BƐZE Keleseɛnema kɛ bɛli Kelaese ewule Ngakyelɛ ɛvoyia ne. Eza bɛfɛlɛ ɛvoyia ɛhye ‘Awulae nɔsolɛ aleɛ ne.’ (1 Kɔlentema 11:20) Kɛzi ɛvoyialilɛ ɛhye anwo hyia ɛ? Mekɛ boni yɛɛ kɛzi ɔwɔ kɛ bɛdi ɛvoyia ɛhye ɛ?

Gyisɛse Kelaese vale ɛvoyia ɛhye ziele ɛkɛ ne wɔ nɔe ne mɔɔ bɛlile Dwuuma Akpabɛnwo ne wɔ 33 Y.M. Ɛnee bɛdi Akpabɛnwo ne ko pɛ ɛvolɛ biala wɔ Dwuuma siane Naesan kenle 14 ne azo. Amaa bɛanwu mekɛ ne la, ɛnee Dwuuma ne kendɛ kɔdwu ezule mekɛ nu, mekɛ mɔɔ bɛnyia dɔnehwele 12 wɔ alehyenlɛ nu yɛɛ dɔnehwele 12 wɔ aledwolɛ nu la. Kenle mɔɔ lumua mɔɔ bɛkɛnwu kɛ siane ne ɛvi la a bɔ Naesan abo a. Bɛdi Akpabɛnwo ne wɔ ye kenle 14 ne anzi, wɔ mekɛ mɔɔ ewia ne ɛhɔdɔ la.

Gyisɛse nee ye ɛzoanvolɛ ne mɔ lile Akpabɛnwo ne, na mekɛ mɔɔ ɛnee yemaa Dwudase Yesekaleɔto ɛvinde la, ɔvale Awulae Nɔsolɛ Aleɛ ne ɔziele ɛkɛ. Aleɛlilɛ ɛhye ragyinlanle Dwuuma Akpabɛnwo ne agyakɛ anu na ɛhye ati, ɔwɔ kɛ bɛdi ye ko pɛ ɛvolɛ biala.

 Mateyu Edwɛkpa ne kile kɛ: “Gyisɛse vale kpanwo, ɔyilale zolɛ, ɔbubule nuhua ɔmanle ye ɛdoavolɛma ne na ɔzele bɛ kɛ, ‘Bɛlie bɛli, ɛhye a le me nwonane ne a.’ Akee ɔvale dwora, ɔyɛle Nyamenle mo, ɔvale ɔmanle bɛ na ɔzele kɛ, ‘Bɛ muala bɛnlo, ɛhye a le me mogya ne mɔɔ bɛhwi bɛgua wɔ menli dɔɔnwo bɛ ɛtane fakyɛ ti’” a.—Mateyu 26:26-28.

Menli bie mɔ suzu kɛ Gyisɛse manle kpanwo ne hakyile ɔ nwonane yɛɛ nwanye ne hakyile ye mogya ne. Noko akee, mekɛ mɔɔ Gyisɛse vale kpanwo ne manle la ɛnee ɔ nwonane ne anwo ɛtɛbule ɛbonle. Asoo ɛnee Gyisɛse ɛzoanvolɛ ne mɔ amgba ɛlɛdi ye nwonane na bɛanlo ye mogya ne ɔ? Kyɛkyɛ, anrɛɛ ɛhye bahile kɛ bɛdi sonla nane, na bɛdo Nyamenle mɛla. (Mɔlebɛbo 9:3, 4; Sɛlɛvolɛma 17:10) Kɛmɔ Luku 22:20 kile la, Gyisɛse hanle kɛ: “Dwora ɛhye mɔɔ bɛlɛno nu la a le . . . ngyekyeleɛ fofolɛ ne mɔɔ bɛva me mogya ne bɛzɔ ɔ nloa la.” Asoo dwora mumua ne a rayɛle “ngyekyeleɛ fofolɛ ne” a? Ɛhye ɛnrɛhola ɛnrɛyɛ boɛ, ɔluakɛ ngyekyeleɛ ɛnle debie mɔɔ bɛkola bɛsɔ nu a, ɔle ngyehyɛleɛ ala.

