ƐVOLƐ nwiɔ ɛze ɛhɔ, na Dwosefi tɛda efiade. Sonvolɛ ne mɔɔ nea nza zo la ɛtɛkakyele ye. Na kenle ko nɔɔzo Falo hanle ɛlalɛ ɛzulolɛ nwiɔ, na ɛnee ɔnde mɔɔ bɛkile la abo. Asoo ɛnwu ye kɛ ɔla ɛkɛ ne ɔ? Aleɛ hyenle la Falo vɛlɛvɛlɛle ye nrɛlɛbɛvolɛma ne na ɔhanle ye ɛlalɛ ne mɔ ɔhile bɛ. Noko bɛangola bɛangile ye ɛlalɛ ne mɔ abo bɛangile ye.

Akee sonvolɛ ne mɔɔ nea nza zo la hakyele Dwosefi. Ɔzele Falo kɛ: ‘Mekɛ mɔɔ mela efiade la ɛnee nrenya bie wɔ ɛkɛ mɔɔ kola kile ɛlalɛ bo a.’ Ɛkɛ ne ala Falo manle bɛyele Dwosefi bɛvile efiade bɛrale.

Falo hanle ye ɛlalɛ ne mɔ hilele Dwosefi: ‘Menwunle nlankɛ mgbole, dɔlera nsuu. Na akee menwunle nlankɛ nwanlera, kengamgbaanwo nsuu noko. Na nwanlera ne mɔ hyele nlankɛ mgbole ne mɔ lile.

‘Wɔ me ɛlalɛ ne mɔɔ tɔ zo nwiɔ la anu, menwunle abɛlɛ mbaka mgbole nsuu mɔɔ ɛwɔlɔwɔlɔ baka ko anwo. Na akee menwunle abɛlɛ mbaka ɛtane ɛtane, mɔɔ aleɛ ɛnle nu la nsuu mɔɔ ɔdaye noko yewɔlɔ. Na abɛlɛ mbaka ɛtane ɛtane ne mɔ memenle abɛlɛ mgbole ne mɔ.’

Dwosefi buale Falo kɛ: ‘Ɛlalɛ nwiɔ ne abo le kokye. Nlankɛ mgbole nsuu ne nee abɛlɛ mbaka mgbole nsuu ne kile ɛvolɛ nsuu, yɛɛ nlankɛ nwanlera nsuu ne nee abɛlɛ mbaka ɛtane ɛtane nsuu ne kile ɛvolɛ nsuu bieko. Ɛvolɛ nsuu bara mɔɔ aleɛ babu kpole wɔ Yigyibiti azɛlɛ ye azo a. Akee ɛvolɛ nsuu badoa zo mɔɔ ɛhɔne kpole kpalɛ bara a.’

Yemɔti Dwosefi hanle hilele Falo kɛ: ‘Ye sonla mɔɔ anye gyi ɔ ti anwo na ɔze nrɛlɛbɛ, na maa ɔnlea aleɛ ɛboɔboalɛ zo wɔ ɛvolɛ kpalɛ ne mɔ anu. Amaa saa ɛvolɛ nsuu ɛhɔne ne mɔɔ doa ye la ba a, ɛhɔne angu menli ne ambɔ bɛ bo zo.’

Nzuzulɛ ne zɔle Falo anye. Na ɔyele Dwosefi kɛ ɔboɔboa aleɛ nloa, na ɔva ɔzie. Dwosefi rayɛle sonla kpole mɔɔ anwo hyia la wɔ Yigyibiti mɔɔ saa Falo ɛnle ɛkɛ a ɔdaye a ɔwɔ ɛkɛ a.

Ɛvolɛ mɔtwɛ anzi, wɔ ɛhɔne mekɛ ne anu, Dwosefi nwunle mrenya bie kɛ bɛlɛba. Ɛze bɛ menli holɛ ko ɔ? Ɔ mediema mgbanyinli 10 ne ɔ! Ɛnee bɛ ze Gyekɔbo ɛzoa bɛ wɔ Yigyibiti ɔluakɛ ɛnee aleɛ nwo ɛhyia wɔ bɛ sua zo Keena. Dwosefi nwunle ɔ mediema mrenya ne mɔ, noko bɛmɛ ɛdeɛ bɛannwu ye sonla holɛ. Ɛze deɛ mɔɔ ɔti bɛannwu ye la ɔ? Ɔluakɛ ɛnee Dwosefi ɛyɛ kpanyinli, na yeziezie ɔ nwo ngakyile.

Dwosefi hakyele kɛ mekɛ mɔɔ ɛnee ɔle kakula la ɔhanle ɛlalɛ mɔɔ ɛnee ɔ mediema mrenya ne mɔ ɛlɛbɔ bɛ ti aze bɛamaa ye a. Ɛkakye kɛ wɔgenga ɛhye anwo debie ɔ? Ɔti Dwosefi nwunle ye kɛ Nyamenle a ɛzoa ye ɛmaa yera Yigyibiti a, na ɔlua adwenle kpalɛ bie azo ati ɔ. Duzu a ɛsuzu kɛ Dwosefi yɛle a? Maa yɛnlea.