ASOO ɛnwu mɔɔ Ebileham ɛlɛyɛ ye wɔ ɛke la ɔ? Ɔlɛ dadeɛ, na ɔzɔho kɛ ɔku ɔ ra ne. Duzu ati a ɔbayɛ ɛhye a? Mɔɔ lumua la, maa yɛnlea kɛ Ebileham nee Sɛla zi nyianle bɛ ra ne la.

Kakye kɛ, Nyamenle bɔle bɛ ɛwɔkɛ kɛ bɛbawo ralɛ nrenya. Noko ɛnee ɔle kɛ asɛɛ ɔnrɛyɛ boɛ la, ɔluakɛ ɛnee Ebileham nee Sɛla ɛnyi somaa. Noko akee, Ebileham liele lile kɛ Nyamenle bahola ayɛ mɔɔ le kɛ asɛɛ ɔnrɛyɛ boɛ la. Yemɔti boni a zile a?

Mɔɔ Nyamenle bɔle ye ɛwɔkɛ ne wiele la, ɛvolɛ mumua pɛle nu. Na akee, mɔɔ Ebileham lile ɛvolɛ 100 na Sɛla noko ɛli ɛvolɛ 90 la, bɛwole ralɛ nrenya mɔɔ bɛvɛlɛle ye Ayezeke a. Nyamenle ɛli ye ɛwɔkɛ zo!

Noko mɔɔ Ayezeke nyinle la, Gyihova zɔle Ebileham diedi nleanle. Ɔvɛlɛle ye kɛ: ‘Ebileham!’ Na Ebileham liele zolɛ kɛ: ‘Mewɔ ɛke!’ Akee Nyamenle zele kɛ: ‘Fa ɛ ra nrenya ne, ɛ ra kokye ne, Ayezeke, na kɔ boka mɔɔ mebahile wɔ la azo. Kɔhu ye bɔ afɔle maa me wɔ ɛkɛ.’

Nea kɛzi zɔhane edwɛkɛ ne manle Ebileham arɛle bɔle a, ɔluakɛ ɛnee Ebileham kulo ɔ ra ne kpalɛ kpalɛ. Na kakye kɛ, ɛnee Nyamenle ɛbɔ ɛwɔkɛ kɛ Ebileham abo zo amra badɛnla Keena azɛlɛ ne azo. Na saa Ayezeke wu a kɛ ɔkɛyɛ na ɛhye ara nu ɛ? Ɛnee Ebileham ɛnde ɛhye abo, noko akee ɔdiele Nyamenle.

Mɔɔ bɛdwule boka ne azo la, Ebileham kyekyele Ayezeke na ɔvale ye ɔdole afɔlemokyea ne mɔɔ yezi la azo. Akee ɔvale dadeɛ ne kɛ ɔku ɔ ra ne. Na ɛkɛ ne ala Nyamenle anwumabɔvolɛ deanle nu kɛ: ‘Ebileham, Ebileham!’ Na Ebileham liele zolɛ kɛ: ‘Mewɔ ɛke!’

Nyamenle zele kɛ: ‘Mmafa ɛ sa ɛka kakula ne anzɛɛ mmayɛ ye debie. Kɛkala menwu kɛ ɛlɛ me nu diedi, ɔboalekɛ wɔanva ɛ ra kokye ne wɔanyɛ me abokɛ.’

Nea diedi kpole mɔɔ Ebileham lɛ ye wɔ Nyamenle anu a! Ɔliele ɔlile kɛ debie biala ɛnle ɛkɛ mɔɔ Gyihova ɛngola ye yɛ a, na Gyihova bahola adwazo Ayezeke avi ewule nu bɔbɔ. Noko ɛnee tɛ Nyamenle ɛhulolɛdeɛ kpalɛ a le kɛ Ebileham bahu Ayezeke. Yemɔti Nyamenle manle boane bie vindele kpɔkɛ bie mɔɔ bikye ɛkɛ ne la anu, na ɔmanle Ebileham gyakyile ɔ ra ne na ɔvale boane ne ɔbɔle afɔle.