NGAKULA mrenya nwiɔ ne mɔɔ wɔ ɛke la le ngakyile, ɔnle zɔ ɔ? Asoo ɛze bɛ aluma? Yisɔ a le bɔvolɛ ne, yɛɛ mɔɔ ɛlɛnea mboane ne mɔ la a le Gyekɔbo.

Ayezeke nee Relɛbɛka amra ndalɛ a le Yisɔ nee Gyekɔbo. Ɛnee bɛ ze Ayezeke kulo Yisɔ kpalɛ, ɔluakɛ ɛnee ɔle bɔvolɛ kpalɛ na ɛnee ɔfa aleɛ ɔba sua nu ɔmaa abusua ne nyia bie di. Noko Relɛbɛka hulole Gyekɔbo kpole kpalɛ, ɔluakɛ ɛnee ɔle kakula mɔɔ le bɛtɛɛ na ɔ nwo dwo a.

Ɛnee nenya Ebileham tɛte aze, na yɛkola yɛnwu kɛzi Gyekɔbo anye balie kɛ ɔkɛhɔ ye ɛkɛ ɔkɛhɔdie Gyihova anwo edwɛkɛ a. Akee Ebileham nyianle ɛvolɛ 175 la ɔwule, na ɛnee ndalɛ ne mɔ ɛnyia ɛvolɛ 15.

Mɔɔ Yisɔ nyianle ɛvolɛ 40 la ɔgyale mraalɛ nwiɔ mɔɔ vi Keena la. Ɛhye manle Ayezeke nee Relɛbɛka lile nyane, ɔluakɛ mraalɛ ɛhye mɔ ɛnzonle Gyihova.

Na kenle ko, debie bie zile mɔɔ manle Yisɔ vale ɔ diema Gyekɔbo anwo ɛya kpole kpalɛ a. Mekɛ dwule mɔɔ ɛnee ɔwɔ kɛ Ayezeke yila ɔ ra kpanyinli ne a. Kɛmɔ Yisɔ tɛla Gyekɔbo kpanyinli la, ɛnee Yisɔ anye la kɛ ɔbanyia nyilalɛ ɛhye. Noko ɛnee Yisɔ ɛlumua ɛdɔne adenle mɔɔ ɔlɛ kɛ ɔnyia nyilalɛ ne la yemaa Gyekɔbo. Bieko, mekɛ mɔɔ bɛwole ngakula nwiɔ ne la ɛnee Nyamenle ɛha kɛ Gyekɔbo a banyia nyilalɛ ne a. Na ɛhye a ralɛ nu a. Ayezeke vale nyilalɛ ne manle ɔ ra Gyekɔbo.

Amozii, mɔɔ Yisɔ dele ɛhye la ɔvale Gyekɔbo anwo ɛya. Ɔvale ɛya dedee ɔhanle kɛ ɔkɔ yeahɔhu Gyekɔbo. Relɛbɛka dele ɛhye anwo bie la, ɔ rɛle bɔle. Ɔti ɔzele ɔ hu Ayezeke kɛ: ‘Ɔnrɛyɛ kpalɛ fee kɛ Gyekɔbo noko kɛgya Keena mraalɛ ne mɔ bie.’

Ɔlua ɛhye azo Ayezeke vɛlɛle ɔ ra nrenya Gyekɔbo na ɔzele ye kɛ: ‘Mmagya Keena mraalɛ ne mɔ bie. Emomu kɔ Hɛlan, wɔ nenya Bɛtuwɛle sua nu. Kɔgya ɔ ra nrenya Leeban amra mraalɛ ne mɔ bie.’

Gyekɔbo diele ɔ ze, na ɛkɛ ne ala ɔbɔle ye adenle tendendenlenle ne abo ɔhɔle Hɛlan, ɛleka mɔɔ ɔ nwo amra ne de la.