Kengavolɛ Kulovolɛ:

Gyisɛse Kelaese ɛdo ɛsalɛ ɛvɛlɛ yɛ nuhua ko biala. Ɔse, “Bɛla badoa me.” (Maake 10:21) Wɔlie ye ɛsalɛdolɛ ne azo ɔ? Ɛdie zo a ɔbaboa wɔ kpalɛ. Duzu ati ɔ?

Gyihova zoanle ɔ Ra kokye ne maanle ɔrale azɛlɛ ye azo amaa yeava ye ngoane yeayɛ ɛkpɔnedeɛ. (Dwɔn 3:16) Gyisɛse wule maanle yɛ, noko eza ɔhilele yɛ kɛzi ɔwɔ kɛ yɛbɔ yɛ ɛbɛla la. Ɔlile nɔhalɛ wɔ debie biala mɔɔ ɔyɛle la anu, na ɔmaanle ɔ Ze anye liele. Gyisɛse eza hilele yɛ kɛzi yɛbahola yɛayɛ kɛ ɔ Ze la. Mɔɔ Gyisɛse hanle nee mɔɔ ɔyɛle la maa yɛnwu Selɛ ne ɛhulolɛdeɛ nee kɛzi ɔyɛ ye ninyɛne la.​—Dwɔn 14:9.

Baebolo ne se, Gyisɛse le “neazo” mɔɔ ‘ɔwɔ kɛ yɛdi ɔ gyakɛ anzi kpalɛ a.’ (1 Pita 2:21) Saa yɛkulo kɛ yɛbikye Gyihova kpalɛ, yɛ nye die ɛnɛ na yɛnyia dahuu ngoane a, ɔwɔ kɛ yɛdi Kelaese agyakɛ anzi kpalɛ.

Amaa yɛayɛ ɛhye la, ɔwɔ kɛ yɛnwu ɛbɛla mɔɔ Gyisɛse bɔle ye wɔ azɛlɛ ye azo la. Yemɔti ɔwɔ kɛ yɛsukoa Gyisɛse anwo edwɛkɛ mɔɔ wɔ Baebolo ne anu la boɛ. Saa yɛdwenledwenle mɔɔ Gyisɛse hanle nee ninyɛne mɔɔ ɔyɛle yɛɛ kɛzi yɛbahola yɛazukoa ye wɔ yɛ ɛdendɛlɛ nee yɛ nyɛleɛ nu la anwo kpalɛ a, ɔbaboa yɛ yeamaa yɛanwu kɛzi yɛbahola yɛadoa ye la wienyi.

Buluku ɛhye baboa wɔ yeamaa wɔanyia Gyisɛse nee Gyihova anwo ɛlɔlɛ kpole. Na zɔhane ɛlɔlɛ ne baha wɔ yeamaa wɔali Gyisɛse agyakɛ anzi kpalɛ na wɔamaa Gyihova anye alie ɛnɛ nee dahuu.