1, 2. (a) Mekɛ boni anu a ahyɛlɛdeɛ bie kola yɛ mɔɔ sonle bolɛ kpole maa wɔ a? (b) Duzu ati a yɛkola yɛka kɛ ɛkpɔnedeɛ ne le ahyɛlɛdeɛ mɔɔ sonle bolɛ tɛla biala mɔɔ ɛ sa bahola aha a?

AHYƐLƐDEƐ mɔɔ sonle bolɛ tɛla biala mɔɔ ɛ sa ɛha la a le boni? Ɔngyia kɛ ahyɛlɛdeɛ bie bolɛ yɛ se na yeayɛ mɔɔ sonle bolɛ a. Ɔluakɛ tɛ ahyɛlɛdeɛ bie bolɛ a kile kɛ nwolɛ hyia a. Emomu, saa ahyɛlɛdeɛ ne maa ɛ nye die anzɛɛ ɔdi wɔ ngyianlɛ nwo gyima a yɛɛ ɔkile kɛ ɔsonle bolɛ kpalɛ ɔmaa wɔ a.

² Wɔ ahyɛlɛdeɛ ngakyile mɔɔ ɛ nye bahola ala kɛ ɛkɛnyia la anu, ko wɔ ɛkɛ ne mɔɔ tɛla ɔ muala a. Yemɔ a le ahyɛlɛdeɛ mɔɔ Nyamenle ɛva ɛmaa alesama la. Gyihova ɛva ninyɛne dɔɔnwo ɛmaa yɛ, noko, ye ahyɛlɛdeɛ mɔɔ tɛla biala la a le ɔ Ra Gyisɛse Kelaese ɛkpɔnelɛ afɔlebɔlɛ ne. (Mateyu 20:28) Kɛmɔ yɛbanwu ye wɔ tile ɛhye anu la, ɛkpɔnedeɛ ne le ahyɛlɛdeɛ mɔɔ sonle bolɛ tɛla biala mɔɔ ɛ sa bahola aha a, ɔluakɛ ɔbamaa wɔanyia anyelielɛ kpole yɛɛ ɔbali wɔ ngyianlɛ nwo gyima yeamaa wɔ. Ɛkpɔnedeɛ ne amgba le ɛlɔlɛ kpole kpalɛ mɔɔ Gyihova ɛla ye ali ɛhile wɔ a.

3. Ɛkpɔnedeɛ ne a le duzu, na boni a ɔwɔ kɛ yɛdumua yɛte ɔ bo amaa yɛanwu bolɛ mɔɔ ahyɛlɛdeɛ ɛhye sonle la ɛ?

³ Saa yɛka ye sikalɛ a, yɛbaha ye kɛ ɛkpɔnedeɛ ne le adenle mɔɔ Gyihova dua zo die alesama fi ɛtane nee ewule nu a. (Ɛfɛsɛsema 1:7) Saa yɛbade Baebolo ngilehile ɛhye abo a, ɔwɔ kɛ yɛsia yɛneɛnlea mɔɔ zile Yidɛn tola ne anu la anu. Saa yɛte mɔɔ vile Adam asa wɔ mekɛ mɔɔ ɔyɛle ɛtane la abo a yɛɛ yɛbahola yɛade deɛ mɔɔ ɔti ɛkpɔnedeɛ ne le ahyɛlɛdeɛ mɔɔ sonle bolɛ tɛla biala la abo a.