Ɛhye ati, kpanwo ne nee nwanye ne le sɛkɛlɛneɛ ala. Kpanwo ne le Kelaese nwonane ne mɔɔ di munli la anwo sɛkɛlɛneɛ. Akpabɛnwo kpanwo ne mɔɔ hale la bie a Gyisɛse vale a. Ɛnee mgbɔvonle biala ɛnle kpanwo ne anu. (Adendulɛ 12:8) Baebolo ne ta fa mgbɔvonle yɛ ɛtane nwo sɛkɛlɛneɛ. Yemɔti kpanwo ne gyi ɛkɛ ne maa Gyisɛse nwonane ne mɔɔ di munli mɔɔ ɔvale ɔbɔle afɔle la. Ɛtane biala ɛnle nu.—Mateyu 16:11, 12; 1 Kɔlentema 5:6, 7; 1 Pita 2:22; 1 Dwɔn 2:1, 2.

Nwanye kɔkɔlɛ ne le Gyisɛse mogya ne anwo sɛkɛlɛneɛ. Mogya zɔhane maa ngyekyeleɛ fofolɛ ne di munli. Gyisɛse hanle kɛ bɛhwi ye mogya ne bɛgua ɔlua “ɛtane fakyɛ ti.” Ɛhye a bamaa babu alesama kɛ bɛ nwo te wɔ Nyamenle anyunlu na bahola bɛ nee Gyihova ayɛ ngyekyeleɛ fofolɛ a. (Hibuluma 9:14; 10:16, 17) Ngyekyeleɛ ɛhye maa ɔyɛ boɛ kɛ Keleseɛnema 144, 000 mɔɔ di nɔhalɛ la bahɔ anwuma. Bɛbazonle kɛ arelemgbunli nee ɛsɔfoma wɔ ɛkɛ bɛamaa alesama amuala anyia nyilalɛ.—Mɔlebɛbo 22:18; Gyɛlɛmaya 31:31-33; 1 Pita 2:9; Yekile 5:9, 10; 14:1-3.

Nwane mɔ a ɔwɔ kɛ bɛdi kpanwo ne na bɛno nwanye ne bie wɔ Ngakyelɛlilɛ ne abo a? Ɔda ali wienyi kɛ menli mɔɔ wɔ ngyekyeleɛ  fofolɛ ne anu, bɛdabɛ mɔɔ bɛlɛ anyelazo kɛ bɛbahɔ anwuma, la a ɔwɔ kɛ bɛdi kpanwo ne na bɛno nwanye ne bie a. Nyamenle sunsum nwuanzanwuanza ne a kile bɛ kɛ bɛkpa bɛ kɛ anwuma arelemgbunli a. (Wulomuma 8:16) Eza bɛboka Gyisɛse Belemgbunlililɛ ngyekyeleɛ ne anwo.—Luku 22:29.

Na bɛdabɛ mɔɔ bɛlɛ anyelazo kɛ bɛbadɛnla azɛlɛ ye azo dahuu wɔ Paladaese noko la ɛ? Bɛtie Gyisɛse edwɛkɛ ne na bɛfi ɛbulɛ nu bɛkɔ Awulae Nɔsolɛ Aleɛ ne abo, noko bɛnli bie. Ɛvolɛ biala wɔ Naesan 14, mekɛ mɔɔ ewia ne ɛhɔdɔ la, Gyihova Alasevolɛ di Awulae Nɔsolɛ Aleɛ ne. Ɔwɔ nuhua kɛ wɔ ewiade amuala, menli ekyi bie ala a kile kɛ bɛlɛ anyelazo kɛ bɛbahɔ anwuma a, noko akee ɛvoyialilɛ ɛhye anwo hyia Keleseɛnema amuala. Ɔle mekɛ mɔɔ bɛ muala bɛkola bɛdwenledwenle ɛlɔlɛ mɔɔ tɛla biala mɔɔ Gyihova Nyamenle nee Gyisɛse Kelaese ɛla ye ali la anwo a.—Dwɔn 3:16.