisɛse maanle kɛzi ɔbu pɛlepɛlelilɛ nee amumuyɛyɛlɛ la lale ali ɛ? Kɛ neazo la, mekɛ mɔɔ Gyisɛse ɛdoavolɛma diele ye adehilelɛ ne na bɛnyianle nyilalɛ wɔ daselɛlilɛ gyima ne anu la, duzu a ɔyɛle a? Ɔlile fɛlɛko kpole. (Luku 10:1, 17, 21) Eza mekɛ mɔɔ Gyɛlusalɛmma yɛle anzosesebɛ na bɛkpole Gyisɛse mɔdenle mɔɔ ɔbɔle kɛ ɔboa bɛ la, duzu a ɔyɛle a? Ɔzunle, ɔluakɛ suakpole ne azo amra dele atua. (Luku 19:41, 42) Gyisɛse di debie kpalɛ nwo fɛlɛko yɛɛ ɔdi nyɛleɛ ɛtane nwo nyane.

10. Kɛzi ɔwɔ kɛ yɛbu ɛbɛla kpalɛ nee ɛbɛlatane ɛ, na duzu a baboa yɛ yeamaa yɛayɛ zɔ a?

¹⁰ Saa yɛdwenledwenle kɛzi Gyisɛse te nganeɛ la anwo a ɔbaboa yɛ yeamaa yɛazukoa ye na yɛadie Gyihova. Yɛnli munli ɛdeɛ, noko yɛbahola yɛavi yɛ ahonle nu yɛahulo kpalɛ na yɛahyi ɛtane bɔkɔɔ. Ɔwɔ kɛ yɛsɛlɛ Gyihova kɛ ɔboa yɛ ɔmaa yɛnyia subane mɔɔ ɔdaye nee ɔ Ra ne lɛ la bie. (Edwɛne 51:10) Noko eza ɔwɔ kɛ yɛkpo ninyɛne mɔɔ ɔnrɛmaa yɛnrɛnyia subane zɔhane la. Ɔwɔ kɛ yɛnea boɛ wɔ anyelielɛ ninyɛne nee agɔnwolɛvalɛ nwo. (Mrɛlɛbulɛ 13:20; Felepaema 4:8) Saa yɛnyia Kelaese adwenle ne bie a, yɛ tieyɛ ɛnrɛyɛ ɛnyelɛ zo ala. Yɛbayɛ mɔɔ le kpalɛ la ɔluakɛ yɛkulo kɛ yɛyɛ zɔ la ati ɔ. Yɛbakpo ɛbɛlatane, tɛ kɛ yɛsulo kɛ bɛbahye yɛ la ati, emomu kɛmɔ yɛkyi la ati ɔ.

11, 12. (a) Duzu a dole Gyisɛse wɔ ye ɛzonlenlɛ gyima ne mɔlebɛbo a? (b) Duzu a Seetan limoale vale zɔle Gyisɛse nleanle a, na duzu ati a ɔyɛle zɔ a?

¹¹ Kɛmɔ Gyisɛse kyi ɛtane la ati, nwolɛ sɔnea a ɔyiale ye wɔ ye ɛzonlenlɛ gyima ne mɔlebɛbo a. Wɔ ye ɛzɔnenlɛ ne  anzi, ɔhyele ɛhɔne alehyenlɛ nee aledwolɛ kenle 40 wɔ fienemgbole ne anu. Mɔɔ ɔwiele la, Seetan razɔle ye nleanle. Nea mɛlɛbɛla adenle mɔɔ Abɔnsam luale zo la.​—Mateyu 4:1-11.

¹² Seetan limoale hanle kɛ: “Saa ɛle Nyamenle ara a, ka kile awolɛ ɛhye mɔ maa bɛhakyi paano.” (Mateyu 4:3) Mɔɔ Gyisɛse hyele ɛhɔne mekɛ tendenle wiele la, duzu a zile a? Baebolo ne ka ye wienyi kɛ: “Ɛhɔne hunle ye.” (Mateyu 4:2) Ɛnee Seetan ze kɛ ɔnyia aleɛ a ɔbali, ɔti ɔhendɛle too ɛhɔne hunle ye na ɔyɛle bɛtɛɛ na yeazɔ ye yeanlea. Eza yɛ agolobɛnwo edwɛkɛ mɔɔ Seetan hanle la nzonlɛ: “Saa ɛle Nyamenle ara a.” Ɛnee Seetan ze kɛ Gyisɛse a le “abɔdeɛ muala anu belamunli ralɛ a.” (Kɔlɔsaema 1:15) Noko, Gyisɛse andoa Seetan anyɛ anzosesebɛ. Ɛnee Gyisɛse ze kɛ Nyamenle ɛngulo kɛ ɔfa tumi mɔɔ yeva yemaa ye la ɔyɛ mɔɔ ɔdaye ɔkulo la. Ɔkpole na ɔvile mɛlɛbɛnwoaze nu ɔvale ɔ nwo ɔdole Gyihova anwo zo kɛ ɔbamaa ye aleɛ nee adehilelɛ.​—Mateyu 4:4.

