EDWƐKƐ 21
Dwosefi Amediema Ne Mɔ Kpɔle Ye
NEA kɛzi kakula ne anwo ɛyɛ alɔbɔlɛ bie ɛ. Dwosefi ɛne. Kɛkala a ɔ mediema mrenya ne mɔ ɛdɔne ye ɛmaa mrenya ɛhye mɔ mɔɔ agyakɛ wɔ zo ɛlɛkɔ Yigyibiti la. Dwosefi kayɛ akɛlɛ wɔ ɛkɛ. Duzu ati a ɔ mediema mrenya ne mɔ ɛyɛ debie ɛtane ɛhye a? Ɔluakɛ bɛngulo Dwosefi edwɛkɛ la ati ɔ.
Ɛnee bɛ ze Gyekɔbo kulo Dwosefi edwɛkɛ kpalɛ. Ɔhulole ye edwɛkɛ ɔdɛlale bɛdabɛ mɔɔ ɛha la ɔlua tɛladeɛ tendenle kɛnlɛma bie mɔɔ ɔkpomgbale ɔmanle ye la azo. Na mɔɔ ɔ mediema mrenya mgbanyinli 10 ne nwunle kɛ Gyekɔbo kulo Dwosefi edwɛkɛ tɛla bɛ la, bɛangulo Dwosefi edwɛkɛ na bɛkpɔle ye. Noko debie bieko wɔ ɛkɛ mɔɔ ɔti bɛkpɔle ye a.
Dwosefi hanle ɛlalɛ nwiɔ. Wɔ Dwosefi ɛlalɛ ne amu nwiɔ anu, ɔ mediema ne mɔ bɔle bɛ ti aze manle ye. Mekɛ mɔɔ Dwosefi hanle ɛlalɛ ɛhye mɔ hilele ɔ mediema ne mɔ la, bɛ ɛkpɔlɛ ne akee yɛle kpole kpalɛ.
Kenle ko, mekɛ mɔɔ Dwosefi amediema mrenya mgbanyinli ne mɔ vale bɛ ze mboane ne mɔ hɔle adidi la, Gyekɔbo zoanle Dwosefi kɛ ɔhɔnlea saa ɔ mediema ne mɔ anwo le kpalɛ a. Mɔɔ Dwosefi amediema ne mɔ nwunle kɛ ɔlɛba la, bie mɔ hanle kɛ: ‘Bɛrɛla bɛmaa yɛhu ye!’ Noko Wulubɛn, zele kɛ: ‘Kyɛkyɛ, bɛmmaku ye!’ Emomu bɛhyele Dwosefi na bɛvuandinle ye bɛdole kuma bie mɔɔ nzule ɛnle nuhua la anu. Akee bɛdɛnlanle aze kɛ bɛdwenledwenle mɔɔ bɛbayɛ ye la anwo.
Mekɛ ɛhye anu bɛnwunle kɛ Yehyemeeyɛlema bie ɛlɛba. Dwuda zele ɔ ze amra ne mɔ kɛ: ‘Bɛmaa yɛdɔne ye yɛmaa Yehyemeeyɛlema ne mɔ.’ Na zɔhane ala a bɛyɛle a. Bɛdɔnenle Dwosefi dwɛtɛ fufule 20. Nea angomedi nee atisesebɛ mɔɔ ɛhye kile a!
Duzu a ɔ mediema ne mɔ baha ahile bɛ ze a? Bɛhunle abɔnkye ko na bɛvale Dwosefi tɛladeɛ kɛnlɛma ne bɛfofɔle abɔnkye ne mogya ne. Akee bɛvale tɛladeɛ ne bɛhɔle sua nu bɛvale bɛmanle bɛ ze Gyekɔbo na bɛzele kɛ: ‘Debie mɔɔ yɛnwu ye la ɛne. Nea saa Dwosefi tɛladeɛ ne a.’
Gyekɔbo nwunle kɛ yemɔ ɔ. Ɔdeanle nuhua kɛ: ‘Nane anwo ɛzulolɛ bie ɛhu Dwosefi.’ Na zɔhane ala a ɛnee Dwosefi amediema ne mɔ kpondɛ kɛ bɛ ze dwenle a. Gyekɔbo lile nyane kpole kpalɛ. Ɔzunle mekɛ dɔɔnwo. Noko ɛnee Dwosefi ɛtɛwule. Maa yɛnlea mɔɔ dole ye wɔ ɛleka mɔɔ bɛvale ye bɛhɔle la.