4. Duzu nvasoɛ a ɛnee Adam banyia avi dasanli ngoane mɔɔ di munli la anu a?

⁴ Mekɛ mɔɔ Gyihova bɔle Adam la, ɔvale debie mɔɔ sonle bolɛ kpalɛ—dasanli ngoane mɔɔ di munli la ɔmanle ye. Suzu mɔɔ ɛnee ɛhye kile maa Adam la anwo nea. Ɔluakɛ ɛnee ɔlɛ sonlabaka nee adwenle mɔɔ di munli la ati, ɛnee ɔ nwo ɛnrɛdo ye, ɔnrɛyɛ kpanyinli na yeawu bɔbɔ. Kɛmɔ ɛnee ɔle sonla mɔɔ di munli la ati, ɔ nee Gyihova nyianle abusuabɔlɛ titile. Baebolo ne fɛlɛ Adam kɛ “Nyamenle ara.” (Luku 3:38) Yemɔti Adam nee Gyihova Nyamenle nyianle abusuabɔlɛ mɔɔ yɛ anyelielɛ kpalɛ kɛmɔ ralɛ nee selɛ mɔɔ ɔlɛ ɛlɔlɛ kola nyia la. Gyihova nee ɔ ra ne mɔɔ wɔ azɛlɛ ye azo la lile adwelie na ɔmanle Adam gyima mɔɔ ahunludwolɛ wɔ nu na eza ɔmanle ɔnwunle mɔɔ ɔ nye la kɛ ɔwɔ kɛ ɔyɛ la.—Mɔlebɛbo 1:28-30; 2:16, 17.

5. Saa Baebolo ne ka kɛ Nyamenle bɔle Adam kɛ “ye ɛsaso” a, duzu a ɔkile a?

⁵ Nyamenle bɔle Adam kɛ “ye ɛsaso.” (Mɔlebɛbo 1:27) Duzu a ɛhye kile a? Kɛmɔ yɛzukoale ye wɔ buluku ɛhye Tile 1 ne la, Gyihova le sunsum mɔɔ ɛnyelɛ ɛnnwu ye a. (Dwɔn 4:24) Yemɔti Gyihova ɛnlɛ sonlabaka mɔɔ le nwonane nee mogya a. Nyamenle ɛsaso mɔɔ bɛbɔle Adam la kile kɛ bɛvale subane mɔɔ Nyamenle lɛ mɔɔ le kɛ ɛlɔlɛ, nrɛlɛbɛ, pɛlepɛlelilɛ nee tumi la a bɛbɔle ye a. Ɛnee Adam le kɛ ɔ Ze wɔ adenle bieko mɔɔ hyia la azo ɔluakɛ ɛnee ɔlɛ adenle ɔkpa mɔɔ  ɔkulo la. Ɛhye ati, ɛnee Adam ɛnle kɛ milahyinli mɔɔ debie mɔɔ bɛyɛ ye kɛ ɔyɛ la ala a ɔyɛ a. Emomu, ɛnee ɔkola ɔsi ɔ ti anwo kpɔkɛ kɛ ɔkɛyɛ mɔɔ le kpalɛ anzɛɛ ɛtane. Saa ɔkpale kɛ ɔkɛdie Nyamenle a, anrɛɛ ɔbadɛnla aze dahuu wɔ Paladaese azɛlɛ zo.

6. Mekɛ mɔɔ Adam yɛle Nyamenle anwo anzosesebɛ la, duzu a ɔminlinle a, na kɛzi ɛhye ɛha ɔ bo zo amra ɛ?

⁶ Ɛhye ati, ɔda ali wienyi kɛ mekɛ mɔɔ Adam yɛle Nyamenle anwo anzosesebɛ na bɛbuale ye ewule fɔlɛ la, ɔminlinle debie kpole kpalɛ. Ye ɛtane ne manle ɔminlinle ye dasanli ngoane mɔɔ di munli nee nyilalɛ mɔɔ boka nwolɛ la amuala. (Mɔlebɛbo 3:17-19) Ɔyɛ alɔbɔlɛ kɛ, ngoane ɛhye mɔɔ sonle bolɛ mɔɔ Adam minlinle ye la hanle ye nee ɔ bo zo amra mɔɔ bara kenlebie la. Nyamenle Edwɛkɛ ne se: “Yemɔti kɛmɔ ɛtane luale sonla ko [Adam] anwo zo a rale ewiade, na sonla ko ne ɛtane ne vale ewule rale la, yɛɛ ewule dele kpondenle aleɛabo amra anwo zo a, ɔluakɛ menli kɔsɔɔti ɛyɛ ɛtane.” (Wulomuma 5:12) Nɔhalɛ nu, Adam ɛtane ne ɛha yɛ muala. Ɛhye ati Baebolo ne ka kɛ ‘ɔdɔnenle’ ɔ nwo nee ɔ bo zo amra kɛ ngɛkɛlɛ ɔmanle ɛtane nee ewule. (Wulomuma 7:14) Ɛnee Adam anzɛɛ Yive ɛnlɛ anyelazo biala ɔluakɛ bɛ nye fuu a bɛyɛle Nyamenle anwo anzosesebɛ a. Na bɛ bo zo amra, mɔɔ yɛboka nwolɛ la noko ɛ?

