NEA Mosisi mɔɔ ɛlɛnriandi avi Yigyibiti la. Ɛnwu mrenya ne mɔ mɔɔ ɛlɛfoa ye la ɔ? Asoo ɛze deɛ mɔɔ ɔti bɛkpondɛ kɛ bɛku Mosisi la? Maa yɛnlea saa yɛkɛnwu ye a.

Mosisi nyinle wɔ Falo, Yigyibiti belemgbunli ne sua nu. Ɔrayɛle sonla kpole mɔɔ ze nrɛlɛbɛ a. Ɛnee Mosisi ze ye kɛ ɔnle Yigyibitinli, na ye awovolɛma kpalɛ kpalɛ ne le Yizilayɛma mɔɔ le ngɛkɛlɛ a.

Kenle ko, mɔɔ ɛnee Mosisi ɛnyia ɛvolɛ 40 la, ɔyɛle kɛ ɔkanlea kɛ ye menli ne mɔ anwo de la. Ɛnee kɛzi bɛyɛ bɛ la ɛnle kpalɛ fee zɛhae. Ɔnwunle kɛ Yigyibitinli bie ɛlɛbo Yizilayɛ ngɛkɛlɛ ne mɔ anu ko. Mosisi totole ɔ nye na yeannwu awie biala kɛ ɔlɛnea ye la, ɔbɔle Yigyibitinli ne, na Yigyibitinli ne wule. Akee Mosisi vunle ye veale ɛnwea ne anu.

Aleɛ hyenle la Mosisi hɔle kɛ ɔkanlea ye menli ne bieko. Ɛnee ɔdwenle kɛ ɔbahola yeaboa bɛ na bɛangɔ zo bɛanyɛ ngɛkɛlɛ bieko. Noko ɔnwunle Yizilayɛma nwiɔ kɛ bɛlɛko, yemɔti Mosisi zele nuhua ne mɔɔ anyɛ ye boɛ la kɛ: ‘Duzu ati a ɛlɛbo ɛ gɔnwo ɛ?’

Nrenya ne buale kɛ: ‘Nwane a yɛle wɔ yɛ nwo zo neavolɛ nee ndɛnebuavolɛ a? Ɛkpondɛ kɛ ɛku me kɛmɔ ɛhunle Yigyibitinli ne la ɔ?’

Akee Mosisi zulole. Ɔnwunle kɛ menli ɛde mɔɔ ɔyɛle Yigyibitinli ne la. Falo bɔbɔ dele nwolɛ bie, na ɔzoanle menli kɛ bɛhɔhu Mosisi. Ɛhye ati a ɛnee ɔwɔ kɛ Mosisi nriandi fi Yigyibiti a.

Mɔɔ Mosisi vile Yigyibiti la, ɔhɔle Medean azɛlɛ mɔɔ wɔ moamoa la azo. Ɛkɛ ne a ɔnwunle Gyɛtulo abusua ne a, na ɔgyale ɔ mra mraalɛ ne mɔ ko mɔɔ bɛfɛlɛ ye Zepɔla la. Mosisi rayɛle mboaneneavolɛ na ɔnleanle Gyɛtulo mboane ne mɔ. Ɔdɛnlanle Medean azɛlɛ zo ɛvolɛ 40. Ɛnee akee yenyia ɛvolɛ 80. Na kenle ko, mɔɔ ɛnee Mosisi ɛlɛnea Gyɛtulo mboane ne la, edwɛkɛ nwanwane bie zile mɔɔ hakyile Mosisi asetɛnla bɔkɔɔ a. Kɔ mukelɛ ne mɔɔ doa ye la, na maa yɛnlea nwanwane debie holɛ ko mɔɔ zile la.