MƆƆ menli bɔle ɔ bo kɛ bɛso wɔ azɛlɛ ne azo la, bɛ nuhua dɔɔnwo yɛle ninyɛndane kɛ Keen la. Noko ɛnee bɛ nuhua ko le ngakyile. Yemɔ a le nrenya ɛhye mɔɔ bɛfɛlɛ ye Yinɔko la. Ɛnee Yinɔko le nrenya mɔɔ ɔ kɛnra yɛ se. Ɛnee menli mɔɔ wɔ ɛkɛ ne la amuala ɛlɛyɛ ninyɛndane, noko Yinɔko hɔle zolɛ zonlenle Nyamenle.

Asoo ɛze deɛ mɔɔ ɔti menli mɔɔ ɛnee wɔ ɛkɛ ne zɔhane mekɛ ne la yɛle ninyɛndane dɔɔnwo zɔhane la ɔ? Dwenle nwolɛ nea, Nwane a manle Adam nee Yive yɛle Nyamenle anwo anzosesebɛ na bɛlile baka ma ne mɔɔ Nyamenle hanle kɛ bɛmmadi la bie a? Ɛhɛe, anwumabɔvolɛ ɛtane bie ɔ. Baebolo ne fɛlɛ ye Seetan. Na ɔlɛbɔ mɔdenle kɛ ɔbamaa awie biala ayɛ ɛtane.

Kenle ko Gyihova Nyamenle manle Yinɔko hanle edwɛkɛ bie mɔɔ menli ne ɛmkpondɛ kɛ bɛte la ɔhilele bɛ. Yemɔ ɛne: ‘Nyamenle bara arazɛkye ɛtanevolɛma amuala kenlebie.’ Ɔbayɛ kɛ menli ne vale ɛya kpole kɛ bɛdele ɛhye la. Bie a bɛbɔle mɔdenle bɔbɔ kɛ bɛku Yinɔko. Yemɔti ɛnee ɔhyia kɛ Yinɔko si ɔ kɛnra kpalɛ na yeahola yeaha mɔɔ ɛnee Nyamenle ɛlɛba arayɛ la yeahile menli ne.

Nyamenle ammaa Yinɔko andɛnla aze mekɛ tendenle wɔ ɛtanevolɛma zɔhane avinli. Yinɔko lile ɛvolɛ 365 pɛ. Duzu ati a yɛka kɛ “ɛvolɛ 365 pɛ” a? Ɔluakɛ zɔhane mekɛ ne ɛnee menli te kpɔkɛ kpalɛ ɔti ɛnee bɛtɛnla aze bɛkyɛ kpalɛ bɛtɛla ɛnɛ. Ɛhɛe, Yinɔko ara Mɛtusɛla lile ɛvolɛ 969!

Wɔ Yinɔko ewule nzi, menli ne ɛtaneyɛlɛ yɛle kpole kpalɛ. Baebolo ne ka kɛ ‘ɛtane ngome yile bɛ adwenle nee bɛ ahonle nu tɛkɛɛ,’ na ‘basabasayɛlɛ yɛle kpole kpalɛ wɔ azɛlɛ ne azo.’

Ɛze debie mɔɔ manle basabasayɛlɛ dɔɔnwo rale azɛlɛ ne azo wɔ zɔhane mekɛ ne la anu ko ɔ? Yemɔ a le kɛ Seetan nyianle adenle fofolɛ mɔɔ ɔdua zo ɔmaa menli yɛ ninyɛndane a. Yɛbazukoa ɛhye anwo debie wɔ mɔɔ doa zo la anu.