7, 8. Duzu ninyɛne nwiɔ a ɛkpɔnedeɛ kola kile a?

⁷ Gyihova luale ɛkpɔnedeɛ ne azo liele alesama. Ɛkpɔnedeɛ a le duzu? Ɛkpɔnedeɛ kile ninyɛne nwiɔ. Mɔɔ lumua la, ɛkpɔnedeɛ a le debie anzɛɛ ezukoa mɔɔ bɛtua bɛdie awie anzɛɛ bɛsia bɛdie debie bieko la. Yɛbahola yɛava yɛado ezukoa mɔɔ bɛtua bɛdie debie mɔɔ bɛva bɛwula awoba la anwo. Mɔɔ tɔ zo nwiɔ, ɛkpɔnedeɛ a le ezukoa mɔɔ bɛfa bɛtua kakɛ bie la. Ɔle kɛ ezukoa mɔɔ awie tua maa sonla mɔɔ ɔkɛboda ye la. Kɛ neazo la, saa awie maa esiane bie si na ɔsɛkye debie a, ɔwɔ kɛ ɔtua ezukoa mɔɔ nee deɛ ne mɔɔ ɔzɛkyele ye la bolɛ le ko la.

 ⁸ Kɛzi bɛbahola bɛadua kakɛ kpole mɔɔ Adam vale dole yɛ muala yɛ nwo zo na bɛalie yɛ bɛavi ɛtane nee ewule akɛlɛyɛlɛ bo ɛ? Maa yɛzuzu ɛkpɔnedeɛ ne mɔɔ Gyihova vale manle la nee nvasoɛ mɔɔ ɛbahola wɔanyia wɔ ɛhye anu la anwo.

9. Ɛkpɔnedeɛ boni a ɛnee nwolɛ hyia a?

⁹ Kɛmɔ dasanli ngoane mɔɔ di munli la a minlinle la ati, ɛnee dasanli ngoane mɔɔ ɛnli munli la biala ɛnrɛhola ye tua. (Edwɛndolɛ 49:7, 8) Mɔɔ ɛnee hyia la a le ɛkpɔnedeɛ mɔɔ nee deɛ ne mɔɔ minlinle la le ko la. Ɛhye nee pɛlepɛlelilɛ ngyinlazo mɔɔ di munli mɔɔ wɔ Nyamenle Edwɛkɛ ne anu, mɔɔ se: “Awie mɔɔ kɛhu sonla la, bɛhu ye” bie la le ko. (Mɛla ne 19:21) Yemɔti, duzu a bahola adua dasanli ngoane mɔɔ di munli mɔɔ Adam minlinle la ɛ? Ɛnee dasanli ‘ngoane bieko mɔɔ di munli mɔɔ kola kpɔne’ la a anwo hyia a.—1 Temɔte 2:6.

10. Adenle boni azo a Gyihova luale vale ɛkpɔnedeɛ ne manle a?

¹⁰ Adenle boni azo a Gyihova luale vale ɛkpɔnedeɛ ne manle a? Ɔzoanle ye sunsum nu mralɛ mɔɔ di munli la anu ko ɔmanle ɔrale azɛlɛ ye azo. Noko Gyihova anzoa sunsum nu abɔdeɛ bie ala. Ɔzoanle ɔ Ra kokye ne, mɔɔ sonle bolɛ kpole kpalɛ ɔmaa ye la. (1 Dwɔn 4:9, 10) Ralɛ ɛhye nyianle ɛhulolɛ na ɔvi anwuma ɔrale. (Felepaema 2:7) Kɛmɔ yɛnwunle ye wɔ tile ne mɔɔ li ɛhye anyunlu wɔ buluku ye anu la, Gyihova luale nwanwane adenle zo vale Ralɛ ɛhye ngoane wulale Mɛle awodeɛ nu. Ɔlua Nyamenle sunsum nwuanzanwuanza ne azo, bɛwole Gyisɛse kɛ dasanli mɔɔ di munli la na ɛnee ɛtane biala ɛnle ɔ nwo.—Luku 1:35.

