WƆDE kɛ asoaso bie ɛdendɛ ɛlɛ ɔ? Bie a ɛbaha kɛ, ‘Kyɛkyɛ, nane ɛndendɛ.’ Noko Baebolo ne ka asoaso bie mɔɔ ɔdendɛle la anwo edwɛkɛ. Maa yɛnlea kɛzi ɔrale ye zɔ la.

Ɛnee asɛɛ Yizilayɛma ne ɛdwu Keena azɛlɛ ne azo. Mowabema belemgbunli Beelake ɛnee sulo Yizilayɛma ne mɔ. Yemɔti ɔmanle bɛhɔvale nrenya nrɛlɛbɛvolɛ bie mɔɔ bɛfɛlɛ ye Beelam la kɛ ɔrawa Yizilayɛma amonle. Beelake bɔle Beelam ɛwɔkɛ kɛ ɔbamaa ye ezukoa dɔɔnwo, ɔti Beelam vole dɛnlanle ye asoaso ne azo na ɔbɔle ɔ bo kɛ ɔkɔ Beelake ɛkɛ.

Ɛnee Gyihova ɛngulo kɛ Beelam kɛwa Ye menli ne amonle. Yemɔti ɔmanle ye anwumabɔvolɛ vale dadeɛ tendenle bie hɔgyinlanle adenle ne anu kɛ ɔzi Beelam adenle. Beelam ɛnnwu anwumabɔvolɛ ne, noko ye asoaso ne nwu ye. Ɔti asoaso ne bɔle mɔdenle kɛ ɔtwe ɔ nwo ahane yeavi anwumabɔvolɛ ne anyunlu, na amozii ɔbutule adenle ne anu. Beelam vale ɛya kpole, na ɔvale baka ɔfinle ye asoaso ne.

Akee Gyihova manle Beelam dele kɛ ye asoaso ne ɛlɛtendɛ ahile ye. Asoaso ne bizale ye kɛ: ‘Duzu bɔbɔ yɛɛ meyɛ wɔ mɔɔ yemɔti wɔfi me a?’

Beelam buale ye kɛ: ‘Wɔyɛ me koasea. Saa, melɛ dadeɛ a anrɛɛ mehu wɔ!’

Asoaso ne bizale ye kɛ: ‘Asoo meyɛ wɔ zɛhae ɛlɛ?’

Beelam buale kɛ: ‘kyɛkyɛ.’

Akee Gyihova manle Beelam nwunle anwumabɔvolɛ ne kɛ ɔlɛ dadeɛ ɔgyi adenle ne anu. Anwumabɔvolɛ ne zele ye kɛ: ‘Duzu ati a wɔfi wɔ asoaso ne ɛ? Mera kɛ mebazi wɔ aze, ɔluakɛ ɔnle kɛ ɛkɔwa Yizilayɛma amonle. Saa wɔ asoaso ne anyɛ zɔhane a anrɛɛ mehu wɔ, na megyakyi wɔ asoaso ne.’

Beelam buale kɛ: ‘Meyɛ ɛtane. Menze kɛ ɛgyi adenle ne anu.’ Anwumabɔvolɛ ne manle Beelam hɔle, na Beelam hɔnwunle Beelake. Ɔbɔle mɔdenle bieko kɛ ɔwa Yizilayɛ amonle, noko akee, Gyihova manle ɔyilalɛ Yizilayɛ fane nsa.