DEVIDI bɔle ɔ bo kɛ ɔdi tumi wɔ Gyɛlusalɛm la, Gyihova manle ye ɛlɔnema ne lile bɛ agbɔvolɛ nwo zo konim dɔɔnwo. Ɛnee Gyihova ɛbɔ ɛwɔkɛ kɛ ɔbava Keena azɛlɛ ne yeamaa Yizilayɛma. Awieleɛ kolaa, akee, ɔlua Gyihova moalɛ zo, ɛwɔkɛ azɛlɛ ne amuala rayɛle bɛ ɛdeɛ.

Devidi ze maanle bu kpalɛ. Ɔkulo Gyihova. Yemɔti mekɛ mɔɔ ɔhonle ɔvale Gyɛlusalɛm la mɔɔ ɔlumua ɔyɛle la a le kɛ ɔhɔvale Gyihova ngyekyeleɛ ɛlɛka ne ɔrale. Na ɛnee ɔkulo kɛ ɔsi ɛzonlenlɛ sua na ɔfa ɔsie nuhua.

Mɔɔ Devidi yɛle kpanyinli la, ɔyɛle nvonleɛ kpole bie. Ɛnee Devidi ze ye kɛ ɔle ɛtane kɛ ɔkɛva awie debie. Noko kenle ko nɔsolɛ nu, mekɛ mɔɔ ɛnee yevo ye sua ne ati zo la, ɔnwunle raalɛ anwo fɛlɛko bie. Bɛfɛlɛ ye Batehyɛba, na ɔ hu le ye ɛlɔnema ne anu ko mɔɔ bɛfɛlɛ ye Yulaya a.

Devidi hulole Batehyɛba kpole kpalɛ ɔti ɔmanle bɛhɔvale ye bɛrale ye sua nu. Ɛnee ɔ hu ɛhɔ konle. Devidi nee ye lale na nzinlii ɔnwunle kɛ yeva ɛkolɛ. Ɛhye gyegyele Devidi kpalɛ ɔti ɔvale nrɛlaleɛ ɔhɔmanle ye safohyenle Dwowabe kɛ ɔva Yulaya ɔdo konle ne ɛleka mɔɔ ɛyɛ se kpalɛ la amaa bɛahu ye. Mekɛ mɔɔ Yulaya wule la, Devidi gyale Batehyɛba.

Gyihova vale Devidi anwo ɛya kpole. Yemɔti ɔzoanle ye sonvolɛ Neetan kɛ ɔhɔha ye ɛtane ne ɔhile ye. Neetan a nee Devidi ɛlɛtendɛ wɔ ɛkɛ ne la. Devidi nlunle ɔ nwo wɔ mɔɔ ɔyɛle la anwo, yemɔti Gyihova angu ye. Noko Gyihova zele ye kɛ: ‘Ɔluakɛ wɔyɛ ɛtane ɛhye la ati ngyegyelɛ dɔɔnwo bara wɔ aako nu.’ Na amgba nea ngyegyelɛ mɔɔ Devidi yiale ye a!

Mɔɔ lumua la, Batehyɛba ara ne wule. Akee Devidi belamunli ralɛ Amenɔn hyele ɔ diema raalɛ Teemaa mialera nu ɔ nee ye lale. Devidi ara nrenya Abesalɛm vale ɛhye anwo ɛya kpole na ɔhunle Amenɔn. Nzinlii, Abesalɛm nyianle menli dɔɔnwo anyunlu ɛlolɛ, na ɔdaye mumua ne ɔziele ɔ nwo belemgbunli. Awieleɛ kolaa ne, bɛhunle Abesalɛm na Devidi lile konim. Amgba, Devidi yiale ngyegyelɛ dɔɔnwo.

Wɔ mekɛ ɛhye mɔ anu, Batehyɛba wole ralɛ nrenya na bɛdonle ye duma Sɔlɔmɔn. Mekɛ mɔɔ Devidi yɛle kpanyinli na ɔ nwo dole ye la, ɔ ra nrenya Adonaegya bɔle mɔdenle kɛ ɔyɛ ɔ nwo belemgbunli. Yemɔti Devidi manle ɛsɔfo bie mɔɔ bɛfɛlɛ ye Zeedɔko la vale nwole guale Sɔlɔmɔn ati zo mɔɔ kile kɛ Sɔlɔmɔn a bayɛ belemgbunli a. Yeangyɛ yɛɛ Devidi wule a, ɛnee yenyia ɛvolɛ 70. Ɔlile ebia ne ɛvolɛ 40, noko kɛkala Sɔlɔmɔn a le Yizilayɛ belemgbunli a.