11. Kɛzi sonla ko kola yɛ ɛkpɔnedeɛ maa menli mgbe mgbe dɔɔnwo ɛ?

¹¹ Kɛzi sonla ko kola yɛ ɛkpɔnedeɛ maa menli mgbe mgbe dɔɔnwo ɛ? Mɔɔ lumua la, adenle boni azo a alesama mgbe mgbe dɔɔnwo ne rayɛle ɛtanevolɛma ɛ? Kakye kɛ mekɛ mɔɔ Adam yɛle ɛtane la ɔminlinle dasanli ngoane mɔɔ sonle bolɛ  mɔɔ ɛnee ɔlɛ la. Ɛhye ati, yeangola yeanva yeammaa ɔ bo zo amra. Emomu, ɔvale ɛtane nee ewule a ɔgyakyile bɛ a. Gyisɛse mɔɔ Baebolo ne fɛlɛ ye “Adam ne mɔɔ li amozi la” ɛnee lɛ dasanli ngoane mɔɔ di munli na yeanyɛ ɛtane ɛlɛ. (1 Kɔlentema 15:45) Wɔ adenle bie azo, Gyisɛse gyinlanle Adam agyakɛ anu amaa yealie yɛ ngoane. Gyisɛse luale ye ngoane mɔɔ di munli mɔɔ ɔvale ɔbɔle afɔle ɔdiele Nyamenle bɔkɔɔ la azo, duale Adam ɛtane ne anwo kakɛ. Gyisɛse luale ɛhye ɛyɛlɛ zo manle Adam abo zo amra nyianle anyelazo.—Wulomuma 5:19; 1 Kɔlentema 15:21, 22.

12. Duzu a Gyisɛse amaneɛnwunlɛ ne manle ɔlale ali a?

¹² Baebolo ne ka amaneɛ mɔɔ Gyisɛse nwunle ye kolaa na yeawu la anwo edwɛkɛ dɔɔnwo. Bɛbole ye, bɛbɔle ye baka nu wɔ atisesebɛ adenle zo na ɔwule nyane ewule wɔ baka ne azo. (Dwɔn 19:1, 16-18, 30; Mokanwo, mukelɛ 204-6) Duzu ati a ɛnee nwolɛ hyia kɛ Gyisɛse kɛnwu amaneɛ kpole zɛhae a? Amozii yɛbanwu ye wɔ buluku ɛhye tile bie anu kɛ Seetan hanle kɛ Gyihova sonvolɛ biala ɛnle ɛkɛ ne mɔɔ saa ɔyia sɔnea a ɔbahɔ zo yeali nɔhalɛ yeamaa ye a. Ɔwɔ nuhua kɛ Gyisɛse nwunle amaneɛ ɛdeɛ, noko ɔluale nɔhalɛ mɔɔ ɔlile la azo ɔbuale Seetan edwɛkɛ ne wɔ adenle kpalɛ zo. Gyisɛse lale ye ali kɛ dasanli mɔɔ di munli na ɔlɛ adenle ɔkpa mɔɔ ɔkulo la bahola ali nɔhalɛ amaa Nyamenle mɔɔ debie biala mɔɔ Abɔnsam kɛyɛ la ɛnvane nwolɛ a. Nea kɛzi Gyihova anye liele kpole wɔ nɔhalɛ mɔɔ ye kulovolɛ Ralɛ ne lile la anwo a!—Mrɛlɛbulɛ 27:11.

