MOSISI ɛpɛ adenle toonwo ɛra Hɔlɛbe boka ne abo bakpondɛ ndile amaa ye mboane ne mɔ. Na ɔnwunle kpɔkɛ mɔɔ senle la nu ɔlɛsɔ, noko ɔnyela a!

Mosisi hanle ye ɔ ti anu kɛ: ‘Ɛhye yɛ nwanwane. Mebikye ye kpalɛ na meanwu ye boɛ.’ Mɔɔ ɔbikyele ye kpalɛ la, ɛnelɛ bie vi kpɔkɛ ne anu hanle kɛ: ‘Mmabikye ɛke bieko. Yeye wɔ mgbɔlaboa ne, ɔluakɛ azɛlɛ ne mɔɔ ɛgyi zolɛ la le nwuanzanwuanza.’ Ɛnee Nyamenle a lua anwumabɔvolɛ nwo zo ɛlɛtendɛ a, ɔti Mosisi hedale ɔ nyunlu.

Akee Nyamenle hanle kɛ: ‘Menwu me menli mɔɔ wɔ Yigyibiti la amaneɛnwunlɛ ne. Yemɔti mera kɛ mebalie bɛ, na wɔmɔ a mesoa wɔ meamaa wɔahɔye me menli ne wɔavi Yigyibiti a.’ Ɛnee Gyihova ɛlɛba arava ye menli ne ara Keena azɛlɛ kɛnlɛma ne azo.

Noko Mosisi hanle kɛ: ‘Menle awie. Kɛ mebazi meayɛ ɛhye ɛ? Na saa mekɔ a. Yizilayɛma ne babiza me kɛ, “Nwane a zoanle wɔ a?” Na saa bɛbiza me a, duzu a menga a?’

Nyamenle buale kɛ: ‘Ka ɛhye kile bɛ. “GYIHOVA mɔɔ le Ebileham Nyamenle ne, Ayezeke Nyamenle ne, nee Gyekɔbo Nyamenle ne ɛzoa me bɛ nwo ɛke.”’ Na Gyihova vale zɔle zolɛ kɛ: ‘Ɛhye a le me duma wɔ mekɛ mɔɔ ɛnlɛ awieleɛ.’

Mosisi yele ɔ nloa kɛ: ‘Na saa meka kɛ ɛdawɔ a ɛzoanle me na bɛanlie me bɛanli ɛ.’

Nyamenle bizale kɛ: ‘Duzu a ɛlɛ ye ɛ sa nu la?’

Mosisi buale kɛ: ‘Kpɔma ɔ.’

Nyamenle zele kɛ: ‘Fuandi to azɛlɛ ne anwo.’ Na Mosisi yɛle zɔ la, kpɔma ne hakyile ɛwɔlɛ. Akee Gyihova hilele Mosisi sɛkɛlɛneɛ bieko. Ɔhanle kɛ: ‘Fa ɛ sa wula wɔ tɛladeɛ ne anu.’ Mosisi yɛle, na mɔɔ ɔyele ɔ sa la, ɛnee yeyɛ fufule nwohyee kɛ ezukɔtweaba! Ɛsalɛ ne yɛle kɛ kokobɛ ɛdila ye la. Mɔɔ doa ye bieko la, Gyihova manle Mosisi tumi mɔɔ ɔbava yeayɛ sɛkɛlɛneɛ mɔɔ tɔ zolɛ nsa la. Awieleɛ kolaa ne ɔhanle kɛ: ‘Saa ɛyɛ sɛkɛlɛneɛ ɛhye mɔ a Yizilayɛma balie ali kɛ medame a mezoa wɔ a.’

Ɛhye anzi, Mosisi hɔle sua nu hɔhanle hilele Gyɛtulo kɛ: ‘Mesɛlɛ wɔ, maa me adenle maa menzia mengɔ Yigyibiti mengɔnea saa me nwo amra tɛte ngoane nu a.’ Yemɔti Gyɛtulo kponlenle zolɛ kɛ Mosisi ɛhɔ anzondwolɛ nu, na Mosisi bɔle ye adenle mɔɔ ɔtu yeazia yeahɔ Yigyibiti la abo.