ASOO ɛhye zɔho ɛwɔlɛ kpalɛ mɔɔ bɛva bɛbeba baka ne anwo ɔ? Kyɛkyɛ. Bɛva kɔbele a bɛyɛ ɛwɔlɛ ne a. Gyihova hanle hilele Mosisi kɛ ɔva ɔhenda baka zo amaa menli ne anlea na bɛanyia ngoane. Noko nwɔlɛ ne mɔɔ wɔ azɛlɛ ne anwo la le nwɔlɛ mgbalɛ. Bɛkeka menli ne mɔ, na bɛmaa bɛ nwo ɛdo bɛ. Ɛze deɛ mɔɔ ɔti yera ye zɔ la ɔ?

Yizilayɛma ne mɔ ɛdendɛ ɛtia Nyamenle nee Mosisi la ati ɔ. Bɛse: ‘Duzu ati yɛɛ bɛva yɛ bɛvi Yigyibiti kɛ yɛrawu wɔ fienemgbole ye anu ɛ? Nzule nee aleɛ bɔbɔ ɛnle ɛke. Mana aleɛ funli ɛhye yɛnrɛhola bieko di.’

Noko mana ne le aleɛ kpalɛ. Gyihova lua nwanwane adenle zo a yeva yemaa bɛ a. Eza ɔlua nwanwane adenle zo a yemaa bɛ nzule a. Noko menli ne angile anyezɔlɛ wɔ ɛhye mɔ mɔɔ Nyamenle ɛyɛ ɛmaa bɛ la anwo. Ɔti Gyihova zoanle nwɔlɛ anwo ɛzulolɛ ɛhye mɔ vale hwenle Yizilayɛma anzo. Nwɔlɛ ne mɔ kekale bɛ na bɛ nuhua dɔɔnwo wule.

Awieleɛ kolaa ne menli ne rale Mosisi anwo ɛkɛ ne, na bɛhanle kɛ: ‘Yɛyɛ ɛtane, ɔluakɛ yɛdendɛ yɛtia Gyihova nee ɛdawɔ. Sɛlɛ Gyihova maa ɔmaa nwɔlɛ ɛhye mɔ ɛhɔ.’

Yemɔti Mosisi zɛlɛle manle menli ne. Na Gyihova hanle hilele Mosisi kɛ ɔyɛ kɔbele ɛwɔlɛ ɛhye. Ɔse ɔva ɔhenda baka zo, na ɔwɔ kɛ awie biala mɔɔ ɛwɔlɛ kɛha ye la nea. Mosisi yɛle mɔɔ Nyamenle hanle hilele ye la. Na menli mɔɔ ɛwɔlɛ hale bɛ la dole bɛ nye nleanle kɔbele ɛwɔlɛ ne na bɛdele kpɔkɛ bieko.

Yɛsukoa debie yɛfi ɛhye anu. Wɔ adenle bie azo, yɛ muala yɛle kɛ Yizilayɛma ne mɔ mɔɔ nwɔlɛ ne kekale bɛ la. Yɛ muala yɛlɛwu. To ɛ nye nea ɛleka mɔɔ ɛde la, na ɛbanwu ye kɛ menli yɛ mgbanyinli, bɛ nwo to bɛ, na bɛwu. Ɔluakɛ raalɛ nee nrenya mɔɔ lumua la, Adam nee Yive hwenle bɛ nwo vile Gyihova adehilelɛ bo, na yɛdayɛ noko yɛle bɛ mra la ati a yera ye zɔ a. Noko Gyihova ɛyɛ nziezielɛ mɔɔ bamaa yɛadɛnla aze dahuu a.

Gyihova zoanle ɔ Ra, Gyesɛse Kelaese, rale azɛlɛ ye azo. Bɛhendanle Gyesɛse wɔ baka zo, ɔluakɛ ɛnee menli dɔɔnwo suzu kɛ ɔle ɛtanevolɛ. Noko Gyihova vale Gyesɛse manle kɛ ɔlie yɛ ngoane. Saa yɛfa yɛ nwo yɛto ɔ nwo zo, na yɛdi ɔ nzi a, yɛbahola yɛanyia dahuu ngoane. Yɛbazukoa ɛhye anwo edwɛkɛ dɔɔnwo amozii.