13-15. (a) Sɔnea mɔɔ tɔ zo nwiɔ nee nsa mɔɔ Seetan vale rale Gyisɛse anwo zo la a le boni, na duzu a Gyisɛse yɛle wɔ nwo a? (b) Kɛzi yɛkola yɛnwu kɛ ɛnee Gyisɛse ɛziezie ɔ nwo kɛ ɔbakpo Seetan sɔnea ne mɔ ɛ?

¹³ Sɔnea mɔɔ tɔ zo nwiɔ ne, Seetan vale Gyisɛse hɔziele ɛzonlenlɛsua ne ati zo. Seetan vale Nyamenle Edwɛkɛ ne lile gyima wɔ adenle ɛtane zo na ɔhanle ɔhilele Gyisɛse kɛ ɔgyakyi ɔ nwo ɔde aze, ɔluakɛ anwumabɔvolɛma baralie ye. Saa menli dɔɔnwo mɔɔ ɛnee wɔ ɛzonlenlɛsua ne anu la nwunle nwanwane debie ɛhye a, asoo anrɛɛ awie bazu kpolera kɛ Gyisɛse ɛnle Mɛzaya ne mɔɔ bɛbɔ ɔ nwo ɛwɔkɛ la ɔ? Na saa Gyisɛse yɛle nwanwane deɛ ɛhye ɔmaanle menli liele dole nu kɛ yemɔ a le Mɛzaya ne a, asoo anrɛɛ Gyisɛse kɛyia ngyegyelɛ nee sɔnea dɔɔnwo ɔ? Bie a. Noko, ɛnee Gyisɛse ze kɛ Gyihova kulo kɛ Mɛzaya ne yɛ ye gyima ne wɔ mɛlɛbɛnwoaze nu, na tɛ kɛ ɔmaa menli alie ye ali ɔlua nwanwane ninyɛne mɔɔ ɔbayɛ la azo. (Ayezaya 42:1, 2) Bieko,  Gyisɛse anyɛ Gyihova anwo anzosesebɛ. Yeammaa dumalielɛ anli ɔ ti.

¹⁴ Na mɔɔ fale tumi nwo la noko ɛ? Sɔnea mɔɔ tɔ zo nsa ne, Seetan vale ewiade arelemgbunlililɛ kɔsɔɔti hilele Gyisɛse na ɔhanle kɛ saa ɔsonle ye a ɔbava yeamaa ye. Asoo ɔdwenlenle mɔɔ Seetan hanle kɛ ɔfa yeamaa ye la anwo ɔ? Ɔhanle kɛ “Fi ɛke kɔ Seetan! Akee ɔvale ɔzɔle zo kɛ: ‘Gyihova wɔ Nyamenle ne a ɔwɔ kɛ ɛsonle ye a, na ɔ ngome ala a ɔwɔ kɛ ɛkoto ye a.’” (Mateyu 4:10) Debie biala ɛnle ɛkɛ mɔɔ bamaa Gyisɛse azonle nyamenle gyɛne a. Tumi anzɛɛ debie biala mɔɔ wɔ ewiade mɔɔ ɔbanyia ye la ɛnrɛmaa ɔnrɛyɛ anzosesebɛ.

¹⁵ Asoo Seetan asa nu dole ɔ? Ɔhɔle kɛ mɔɔ Gyisɛse hanle la. Noko, Luku Edwɛkpa ne ka kɛ Abɔnsam vile “ɔ nwo ɛkɛ ne ɔhɔkpulale mekɛ kpalɛ bieko.” (Luku 4:13) Nɔhalɛ nu, Seetan kpondɛle ndenle fofolɛ mɔɔ ɔbalua zo yeazɔ Gyisɛse yeanlea la too Gyisɛse wule. Baebolo ne ka ye wɔ Gyisɛse anwo kɛ “bɛzɔ ye bɛnlea wɔ debie biala anu.” (Hibuluma 4:15) Ɔti, Gyisɛse hɔle zo maanle ɔ nye lale ɛkɛ; ɔwɔ kɛ yɛdayɛ noko yɛyɛ zɔ.