13. Kɛzi bɛduale ɛkpɔnedeɛ ne ɛ?

¹³ Kɛzi bɛduale ɛkpɔnedeɛ ne ɛ? Wɔ Dwuuma siane ne mɔɔ bɛfɛlɛ ye Naesan la kenle 14 ne, wɔ ɛvolɛ 33 Y.M. anu, Nyamenle manle adenle manle bɛhunle ɔ Ra ne mɔɔ di munli mɔɔ ɛtane biala ɛnle ɔ nwo la. Gyisɛse luale ɛhye azo vale ye dasanli ngoane mɔɔ di munli la bɔle afɔle “kokye.” (Hibuluma 10:10) Gyisɛse wule la ye kenle nsa ne azo, Gyihova dwazole ye rale ngoane nu kɛ sunsum nu abɔdeɛ. Gyisɛse  hɔle anwuma la, ɔvale ye dasanli ngoane ne mɔɔ di munli mɔɔ ɔvale ɔbɔle afɔle la bolɛ mɔɔ ɔsonle la ɔmanle Nyamenle kɛ ɛkpɔnedeɛ ɔliele Adam abo zo amra. (Hibuluma 9:24) Gyihova liele bolɛ mɔɔ Gyisɛse afɔlebɔlɛ ne sonle la kɛ ɛkpɔnedeɛ ne mɔɔ kola die alesama fi ɛtane nee ewule akɛlɛyɛlɛ bo la.—Wulomuma 3:23, 24.

14, 15. Duzu a ɔwɔ kɛ yɛyɛ na yɛanyia ‘ɛtane fakyɛ’ a?

¹⁴ Ɔnvane nwolɛ kɛ yɛle menli mɔɔ ɛtane wɔ yɛ nwo la, yɛbahola yɛalua ɛkpɔnedeɛ ne azo yɛanyia nyilalɛ mɔɔ tɛla biala la. Maa yɛzuzu Nyamenle ahyɛlɛdeɛ ɛhye mɔɔ tɛla biala la azo nvasoɛ mɔɔ yɛbanyia ye ɛnɛ nee kenlebie la bie mɔ anwo.

¹⁵ Ɛtane fakyɛ. Kɛmɔ bɛva sinlidɔlɛ bɛwo yɛ la ati, yɛpele kpalɛ na yɛahola yɛayɛ mɔɔ tenrɛ la. Yɛ muala yɛfo wɔ yɛ ɛdendɛlɛ anzɛɛ yɛ nyɛleɛ nu. Noko, ɔlua Gyisɛse ɛkpɔnelɛ afɔlebɔlɛ ne azo, yɛkola yɛnyia ‘ɛtane fakyɛ.’ (Kɔlɔsaema 1:13, 14) Noko akee, amaa yɛanyia ɛtane fakyɛ ɛhye la, ɔwɔ kɛ yɛnu yɛ nwo nɔhalɛ nu. Eza ɔwɔ kɛ yɛfi mɛlɛbɛnwoaze nu yɛsɛlɛ Gyihova ɛkɛ ne ɛtane fakyɛ ɔlua diedi mɔɔ yɛlɛ wɔ ɔ Ra ne ɛkpɔnelɛ afɔlebɔlɛ ne anu la azo.—1 Dwɔn 1:8,  9.

16. Duzu a boa yɛ maa yɛkola yɛfa adwenle mɔɔ anu te la yɛsonle Nyamenle a, na nvasoɛ boni a wɔ adwenle zɛhae azo a?

¹⁶ Adwenle mɔɔ anu te wɔ Nyamenle anyunlu. Saa yɛ adwenle bua yɛ fɔlɛ a, ɔbahola yeamaa yɛ sa nu ado na yɛade nganeɛ kɛ yɛnfɛta. Noko akee, ɔlua ɛtane fakyɛ ne mɔɔ yɛnyia ye wɔ ɛkpɔnedeɛ ne azo la ati, Gyihova fi atiakunlukɛnlɛma nu ɔmaa yɛfa adwenle mɔɔ anu te la yɛsonle ye mɔɔ yɛ sinlidɔlɛ ne ɛnvane nwolɛ a. (Hibuluma 9:13, 14) Ɛhye maa yɛfi yɛ ɛhulolɛ nu yɛ nee Gyihova tendɛ mɔɔ yɛ adwenle nu ɛnyɛ yɛ kesee a. Ɛhye ati yɛkola yɛbikye ye wɔ asɔneyɛlɛ nu dahuu. (Hibuluma 4:14-16) Adwenle mɔɔ anu te mɔɔ yɛbanyia ye dahuu la, bamaa yɛanyia anzondwolɛ nee ɛbulɛ yɛamaa yɛ nwo na yɛ nye alie.

