ASOO ɛze menli mɔɔ Daena ɛlɛkɔ ahɔkpɔla bɛ la? Ɔlɛkɔ ngakula mraalɛ bie mɔɔ bɛde Keena azɛlɛ ne azo la ɛkɛ. Asoo ɔ ze Gyekɔbo anye balie ɛhye anwo ɔ? Amaa wɔaye edwɛkɛ ɛhye anloa la, kakye mɔɔ Ebileham nee Ayezeke zuzule ye wɔ Keena mraalɛ ne mɔ anwo la.

Asoo ɛnee Ebileham kpondɛ kɛ ɔ ra Ayezeke gya Keena kakula raalɛ ɔ? Kyɛkyɛ, yeamkpondɛ ye zɔ. Asoo ɛnee Ayezeke nee Relɛbɛka kpondɛ kɛ bɛ ra Gyekɔbo gya Keena kakula raalɛ? Kyɛkyɛ, bɛangulo ye zɔ. Ɛze deɛ mɔɔ ɔti ɔrale ye zɔ la ɔ?

Ɔrale ye zɔ ɔluakɛ menli ɛhye mɔ mɔɔ wɔ Keena la ɛnee sonle awozonle. Ɛnee bɛnle menli mgbalɛ mɔɔ fɛta kɛ bɛ nee bɛ tɛnla kɛ kunlima nee yelɛma a, na ɛnee bɛnle menli mgbalɛ mɔɔ fɛta kɛ bɛfa bɛ agɔnwolɛ a. Ɔti yɛkola yɛnwu ye wienyi kɛ ɛnee Gyekɔbo anye ɛnrɛlie nwolɛ kɛ ɔ ra raalɛ ne ɛlɛfa Keena ngakula mraalɛ ɛhye mɔ agɔnwolɛ a.

Amgba noko, edwɛkɛ dole Daena. Ɛnwu Keenanli kpavolɛ ne mɔɔ wɔ nvoninli ne anu mɔɔ ɛlɛnea Daena la ɔ? Bɛfɛlɛ ye Hyikɛm. Kenle ko Daena hɔle kɛ ɔkakpɔla ɔ gɔnwo mɔ la, Hyikɛm hyele Daena mialera nu ɔ nee ye lale. Ɛhye le ɛtane, ɔluakɛ agyalɛ mrenya nee mraalɛ a ɔwɔ kɛ bɛ nee bɛ nwo da a. Ɛtane ɛhye mɔɔ Hyikɛm yɛle Daena la vale ngyegyelɛ dɔɔnwo rale.

Mekɛ mɔɔ Daena amediema mrenya ne mɔ dele mɔɔ ɛzi la, bɛvale ɛya kpole. Bɛ nuhua nwiɔ, Semɛyɔn nee Livae, vale ɛya dedee na bɛvale dadeɛ bɛhɔle mrenya ne mɔ anwo zo wɔ suakpole ne azo arɛlevilɛ nu. Bɛ nee bɛ mediema mrenya ne mɔ hunle Hyikɛm nee mrenya mɔɔ ɛha la amuala. Gyekɔbo vale ɛya wɔ ɛtane ɛhye mɔɔ ɔ mra mrenya ne mɔ yɛle la anwo.

Kɛ ngyegyelɛ ɛhye amuala zile bɔle ɔ bo ɛ? Ɔrale ye zɔ ɔluakɛ Daena vale menli mɔɔ bulu Nyamenle mɛla zo la agɔnwolɛ la ati ɔ. Yɛnrɛhulo kɛ yɛkɛva agɔnwolɛ zɛhae bie, ɔnle zɔ ɔ?