16. Kɛzi Seetan sɔ Nyamenle azonvolɛ nea ɛnɛ ɛ, na kɛ ɔkɛyɛ na yɛakpo ye sɔnea ne mɔ ɛ?

¹⁶ Ɛnɛ, Seetan kɔ zo sɔ Nyamenle azonvolɛ nea. Ɔyɛ nyane kɛ ɔdwu mekɛ ne bie a kɛmɔ yɛnli munli la ati, ɔ sa ka yɛ ndɛndɛ. Seetan dua nrɛlɛbɛ adenle zo fa angomedi, anwomemaazo nee tumi sɔ yɛ nea. Seetan eza dua anwonyia ɛhulolɛ zo fa ninyɛne ɛhye mɔ kɔsɔɔti sɔ yɛ nea! Ɔhyia kɛ ɔdwu mekɛ ne bie a yɛgyinla na yɛneɛnlea yɛ nwo nu kpalɛ. Ɔwɔ kɛ yɛdwenledwenle edwɛkɛ mɔɔ wɔ 1 Dwɔn 2:15-17 la anwo. Mekɛ mɔɔ yɛlɛyɛ ɛhye la, ɔwɔ kɛ yɛnea saa nwonane nu atiakunluwɔzo, anwonyia ɛhulolɛ nee menli nyunlu ɛlolɛ mɔɔ yɛkulo la ɛlɛsɛkye ɛlɔlɛ mɔɔ yɛlɛ yɛmaa yɛ anwuma Selɛ ne la a. Ɔwɔ kɛ yɛkakye kɛ ewiade ɛhye nee Seetan mɔɔ nea zo la ɛlɛpɛ nu aze. Bɛmaa yɛkpo ye mɛlɛbɛla  adenle mɔɔ ɔdua zo ɔmaa yɛyɛ ɛtane la! Bɛmaa yɛzukoa yɛ Menle ne ɔluakɛ “yeanyɛ ɛtane biala.”​—1 Pita 2:22.

17. Kɛzi Gyisɛse bule ɔ Ze mɔɔ ɔtie ye la ɛ, noko duzu edwɛkɛ a bie mɔ ka a?

¹⁷ Tieyɛ ɛngile kɛ yɛtwe yɛ nwo yɛavi ɛtane nwo ala; Kelaese bɔle mɔdenle lile ɔ Ze mɛla kɔsɔɔti azo. Ɔhanle kɛ: “Meyɛ mɔɔ sɔ ɔ nye la dahuu.” (Dwɔn 8:29) Tieyɛ zɛhae maanle Gyisɛse anye liele kpole. Noko bie mɔ baha kɛ ɛnee ɔnyɛ se kɛ Gyisɛse bayɛ tieyɛ. Bɛdwenle kɛ Gyihova mɔɔ di munli la angome a ɛnee ɔwɔ kɛ ɔtie ye a, noko yɛmɛ ɔwɔ kɛ yɛtie menli mɔɔ ɛnli munli na bɛmaa bɛ tumi la. Nɔhalɛ nu, Gyisɛse yɛle tieyɛ maanle menli mɔɔ ɛnli munli na bɛmaa bɛ tumi la.

18. Tieyɛ nwo neazo boni a Gyisɛse yɛle wɔ ye ngakula nu a?

¹⁸ Dwosefi nee Mɛle mɔɔ ɛnli munli la a nleanle Gyisɛse maanle ɔnyinle a. Bie a ɔnwunle ye awovolɛ sinlidɔlɛ ne mɔ ɔdɛlale ngakula dɔɔnwo. Asoo ɔdele atua ɔtiale ye awovolɛ anzɛɛ ɔhilele bɛ kɛzi ɔwɔ kɛ bɛnea abusua ne la ɔ? Yɛ edwɛkɛ mɔɔ Luku 2:51 ka ye wɔ Gyisɛse mɔɔ ɛnee yeli ɛvolɛ 12 anwo la nzonlɛ: “Ɔhɔle zo ɔbɛlɛle ɔ nwo aze ɔmaanle bɛ.” Ɔluale ye tieyɛ ne azo ɔyɛle neazo kpalɛ ɔmaanle Kilisiene ngakula mɔɔ bɔ mɔdenle tie bɛ awovolɛ na bɛbu bɛ la.​—Ɛfɛsɛsema 6:1, 2.

19, 20. (a) Tɛnlabelɛ mɔɔ yɛ se la boni anu a ɛnee ɔwɔ kɛ Gyisɛse tie menli mɔɔ ɛnli munli la a? (b) Duzu ati a ɔwɔ kɛ nɔhalɛ Kilisienema yɛ tieyɛ maa menli mɔɔ li bɛ nyunlu ɛnɛ la ɛ?

