BAEBOLO ne ɛngile yɛ mekɛ mɔɔ bɛwole Gyisɛse la. Noko akee, ɔmaa yɛnyia ndelebɛbo kpalɛ mɔɔ yɛkola yɛgyinla zo yɛka ye kɛ bɛanwo ye wɔ December a.

Suzu kɛzi ɛnee maanle nu de wɔ zɔhane mekɛ ne anu wɔ Bɛtelɛhɛm, ɛleka mɔɔ bɛwole Gyisɛse la anwo nea. Ɛnee Dwuuma siane Chislev (mɔɔ nee November/December le ko la) le siane mɔɔ ezule tɔ wɔ nu na maanle nu yɛ ɛyɛlɛ a. Siane mɔɔ doa zolɛ la a le Tebeth (December/January). Ɛnee ɔle mekɛ mɔɔ maanle nu yɛ weɛlɛkɔkɔ kpalɛ na ɔdwu mekɛ ne bie a ezukɔtweaba tɔ awoka ne mɔ azo a. Maa yɛnlea mɔɔ Baebolo ne ka ye wɔ kɛ ɛnee maanle nu de wɔ zɔhane ɛleka ne la.

Baebolo kɛlɛvolɛ Ɛzela maa yɛnwu ye kɛ Chislev amgba le mekɛ mɔɔ maanle nu yɛ ɛyɛlɛ na ezule ta tɔ a. Mekɛ mɔɔ ɔhanle kɛ ɛnee menli dɔɔnwo ɛyia Gyɛlusalɛm wɔ “siane ngɔnla [Chislev] ne ye kenle mɔɔ tɔ zolɛ abulanwiɔ” ɔwiele la, Ɛzela eza hanle kɛ “ezule  mɔɔ ɛnee ɛlɛtɔ kpole la manle bɛ nwo wozole bɛ.” Menli mɔɔ yiale ɛkɛ ne la hanle kɛzi ɛnee maanle nu de la anwo edwɛkɛ kɛ: “Ezule ne ɛlɛtɔ kpole. Yɛnrɛhola nuhua gyinla zɛhae.” (Ɛzela 10:9, 13; Gyɛlɛmaya 36:22) Ɛhye ati ɔnyɛ azibɛnwo kɛ mboaneneavolɛma mɔɔ ɛnee wɔ Bɛtelɛhɛm la bɔle mɔdenle kɛ bɛ nee bɛ mboane ne mɔ ɛnrɛhɔ adidi nɔɔzo wɔ December anu a!

Noko akee, Baebolo ne ka kɛ mekɛ mɔɔ bɛwole Gyisɛse la ɛnee mboaneneavolɛma ɛlɛnea bɛ mboane wɔ fiene ne azo. Nɔhalɛ nu, Baebolo kɛlɛvolɛ Luku kile kɛ wɔ zɔhane mekɛ ne anu “ɛnee mboaneneavolɛma bie wɔ maanle ne anu na bɛlɛsi epe [nɔe ne] bɛanlea bɛ mboane wɔ fiene ne azo,” wɔ ɛleka mɔɔ bikye Bɛtelɛhɛm la. (Luku 2:8-12) Yɛ ye nzonlɛ kɛ ɛnee mboaneneavolɛma ne ɛlɛsi epe nɔe ne anlea bɛ mboane wɔ fiene ne azo. Saa ɛnee ɔle December anu a, asoo anrɛɛ bɛbahola bɛadɛnla fiene ne azo nɔe ne wɔ mekɛ mɔɔ maanle nu yɛ ɛyɛlɛ na ezule ta tɔ wɔ Bɛtelɛhɛm la ɔ? Kyɛkyɛ, ɔnrɛyɛ boɛ. Ɛhye ati edwɛkɛ mɔɔ zile wɔ mekɛ mɔɔ bɛwole Gyisɛse la kile kɛ bɛanwo ye wɔ December anu. *

Nyamenle Edwɛkɛ ne ka mekɛ kpɔtee mɔɔ Gyisɛse wule la anwo edwɛkɛ, noko ye awolɛ mekɛ ne anwo edwɛkɛ ekyi bie ala a ɔka ɔkile yɛ a. Ɛhye maa yɛkakye edwɛkɛ mɔɔ Belemgbunli Sɔlɔmɔn hanle la: “Dumamɔlɛ kpalɛ le kpalɛ tɛla nwole evuanlɛ mɔɔ sonle bolɛ la; yɛɛ ewule kenle le kpalɛ tɛla awolɛ kenle.” (Nolobɔvo ne 7:1) Ɛhye ati ɔnyɛ ɛzulolɛ kɛ Baebolo ne ka Gyisɛse ɛzonlenlɛ gyima ne nee ye ewule ne anwo edwɛkɛ dɔɔnwo, noko ɔka ye awolɛ mekɛ ne anwo edwɛkɛ ekyi bie ala a.