OO, OO! Duzu a menli ne ɛlɛyɛ la? Bɛlɛsonle ɛnlankɛ ralɛ! Duzu ati a bɛlɛyɛ ɛhye a?

Mekɛ mɔɔ Mosisi hyɛle wɔ boka ne azo na ɔmba la, menli ne zele kɛ: ‘Yɛnze mɔɔ ɛzi Mosisi anwo zo a. Yemɔti bɛmaa yɛyɛ nyamenle na ɔli yɛ nyunlu yɛvi azɛlɛ ɛhye azo.’

Mosisi adiema Aalɔn zele bɛ kɛ: ‘Mede. Bɛyeye bɛ ezukoa nvutuke asomadeɛ ne mɔ bɛrɛlɛ me.’ Mekɛ mɔɔ menli ne yeyele rale la, Aalɔn holole guale nvutuke ɛnlankɛ ralɛ. Na menli ne hanle kɛ: ‘Yɛ Nyamenle ne mɔɔ yele yɛ vile Yigyibiti la ɛne!’ Akee Yizilayɛma ne mɔ dole ɛkponle kpole bie, na bɛzonlenle nvutuke ɛnlankɛ ralɛ ne.

Mɔɔ Gyihova nwunle ɛhye la, ɔvale ɛya kpole. Yemɔti ɔhanle ɔhilele Mosisi kɛ: ‘Maa ɔyɛ ndɛndɛ tolo kɔ. Menli ne mɔ ɛlɛyɛ ɛtane kpole. Bɛkpo me mɛla ne na bɛlɛsonle nvutuke ɛnlankɛ ralɛ.’

Mosisi tolole boka ne ndɛndɛ. Na mɔɔ ɔbikyele bɛ la, mɔɔ ɔnwunle ye la ɛne. Menli ne ɛlɛto edwɛne na bɛlɛsi agole bɛabɔ nvutuke ɛnlankɛ ralɛ ne anwo mgbɔlɛka bayia! Mosisi vale ɛya kpole na ɔvuandinle awolɛ ndɛbandɛba ne mɔɔ mɛla ne wɔ zolɛ la ɔguale aze, ɔbubule bɛ bɔkɔɔ. Akee ɔvale nvutuke ɛnlankɛ ralɛ ne na ɔholole ye. Akee ɔdinle ɔmanle ɔyɛle motomoto kɛ pawoda.

Menli ne ɛyɛ ɛtane kpole kpalɛ. Ɔti Mosisi hanle hilele mrenya ne mɔ bie kɛ bɛva bɛ dadeɛ ne mɔ. Mosisi zele kɛ: ‘Ɔwɔ kɛ menli mɔɔ zonlenle nvutuke ɛnlankɛ ne la kɔsɔɔti wu.’ Yemɔti mrenya ne mɔ hunle menli ne anu 3,000! Asoo ɛhye ɛngile kɛ ɔwɔ kɛ yɛnea boɛ kɛ yɛbazonle Gyihova angomekye, na yɛnrɛzonle adalɛ nyamenle biala ɔ?