¹⁹ Gyisɛse yɛle neazo kɛnlɛma ɔluakɛ ɔdiele menli mɔɔ ɛnli munli la wɔ tɛnlabelɛ mɔɔ yɛ se la anu mɔɔ ɛnɛ nɔhalɛ Kilisienema ɛnrɛyia bie ɛlɛ la. Suzu ninyɛne mɔɔ ɛnee wɔ ɛkɛ wɔ ye mekɛ zo la anwo nea. Ɛnee Gyihova ɛlɛfa Dwuuma ɛzonlenlɛ ne, Gyɛlusalɛm ɛzonlenlɛsua ne nee ye ɛsɔfo gyima ne anwo ngyehyɛleɛ ne mɔɔ yeva yeli gyima mekɛ  tendenle la ara awieleɛ, na yeava Kilisiene asafo ne yeazie ɛkɛ. (Mateyu 23:33-38) Noko, ɛnee ɛzonlenlɛ nu mgbanyima dɔɔnwo kilehile adalɛ edwɛkɛ mɔɔ gyi Gilikima nrɛlɛbɛ zo la. Ɛnee belaebo ɛlielɛ ɛbu zo wɔ ɛzonlenlɛsua ne anu, ɔti Gyisɛse vɛlɛle ɛkɛ ne “nwule feabelɛ.” (Maake 11:17) Asoo ɛnee Gyisɛse ɛngɔ ɛzonlenlɛsua ne nee nyianu azua ne mɔ anu ɔ? Kyɛkyɛ! Ɛnee Gyihova ɛlɛfa zɔhane ngyehyɛleɛ ne ali gyima. Gyisɛse yɛle tieyɛ hɔle ɛzonlenlɛsua ne anu wɔ ɛvoyialilɛ mekɛ nu nee nyianu azua ne mɔ anu hɔkpulale kɛ Nyamenle hakyile ye la.​—Luku 4:16; Dwɔn 5:1.

²⁰ Saa Gyisɛse yɛle tieyɛ wɔ tɛnlabelɛ ɛhye mɔ anu a, ɛnee ɔwɔ kɛ Kilisienema yɛ tieyɛ ɛnɛ! Yɛmɛ yɛde mekɛ mɔɔ le ngakyile mɔɔ bɛhanle bɛdole ɛkɛ mekɛ tendenle kɛ bɛbava nɔhalɛ ɛzonlenlɛ bɛazie ɛkɛ ne bieko la anu. Nyamenle ɛbɔ yɛ ɛwɔkɛ kɛ ɔnrɛmaa Seetan ɛnrɛzɛkye ye menli ne mɔɔ yede bɛ nwo la ɛlɛ. (Ayezaya 2:1, 2; 54:17) Nɔhalɛ nu, menli mɔɔ wɔ Kilisiene asafo ne anu la ɛnli munli yɛɛ ɛtane wɔ bɛ nwo. Noko asoo ɔwɔ kɛ awie mɔ sinlidɔlɛ ti yɛyɛ Gyihova anwo anzosesebɛ, na bie a yɛgyakyi debiezukoalɛ ɛhɔlɛ anzɛɛ yɛtendɛ yɛtia asafo mgbanyima ne mɔ ɔ? Kyɛkyɛ!  Emomu, yɛfi yɛ ahonle kɔsɔɔti anu yɛboa menli mɔɔ li asafo ne anyunlu la. Yɛyɛ tieyɛ yɛkɔ debiezukoalɛ nee nyianu na yɛfa Ngɛlɛlera ne anu folɛdulɛ mɔɔ yɛte la yɛbɔ yɛ ɛbɛla.​—Hibuluma 10:24, 25; 13:17.

