WƆBƆ ɛwɔkɛ bie mɔɔ akee amozii ɛnwunle kɛ ɔyɛ se kɛ ɛkɛli zolɛ la ɛlɛ ɔ? Zɔhane a ɛdo nrenya ne mɔɔ wɔ nvoninli ɛhye anu la, na yemɔti a ɔlɛdi alɔbɔlɛ a. Bɛfɛlɛ ye Gyɛfeta na ɔle Yizilayɛ ndɛnebuavolɛ mɔɔ lɛ akɛnrasesebɛ a.

Gyɛfeta dɛnlanle aze wɔ mekɛ mɔɔ ɛnee Yizilayɛma ɛgyakyi Gyihova ɛzonlenlɛ la. Bɛbɔle ɔ bo bɛyɛle ninyɛndane bieko. Ɔti Gyihova manle Amɔnoma duale bɛ kakɛ soo. Ɛhye manle Yizilayɛma zunle vɛlɛle Gyihova kɛ: ‘Yɛyɛ ɛtane yɛtia wɔ. Yɛsɛlɛ wɔ, die yɛ!’

Menli ne nlunle bɛ nwo wɔ bɛ ɛtane nwo. Akee bɛbɔle ɔ bo bɛzonlenle Gyihova bieko. Ɔti Gyihova boale bɛ bieko.

Menli ne yele Gyɛfeta manle ɔ nee Amɔnoma honle. Ɛnee Gyɛfeta kulo kɛ Gyihova boa ye wɔ konle ne anu. Yemɔti ɔbɔle Gyihova ɛwɔkɛ kɛ: ‘Saa ɛmaa medi Amɔnoma anwo zo konim, na mesia meara sua nu, na awie biala mɔɔ kɛlumua kɛvi me sua nu ɛkɛ ne kɛvinde kɛ ɔbayia me la, mebava ye meamaa wɔ.’

Gyihova diele Gyɛfeta ɛwɔkɛ ne na ɔboale ye ɔmanle ɔlile konim. Gyɛfeta sia ara sua nu la, ɛze awie mɔɔ lumuale kɛ ɔbayia ye ɔ? Ɔ ra raalɛ ne, mɔɔ le ɔ ra kokye la ɔ. Gyɛfeta deanle nu kɛ: ‘Oo me ra! Duzu ati a wɔde me ɛbolɛ kpole zɛhae ɛ? Noko mebɔ Gyihova ɛwɔkɛ, na metwe mesia a ɔnyɛ boɛ.’

Mekɛ mɔɔ Gyɛfeta ara raalɛ ne dele ye ɛwɔkɛ ne la, mɔlebɛbo ne ɔdaye noko ɔrɛle bɔle. Ɔboalekɛ ɛnee ɛwɔkɛ ne kile kɛ ɔwɔ kɛ ɔfi ɔ ze nee ɔ gɔnwo mɔ amuala anwo. Na ye ngoane mekɛ muala anu ɔbazonle Gyihova wɔ ye ɛzonlenlɛ sua ne mɔɔ wɔ Hyaelo la anu. Yemɔti ɔzele ɔ ze kɛ: ‘Saa wɔbɔ Gyihova ɛwɔkɛ a, ɛnee ɔwɔ kɛ ɛdi zolɛ.’

Ɔti Gyɛfeta ara raalɛ ne hɔle Hyaelo, na ɔzonlenle wɔ Gyihova ɛzonlenlɛ sua ne anu wɔ ye ngoane mekɛ muala anu. Ɛvolɛ biala dwu a Yizilayɛ mraalɛ kɔkpɔla ye wɔ ɛzonlenlɛ sua ne anu kenle nna, na bɛbɔ nu bɛdie bɛ nye. Menli ne hulole Gyɛfeta ara raalɛ ne edwɛkɛ ɔluakɛ ɛnee ɔle Gyihova sonvolɛ kpalɛ.