NEA Dwɔhyua. Ɔlɛka kɛ: ‘Sɛnzɛne, mmatu ɛ bo!’ Amgba sɛnzɛne ne gyinlanle. Ɔgyinlanle ɛleka ko kenle ko ne amuala. Gyihova a yɛle ye zɔ a! Noko maa yɛnlea deɛ mɔɔ ɔti Dwɔhyua kulo kɛ sɛnzɛne ne kɔ zo gyinla la.

Mekɛ mɔɔ arelemgbunli nnu ne mɔɔ vi Keena azɛlɛ ne azo la bɔle ɔ bo kɛ bɛ nee Gebɛyɔnoma ne mɔ ko la, Gebɛyɔnoma ne zoanle awie kɛ ɔhɔvɛlɛ Dwɔhyua ɔmaa ɔraboa bɛ. Ɔse: ‘Bɛla ndɛndɛ! Balie yɛ ngoane! Arelemgbunli mɔɔ wɔ awoka ne mɔ azo lɔ la ɛbɔ nu ɛra nee wɔ ngɛkɛlɛ baho.’

Ndɛndɛ ne ala Dwɔhyua nee ye ɛlɔnema ne hɔle. Bɛdiale nɔe ne toonwo bɛhɔle. Bɛdwule Gebɛyɔn la, ɛzulolɛ hanle arelemgbunli nnu ne ɛlɔnema ne na bɛbɔle ɔ bo kɛ bɛnriandi. Gyihova manle ezuawolɛ mgbole vi anwuma dɔle guale bɛ nwo zo, na menli mɔɔ ezuawolɛ ne hunle bɛ la zonle tɛla mɔɔ Dwɔhyua ɛlɔnema ne mɔ hunle bɛ la.

Dwɔhyua nwunle kɛ ɔnrɛhyɛ sɛnzɛne ne badɔ. Awozinli bara, na arelemgbunli nnu ne ɛlɔnema ne bava bɛ nwo kɔlɔɔnwo anriandi. Ɛhye ati Dwɔhyua yɛle asɔne na ɔhanle ɔhilele Gyihova kɛ: ‘Sɛnzɛne, mmatu ɛ bo!’ Mekɛ mɔɔ sɛnzɛne ne gyinlanle la, Yizilayɛma ne holale wiele bɛ konimlilɛ wɔ konle ne anu bɔkɔɔ.

Arelemgbunli atisesebɛ dɔɔnwo wɔ Keena azɛlɛ ne azo mɔɔ bɛkpɔ Nyamenle menli a. Dwɔhyua nee ye ɛlɔnema ne vale ɛvolɛ nsia na bɛahola bɛadu arelemgbunli 31 wɔ azɛlɛ ne azo. Bɛwiele la Dwɔhyua nleanle manle bɛhyehyɛle Keena azɛlɛ ne anu bɛmanle mbusua ne mɔɔ ɛnee bɛtɛnyianle azɛlɛ ne bie la.

Ɛvolɛ dɔɔnwo anzi, Dwɔhyua wule wɔ mekɛ mɔɔ ɛnee yeli ɛvolɛ 110. Mekɛ mɔɔ ɔ nee ɔ gɔnwo mɔ de aze la, maanle ne diele Gyihova. Noko mekɛ mɔɔ menli mgbalɛ ɛhye mɔ wule la, menli ne bɔle ɔ bo kɛ bɛyɛ ninyɛndane mɔɔ ɔnfɛta la na ɛhye manle bɛyiale ngyegyelɛ dɔɔnwo. Mekɛ ɛhye anu ɛnee akee bɛhyia Nyamenle moalɛ amgba.