21. Duzu a Gyisɛse yɛle wɔ mekɛ ɛnee bɛkpondɛ kɛ ɔyɛ Nyamenle anwo anzosesebɛ la ɛ, na neazo boni a ɔyɛle ɔmaanle yɛ a?

²¹ Gyisɛse ammaa menli anzɛɛ agɔnwolɛma mɔɔ lɛ adwenle kpalɛ la anzi ye adenle kɛ ɔbadie Gyihova. Kɛ neazo la, ɛzoanvolɛ Pita dule ɔ Menle ne folɛ kɛ ɔngyia kɛ ɔnwu amaneɛ na ɔwu. Gyisɛse kpole folɛ ɛtane mɔɔ Pita mɔɔ lɛ ɔ nwo adwenle kpalɛ dule ye la. (Mateyu 16:21-23) Ɛnɛ, yɛta yɛgyinla adwenle kpalɛ mɔɔ yɛ mbusuafoɔ lɛ la ati bɛbɔ mɔdenle kɛ bɛmaa yɛagyakyi Nyamenle mɛla nee ye ngyinlazo ne mɔ azo ɛlilɛ la anwo ngyegyelɛ nloa. Yɛ nee Gyisɛse ɛdoavolɛma mɔɔ ɛnee wɔ ɛvoya mɔɔ limoa anu la yɛ adwenle kɛ “ɔwɔ kɛ yɛtie Nyamenle kɛ tumivolɛ na tɛ menli ɔ.”​—Gyima ne 5:29.

22. Kpuya boni a Gyisɛse buale a, na wɔ adenle boni azo?

²² Gyisɛse yiale tieyɛ nwo sɔnea kpole wɔ kenle mɔɔ ɔwule la. Wɔ mekɛ ɛsesebɛ zɔhane anu, “ɔzukoale tieyɛ” wɔ adenle mɔɔ di munli bɔkɔɔ la azo. Ɔyɛle ɔ Ze ɛhulolɛdeɛ, yeanyɛ ɔdaye mumua ne ye ɛhulolɛdeɛ. (Luku 22:42) Ɔluale zo ɔyɛle nɔhalɛlilɛ nwo neazo mɔɔ di munli bɔkɔɔ la. (1 Timote 3:16) Ɔbuale kpuya ɛhye mɔɔ ɛnee la ɛkɛ mekɛ tendenle la: Saa sonla mɔɔ di munli la kɔ sɔnea nu a, asoo ɔbayɛ tieyɛ yeamaa Gyihova? Adam nee Yive andie Gyihova. Akee Gyisɛse rale, ɔluale kɛzi ɔbɔle ye ɛbɛla na ɔwule la azo ɔbuale kpuya ne. Gyihova abɔdeɛ kɔsɔɔti anu kpanyinli ne buale edwɛkɛ ne wɔ adenle kpalɛ zo. Ɔyɛle tieyɛ ɔnva nwo kɛ ɔmaanle ɔnwunle amaneɛ na ɔwule bɔbɔ la.

23-25. (a) Kɛzi tieyɛ fale nɔhalɛlilɛ nwo ɛ? Maa neazo. (b) Duzu a yɛbazuzu nwo wɔ tile mɔɔ doa zo la anu a?

²³ Saa yɛtie Gyihova a, yɛmaa ɔda ali kɛ yɛkulo ye na yɛkulo  kɛ yɛdi nɔhalɛ yɛmaa ye wɔ yɛ ɛbɛlabɔlɛ nu amuala. Kɛmɔ Gyisɛse yɛle tieyɛ la ati, ɔlile nɔhalɛ na ɔmaanle alesama kɔsɔɔti nyianle zolɛ nvasoɛ. (Wulomuma 5:19) Gyihova yilale Gyisɛse kpole. Saa yɛtie yɛ Menle, Kelaese a, Gyihova bayila yɛdayɛ noko. Yɛtie Kelaese a yɛbanyia “dahuu ngoanelielɛ”!​—Hibuluma 5:9.

²⁴ Eza saa awie di nɔhalɛ a ɔnyia nwolɛ nyilalɛ. Mrɛlɛbulɛ 10:9 ka kɛ: “Sonla mɔɔ fa nɔhalɛlilɛ dua la banyia banebɔlɛ.” Saa yɛfa nɔhalɛlilɛ yɛtoto sua kpole mɔɔ bɛva belekese ngɛnlɛma bɛzi la anwo a, ɛnee tieyɛ ko biala mɔɔ yɛbayɛ la le kɛ belekese ko la. Bie a yɛnrɛnwu nvasoɛ mɔɔ wɔ belekese ko azo la, noko ko biala anwo lɛ nvasoɛ. Na saa bɛka ɔ muala bɛbɔ nu a, debie mɔɔ sonle bolɛ kpalɛ la vi nu ba. Saa bɛka tieyɛ ngakyile mɔɔ yɛyɛ ye alehyenlɛ ko biala nee ɛvolɛ biala la bɛbɔ nu a, yɛ nɔhalɛlilɛ ne yɛ kpole kɛ sua kɛnlɛma la.

²⁵ Awie mɔɔ yɛ tieyɛ mekɛ tendenle la maa ɔda ali kɛ ɔkola ɔgyinla kpundii. Yɛbazuzu nwolɛ neazo mɔɔ Gyisɛse yɛle la wɔ tile mɔɔ doa zo la anu.