17. Ɔluakɛ Gyisɛse wule manle yɛ la ati, duzu nyilalɛ a yɛbahola yɛanyia a?

 ¹⁷ Dahuu ngoane nwo anyelazo wɔ paladaese azɛlɛ zo. Wulomuma 6:23 ne se: “Ɛtane ahatualɛ a le ewule.” Ngyɛnu ko ne ala eza ka kɛ: “Nyamenle ahyɛlɛdeɛ ne mɔɔ ɔfa ɔmaa mgbane la a le ngoane mɔɔ ɛnlɛ awieleɛ wɔ yɛ Awulae Kelaese ati.” Wɔ buluku ɛhye Tile 3 ne, yɛzuzule azɛlɛ ye azo Paladaese mɔɔ ɛlɛba la anu nyilalɛ ne bie mɔ anwo. (Yekile 21:3, 4) Yɛbahola yɛanyia dahuu ngoane asetɛnla mɔɔ kpɔkɛdelɛ kpalɛ wɔ nu nee nyilalɛ mɔɔ ɛha la amuala kenlebie ɔluakɛ Gyisɛse wule manle yɛ la ati. Amaa yɛ sa aha zɔhane nyilalɛ ne mɔ la, ɔwɔ kɛ yɛkile kɛ yɛ nye sɔ ɛkpɔnelɛ ahyɛlɛdeɛ ne.

18. Duzu ati a ɔwɔ kɛ yɛkile anyezɔlɛ kpole yɛmaa Gyihova wɔ ɛkpɔnedeɛ ne mɔɔ ɔvale ɔmanle la anwo ɛ?

¹⁸ Duzu ati a ɔwɔ kɛ yɛnyia anyezɔlɛ kpole yɛmaa Gyihova wɔ ɛkpɔnedeɛ ne anwo a? Saa ahyɛlɛdeɛ bie kɛzonle bolɛ a ɔvi kɛzi ahenle mɔɔ ɔfa yeamaa la badɔ alagye wɔ nwolɛ anzɛɛ babɔ nwolɛ kakɛ la. Yɛ nye die kpole wɔ mekɛ mɔɔ yɛbanwu kɛ ahenle mɔɔ vale ahyɛlɛdeɛ ne manle yɛ la amgba kulo yɛ la. Ɛkpɔnedeɛ ne le ahyɛlɛdeɛ mɔɔ sonle bolɛ  tɛla biala a, ɔluakɛ Nyamenle bɔle afɔle kpole kpalɛ yɛɛ ɔvale ɔmanle a. Dwɔn 3:16 ka kɛ: “Nyamenle hulole ewiade amra kpole kpalɛ la ati yɛɛ ɔvale Ɔ Ra kokye ne ɔmanle a.” Ɛkpɔnedeɛ ne le daselɛ kpole kpalɛ mɔɔ kile kɛ Gyihova kulo yɛ a. Eza ɔkile kɛ Gyisɛse kulo yɛ, ɔluakɛ ɔvile ye ɛhulolɛ nu ɔvale ye ngoane ɔdole ɛkɛ ne ɔmanle yɛ. (Dwɔn 15:13) Ɛhye ati ɔwɔ kɛ ɛkpɔnelɛ ahyɛlɛdeɛ ne maa yɛnwu ye kɛ Gyihova nee ɔ Ra ne kulo yɛ nuhua ko biala.—Galeehyeama 2:20.

19, 20. Ndenle boni azo a ɛbahola wɔala ye ali kɛ ɛ nye sɔ Nyamenle ɛkpɔnelɛ ahyɛlɛdeɛ ne a?

¹⁹ Kɛzi ɛbahola wɔahile kɛ ɛ nye sɔ Nyamenle ɛkpɔnelɛ ahyɛlɛdeɛ ne ɛ? Mɔɔ lumua la, bɔ mɔdenle sukoa na nwu Gyihova, Maavolɛ Kpole ne anwo ninyɛne dɔɔnwo. (Dwɔn 17:3) Baebolo ne mɔɔ ɛbalua buluku ɛhye azo wɔazukoa la baboa wɔ yeamaa wɔayɛ zɔ. Mekɛ mɔɔ ɛlɛnyia Gyihova anwo ndelebɛbo dɔɔnwo la, ɛlɔlɛ mɔɔ ɛlɛ ɛmaa ye la bayɛ kpole. Na zɔhane ɛlɔlɛ ne bamaa wɔanyia ɛhulolɛ kɛ ɛkɛyɛ mɔɔ ɔ nye die nwolɛ la.—1 Dwɔn 5:3.

