NINYƐNE mgbalɛ mɔɔ yɛlɛ la amuala vi Nyamenle ɛkɛ. Ɔbɔle sɛnzɛne ne kɛ ɔmaa yɛ wienyi alehyenlɛ nu, yɛɛ siane ne nee nwɔlɔra ne mɔ amaa yɛanyia wienyi aledwolɛ nu. Akee Nyamenle bɔle azɛlɛ ne kɛ yɛdɛnla zolɛ.

Noko tɛ sɛnzɛne ne, siane ne, nwɔlɔra ne mɔ yɛɛ azɛlɛ ne a le ninyɛne mɔɔ Nyamenle lumua bɔle a. Ɛze debie mɔɔ lumua la ɔ? Nyamenle lumua bɔle menli mɔɔ le kɛ ɔdaye la. Yɛnnwu menli ɛhye mɔ, kɛmɔ yɛnnwu Nyamenle ala la. Wɔ Baebolo ne anu bɛfɛlɛ menli ɛhye mɔ anwumabɔvolɛma. Nyamenle bɔle anwumabɔvolɛ ne mɔ kɛ bɛ nee ye ɛdɛnla anwuma.

Anwumabɔvolɛ mɔɔ lumua mɔɔ Nyamenle bɔle la le ngakyile. Ɛnee ɔle Nyamenle Ara mɔɔ lumua, na ɔ nee ɔ Ze yɛle gyima. Ɔboale Nyamenle ɔmanle ɔbɔle ninyɛne gyɛne mɔɔ ɛha la amuala. Ɔboale Nyamenle ɔmanle ɔbɔle sɛnzɛne ne, siane ne, nwɔlɔra ne mɔ yɛɛ yɛ azɛlɛ ye.

Ɛnee kɛ azɛlɛ ne de ɛ? Mɔlebɛbo ne ɛnee awie biala ɛnrɛhola azɛlɛ ne azo tɛnla. Ɛnee debie biala ɛnle azɛlɛ ne azo kɛ azule tandane ko ala. Noko ɛnee Nyamenle kpondɛ kɛ menli tɛnla azɛlɛ ne azo. Ɔti ɔbɔle ɔ bo kɛ ɔsiezie ninyɛne yeamaa yɛ. Duzu a ɔyɛle a?

Mɔɔ lumua, ɛnee azɛlɛ ne hyia wienyi. Yemɔti Nyamenle manle wienyi vile sɛnzɛne ne anu dale azɛlɛ ne azo. Ɔyɛle ɛhye amaa yɛanyia aledwolɛ nee alehyenlɛ. Ɛhye mɔ anzi, Nyamenle manle azɛlɛ vile azule tandane ne anu rale.

Mɔlebɛbo ne ɛnee debie biala ɛnle azɛlɛ ne azo. Ɛnee ɔle kɛ nvoninli ne mɔɔ ɛnwu ye wɔ ɛke la. Ɛnee ndotolo anzɛɛ mbaka anzɛɛ nane nane ɛnle ɛkɛ. Ɛnee fɛlɛ biala bɔbɔ ɛnle nyevile ne anu. Ɛnee Nyamenle lɛ gyima dɔɔnwo yɛ amaa azɛlɛ ne ayɛ kɛnlɛma kpalɛ kpalɛ yeamaa nane nee menli adɛnla zo.