NEA kɛ kakula adɔma ne ɛlɛsu, na ɔlɛsɔ bɛlɛra ne asa ɛ. Mosisi ɛne. Asoo ɛze bɛlɛra kɛnlɛma ne sonla holɛ ɔ? Ɔle Yigyibiti belemgbunli ara raalɛ, Falo mumua ne ara raalɛ.

Mosisi ɔ nli vale ɔ ra adɔma ne ziele toonwo ɔnyianle siane nsa, ɔboalekɛ ɛnee ɔmkpondɛ kɛ Yigyibitima ne ku ye. Noko ɛnee ɔze kɛ ɔbahola yeara ye kɛ bɛbanwu Mosisi, ɔti mɔɔ ɔyɛle ɔliele ye ngoane la ɛne.

Ɔvale kɛndɛne na ɔzieziele ye mɔɔ nzule ɛngola ɛngɔ nu a. Akee ɔvale Mosisi ɔdole nu, na ɔvale kɛndɛne ne ɔhɔziele ndile ne mɔɔ wɔ Azule Naele ne anloa la anu. Bɛmanle Mosisi adiema raalɛ, Meleam, gyinlanle moa ekyi nleanle edwɛkɛ mɔɔ bazi la.

Yeangyɛ biala yɛɛ Falo ara raalɛ ne hɔle Azule Naele ne anu kɛ ɔkabia a. Arɛlevilɛ nu ala ɔ nye hɔdɔle kɛndɛne ne azo kɛ ɔgyi ndile ne anu. Ɔzoanle ye sonvolɛ mraalɛ ne mɔ ko kɛ: ‘Kɔva kɛndɛne ne bɛlɛ me.’ Nea kakula adɔma kɛnlɛma ko mɔɔ belemgbunli ara raalɛ ne nwunle ye mekɛ mɔɔ ɔdukuele kɛndɛne ne azo la ɛ! Ɛnee kakula Mosisi ɛlɛsu, na belemgbunli ara raalɛ ne lile ɔ nwo nyane. Yeangulo kɛ ɔkɛmaa bɛkɛhu ye.

Akee Meleam vindele rale. Ɛkola ɛnwu ye wɔ nvoninli ne anu. Meleam bizale Falo ara raalɛ ne kɛ: ‘Mengɔnvɛlɛ Yizilayɛnli raalɛ memaa ɔrava kakula ne ɔhɔnlea ye ɔmaa wɔ ɔ?’

Belemgbunli ara raalɛ ne zele kɛ: ‘Ɛhɛe, kɔ.’

Yemɔti Meleam hanle ɔ nwo ndɛndɛ hɔvɛlɛle ɔ nli. Mɔɔ Mosisi ɔ nli rale la, belemgbunli ara raalɛ ne zele kɛ: ‘Fa kakula ɛhye kɔ kɔnlea ye maa me na mebadua wɔ kakɛ.’

Yemɔti Mosisi ɔ nli nleanle ɔdaye mumua ne ɔ ra. Nzinlii mɔɔ Mosisi nyinle la, ɔ nli vale ye hɔmanle Falo ara raalɛ ne, na ɔtetele ye kɛ ɔdaye mumua ne ɔ ra nrenya. Ɛhye azo a ɔlua mɔɔ Mosisi ranyinle wɔ Falo sua nu a.