ƐZE nrenya bie mɔɔ anwo yɛ se kpalɛ mɔɔ ɛdɛnla aze ɛlɛ la duma ɔ? Ɔle ndɛnebuavolɛ mɔɔ bɛfɛlɛ ye Samesɛn. Gyihova a manle Samesɛn anwosesebɛ a. Kolaa na bawo Samesɛn bɔbɔ la, Gyihova hanle hilele ɔ nli kɛ: ‘Ɔnrɛhyɛ ɛbawo ralɛ nrenya. Na yemɔ yɛɛ ɔbalie Yizilayɛma yeavi Filisitiama asa nu a.’

Filisitiama le ɛtanevolɛma mɔɔ de Keena. Bɛlɛ ɛlɔnema dɔɔnwo, na bɛgyegyele Yizilayɛma kpalɛ. Kenle ko mɔɔ Samesɛn lua adenle nu ɔlɛkɔ ɛleka mɔɔ Filisitiama ne mɔ de la, ɔnwunle kɛ awenade kpole bie ɛlɛkpo arayia ye. Na Samesɛn vale ɔ sa mgbane hunle awenade ne. Eza ɔhunle Filisitiama mɔɔ di ɛtane la anu ɛya ɛya dɔɔnwo.

Amozii Samesɛn nwunle raalɛ bie mɔɔ bɛfɛlɛ ye Dɛlaela la na ɔhulole ye. Filisitiama mgbanyima bɔle Dɛlaela ɛwɔkɛ kɛ saa ɔkola ɔkile debie mɔɔ maa Samesɛn anwo yɛ se la a bɛ nuhua ko biala bamaa ye dwɛtɛ fufule 1,100. Dɛlaela kulo kɛ ɔnyia ezukoa ɛhye amuala. Ɛnee ɔnle Samesɛn anzɛɛ Nyamenle menli agɔnwo kpalɛ. Yemɔti ɔhɔle zolɛ ɔbizale Samesɛn alehyenlɛ ko biala kɛ ɔhile ye deɛ mɔɔ maa ɔ nwo yɛ se la.

Awieleɛ kolaa ne, Samesɛn hanle ɛleka mɔɔ ye anwosesebɛ ne wɔ la ɔhilele Dɛlaela. Ɔse: ‘Dadeɛ dɛma ɛtɛkanle me ti enrinli ɛlɛ. Ɔluakɛ ɔvi mekɛ mɔɔ bɛwole me la, Nyamenle kpale me kɛ ye sonvolɛ titile mɔɔ bɛfɛlɛ ye Tusiemaa-Nyamenle anzɛɛ Nazalaete. Saa bɛkpa me ti enrinli ne a me anwosesebɛ ne bavi me nu.’

Dɛlaela dele ye zɔ la ɔmanle Samesɛn lafele ɔ gyakɛ azo. Akee ɔvɛlɛle nrenya bie ɔmanle ɔrakpale ɔ ti enrinli ne. Samesɛn vi nlafelɛ nu dwazole la, ɛnee ye anwosesebɛ ne ɛvi ye nu. Filisitiama ne rale na bɛrahyele ye. Bɛdudule ɔ nye nwiɔ ne, na bɛyɛle ye bɛ akɛlɛ.

Kenle ko Filisitiama ne yiale dole ɛkponle kpole bie manle bɛ nyamenle Deegɔn, na bɛvale Samesɛn bɛrale kɛ bɛgolo ɔ nwo. Zɔhane mekɛ ne ɛnee Samesɛn ati enrinli ne ɛvi bieko. Samesɛn hanle hilele kakula nrenya ne mɔɔ ɔlɛ ɔ sa ɔlɛkile ye adenle la kɛ: ‘Maa mensosɔ mpila ne mɔɔ lɛ sua ye la anu.’ Akee Samesɛn zɛlɛle Gyihova kɛ ɔmaa ye anwosesebɛ, na ɔzɔle mpila ne mɔ anu. Ɔdeanle nu kɛ: ‘Maa me nee Filisitiama ye ɛwu.’ Mekɛ mɔɔ Samesɛn tiale mpila ne mɔ la, ɔbule ɔguale Filisitiama 3,000 mɔɔ ɛnee wɔ ɛkponledolɛ ne abo la anwo zo na ɔhunle ɛtanevolɛma ɛhye mɔ amuala.