ƐZE raalɛ holɛ ko mɔɔ wɔ nvoninli ɛhye anu la ɔ? Ye duma a le Relɛbɛka. Na nrenya ne mɔɔ ɔlɛba yearayia ye la a le Ayezeke. Ɔlɛba yearayɛ ɔ ye. Kɛzi ɛhye rale ɛ?

Ɛnee Ayezeke ɔ ze Ebileham kpondɛ kɛ ɔnyia yelɛ kpalɛ ɔmaa ɔ ra nrenya ne. Ɛnee ɔmkpondɛ kɛ Ayezeke gya Keena mraalɛ ne mɔ bie, ɔluakɛ ɛnee menli ɛhye mɔ sonle awozonle. Ɔti Ebileham vɛlɛle ye sonvolɛ ne na ɔzele ye kɛ: ‘Mekpondɛ kɛ ɛsia ɛkɔ me nwo amra anu wɔ Hɛlan na ɛgya raalɛ ɛmaa me ra Ayezeke.’

Ɛkɛ ne ala Ebileham sonvolɛ ne vale afunlumu bulu na ɔzile nu ɔdule adenle tendendenlenle ne. Mɔɔ ɔbikyele ɛleka mɔɔ Ebileham anwo amra ne wɔ la, ɔgyinlanle bula bie anwo. Ɛnee aleɛ ɛlɛdwo, na ɛnee ɔle mekɛ mɔɔ mraalɛ mɔɔ wɔ suakpole ne azo la fa bato nzule fi bula ne anu a. Yemɔti Ebileham sonvolɛ ne yɛle nzɛlɛlɛ zele Gyihova kɛ: ‘Maa bɛlɛra ne mɔɔ kɛmaa me nzule ne bie kɛnlo na ɔkɛmaa afunlumu ne mɔ bie bɛkɛnlo la ɛyɛ sonla ne mɔɔ wɔkpa nu wɔye ye kɛ ɔyɛ Ayezeke aye la.’

Yeangyɛ biala Relɛbɛka rale kɛ ɔbaza nzule. Mɔɔ sonvolɛ ne zɛlɛle ye kɛ ɔmaa ye nzule ɔnlo la, ɔmanle ye bie. Na akee ɔhɔzale nzule ne bie ɔrɛlɛle afunlumu ne mɔ mɔɔ nzuhɔne ɛlɛku bɛ la amuala ɔmanle ɔzale bɛ. Ɛnee ɛhye ɛnle gyima ekyi ɔluakɛ afunlumu no nzule dɔɔnwo kpalɛ.

Mɔɔ Relɛbɛka yɛle ɛhye wiele la, Ebileham sonvolɛ ne bizale ye ɔ ze duma. Eza ɔbizale saa ɔbahola yeazokoɛ bɛ sua nu nɔsolɛ ne a. Ɔhanle kɛ: ‘Me ze a le Bɛtuwɛle, na yɛlɛ sua mɔɔ ɛbazokoɛ nu a.’ Ɛnee Ebileham sonvolɛ ne ze ye kɛ Ebileham adiema nrenya Neehɔ ara a le Bɛtuwɛle. Yemɔti ɔhotole na ɔlale Gyihova ase kɛ yeva ye yera Ebileham anwo amra sua nu la.

Kenle ko nɔe ne Ebileham sonvolɛ ne hanle deɛ mɔɔ ɔti yera la ɔhilele Bɛtuwɛle yɛɛ Relɛbɛka adiema nrenya Leeban. Bɛ mu nwiɔ bɛliele bɛdole nuhua kɛ ɔbahola ɔ nee Relɛbɛka ahɔ na yeahɔyɛ Ayezeke aye. Mɔɔ bɛhanle bɛhilele Relɛbɛka la boni a ɔhanle a? Ɔbuale kɛ, ‘Ɛhɛe,’ ɔkulo kɛ ɔ nee ye kɛhɔ. Yemɔti aleɛ hyenle ala la bɛvole afunlumu ne mɔ azo na bɛbɔle adenle tendendenlenle ne abo kɛ bɛsia bɛahɔ Keena.

Bɛhɔdwule la ɛnee aleɛ ɛlɛdwo. Relɛbɛka nwunle kɛ nrenya bie luolua ɛya ne anu. Ɛnee Ayezeke ɔ. Ɔnwunle Relɛbɛka la ɔ nye liele. Ɛnee ɔ nli Sɛla wule la yenyia ɛvolɛ nsa pɛ, na ɛnee ɔtɛdi nwolɛ nyane. Noko, akee Ayezeke rahulole Relɛbɛka kpole kpalɛ, na ɔ nye liele bieko.