WƆ BAEBOLO ne anu ɛbanwu buluku bie mɔɔ bɛfɛlɛ ye Wulutu. Ɔka abusua bie mɔɔ dɛnlanle aze wɔ mekɛ mɔɔ ɛnee ndɛnebuavolɛma a sie Yizilayɛ la anwo edwɛkɛ. Wulutu le bɛlɛra mɔɔ vi Mowabe azɛlɛ zo; ɔmboka Nyamenle menli Yizilayɛma anwo. Noko mekɛ mɔɔ Wulutu zukoale nɔhalɛ Nyamenle Gyihova ne anwo debie la, ɔnyianle ɛhulolɛ kpole ɔmanle ye. Nawome le raalɛ kpanyinli mɔɔ boale Wulutu manle ɔzukoale Gyihova anwo debie a.

Nawome le Yizilayɛnli raalɛ. Ɔ nee ɔ hu yɛɛ ɔ mra mrenya nwiɔ hɔdɛnlanle Mowabe azɛlɛ zo wɔ mekɛ mɔɔ ɛnee aleɛ nwo ɛyɛ se wɔ Yizilayɛ la. Kenle ko Nawome ahu ne wule. Amozii Nawome amra mrenya ne mɔ gyale Mowabe mbɛlɛra nwiɔ mɔɔ bɛfɛlɛ bɛ Wulutu nee Ɔpa. Noko ye ɛvolɛ kɛyɛ 10 anzi, Nawome amra mrenya nwiɔ ne wule. Nea alɔbɔlɛ kpole mɔɔ Nawome nee mbɛlɛra nwiɔ ne lile a! Duzu a akee Nawome bayɛ a?

Kenle ko Nawome bɔle kpɔkɛ kɛ ɔtu adenle tendenle ne yeazia yeahɔ ye sua zo. Wulutu nee Ɔpa kulo kɛ bɛ nee ye tɛnla, ɔti bɛ nee ye hɔle. Noko bɛdwule adenle nu la, Nawome zele mbɛlɛra ne mɔ kɛ: ‘Bɛzia, awie biala ɛhɔ ɔ nli sua nu.’

Nawome vole bɛ nloa anwo na ɔhɛlale bɛ. Ɛkɛ ne ala bɛdukuele nu bɛzunle, ɔluakɛ ɛnee bɛkulo Nawome kpalɛ kpalɛ. Bɛzele kɛ: ‘Kyɛkyɛ! Yɛ nee wɔ kɔ ɛleka mɔɔ ɛvi la.’ Na Nawome buale bɛ kɛ: ‘Me mra mraalɛ, bɛzia bɛhɔ. Ɔbayɛ kpalɛ yeamaa bɛ wɔ bɛ sua zo.’ Ɔti Ɔpa ziale. Na Wulutu ɛdeɛ, yeamkponle kɛ ɔkɛzia.

Nawome hakyile ɔ nwo na ɔzele ye kɛ: ‘Ɔpa ɛzia ɛhɔ. Ɛdawɔ noko toa ye ɛ nee ye bɛhɔ.’ Noko Wulutu buale kɛ: ‘Mmafoa me kɛ mengyakyi wɔ mengɔ! Maa me nee wɔ ɛhɔ. Ɔluakɛ me nee wɔ yɛkɔ ɛleka mɔɔ ɛlɛkɔ la, yɛɛ mebadɛnla ɛleka mɔɔ ɛkɛdɛnla la. Wɔ menli bayɛ me menli, na wɔ Nyamenle ne ayɛ me Nyamenle. Ɛleka mɔɔ ɛkɛwu la, ɛkɛ ne yɛɛ medame mebawu meala na bɛazie me a.’ Wulutu hanle ɛhye la Nawome andɛ ɔ nloa anu bieko kɛ ɔmaa yeazia.

Awieleɛ kolaa mraalɛ nwiɔ ne radwule Yizilayɛ. Ɛke yɛɛ bɛzokoɛle bɛdɛnlanle a. Ɔluakɛ ɔle aleɛ ɛpɛlɛ mekɛ la ati Wulutu bɔle ɔ bo kɛ ɔyɛ gyima wɔ ɛya ne mɔ anu. Nrenya bie mɔɔ bɛfɛlɛ ye Bowaze la manle ɔhuohuale ma wɔ ye ɛya ne anu. Asoo ɛze Bowaze ɔ nli ɔ? Ye mɔ a le Releehab mɔɔ vi Gyɛleko la.

Kenle ko Bowaze zele Wulutu kɛ: ‘Mede ɛ nwo edwɛkɛ nee kpalɛ mɔɔ wɔyɛ wɔmaa Nawome la kɔsɔɔti. Meze kɛzi wɔgyakyi ɛ ze nee ɛ nli ɛvi wɔ maanle nu wɔra menli mɔɔ ɛnze bɛ la avinli la, amuala. Gyihova ɛlo wɔ molozo!’

Wulutu buale kɛ: ‘Yɛmenle, wɔlo me somaa. Mɔɔ wɔha la ɛmaa me nye ɛlie na me rɛle ɛkyekye bɔkɔɔ.’ Ɛnee Bowaze kulo Wulutu kpalɛ, ɔti yeangyɛ yɛɛ bɛgyale bɛ nwo a. Nea kɛzi ɛhye manle Nawome anye liele a! Noko Nawome anyelielɛ ne yɛle kpole wɔ mekɛ mɔɔ Wulutu nee Bowaze wole bɛ belamunli ralɛ nrenya ne, mɔɔ bɛfɛlɛ ye Obɛde la. Amozii Obɛde rayɛle Devidi mɔɔ yɛbazukoa ɔ nwo debie dɔɔnwo nzinlii la nenya.