NEA Keen nee Ebɛle. Bɛyɛ mgbanyinli. Keen ɛrayɛ ɛyazonlɛnli. Ɔdua abɛlɛ nee atoko mɔ yɛɛ mbaka ma nee ɛbɔ nu ninyɛne ngakyile.

Ebɛle ɛrayɛ mboaneneavolɛ. Ɛnee ɔ nye die kɛ ɔkɛnlea mboane mralɛ. Bɛnyinle bɛyɛle mboane mgbole, ɔti yeangyɛ biala Ebɛle ranyianle mboane dɔɔnwo mɔɔ ɛnee ɔnea zo a.

Kenle ko Keen nee Ebɛle bɔle afɔle manle Nyamenle. Keen vale ye egyinli ne anu aleɛ ne bie rale. Ebɛle noko vale ye boane mɔɔ ɛlɔ kpalɛ la rale. Gyihova anye zɔle Ebɛle nee ye afɔle ne. Na ɔ nye anzɔ Keen nee ye afɔle ne. Ɛze deɛ mɔɔ ɔti ɔrale ye zɔ la ɔ?

Tɛ kɛ asɛɛ Ebɛle afɔle ɛdeɛ ne le kpalɛ tɛla Keen ɛdeɛ ne la ati ɔ. Yemɔ a le kɛ ɛnee Ebɛle le sonla kpalɛ. Ɛnee ɔkulo Gyihova yɛɛ ɔ diema ne. Noko ɛnee Keen ɛnle sonla kpalɛ; ɛnee ɔngulo ɔ diema ne.

Yemɔti Nyamenle hanle hilele Keen kɛ ɔwɔ kɛ ɔkakyi ye subane.Noko Keen andie. Ɔvale ɛya kpole ɔluakɛ ɛnee Nyamenle kulo Ebɛle kpalɛ la ati. Ɔti Keen zele Ebɛle kɛ: ‘Maa yɛhɔ ɛbɔ nu.’ Wɔ ɛkɛ ne, mekɛ mɔɔ ɛnee awie biala ɛnle ɛkɛ ne la, Keen bɔle ɔ diema Ebɛle. Ɔbɔle ye kpole ɔmanle ɔholale ye na ɔwule. Asoo ɛhye ɛnle ɛtane kpole mɔɔ Keen yɛle a?

Ɔwɔ nuhua kɛ Ebɛle ɛwu ɛdeɛ, noko Nyamenle tɛkakye ye. Ɛnee Ebɛle le sonla kpalɛ, na Gyihova arɛle ɛnvi sonla zɛhae ɛlɛ. Yemɔti kenlebie Gyihova Nyamenle bava Ebɛle azia ara ngoane nu bieko. Wɔ zɔhane mekɛ ne anu, Ebɛle ɛnrɛwu bieko. Ɔbahola yeadɛnla aze wɔ azɛlɛ ye azo dahuu. Asoo ɔnrɛyɛ anyelielɛ kɛ yɛkɛnwu menli mɔɔ le kɛ Ebɛle la ɔ?

Noko Nyamenle anye ɛnlie menli mɔɔ le kɛ Keen la anwo. Ɔti mɔɔ Keen hunle ɔ diema ne wiele la, Nyamenle hwenle ɔ nzo ɔlua ɛvoanlɛ mɔɔ ɔvoanle ye ɔvile ye mbusuama avinli ɔmanle ɔhɔdɛnlanle moamoa la azo. Mɔɔ Keen kɔ ahɔdɛnla azɛlɛ ne foa bie azo la, ɔvale ɔ mediema mraalɛ ne mɔ ko ɔhɔle, na ɔrayɛle ɔ ye.

Yeangyɛ Keen nee ɔ ye bɔle ɔ bo kɛ bɛwo mralɛ. Adam nee Yive amra mrenya nee mraalɛ mɔɔ ɛha la noko gyale bɛ nwo, na bɛdabɛ noko bɛwole mralɛ. Yeangyɛ biala menli dɔɔnwo rale azɛlɛ ne azo. Maa yɛzukoa bie mɔ anwo debie.