²⁰ Kile kɛ ɛlɛ diedi wɔ Gyisɛse ɛkpɔnelɛ afɔlebɔlɛ ne anu. Bɛhanle ye wɔ Gyisɛse anwo kɛ: “Awie biala mɔɔ die Ralɛ ne di la lɛ ngoane mɔɔ ɛnlɛ awieleɛ.” (Dwɔn 3:36) Kɛzi yɛbahola yɛanyia Gyisɛse anu diedi ɛ? Tɛ bɛ nloa angomekye a bɛfa bɛkile diedi ɛhye a. Gyemise 2:26 ka kɛ: “Diedi mɔɔ gyimayɛlɛ ɛmboka nwolɛ la le wulera.” Ɛhɛe, yɛdua “gyimayɛlɛ” zo a yɛda nɔhalɛ diedi ali a, ɛhye kile kɛ, yɛdua nyɛleɛ zo. Adenle ko mɔɔ yɛdua zo yɛkile kɛ yɛlɛ Gyisɛse anu diedi la a le kɛ yɛkɛbɔ mɔdenle kɛ yɛkɛzukoa ye, tɛ mɔɔ yɛka la angomekye na emomu wɔ mɔɔ yɛyɛ noko la anu.—Dwɔn 13:15.

21, 22. (a) Duzu ati a ɔwɔ kɛ yɛkɔ Awulae Nɔsolɛ Aleɛlilɛ ne abo ɛvolɛ biala ɛ? (b) Duzu a bɛbahilehile nuhua wɔ Tile 6 nee 7 ne anu a?

²¹ Kɔ Awulae Nɔsolɛ Aleɛlilɛ ne abo ɛvolɛ biala. Wɔ Naesan 14, ɛvolɛ 33 Y.M anu nɔsolɛ ne, Gyisɛse vale ɛvoyia titile bie mɔɔ Baebolo ne fɛlɛ ye ‘Awulae nɔsolɛ aleɛ ne’ la ziele ɛkɛ. (1 Kɔlentema 11:20; Mateyu 26:26-28) Eza bɛfɛlɛ ɛvoyia  ɛhye Kelaese ewule ne anwo Ngakyelɛ. Gyisɛse vale ziele ɛkɛ ne boale ye ɛzoanvolɛma ne nee nɔhalɛ Keleseɛnema mɔɔ bara amozii la amuala amaa bɛahakye kɛ ɔlua ewule mɔɔ ɔwule kɛ dasanli mɔɔ di munli la azo a ɔvale ye ngoane ɔmanle kɛ ɛkpɔnedeɛ a. Gyisɛse hanle vanenle ɛvoyia ɛhye anwo kɛ: “Bɛyɛ ɛhye bɛva bɛhakye me.” (Luku 22:19) Ngakyelɛlilɛ ne maa yɛkakye ɛlɔlɛ kpole mɔɔ Gyihova nee Gyisɛse luale ɛkpɔnedeɛ ne azo lale ye ali la. Yɛbahola yɛahile anyezɔlɛ yɛamaa ɛkpɔnedeɛ ne ɔlua Gyisɛse ewule ne anwo Ngakyelɛlilɛ ne mɔɔ yɛbahɔ ɔ bo ɛvolɛ biala la azo. *

²² Ɛkpɔnedeɛ ne mɔɔ Gyihova vale manle la amgba le ahyɛlɛdeɛ mɔɔ sonle bolɛ tɛla biala a. (2 Kɔlentema 9:14, 15) Ahyɛlɛdeɛ ɛhye mɔɔ sonle bolɛ tɛla biala la bahola ayɛ nvasoɛ amaa menli bɔbɔ mɔɔ ɛwu la. Tile 6 nee 7 ne bahilehile kɛzi ɔbayɛ zɔ la anu.