NEA mɔɔ nrenya ne ɛlɛfu awula ye ɛdanlɛ sua ne anu la! Tɛladeɛ kɛnlɛma, ezukoa nvutuke kpɔma ko, nee dwɛtɛ fufule. Ɔvale ɔvile suakpole Gyɛleko azo. Noko duzu a anrɛɛ ɔwɔ kɛ bɛyɛ Gyɛleko ninyɛne ne mɔ a? Ɛkakye ɔ?

Ɛnee ɔwɔ kɛ bɛsɛkye ɔ muala, na bɛfa ezukoa nvutuke ne nee dwɛtɛ fufule ne bɛkɔgua Gyihova gya ne mɔɔ wɔ ɛzonlenlɛ sua ne anu la anu. Ɔti menli ɛhye andie Nyamenle. Bɛwua debie mɔɔ le Nyamenle ɛdeɛ la. Bɛfɛlɛ nrenya ne Ekan, na ye abusua ne anu amra bie a boka ɔ nwo la. Maa yɛnlea mɔɔ ɔzile la.

Ekan wuale ninyɛne ɛhye mɔ wiele la anzi, Dwɔhyua zoanle menli bie kɛ bɛ nee Eyae ɛhɔho. Noko bɛbole bɛ dwɛɛ. Bɛhunle bie mɔ, na mɔɔ hale la guale ɛbɔ nu. Dwɔhyua lile alɔbɔlɛ kpole. Ɔbutule na ɔzɛlɛle Gyihova kɛ: ‘Duzu ati yɛɛ wɔye yɛ wɔmaa a?’

Gyihova buale kɛ: ‘Dwazo! Yizilayɛ ɛyɛ ɛtane. Bɛva ninyɛne ne mɔɔ ɔwɔ kɛ bɛsɛkye bɛ anzɛɛ bɛfa bɛkɔ Gyihova ɛzonlenlɛ sua ne anu la bie. Bɛwua tɛladeɛ kɛnlɛma bie na bɛva bɛvea. Menrɛyila wɔ kyesɛ ɛsɛkye bɛ, nee ahenle mɔɔ ɔvale ninyɛne ɛhye mɔ la.’ Gyihova zele Dwɔhyua kɛ ɔbahile ye zɔhane ɛtanevolɛ ne.

Yemɔti Dwɔhyua boɔboale menli ne kɔsɔɔti anloa, na Gyihova yele Ekan, ɛtanevolɛ ne. Ekan buale kɛ: ‘Meyɛ ɛtane. Menwunle tɛladeɛ kɛnlɛma ne, nee ezukoa nvutuke kpɔma ne yɛɛ dwɛtɛ fufule ne. Ɔyɛle me kɛnlɛma ɔti menvale. Mevu mewula me ɛdanlɛ sua ne anu.’

Bɛnwunle ninyɛne ne na bɛvale bɛrɛlɛle Dwɔhyua la, ɔzele Ekan kɛ: ‘Duzu ati a wɔva ngyegyelɛ ɛhye wɔdo yɛ nwo ɛ? Gyihova bava bie ado ɛ nwo ɛnɛ!’ Akee menli ne amuala zile Ekan nee ye abusua ne awolɛ na bɛhunle bɛ. Asoo ɛhye ɛngile kɛ ɔnle kɛ yɛfa ninyɛne mɔɔ ɔnle yɛ ɛdeɛ la ɔ?

Ɛhye anzi Yizilayɛma nee Eyae hɔhonle bieko. Akee Gyihova boale ye menli ne mɔ, na bɛlile konim.