ƐHYE bayɛ paladaese anwo nvoninli mɔɔ Nyamenle vale hilele ye ngapezonli Ayezaya la. Ayezaya rale Dwona anzi mekɛ ezinra bie.

Paladaese kile “tola” anzɛɛ “anyelielɛ ɛleka.” Asoo ɔkakye wɔ debie bie mɔɔ yɛlumua yɛnwu ye wɔ buluku ɛhye anu la ɔ? Ɔle kɛ tola kɛnlɛma ne mɔɔ Gyihova Nyamenle vale manle Adam nee Yive la, ɔnle zɔ ɔ? Noko asoo azɛlɛ ye amuala bayɛ paladaese kenlebie?

Gyihova hanle hilele ye ngapezonli Ayezaya kɛ ɔhɛlɛ paladaese fofolɛ ne mɔɔ ɛlɛba mɔɔ Nyamenle menli banyia ye la anwo edwɛkɛ. Ɔhanle kɛ: ‘Bɛdi nee boane badɛnla anzondwolɛ nu. Nlankɛ mralɛ nee awenade mralɛ babɔ nu adidi, na ngakula anlea bɛ nwo zo. Ɛwɔlɛ mɔɔ anwo yɛ ɛzulolɛ la bɔbɔ ɛnrɛyɛ kakula ekyi mɔɔ kɛli nwɔhoa kɛbikye ye la ɛhwee.’

Menli dɔɔnwo baha kɛ: ‘Ɛhye ɛnrɛzi ɛlɛ. Dahuu ngyegyelɛ wɔ azɛlɛ ye azo, na ɔbahɔ zo dahuu.’ Noko dwenle nwolɛ nea: Aako boni a Nyamenle kyekyele manle Adam nee Yive a?

Nyamenle manle Adam nee Yive dɛnlanle paladaese. Ɔluakɛ bɛyɛle anzosesebɛ bɛtiale Nyamenle la ati a bɛ aako kɛnlɛma ne bɔle bɛ, bɛyɛle mgbanyinli na bɛwule a. Nyamenle ɛbɔ ɛwɔkɛ kɛ ɔbava ninyɛne mɔɔ vile Adam nee Yive asa la yeamaa menli mɔɔ kulo ye la.

Wɔ paladaese fofolɛ ne mɔɔ ɛlɛba la anu debie biala ɛnle ɛkɛ ne mɔɔ baboda anzɛɛ bazɛkye awie a. Anzondwolɛ mɔɔ di munli la bara. Menli kɔsɔɔti banyia kpɔkɛdelɛ kpalɛ nee anyelielɛ. Ɔbayɛ kɛ mɔɔ ɛnee Nyamenle kulo kɛ ɔyɛ wɔ mɔlebɛbo ne ala la. Amozii yɛbazukoa kɛzi Nyamenle bayɛ ɛhye la anwo debie.